¿Ndáaña kivi keʼéyó ña̱ va̱ʼa kusi̱íka-iniyó natúʼunyó xa̱ʼa̱ Ndióxi̱?

1. ¿Ndáaña ndóʼo savana tá kéena predicación? (Koto na̱ʼná).

MIÍYÓ na̱ ndásakáʼnu Jehová nátúʼunyó xíʼin na̱ yiví saáchi kúʼvi̱-iniyó xíniyóra ta saátu kúni̱yó ña̱ kunda̱a̱-inina xa̱ʼa̱ra. Ku̱a̱ʼání na̱ hermano kúsi̱í-inina tá kéena predicación, soo savana kǒo kúsi̱í-inina tá kéena. ¿Nda̱chun ndóʼona ña̱yóʼo? Saáchi savana kúkaʼanní nu̱úna ta ndákanixi̱nína ña̱ kǒo kívi ka̱ʼa̱nna xíʼin inka na̱ yiví. Savana kǒo kúni̱na ku̱ʼu̱nna veʼe na̱ yiví chi kǒo níkananana ña̱ ku̱ʼu̱nna veʼena, ta íyotu na̱ yíʼvi ña̱ kǒo kuniso̱ʼona ña̱ nátúʼunna. Ta savana kǒo kútóona kanitáʼanna á na̱ána xíʼin na̱ yiví. Ndiʼi na̱ hermano yóʼo kúʼvi̱níva-inina xínina Jehová, soo íxayo̱ʼvi̱níña xíʼinna natúʼunna xíʼin na̱ yiví na̱ kǒo xíni̱na. Soo xa̱ʼa̱ ña̱ kúnda̱a̱-inina ña̱ ndáyáʼviní keʼéna chiñu yóʼo kéevana predicación ta kúsi̱íníva-ini Jehová xíʼin ña̱ kéʼéna.

2. ¿Nda̱chun kǒo xíniñúʼu ndakava-iniún tá kǒo kúsi̱í-iniún tá xa̱a̱ kéeún predicación?

² Ta miíún, ¿á kǒo kúsi̱í-iniún tá xa̱a̱ kítaún predicación? Tá saá ndóʼún kǒo ndakava-iniún chi ña̱ kǒo kúni̱ún kúú ña̱ na̱a̱ún xíʼin na̱ yiví ta ña̱yóʼo náʼa̱ña ña̱ vitá íyo iniún. Ni iinyó kǒo kútóo ña̱ kundasína miíyó saáchi ña̱ kúni̱yó kúú ña̱ chindeétáʼanyó xíʼinna. Soo, yiváyó Jehová kúnda̱a̱va-inira xíʼin ña̱ ndóʼoyó ña̱kán kúni̱ra chindeétáʼanra xíʼinyó (Is. 41:13). Nu̱ú artículo yóʼo kotoyó 5 ña̱ʼa ña̱ chindeétáʼan xíʼinyó ña̱ va̱ʼa kusi̱í-iniyó tá xa̱a̱ kéeyó predicación.

TU̱ʼUN NDIÓXI̱ CHINDEÉTÁʼAN XÍʼÚN

3. ¿Ndáaña chi̱ndeétáʼan xíʼin ta̱ Jeremías ña̱ va̱ʼa natúʼunra xíʼin na̱ yiví?

³ Xa̱a̱ ku̱a̱ʼání ku̱i̱ya̱ tu̱ʼun Ndióxi̱ chíndeétáʼanña xíʼin na̱ káchíñu nu̱úra ña̱ keʼéna chiñu ña̱ táxira ndaʼa̱na. Ná ndakanixi̱níyó xa̱ʼa̱ ta̱ profeta Jeremías. Ni̱yi̱ʼvíníra tá ni̱ka̱ʼa̱n Jehová xíʼinra ña̱ ku̱ʼu̱nra natúʼunra xíʼin na̱ yiví, ta ni̱ka̱ʼa̱nra: “Kǒo xínii̱ ndáaña ka̱ʼi̱n iin ta̱ loʼova kúi̱” (Jer. 1:6). ¿Ndáaña ke̱ʼéra tasaá kǒo níyi̱ʼvíkara? Tu̱ʼun Ndióxi̱ ta̱xi ndee̱ ndaʼa̱ra ta ni̱ka̱ʼa̱nra: “Soo, chí níma̱i̱ tu̱ʼunra ni̱xa̱a̱ña ndu̱uña nda̱a̱ táki̱ʼva íyo iin ñuʼu̱ ña̱ xíxi̱ ña̱ ndíkaa̱ ini lekei̱, ta nda̱a̱ ku̱nai̱ ña̱ sásii̱ ña̱yóʼo, kǒo níkundeéka-inii̱ nu̱úña” (Jer. 20:​8, 9). I̱xayo̱ʼvi̱nívaña xíʼin ta̱ Jeremías ña̱ natúʼunra xa̱ʼa̱ Ndióxi̱ chi na̱ yiví kǒo níxiinna kuniso̱ʼonara, soo ña̱ chi̱ndeétáʼan xíʼinra keʼéra chiñu yóʼo kúú tu̱ʼun Ndióxi̱.

