¿Ndáa ki̱ʼva náʼa̱ na̱ anciano ña̱ kúʼvi̱-inina xínina na̱ kíʼvi ku̱a̱chi ndeé ta kúndáʼvi-inina xíninana?

1. ¿Á kivi ndikó-ini na̱ kíʼvi ku̱a̱chi ndeé?

NU̱Ú artículo ña̱ ni̱ya̱ʼa sa̱kúaʼayó ndáaña ni̱ka̱ʼa̱n ta̱ apóstol Pablo xíʼin na̱ congregación ña̱ Corinto xa̱ʼa̱ ndáa ki̱ʼva ndatiinna ku̱a̱chi xíʼin iin ta̱a ta̱ ni̱ki̱ʼvi ku̱a̱chi ndeé. Xa̱ʼa̱ ña̱ va̱ása níndikó-ini ta̱ ta̱a kán ta̱vánara ti̱xin congregación. Soo nda̱a̱ táki̱ʼva káʼa̱n texto nu̱ú ka̱na artículo yóʼo, Ndióxi̱ kivi chindeétáʼanvara xíʼin iin na̱ yiví na̱ ni̱ki̱ʼvi ku̱a̱chi ndeé ña̱ ndikó-inina (Rom. 2:4). ¿Ndáa ki̱ʼva xíniñúʼu Jehová na̱ anciano ña̱ chindeétáʼanna xíʼin na̱ ni̱ki̱ʼvi ku̱a̱chi ndeé ña̱ ndikó-inina?

2, 3. ¿Ndáaña xíniñúʼu keʼéyó tá ku̱ndaa̱-iniyó ña̱ iin na̱ hermano ni̱ki̱ʼvina ku̱a̱chi ndeé, ta nda̱chun xíniñúʼu keʼéyó ña̱yóʼo?

² ¿Ndáaña kivi keʼéyó tá ku̱ndaa̱-iniyó ña̱ ni̱ki̱ʼvi iin na̱ hermano iin ku̱a̱chi ndeé ta nda̱a̱ kivi tavánana ti̱xin congregación xa̱ʼa̱ ña̱yóʼo? Ña̱ va̱ʼa chindeétáʼan na̱ anciano xíʼin na̱yóʼo siʼna xíniñúʼu kunda̱a̱-inina ndáa ku̱a̱chi ni̱ki̱ʼvina. Ña̱kán ña̱ kivi keʼéyó kúú ña̱ ka̱ʼa̱nyó xíʼinna ná ka̱ʼa̱nna xíʼin na̱ anciano ña̱ va̱ʼa chindeétáʼanna xíʼinna (Is. 1:18; Hech. 20:28; 1 Ped. 5:2).

³ Soo, ¿ndáaña keʼéyó tá va̱ása xíín na̱ yiví kán ka̱ʼa̱nna xíʼin na̱ anciano? Xa̱ʼa̱ ña̱ kúni̱yó ná chindeétáʼanna xíʼinna, miíyó xíniñúʼu ka̱ʼa̱n xíʼin na̱ anciano xa̱ʼa̱ ña̱yóʼo. Tá saá ná keʼéyó na̱ʼa̱yó ña̱ kúʼvi̱-iniyó xíniyóna chi kúnda̱a̱-iniyó ña̱ kivi chindeétáʼan na̱ anciano xíʼinna. Chi tá va̱ása násamana ña̱ kéʼéna kivi sandákoona ña̱ kutáʼanna xíʼin Jehová. Ta tá ná kunda̱a̱-ini na̱ yiví na̱ kǒo ndásakáʼnu Jehová xa̱ʼa̱ ña̱ ke̱ʼéna kixáʼana ka̱ʼa̱nna ña̱ va̱ása va̱ʼa xa̱ʼa̱ra ta saátu xa̱ʼa̱ na̱ ñuura. Ña̱kán ni ná ixayo̱ʼvi̱ña xíʼinyó xíniñúʼu ndakú koo iniyó ta ka̱ʼa̱nyó xíʼin na̱ anciano, saá kúú ña̱ na̱ʼa̱yó ña̱ kúʼvi̱-iniyó xíniyó Jehová ta saátu na̱ ni̱ki̱ʼvi ku̱a̱chi (Sal. 27:14).

¿NDÁA KI̱ʼVA CHÍNDEÉTÁʼAN NA̱ ANCIANO XÍʼIN NA̱ NI̱KI̱ʼVI KU̱A̱CHI NDEÉ?

4. ¿Ndáaña kúni̱ na̱ anciano ná keʼé na̱ ni̱ki̱ʼvi ku̱a̱chi ña̱ ndeé tá ndátakana xíʼinna?

