ARTÍCULO ÑA KAʼVIYÓ 33
YAA 130 Ná sakuaʼayó ixakáʼnu-iniyó
¿Ndáaña kúni̱ Jehová ná keʼé na̱ ñúʼu ti̱xin congregación xíʼin na̱ ni̱ki̱ʼvi iin ku̱a̱chi ndeé?
“Tá íyo iin ndóʼó ni̱ki̱ʼvi ku̱a̱chi, íyo iin ta̱ chíndeétáʼan xíʼinyó” (1 JUAN 2:1).
TEMA
Yóʼo sakúaʼayó ndáaña ku̱u ti̱xin congregación ña̱ Corinto tá nda̱tiinna ku̱a̱chi xíʼin iin ta̱a ta̱ ni̱ki̱ʼvi iin ku̱a̱chi ña̱ ndeéní.
1. ¿Ndáaña kúni̱ Jehová ná keʼéyó?
JEHOVÁ táxira ná nda̱kaxin miíyó ndáaña kúni̱yó keʼéyó, ta ndiʼi ki̱vi̱ kéʼéyó ña̱yóʼo. Soo iin ña̱ ndáyáʼvika kéʼéyó kúú ña̱ ndátaxiyó miíyó ndaʼa̱ Jehová ta inkáchi ndásakáʼnuyóra xíʼin na̱ hermano. Ña̱yóʼo kúú ña̱ kúni̱ Jehová, ña̱ ndiʼina ná ndataxina miína ndaʼa̱ra, saáchi kúʼvi̱-inira xínira na̱ yiví ta kúni̱ra ña̱ va̱ʼaní ná kundoona. Kúni̱ra ná kutáʼanna xíʼinra ta ná kutakuna ndiʼi tiempo (Deut. 30:19, 20; Gál. 6:7, 8).
2. ¿Ndáaña kúni̱ Jehová ná keʼé na̱ ni̱ki̱ʼvi iin ku̱a̱chi ña̱ ndeéní ta ta̱ʼán ndandikó-inina? (1 Juan 2:1).
2 Jehová va̱ása íxandúxara xíʼin nda̱a̱ ni iinna ña̱ ndasakáʼnunara chi ña̱ kúni̱ra kúú ña̱ miína ná ndaka̱xin ndáaña keʼéna, soo ¿ndáaña kúu tá iin na̱ xa̱a̱ nda̱kuchi ni̱ki̱ʼvina iin ku̱a̱chi ña̱ ndeéní? Tá va̱ása ndándikó-inina, xíniñúʼu tavánana ti̱xin congregación (1 Cor. 5:13). Soo ni ná tavána na̱yóʼo ti̱xin congregación, Jehová kúni̱níra ña̱ ná ndikó tukuna nu̱úra, xa̱ʼa̱ ña̱kán kúú ña̱ ta̱xira se̱ʼera ña̱ ni̱xi̱ʼi̱ra xa̱ʼa̱yó ña̱ va̱ʼa ixakáʼnu-inira xa̱ʼa̱ na̱ kíʼvi ku̱a̱chi tá ndándikó-inina (kaʼvi 1 Juan 2:1). Va̱ʼaní-ini Jehová, xa̱ʼa̱ ña̱kán chíndeétáʼanra xíʼin na̱ kíʼvi ku̱a̱chi ña̱ ndandikó-inina (Zac. 1:3; Rom. 2:4; Sant. 4:8).
3. ¿Ndáaña sakúaʼayó nu̱ú artículo yóʼo?