4. ¿Ndáaña va̱ʼa ndákiʼinyó tá káʼviyó tu̱ʼun Ndióxi̱ ta ndákanixi̱níyó xa̱ʼa̱ña? (Colosenses 1:​9, 10).

⁴ Saátu miíyó na̱ ndásakáʼnu Jehová tiempo vitin va̱ʼaní chíndeétáʼan tu̱ʼunra xíʼinyó. Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n nu̱ú na̱ Colosenses ni̱ka̱ʼa̱nra xíʼinna ña̱ tu̱ʼun Ndióxi̱ kivi taxiña ndee̱ ndaʼa̱na ta chindeétáʼanña xíʼinna. Ña̱yóʼo ni̱ka̱ʼa̱nra xíʼinna “ña̱ va̱ʼa viíní keʼéndó nda̱a̱ táki̱ʼva kúni̱ mií Jehová, nani ndákundeéndó kéʼéndó ndiʼi ña̱ va̱ʼa” (kaʼvi Colosenses 1:​9, 10). Tá xa̱a̱ nátúʼunyó xíʼin na̱ yiví xa̱ʼa̱ Ndióxi̱ saá kúú ña̱ kéʼéyó ña̱ va̱ʼa. Tá xa̱a̱ káʼviyó tu̱ʼun Ndióxi̱ ta ndákanixi̱níyó xa̱ʼa̱ña saá kúú ña̱ xáa̱yó kándíxakayó Jehová. Tasaá kúnda̱a̱-iniyó nda̱chun kúú ña̱ ndáyáʼviní ña̱ natúʼunyó xíʼin na̱ yiví xa̱ʼa̱ra.

5. ¿Ndáaña chindeétáʼan xíʼinyó ña̱ va̱ʼa kunda̱a̱-iniyó xíʼin ña̱ káʼa̱n tu̱ʼun Ndióxi̱?

⁵ Ña̱ va̱ʼa sakúaʼakayó xa̱ʼa̱ ña̱ káʼa̱n tu̱ʼun Ndióxi̱ kǒo xíniñúʼu kamaní kaʼviyóña chi xíniñúʼu taváyó tiempo ña̱ vií kaʼviyóña ta saátu ña̱ ndakanixi̱níyó xa̱ʼa̱ña. ¿Ndáaña kivi keʼún tá nda̱ni̱ʼún iin texto ña̱ kǒo kúnda̱a̱-iniún xíʼin? Ña̱ kivi keʼún kúú ña̱ nandukún xa̱ʼa̱ ña̱yóʼo nu̱ú Índice de las publicaciones Watch Tower á nu̱ú ña̱ Guía de estudio para los testigos de Jehová. Tá táváún tiempo ña̱ nandukún xa̱ʼa̱ ña̱ káʼviún saá kúú ña̱ kandíxakaún ña̱ káʼa̱n tu̱ʼun Ndióxi̱ (1 Tes. 5:21). Ta xa̱ʼa̱ ña̱ kándíxakaún ña̱ káʼa̱n Biblia saá kúú ña̱ kusi̱íníka-iniún ña̱ ka̱ʼún xíʼin inka na̱ yiví xa̱ʼa̱ ña̱ kándíxaún.

VIÍNÍ KAʼVIÚN XA̱ʼA̱ ÑA̱ NATÚʼÚN XÍʼIN NA̱ YIVÍ

6. ¿Nda̱chun xíniñúʼu kaʼvi kúeeyó tá kúma̱níka ku̱ʼu̱nyó predicación?