⁴ Tá iin na̱ hermano ni̱ki̱ʼvina ku̱a̱chi ndeé, na̱ anciano ndáka̱xinna u̱ni̱ na̱ anciano na̱ xíni̱va̱ʼa ña̱ va̱ʼa ndatakanaa xíʼin na̱ hermano yóʼo. Vitání xíniñúʼu koo ini na̱yóʼo ta ndakunina ña̱ xíniñúʼu chindeétáʼanna xíʼin na̱ ni̱ki̱ʼvi ku̱a̱chi ña̱ ndikó-inina soo va̱ása xíniñúʼu ixandúxana xíʼin na̱ yiví yóʼo ña̱ nasamana ña̱ kéʼéna (Deut. 30:19). Na̱ anciano xíniñúʼu kunda̱a̱-inina ña̱ su̱ví ndiʼi na̱ kíʼvi ku̱a̱chi ndándikó-inina nda̱a̱ táki̱ʼva ke̱ʼé ta̱ rey David (2 Sam. 12:13). Íyo sava na̱ hermano na̱ kǒo xíín kuniso̱ʼo consejo ña̱ táxi Jehová (Gén. 4:​6-8). Soo ni saá, na̱ anciano xíniñúʼu chikaa̱nína ndee̱ ña̱ va̱ʼa chindeétáʼanna xíʼin na̱ ni̱ki̱ʼvi ku̱a̱chi ña̱ ndikó-inina. ¿Ndáaña xíniñúʼu ndakaʼán na̱ anciano tá ná ndatakana xíʼin na̱ ni̱ki̱ʼvi ku̱a̱chi?

5. ¿Ndáaña xíniñúʼu ndakaʼán na̱ anciano tá ndátakana xíʼin na̱ ni̱ki̱ʼvi ku̱a̱chi? (2 Timoteo 2:​24-26; koto na̱ʼná).

⁵ Na̱ anciano kúnda̱a̱-inina ña̱ ni ni̱ki̱ʼvi iin na̱ hermano ku̱a̱chi ndeé ndáyáʼvikavana nu̱ú Jehová (Luc. 15:​4, 6). Náʼa̱na ña̱yóʼo xíʼin ña̱ kéʼéna ta saátu xíʼin ki̱ʼva ña̱ káʼa̱nna xíʼin na̱ ni̱ki̱ʼvi ku̱a̱chi tá ndátakana xíʼinna. Va̱ása íxandi̱va̱ʼana xíʼinna ta va̱ása ndákanixi̱nína ña̱ xíniñúʼu nda̱ka̱tu̱ʼun kuitínana ña̱ va̱ʼa kunda̱a̱-inina xa̱ʼa̱ ña̱ ku̱u. Chi nu̱úka ña̱ keʼéna saá, kéʼéna ña̱ káʼa̱n 2 Timoteo 2:​24-26 (kaʼviña). Tá ndátakana xíʼin na̱ ni̱ki̱ʼvi ku̱a̱chi, va̱ʼa íyo inina xíʼinna ta kúee íyo inina xíʼinna saáchi kúni̱na chindeétáʼanna xíʼinna ña̱ nasamana ña̱ ndákanixi̱nína.

6. ¿Ndáaña kéʼé na̱ anciano tá kúma̱níka ndatakana xíʼin na̱ ni̱ki̱ʼvi ku̱a̱chi? (Romanos 2:4).

⁶ Na̱ anciano távána tiempo ña̱ nandukúna ndáaña káʼa̱n Jehová. Ndákaʼánna xa̱ʼa̱ ña̱ ni̱ka̱ʼa̱n ta̱ Pablo: “Xa̱ʼa̱ ña̱ va̱ʼaní-ini Ndióxi̱ xíʼún kúú ña̱ kúni̱ra ña̱ ná ndikó-iniún” (kaʼvi Romanos 2:4). Ña̱kán chíkaa̱na ndee̱ ña̱ kundiku̱nna yichi̱ Jehová, saáchi va̱ʼaní-inira xíʼin na̱ kíʼvi ku̱a̱chi tá ndándikó-inina. Na̱ anciano xíniñúʼu ndakaʼánna ña̱ ndáana ndikachi sa̱na̱ Ndióxi̱, ta xíniñúʼu kundiku̱nna yichi̱ ta̱ Jesús ta saátu chiñu ña̱ xáʼndara (Is. 11:​3, 4; Mat. 18:​18-20). Tá kúma̱níka ndatakana xíʼin na̱ ni̱ki̱ʼvi ku̱a̱chi, na̱ anciano káʼa̱nna xíʼin Jehová ná chindeétáʼanra xíʼinna ña̱ va̱ʼa chindeétáʼanna xíʼin na̱ ni̱ki̱ʼvi ku̱a̱chi ña̱ ndikó-inina. Nándukúna ña̱ kivi chindeétáʼan xíʼinna nu̱ú tu̱ʼun Ndióxi̱ ta saátu nu̱ú inkaka tutu ña̱ tává na̱ ñuu Ndióxi̱, ta káʼa̱nna xíʼin Jehová ña̱ ná chindeétáʼanra xíʼinna ña̱ kunda̱a̱-inina xíʼin ña̱ ndóʼo na̱ yiví yóʼo. Nátúʼun-táʼanna xa̱ʼa̱ na̱ ni̱ki̱ʼvi ku̱a̱chi ta ndúkúna ki̱ʼva ña̱ kunda̱a̱-inina ndáa xa̱ʼa̱ kúú ña̱ ni̱ki̱ʼvina ku̱a̱chi (Prov. 20:5).