3 Jehová káʼa̱nra xíʼinyó ndáaña ndákanixi̱níra xa̱ʼa̱ ku̱a̱chi ña̱ kíʼviyó ta saátu ndáaña ndákanixi̱níra xa̱ʼa̱ na̱ kíʼvi iin ku̱a̱chi ña̱ ndeéní, ta kúni̱ra ná ndakanixi̱níyó nda̱a̱ táki̱ʼva ndákanixi̱ní miíra. Nu̱ú artículo yóʼo sakúaʼayó ndáa ki̱ʼva keʼéyó ña̱yóʼo. Siʼna sakúaʼayó ndáa ki̱ʼva nda̱tiinna ku̱a̱chi xíʼin iin ta̱a ta̱ ni̱ki̱ʼvi iin ku̱a̱chi ña̱ ndeéní ta̱ xi̱ndikaa̱ ti̱xin congregación ña̱ Corinto. Saátu sakúaʼayó ndáaña ni̱ka̱ʼa̱n ta̱ apóstol Pablo xíʼin na̱ congregación keʼéna xíʼin ta̱ ta̱a yóʼo tá nda̱ndikó-inira. Ta so̱ndíʼi sakúaʼayó ndáaña ndákanixi̱ní Jehová xa̱ʼa̱ na̱ kíʼvi iin ku̱a̱chi ña̱ ndeéní.
¿NDÁA KI̱ʼVA NDA̱TIINNA KU̱A̱CHI XÍʼIN IIN TA̱ NI̱KI̱ʼVI IIN KU̱A̱CHI ÑA̱ NDEÉNÍ TÁ SIGLO NU̱Ú?
4. ¿Ndáaña xi̱kuu ti̱xin congregación ña̱ Corinto? (1 Corintios 5:1, 2).
4 (Kaʼvi 1 Corintios 5:1, 2). Tá sa̱kán ki̱xáʼa íyo congregación ña̱ Corinto, ta̱ Pablo ku̱ndaa̱-inira xa̱ʼa̱ iin ku̱a̱chi ndeé ña̱ ku̱u ti̱xin congregación kán: iin ta̱a xi̱kisi̱ra xíʼin siʼí ndáʼvira. Ta̱ Pablo ni̱ka̱ʼa̱nra ña̱ ndeéní ku̱a̱chi ni̱ki̱ʼvi ta̱ ta̱a yóʼo saáchi nda̱a̱ na̱ va̱ása kándíxa Ndióxi̱ kǒo kéʼéna ña̱yóʼo. Su̱ví ku̱a̱chi ndeéví níxi̱kuu ña̱yóʼo nu̱ú na̱ congregación ña̱kán va̱ása nítavánara ti̱xin congregación ta sana xi̱ndakanixi̱nína ña̱ va̱ʼava ña̱ xi̱keʼéna xíʼinra. Sana nda̱kanixi̱nína ña̱ saá xi̱naʼa̱na ña̱ kúndáʼvi-inina xínina ta̱ ta̱a yóʼo nda̱a̱ táki̱ʼva kéʼé mií Jehová chi kúndáʼvi-inira xínira na̱ yiví ku̱a̱chi, soo va̱ása táxi Jehová koo na̱ kíʼvi ku̱a̱chi ti̱xin ñuura. Xa̱ʼa̱ ña̱ kini ña̱ xi̱keʼé ta̱ ta̱a yóʼo sava na̱ yiví na̱ kǒo níxindasakáʼnu Ndióxi̱ ki̱xáʼana káʼa̱nna ña̱ va̱ása va̱ʼa xa̱ʼa̱ Jehová, ta saátu tá ná kundikaa̱ka ta̱ ta̱a yóʼo ti̱xin congregación nda̱a̱ inkana kivi kixáʼa keʼé táʼan ña̱ kéʼéra. Tá saá, ¿ndáaña ni̱ka̱ʼa̱n ta̱ Pablo xíʼin na̱ congregación keʼéna?
5. ¿Ndáaña ni̱ka̱ʼa̱n ta̱ Pablo xíʼin na̱ congregación keʼéna, ta ndáaña xi̱kuni̱ kachira xíʼin ña̱yóʼo? (1 Corintios 5:13; koto na̱ʼná).