⁶ Tá xa̱a̱ ya̱chi̱ka káʼviún ña̱ kúni̱ún natúʼún xíʼin na̱ yiví saá kǒo yi̱ʼvíún ña̱ natúʼún xíʼinna. Siʼna sa̱náʼa̱ ta̱ Jesús na̱ discípulora tasaá ni̱ka̱ʼa̱nra xíʼinna ña̱ ku̱ʼu̱nna natúʼunna xíʼin na̱ yiví (Luc. 10:​1-11). Ta xa̱ʼa̱ ña̱ ke̱ʼéna ña̱ ni̱ka̱ʼa̱n ta̱ Jesús xíʼinna ni̱kusi̱íní-inina chi va̱ʼaní xi̱niso̱ʼo na̱ yiví ña̱ na̱túʼunna (Luc. 10:17).

7. ¿Ndáaña kivi keʼéyó ña̱ va̱ʼa koo tu̱ʼvayó tá xa̱a̱ ku̱a̱ʼa̱nyó predicación? (Koto na̱ʼná).

⁷ ¿Ndáaña kivi keʼéyó ña̱ va̱ʼa koo tu̱ʼvayó tá xa̱a̱ ku̱a̱ʼa̱nyó predicación? Xíniñúʼu ndakanixi̱níyó ndáa ki̱ʼva ka̱ʼa̱nyó xíʼin na̱ yiví xa̱ʼa̱ Ndióxi̱. Ta ná ndakanixi̱níyó ndáaña kivi ka̱ʼa̱n na̱ yiví xíʼinyó ña̱ va̱ʼa ndakuiinyó yuʼúna, ta ña̱yóʼo chindeétáʼanña xíʼinyó ña̱ kusi̱í-iniyó ka̱ʼa̱nyó xíʼinna tá xa̱a̱ ndáka̱tu̱ʼunna miíyó.

8. ¿Ndáa ki̱ʼva kítáʼanyó xíʼin ki̱si ñuʼú?

⁸ Ta̱ apóstol Pablo xi̱niñúʼura iin ejemplo ña̱ va̱ʼa na̱ʼa̱ra nu̱úyó ndáaña kéʼéyó tá ku̱a̱ʼa̱nyó predicación, ña̱yóʼo ni̱ka̱ʼa̱nra: “Ña̱ ndáyáʼviní ña̱ kúúmiíndi̱ ndíkaa̱ña ini iin ki̱si ñuʼú” (2 Cor. 4:7). Soo, ¿ndáaña kúú ña̱ ndáyáʼviní yóʼo? Ña̱yóʼo kúú tu̱ʼun va̱ʼa ña̱ nátúʼunyó xa̱ʼa̱ reino Ndióxi̱ ta ña̱yóʼo chíndeétáʼanña xíʼin na̱ yiví ña̱ ka̱kuna (2 Cor. 4:1). Ta, ¿ndáaña ndánaʼa̱ ki̱si ñuʼú? Ña̱yóʼo ndánaʼa̱ña ndiʼi miíyó na̱ xíka nátúʼun xa̱ʼa̱ Ndióxi̱. Tá tiempo ña̱ ni̱xi̱yo ta̱ apóstol Pablo, na̱ yiví na̱ xi̱sikó xi̱taanna ña̱ʼa ini ki̱si ñuʼú ña̱ va̱ʼa ku̱ʼu̱nña xíʼinna inka ñuu, tá kúú xu̱ʼún, comida xíʼin vino. Saátu tiempo vitin Jehová ta̱xira iin chiñu ña̱ ndáyáʼviní ndaʼa̱yó, ña̱ ku̱ʼu̱nyó natúʼunyó xa̱ʼa̱ra xíʼin na̱ yiví. Miíra chíndeétáʼan xíʼinyó ña̱ va̱ʼa keʼéyó chiñu yóʼo.

KA̱ʼA̱N XÍʼIN NDIÓXI̱ ÑA̱ NDASANDAKÚRA-INIÚN

9. ¿Ndáaña kivi keʼéyó tasaá kǒo yi̱ʼvíkayó kuniyó na̱ yiví? (Koto na̱ʼná).