7, 8. ¿Ndáa ki̱ʼva kundiku̱n na̱ anciano yichi̱ Jehová tá ndátakana xíʼin na̱ ni̱ki̱ʼvi ku̱a̱chi?

⁷ Na̱ anciano kúee íyo inina nda̱a̱ táki̱ʼva kéʼé Jehová. Ndákaʼánna ndáa ki̱ʼva xi̱keʼé Jehová xíʼin na̱ xi̱kiʼvi ku̱a̱chi tiempo xi̱naʼá. Tá kúú kúeení ni̱xi̱yo ini Jehová xíʼin ta̱ Caín, ni̱ka̱ʼa̱nra xíʼinra ndáaña kuu tá va̱ása násamara ña̱ kéʼéra, saátu ni̱ka̱ʼa̱nra xíʼinra ña̱ ku̱a̱ʼá ña̱ va̱ʼa ndakiʼinra tá ná kuniso̱ʼora (Gén. 4:​6, 7). Inka yichi̱ tá xi̱kuni̱ Jehová taxira consejo ndaʼa̱ ta̱ rey David xa̱ʼa̱ ña̱ ni̱ki̱ʼvira ku̱a̱chi ndeé, chi̱ndaʼára ta̱ profeta Natán ña̱ ku̱ʼu̱nra ka̱ʼa̱nra xíʼinra ta ta̱yóʼo xi̱niñúʼura iin ejemplo ña̱ va̱ʼa chindeétáʼanra xíʼin ta̱ David ña̱ ndikó-inira (2 Sam. 12:​1-7). Ta saátu ku̱a̱ʼání yichi̱ chi̱ndaʼá Jehová profetara nu̱ú na̱ ñuu Israel xa̱ʼa̱ ña̱ xi̱ ixaso̱ʼonína (Jer. 7:​24, 25). Va̱ása níxi̱ndatura ña̱ siʼna ndikó-ini na̱ xi̱kachíñu nu̱úra tasaá chindeétáʼanra xíʼinna chi siʼna miíra xi̱chindeétáʼan xíʼinna ta xi̱kaʼa̱nra xíʼinna ña̱ ná ndikó-inina xa̱ʼa̱ ku̱a̱chi ña̱ xi̱kiʼvina.

⁸ ¿Ndáa ki̱ʼva ndíku̱n na̱ anciano yichi̱ Jehová tá chíndeétáʼanna xíʼin na̱ ni̱ki̱ʼvi ku̱a̱chi ndeé? Kúee íyo inina xíʼinna nda̱a̱ táki̱ʼva káʼa̱n 2 Timoteo 4:2. Xíniñúʼu chikaa̱na ndee̱ ña̱ kúee koo inina ta va̱ása sa̱a̱na xíʼin na̱ ni̱ki̱ʼvi ku̱a̱chi ña̱ va̱ʼa chindeétáʼanna xíʼinna ña̱ nasamana. Saáchi tá ná sa̱a̱ na̱ anciano xíʼinna va̱ása kuniso̱ʼokana consejo ña̱ taxina ndaʼa̱na ta va̱ása ndikó-inina.

9, 10. ¿Ndáaña xíniñúʼu keʼé na̱ anciano ña̱ chindeétáʼanna xíʼin na̱ ni̱ki̱ʼvi ku̱a̱chi ña̱ kunda̱a̱-inina ña̱ va̱ása va̱ʼa íyo ña̱ ke̱ʼéna?