5 (Kaʼvi 1 Corintios 5:13). Ta̱ Pablo ka̱ʼyira iin carta ku̱a̱ʼa̱n nu̱ú na̱ congregación ta ni̱ka̱ʼa̱nra xíʼinna ña̱ xíniñúʼu tavána ta̱a ta̱ ni̱ki̱ʼvi ku̱a̱chi chi kǒo níndandikó-inira. ¿Ndáaña xi̱niñúʼu keʼé na̱ hermano xíʼin ta̱ ta̱a yóʼo? Ta̱ Pablo ni̱ka̱ʼa̱nra xíʼinna ña̱ ná va̱ása kutáʼanna xíʼin ta̱ ta̱a yóʼo ta ni ná va̱ása kuxuna xíʼinra (1 Cor. 5:11). Saáchi tá xíxiyó xíʼin iin na̱ yiví kíxáʼayó nátúʼunyó xíʼinna, ta loʼo tá loʼo kíxáʼayó ku̱a̱ʼáka tiempo kítáʼanyó xíʼinna. Ña̱kán ña̱ xi̱kuni̱ kachi ta̱ Pablo xíʼin na̱ hermano kán kúú ña̱ ná va̱ása kutáʼankana xíʼin ta̱ ta̱a yóʼo chi saá kúú ña̱ va̱ása kixáʼa na̱ congregación keʼéna ña̱ va̱ása va̱ʼa (1 Cor. 5:5-7). Saátu ña̱yóʼo chindeétáʼanña xíʼin ta̱ ta̱a yóʼo ña̱ kiʼinra kuenta ña̱ kininí íyo ña̱ ke̱ʼéra nu̱ú Jehová, ña̱ kukaʼan nu̱úra xa̱ʼa̱ ña̱ ke̱ʼéra ta sana ña̱yóʼo chindeétáʼanña xíʼinra ña̱ ndikó-inira.
Jehová xi̱niñúʼura ta̱ Pablo ña̱ va̱ʼa kaʼyira iin carta ku̱ʼu̱n ndaʼa̱ na̱ congregación ña̱ Corinto ta nu̱ú ña̱yóʼo ni̱ka̱ʼa̱nra xíʼinna ná tavána ta̱ ta̱a ta̱ ni̱ki̱ʼvi ku̱a̱chi chi kǒo níndandikó-inira. (Koto párrafo 5).
6. ¿Ndáa ki̱ʼva chi̱ndeétáʼan carta ta̱ Pablo xíʼin na̱ congregación ta saátu xíʼin ta̱ ni̱ki̱ʼvi ku̱a̱chi?
6 Tá chi̱ndaʼá ta̱ Pablo carta ku̱a̱ʼa̱n nu̱ú na̱ congregación ña̱ Corinto sana nda̱kanixi̱níra ndáaña keʼé na̱ hermano kán. Tá ni̱ya̱ʼa loʼo tiempo, ta̱ Tito na̱túʼunra xíʼinra ña̱ va̱ʼaníva xi̱ndiku̱n na̱ hermano kán ña̱ ni̱ka̱ʼa̱n ta̱ Pablo xíʼinna ta ta̱vána ta̱ ta̱a ta̱ ni̱ki̱ʼvi ku̱a̱chi ti̱xin congregación (2 Cor. 7:6, 7). Ta saátu tá ni̱ya̱ʼa loʼo tiempo ña̱ chi̱ndaʼá ta̱ Pablo carta yóʼo xa̱a̱ nda̱ndikóva-ini ta̱ ta̱a yóʼo, na̱samara ña̱ xi̱keʼéra ta ki̱xáʼara ndíku̱nra ña̱ káʼa̱n Jehová (2 Cor. 7:8-11). ¿Ndáaña ni̱ka̱ʼa̱n ta̱ Pablo xíʼin na̱ congregación keʼéna?
¿NDÁAÑA XI̱NIÑÚʼU KEʼÉ NA̱ CONGREGACIÓN XÍʼIN TA̱A TA̱ NDA̱NDIKÓ-INI?
7. ¿Ndáaña ke̱ʼé ta̱ ni̱ki̱ʼvi ku̱a̱chi tá ta̱vánara ti̱xin congregación? (2 Corintios 2:5-8).