⁹ Sava yichi̱ yíʼviyó xíniyó na̱ yiví chi ndákanixi̱níyó ña̱ kundasína kunina miíyó. ¿Ndáaña kivi chindeé miíyó? Ná ndakanixi̱níyó ndáaña ni̱ka̱ʼa̱n na̱ apóstol xíʼin Ndióxi̱ tá ni̱ka̱ʼa̱n na̱ yiví xíʼinna ña̱ kǒo natúʼunkana xa̱ʼa̱ra. Nu̱úka ña̱ yi̱ʼvína kunina na̱ yiví, ni̱ka̱ʼa̱nna xíʼin Jehová ña̱ ná chindeétáʼanra xíʼinna ña̱ ndakú koo inina natúʼunna xa̱ʼa̱ra. Ta ndi̱ku̱n kama chi̱ndeétáʼanra xíʼinna (Hech. 4:​18, 29, 31). Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ kuʼvi̱ka-iniyó kuniyó na̱ yiví tasaá kǒo yi̱ʼvíkayó ña̱ natúʼunyó xíʼinna.

10. ¿Ndáaña kivi chindeétáʼan xíʼinyó ña̱ va̱ʼa natúʼunyó xíʼin na̱ yiví?

¹⁰ Jehová nda̱kaxinra miíyó ña̱ kooyó testigora (kaʼvi Isaías 43:​10-12).a Ta káʼa̱nra ña̱ chindeétáʼanra xíʼinyó ña̱ ndakú koo iniyó. Ná ka̱ʼa̱nyó xa̱ʼa̱ ku̱mí ki̱ʼva ña̱ chíndeétáʼanra xíʼinyó. Ña̱ nu̱ú, ta̱ Jesús íyora xíʼinyó tá nátúʼunyó xíʼin na̱ yiví (Mat. 28:​18-20). Ña̱ u̱vi̱, Jehová ta̱xira chiñu ndaʼa̱ na̱ ángel ña̱ chindeétáʼanna xíʼinyó (Apoc. 14:6). Ña̱ u̱ni̱, Jehová táxira espíritu santora ndaʼa̱yó ta ña̱yóʼo chíndeétáʼanña xíʼinyó ña̱ ndakaʼányó xa̱ʼa̱ ña̱ xa̱a̱ sa̱kúaʼayó (Juan 14:​25, 26). Ña̱ ku̱mí, Jehová xíniñúʼura na̱ hermano ña̱ va̱ʼa keena xíʼinyó predicación. Jehová xíʼin na̱ ñuura chíndeétáʼanna xíʼinyó ña̱ kǒo yi̱ʼvíkayó natúʼunyó xa̱ʼa̱ra xíʼin na̱ yiví.

NATÚʼUN XÍʼIN NA̱ YIVÍ HORA ÑA̱ KIVI NDANI̱ʼÚNNA

11. ¿Ndáaña kivi keʼún ña̱ va̱ʼa natúʼún xíʼin ku̱a̱ʼá na̱ yiví xa̱ʼa̱ Ndióxi̱? (Koto na̱ʼná).

¹¹ ¿Á ndákava-iniún tá kǒo na̱ yiví ndáni̱ʼún tá ku̱a̱ʼún veʼena? Iin ña̱ kivi keʼún kúú ña̱ ndakanixi̱níún ndáa míí ñúʼuna hora kán, á na̱ ku̱a̱ʼa̱n kachíñu kúúna á na̱ ku̱a̱ʼa̱n satá kúúna (Hech. 16:13). Tá kǒona ndáni̱ʼún kivi ku̱ʼu̱n chí calle ña̱ nandukún na̱ natúʼún xíʼin. Iin ta̱ hermano ta̱ naní Joshua káʼa̱nra ña̱yóʼo: “Iin ña̱ va̱ʼaní chíndeétáʼan xíʼi̱n kúú ña̱ nandukúi̱ na̱ yiví chí nu̱ú ya̱ʼvi á chí estacionamiento”. Miíra xíʼin ñá síʼíra Bridget va̱ʼaní ndáni̱ʼína na̱ yiví veʼena tá xi̱kuaá á saátu ki̱vi̱ domingo xi̱kuaá (Efes. 5:​15, 16).

12. ¿Ndáaña keʼún ña̱ va̱ʼa kunda̱a̱-iniún ndáaña kándíxa na̱ yiví á ndáaña kúni̱na kunda̱a̱-inina xa̱ʼa̱?

¹² Tá xítoyó ña̱ kǒo xíín na̱ yiví kuniso̱ʼona ña̱ káʼa̱nyó xíʼinna ná ndakanixi̱níyó ndáaña sándi̱ʼi̱-inina á ndáaña kándíxana. Ta̱ Joshua xíʼin ñá Bridget xíniñúʼuna pregunta ña̱ va̱xi nu̱ú tratado ña̱ kúúmiíyó ña̱ va̱ʼa kixáʼana natúʼunna xíʼin na̱ yiví. Ña̱yóʼo káʼa̱n ta̱ Joshua xíʼin ñá Bridget tá táxina tratado ña̱ naní ¿Ndáaña ndákanixi̱níún xa̱ʼa Biblia?, “sava na̱ yiví ndákanixi̱nína ña̱ mií Ndióxi̱ ni̱ka̱ʼa̱n ña̱ va̱xi nu̱ú Biblia ta savana kǒo kándíxana ña̱yóʼo. Ta, ¿yóʼó ndáaña ndákanixi̱níún?”. Xa̱ʼa̱ ña̱ kéʼéna ña̱yóʼo xa̱a̱ ku̱a̱ʼání na̱ yiví nátúʼunna xíʼin xa̱ʼa̱ Ndióxi̱.

13. ¿Nda̱chun kǒo xíniñúʼu sandákooyó ña̱ natúʼunyó xíʼin na̱ yiví ni tá kǒo xíínna kuniso̱ʼona ña̱ nátúʼunyó? (Proverbios 27:11).

¹³ Ni tá kǒo xíín na̱ yiví kuniso̱ʼona tá nátúʼunyó xíʼinna, soo xa̱a̱ sáxi̱nuvayó chiñu ña̱ nda̱kiʼinyó. ¿Nda̱chun? Saáchi ña̱ ndáyáʼvika nu̱ú Jehová xíʼin ta̱ Jesús kúú ña̱ natúʼunyó xíʼin na̱ yiví (Hech. 10:42). Ña̱kán ná kǒo kundi̱ʼi̱-iniyó tá kǒo kívi ka̱ʼa̱nyó xíʼin ni iin na̱ yiví á tá kǒo xíínna kuniso̱ʼona miíyó. Va̱ʼaka ná kusi̱í-iniyó chi xíʼin ña̱ kéʼéyó sákusi̱íyó-ini yiváyó Jehová (kaʼvi Proverbios 27:11).b

14. ¿Ndáa ki̱ʼva kúniyó tá iin na̱ hermano ndáni̱ʼína iin na̱ yiví na̱ va̱ʼaní xíniso̱ʼo xa̱ʼa̱ Ndióxi̱, ta nda̱chun?

¹⁴ Saátu kivi kusi̱í-iniyó tá iin na̱ hermano ndáni̱ʼína iin na̱ yiví na̱ va̱ʼaní xíniso̱ʼo tá nátúʼunna xíʼinna xa̱ʼa̱ Ndióxi̱. Tutu Ña̱ Nátúʼun xíʼinyó chítáʼanña chiñu ña̱ kéʼéyó xíʼin ña̱ nándukúna iin ta̱ loʼo ta̱ nda̱ñúʼu. Ku̱a̱ʼání na̱ yiví nándukúnara soo xa̱a̱ síín síín lugar nándukúnara, tá xa̱a̱ nda̱ni̱ʼínara ndiʼina kúsi̱í-ini. Saátu miíyó ku̱a̱ʼáníyó kée ña̱ ku̱a̱ʼa̱nyó nátúʼunyó xíʼin na̱ yiví xa̱ʼa̱ Ndióxi̱ ta ku̱a̱ʼání ñuu xáʼa̱nyó nátúʼunyó xíʼinna. Ta ndiʼiyó kúsi̱í-ini tá iin na̱ yiví kíxáʼana xáʼa̱nna reunión.

KUʼVI̱-INIÚN KUNIÚN JEHOVÁ XÍʼIN NA̱ YIVÍ

15. ¿Ndáaña chindeétáʼan xíʼinyó ña̱ kusi̱í-iniyó natúʼunyó xíʼin na̱ yiví xa̱ʼa̱ Ndióxi̱? (Mateo 22:​37-39; koto na̱ʼná).

¹⁵ Kusi̱íka-iniyó keeyó predicación tá ná kuʼvi̱ka-iniyó kuniyó Jehová xíʼin na̱ yiví (kaʼvi Mateo 22:​37-39). Kúsi̱íní-ini Jehová tá xítora ña̱ nátúʼunyó xa̱ʼa̱ra xíʼin na̱ yiví ta saátu kúsi̱íní-ini na̱ yiví tá sákuaʼana xa̱ʼa̱ra. Ta ná ndakaʼányó chi ndiʼi na̱ sákuaʼa xa̱ʼa̱ Jehová ka̱kuna (Juan 6:40; 1 Tim. 4:16).