7 (Kaʼvi 2 Corintios 2:5-8). Ta̱ Pablo ka̱chira: “Xíʼin ña̱ ke̱ʼéndó xíʼin ta̱ ta̱a yóʼo, xa̱a̱ cha̱ʼvivara xa̱ʼa̱ ku̱a̱chi ña̱ ni̱ki̱ʼvira”. Ña̱kán tá ta̱vána ta̱yóʼo ti̱xin congregación chi̱ndeétáʼanvaña xíʼinra, saáchi ku̱ndaa̱-inira ña̱ xi̱niñúʼu ndandikó-inira xa̱ʼa̱ ku̱a̱chira ta xa̱ʼa̱ ña̱ ke̱ʼéra ña̱yóʼo xi̱niñúʼu ndakiʼin tukunara (Heb. 12:11).
8. ¿Ndáaña ni̱ka̱ʼa̱n ta̱ Pablo xíʼin na̱ congregación keʼéna?
8 Ta̱ Pablo ni̱ka̱ʼa̱nra xíʼin na̱ hermano ndáaña xi̱niñúʼu keʼéna xíʼin ta̱ ta̱a ta̱ nda̱ndikó-ini, ka̱chira xíʼinna: “Xíniñúʼu koo káʼnu-inindó xa̱ʼa̱ra ta sandíkondó-inira” ta ni̱ka̱ʼa̱nra xíʼinna ña̱ ná na̱ʼa̱na ña̱ kúʼvi̱-inina xíninara. Va̱ása níka̱ʼa̱n kuití ta̱ Pablo xíʼinna ña̱ ná taxina ndikóra congregación chi ni̱ka̱ʼa̱nra xíʼinna ña̱ ná na̱ʼa̱na xíʼin ña̱ kéʼéna ta saátu xíʼin tu̱ʼun ña̱ káʼa̱nna ña̱ i̱xakáʼnu-inina xa̱ʼa̱ra ta kúni̱na xíninara. Tá saá ná keʼéna, ta̱ ta̱a yóʼo kiʼinra kuenta ña̱ kúsi̱í-ini na̱ hermano ña̱ ndi̱kóra.
9. ¿Nda̱chun i̱xayo̱ʼvi̱ña xíʼin savana ña̱ ixakáʼnu-inina xa̱ʼa̱ ta̱a ta̱ nda̱ndikó-ini?
9 ¿Á i̱xayo̱ʼvi̱ña xíʼin sava na̱ hermano ña̱ ndakiʼin tukuna ta̱ ta̱a ta̱ nda̱ndikó-ini xa̱ʼa̱ ku̱a̱chi ña̱ ni̱ki̱ʼvira? Va̱ása káʼa̱nví tu̱ʼun Ndióxi̱ xa̱ʼa̱ ña̱yóʼo soo sana saá ku̱uva. Sana xi̱saa̱ka sava na̱ hermano saáchi sana ka̱ku ku̱a̱chi ti̱xin congregación xa̱ʼa̱ ña̱ ke̱ʼéra á sanatu ke̱ʼéra ña̱ va̱ása va̱ʼa xíʼin inkana ta xa̱ʼa̱ ña̱kán nda̱kava-inina. Saátu sava na̱ xi̱ñuʼu ti̱xin congregación nda̱kanixi̱nína ña̱ su̱ví ña̱ va̱ʼa kúú ña̱ ndi̱kó tuku ta̱ ta̱a kán ti̱xin congregación chi kininí ni̱xi̱yo ña̱ ke̱ʼéra ta miína xi̱chikaa̱nína ndee̱ ña̱ kundiku̱nna ña̱ káʼa̱n Jehová (chitáʼanña xíʼin Lucas 15:28-30). ¿Soo nda̱chun xi̱niñúʼu na̱ʼa̱na ña̱ kúʼvi̱-inina xínina ta̱ ta̱a ta̱ nda̱ndikó-ini xa̱ʼa̱ ku̱a̱chi ña̱ ni̱ki̱ʼvira?