16. ¿Ndáaña chindeétáʼan xíʼinyó ña̱ kusi̱í-iniyó natúʼunyó xa̱ʼa̱ Ndióxi̱ ni kǒo kívi keeyó veʼeyó? Ka̱ʼa̱n xa̱ʼa̱ iin ejemplo.

¹⁶ Soo, ¿ndáaña kivi keʼún tá kǒo kívi keeún natúʼún xíʼin na̱ yiví xa̱ʼa̱ Ndióxi̱? Ndakanixi̱ní ndáaña kivi keʼún ña̱ va̱ʼa na̱ʼún ña̱ kúʼvi̱-iniún xíniún Jehová xíʼin na̱ yiví. Tá xi̱ndikaa̱ COVID-19, ta̱ Samuel xíʼin ñá Dania kǒo níkivi keena veʼena, ña̱kán tiempo saá xi̱natúʼunna xíʼin na̱ yiví xíʼin teléfono, xi̱kaʼyína carta ta saátu xi̱xiniñúʼuna Zoom tá xi̱kaʼvína xíʼinna. Xi̱natúʼuntu ta̱ Samuel xíʼin na̱ xi̱kachíñu clínica nu̱ú xi̱xaʼa̱nra xi̱kutátánra xa̱ʼa̱ ña̱ kúúmiíra ku̱e̱ʼe̱ cáncer. Ta̱yóʼo káchira: “Ndiʼi tu̱ndóʼo ña̱ kúúmiíyó sákunaáníña miíyó, sándakavaníña-iniyó ta kǒoka ndee̱ kúúmiíyó ña̱ ndasakáʼnuyó Ndióxi̱. Soo tá xa̱a̱ káchíñuyó nu̱ú Jehová kúsi̱íní-iniyó, ña̱kán ni̱ka̱ʼa̱nndi̱ xíʼinra ña̱ chindeétáʼanra xíʼinndi̱ ña̱ va̱ʼa kusi̱í-inindi̱”. Soo saátu ñá Dania nda̱kavañá ta kǒo níkivika kakañá chi nda̱saa nu̱ú cama kuití xi̱nduʼuña u̱ni̱ yo̱o̱. Ta tándi̱ʼi, i̱ñu̱ yo̱o̱ xi̱niñúʼu kuniñúʼuñá silla de ruedas. Ñáyóʼo káchiñá: “Chi̱kaa̱i̱ ndee̱ ña̱ natúʼi̱n xíʼin na̱ yiví xa̱ʼa̱ Ndióxi̱ ni ndo̱ʼi̱ ña̱yóʼo, tá kúú na̱túʼi̱n xíʼin ñá enfermera ñá xi̱xaʼa̱n xi̱xito yi̱ʼi̱ ta saátu xíʼin na̱ yiví na̱ xi̱kixi xi̱ndaka ña̱ʼa veʼendi̱. Saátu ku̱a̱ʼá yichi̱ na̱túʼi̱n xíʼin iin ñaʼá ñá xi̱kachíñu iin empresa nu̱ú síkona ña̱ʼa ña̱ xíniñúʼu na̱ ndeéndóʼo á na̱ kíʼvi̱”. Kǒo níxi̱kuchiñu keʼé ta̱ Samuel xíʼin ñá Dania ku̱a̱ʼání ña̱ʼa, soo xi̱chikaa̱vana ndee̱ ña̱ natúʼunna xa̱ʼa̱ Ndióxi̱ ta xa̱ʼa̱ ña̱yóʼo xi̱kusi̱íní-inina.

17. ¿Ama kúú ña̱ va̱ʼaníka chindeétáʼan ña̱ va̱xi nu̱ú artículo yóʼo xíʼinyó?

¹⁷ Tá ná kuniñúʼuyó ndiʼi ña̱ sa̱kúaʼayó nu̱ú artículo yóʼo va̱ʼaníka chindeétáʼanña xíʼinyó. Iin tá iin ña̱yóʼo íyoña nda̱a̱ táki̱ʼva íyo iin receta ña̱ xíniñúʼuyó tá kéʼéyó comida. Tá chítáʼanyó ndiʼi ña̱ xíniñúʼu ku̱ʼu̱n xíʼin iin comida saá kúúña ya̱si̱nní kánaña. Ña̱kán tá kéʼéyó ndiʼi ña̱ sa̱kúaʼayó nu̱ú artículo yóʼo saá kusi̱íní-iniyó ña̱ keeyó predicación ta kǒo ndakava-iniyó.