10, 11. ¿Ndáaña kuu tá kǒo ní ixakáʼnu-ini na̱ anciano xa̱ʼa̱ ta̱a ta̱ nda̱ndikó-ini?
10 ¿Ndáa ki̱ʼva kuni ta̱ ta̱a yóʼo tá na̱ anciano va̱ása níchindeétáʼanna xíʼinra ña̱ ndikóra ti̱xin congregación tá xa̱a̱ nda̱ndikó-inira xa̱ʼa̱ ku̱a̱chi ña̱ ni̱ki̱ʼvira? ¿Á ndáa ki̱ʼva kunira tá va̱ása náʼa̱ na̱ hermano ña̱ kúʼvi̱-inina xíninara? Ta̱ ta̱a kán sana kundi̱ʼiní-inira xa̱ʼa̱ ña̱ kúsuchíní-inira, sana ndakanixi̱níra ña̱ va̱ása kivika ndikóra kachíñura nu̱ú Jehová. Nda̱a̱ kivi ndakanixi̱níra ña̱ va̱ása ixakáʼnu-ini Jehová xa̱ʼa̱ra ña̱kán va̱ása chikaa̱ra ndee̱ ña̱ nasamara.
11 Saátu tá ná va̱ása ixakáʼnu-ini na̱ congregación xa̱ʼa̱ ta̱a ta̱ ni̱ki̱ʼvi ku̱a̱chi, va̱ása viíka kutáʼanna xíʼin Jehová ta na̱ʼa̱na ña̱ ndíku̱nna yichi̱ ta̱ Ndi̱va̱ʼa ta̱ va̱ása kúndáʼvi-ini xíni inkana ta va̱ása na̱ʼa̱na ña̱ ndíku̱nna yichi̱ Jehová, chi Jehová íxakáʼnu-inira xa̱ʼa̱ na̱ kíʼvi ku̱a̱chi tá ndándikó-inina. Tá ná va̱ása ixakáʼnu-inina xa̱ʼa̱ ta̱ ta̱a yóʼo saá kúú ña̱ kuniñúʼu ta̱ Ndi̱va̱ʼa miína ña̱ sandákavana-inira tasaá va̱ása ndasakáʼnukara Jehová (2 Cor. 2:10, 11; Efes. 4:27).
12. ¿Ndáa ki̱ʼva kivi kundiku̱n na̱ congregación yichi̱ Jehová?
12 ¿Ndáaña xi̱niñúʼu keʼé na̱ congregación ña̱ Corinto ña̱ va̱ʼa kundiku̱nna yichi̱ Jehová ta va̱ása kundiku̱nna yichi̱ ta̱ Ndi̱va̱ʼa? Xi̱niñúʼu ixakáʼnu-inina xa̱ʼa̱ na̱ ni̱ki̱ʼvi ku̱a̱chi na̱ ndándikó-ini saáchi Jehová íxakáʼnu-inira xa̱ʼa̱ na̱ kíʼvi ku̱a̱chi tá ndándikó-inina. Ná kotoyó ña̱ káʼa̱n sava na̱ ka̱ʼyi Biblia xa̱ʼa̱ Jehová. Ta̱ David ka̱chira: “Saáchi miíún Jehová va̱ʼaní-iniún ta íyo tu̱ʼvaún ña̱ koo káʼnu-iniún xa̱ʼa̱ na̱ yiví” (Sal. 86:5). Ta̱ Miqueas ka̱chira: “¿Ndáana íyo nda̱a̱ táki̱ʼva íyo yóʼó Ndióxi̱ miíndi̱? Yóʼó íxakáʼnu-iniún xa̱ʼa̱ ku̱a̱chi na̱ kúú herenciaún” (Miq. 7:18). Saátu ni̱ka̱ʼa̱n ta̱ Isaías ña̱yóʼo: “Ta̱a ta̱ ndi̱va̱ʼa-ini ná sandákoora ña̱ va̱ása va̱ʼa kéʼéra ta ta̱a ta̱ kéʼé ña̱ va̱ása va̱ʼa ná sandákoora ña̱ va̱ása va̱ʼa ndákanixi̱níra; ná ndikóra nu̱ú Jehová ta ta̱yóʼo kundáʼvi-inira kunirara, ná ndikóra nu̱ú Ndióxi̱yó ta ta̱yóʼo ixakáʼnu-inira xa̱ʼa̱ ku̱a̱chira” (Is. 55:7).
13. ¿Nda̱chun ta̱xina ña̱ ndi̱kó ta̱ ta̱a ta̱ ndandikó-ini? (Koto recuadro ña̱ naní “¿Ama ndi̱kó ta̱ ta̱a ta̱ nda̱ndikó-ini ti̱xin congregación ña̱ Corinto?”).
13 Ña̱ va̱ʼa kundiku̱n na̱ congregación ña̱ Corinto yichi̱ Jehová, xi̱niñúʼu ixakáʼnu-inina xa̱ʼa̱ ta̱a ta̱ ni̱ki̱ʼvi ku̱a̱chi ta na̱ʼa̱na ña̱ kúni̱na xíninara. Ta̱ Pablo ni̱ka̱ʼa̱nra ña̱ tá íxakáʼnu-inina xa̱ʼa̱ ta̱a ta̱ ni̱ki̱ʼvi ku̱a̱chi saá na̱ʼa̱na ña̱ kéʼéna ndiʼi ña̱ ni̱ka̱ʼa̱nra xíʼinna (2 Cor. 2:9). Ni loʼo yo̱o̱ kúú ña̱ ki̱ta ta̱ ta̱a yóʼo ti̱xin congregación soo ña̱yóʼo chi̱ndeétáʼanña xíʼinra ña̱ ndandikó-inira. Ña̱kán va̱ása níxiniñúʼu taxi na̱ anciano ña̱ ya̱ʼa ku̱a̱ʼání tiempo tasaá chindeétáʼanna xíʼin ta̱ ta̱a yóʼo ña̱ ndikóra ti̱xin congregación.
¿NDÁAÑA SÁKUAʼAYÓ XA̱ʼA̱ JEHOVÁ XA̱ʼA̱ ÑA̱ KÉʼÉRA ÑA̱ NDA̱KÚ TA ÍXAKÁʼNU-INIRA XA̱ʼA̱ INKANA?
14, 15. ¿Ndáaña sákuaʼayó xíʼin ña̱ ku̱u ti̱xin congregación ña̱ Corinto? (2 Pedro 3:9; koto na̱ʼná).
14 Jehová ta̱xira ña̱ ka̱ʼyi̱ nu̱ú tu̱ʼunra ña̱ ku̱u ti̱xin congregación ña̱ Corinto ña̱ va̱ʼa sanáʼa̱ra miíyó (Rom. 15:4). Xíʼin ña̱yóʼo sákuaʼayó ña̱ va̱ása táxi Jehová ña̱ kuñuʼu na̱ kíʼvi ku̱a̱chi ndeé ti̱xin ñuura. Savana ndákanixi̱nína ña̱ xa̱ʼa̱ ña̱ íxakáʼnu-ini Jehová xa̱ʼa̱ ku̱a̱chiyó kivi taxira ña̱ kuñuʼukayó ti̱xin congregación ni kǒo ndándikó-iniyó xa̱ʼa̱ ku̱a̱chi ña̱ ni̱ki̱ʼviyó soo su̱ví ña̱ nda̱a̱ kúú ña̱yóʼo. Íxakáʼnuva-ini Jehová xa̱ʼa̱yó soo va̱ása táxira ña̱ keʼéyó ña̱ kúni̱ miíyó, ta kǒo násamara ña̱ káʼa̱n tu̱ʼunra xa̱ʼa̱ ndáaña kúú ña̱ va̱ʼa ta ndáaña kúú ña̱ va̱ása va̱ʼa (Jud. 4). Tá ná taxi Jehová ña̱ kuñuʼu na̱ kíʼvi ku̱a̱chi ti̱xin congregación, va̱ása chindeétáʼan ña̱yóʼo xíʼin congregación ta saátu va̱ása na̱ʼa̱ Jehová ña̱ va̱ʼa-inira (Prov. 13:20; 1 Cor. 15:33).
15 Xíʼin ña̱ ku̱u ti̱xin congregación ña̱ Corinto sákuaʼayó ña̱ va̱ása kúni̱ Jehová ndiʼi-xa̱ʼa̱ nda̱a̱ ni iinna chi ña̱ kúni̱ra kúú ña̱ ka̱ku ndiʼi na̱ yiví. Ña̱kán íxakáʼnu-inira xa̱ʼa̱ na̱ kíʼvi ku̱a̱chi tá násamana ña̱ kéʼéna ta chíkaa̱na ndee̱ ña̱ kachíñuna nu̱úra (Ezeq. 33:11; kaʼvi 2 Pedro 3:9). Ña̱kán tá nda̱ndikó-ini ta̱ ta̱a ta̱ ñuu Corinto ta sa̱ndákoora ña̱ va̱ása va̱ʼa xi̱keʼéra, Jehová xi̱niñúʼura ta̱ Pablo ña̱ ka̱ʼa̱nra xíʼin na̱ congregación ña̱ ná ixakáʼnu-inina xa̱ʼa̱ ta̱ ta̱a yóʼo ta ndakiʼin tukunara.
Na̱ congregación náʼa̱na ña̱ ndíku̱nna yichi̱ Jehová saáchi náʼa̱na ña̱ kúʼvi̱-inina xínina na̱ ndíkó ti̱xin congregación ta kúndáʼvi-inina xíninana. (Koto párrafo 14 xíʼin 15).
16. ¿Ndáa ki̱ʼva kúniún xíʼin Jehová tá ndákanixi̱níún xa̱ʼa̱ ki̱ʼva ña̱ nda̱tiinna ku̱a̱chi xíʼin ta̱a ta̱ ñuu Corinto?
16 Ña̱ ku̱u ti̱xin congregación ña̱ Corinto sánáʼa̱ña miíyó ña̱ kúʼvi̱ní-ini Jehová xínira miíyó ta nda̱kúní íyo ña̱ kéʼéra (Sal. 33:5). Tá kúnda̱a̱-iniyó ña̱ saá íyo Jehová kúni̱kayó ndasakáʼnuyóra. Saáchi ndiʼiyó kúúyó na̱ yiví ku̱a̱chi ta xíniñúʼuyó ña̱ ixakáʼnu-inira xa̱ʼa̱yó. Táxiníyó tíxa̱ʼvi ndaʼa̱ra xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó chi saá kivi ixakáʼnu-inira xa̱ʼa̱ ku̱a̱chiyó. Va̱ʼaní kúniyó tá kúnda̱a̱-iniyó ña̱ kúʼvi̱ní-ini Jehová xínira na̱ káchíñu nu̱úra ta kúni̱ra ña̱ viíní ná koona.
17. ¿Ndáaña sakúaʼayó nu̱ú inka artículo?
17 Ta tiempo vitin tá iinna ná ki̱ʼvina iin ku̱a̱chi ña̱ ndeé, ¿ndáa ki̱ʼva kivi kundiku̱n na̱ anciano yichi̱ Jehová ña̱ na̱ʼa̱na ña̱ kúʼvi̱-inina xínina na̱ yiví kán ta chindeétáʼanna xíʼinna ña̱ ndandikó-inina? Tá na̱ anciano távána iinna ti̱xin congregación á chíndeétáʼanna xíʼinna ña̱ ndikó tukuna, ¿ndáaña xíniñúʼu keʼé na̱ congregación? Nu̱ú inka artículo sakúaʼayó xa̱ʼa̱ ña̱yóʼo.
YAA 109 Ná kúni̱níyó kuni táʼanyó