⁹ Na̱ anciano xíniñúʼu kunda̱a̱-inina ndáa xa̱ʼa̱ kúú ña̱ ni̱ki̱ʼvi iin na̱ yiví ku̱a̱chi. Tá kúú xíniñúʼu ndakanixi̱nína xa̱ʼa̱ ña̱yóʼo: ¿Ndáaña sa̱kúxíká miína nu̱ú Jehová? ¿Á loʼo tá loʼo sa̱ndákoona ña̱ kaʼvina tu̱ʼun Ndióxi̱ ta saátu ña̱ keena natúʼunna xa̱ʼa̱ra? ¿Á sa̱ndákoona ña̱ ka̱ʼa̱n ni̱ʼina xíʼin Ndióxi̱? ¿Á ki̱xáʼana táxina ña̱ ki̱ʼvi ña̱ va̱ása va̱ʼa níma̱na? ¿Ndáana kítáʼanna xíʼin? ¿Ndáa ña̱ʼa kúú ña̱ ndáka̱xinna kotona á kuniso̱ʼona? ¿Ndáa ki̱ʼva na̱sama ña̱yóʼo ki̱ʼva ña̱ ndákanixi̱nína xíʼin ña̱ kútóona keʼéna? ¿Á kúndaa̱-inina ndáa ki̱ʼva kúni Jehová xíʼin ña̱ ke̱ʼéna?

¹⁰ Na̱ anciano viíní kuniñúʼuna pregunta ña̱ va̱ʼa chindeétáʼanna xíʼin na̱ ni̱ki̱ʼvi ku̱a̱chi soo kǒo xíniñúʼu nda̱ka̱tu̱ʼunna xa̱ʼa̱ ña̱ʼa ña̱ kǒo xíniñúʼu kunda̱a̱-inina xa̱ʼa̱. Tá vií ná keʼéna xíʼinna, va̱ása ixayo̱ʼvi̱ña xíʼin na̱ ni̱ki̱ʼvi ku̱a̱chi natúʼunna xíʼinna tasaá kunda̱a̱-inina ndáa xa̱ʼa̱ kúú ña̱ ni̱ki̱ʼvina ku̱a̱chi (Prov. 20:5). Na̱ anciano kivi keʼéna nda̱a̱ táki̱ʼva ke̱ʼé ta̱ Natán xíʼin ta̱ David, viíní kuniñúʼuna ejemplo ña̱ kivi chindeétáʼan xíʼin na̱ yiví yóʼo ña̱ kunda̱a̱-inina ña̱ va̱ása va̱ʼa íyo ña̱ ke̱ʼéna. Sana tá yichi̱ nu̱ú ña̱ ndatakana xíʼin na̱ ni̱ki̱ʼvi ku̱a̱chi, na̱yóʼo kixáʼana va̱ása va̱ʼa kunina xa̱ʼa̱ ña̱ ke̱ʼéna ta nda̱a̱ kivi ndikó-inina.

11. ¿Ndáa ki̱ʼva xi̱keʼé ta̱ Jesús xíʼin na̱ xi̱kiʼvi ku̱a̱chi?

¹¹ Na̱ anciano chíkaa̱na ndee̱ ña̱ kundiku̱nna yichi̱ ta̱ Jesús. Tá kúú tá ni̱nda̱ka̱tu̱ʼun ta̱ Jesús ta̱ Saulo: “Saulo, Saulo, ¿nda̱chun ndíku̱ún sa̱tái̱?”. Viíní ni̱nda̱ka̱tu̱ʼun ta̱ Jesús ta̱ Saulo saáchi xi̱kuni̱ra ná kunda̱a̱-inira ña̱ va̱ása va̱ʼa íyo ña̱ ke̱ʼéra (Hech. 9:​3-6). Ta nu̱ú Apocalipsis 2:​20, 21 ni̱ka̱ʼa̱nra xa̱ʼa̱ ñá “Jezabel”b ta ka̱chira: “Ta̱xii̱ tiempo ndaʼa̱ñá ña̱ ndikó-iniñá xa̱ʼa̱ ña̱ kéʼéñá”.

12, 13. ¿Ndáaña kivi keʼé na̱ anciano ña̱ va̱ʼa chindeétáʼanna xíʼin na̱ ni̱ki̱ʼvi ku̱a̱chi ña̱ ndikó-inina? (Koto na̱ʼná).

¹² Na̱ anciano ndíku̱nna yichi̱ ta̱ Jesús saáchi va̱ása ndi̱ku̱n ndákanixi̱nína ña̱ va̱ása kúni̱ na̱ ni̱ki̱ʼvi ku̱a̱chi ndikó-inina. Íyo sava na̱ ndándikó-ini yichi̱ nu̱ú ña̱ ndátaka na̱ anciano xíʼinna ta savana ku̱a̱ʼáka loʼo tiempo yáʼa tasaá ndándikó-inina. Xa̱ʼa̱ ña̱kán ku̱a̱ʼáka loʼo yichi̱ xíniñúʼu ndataka na̱ anciano xíʼinna. Sana tá ná ndataka na̱ anciano xíʼinna ña̱ yichi̱ nu̱ú kixáʼana ndakanixi̱nína xa̱ʼa̱ ña̱ ke̱ʼéna ta ka̱ʼa̱nna xíʼin Jehová ña̱ ná ixakáʼnu-inira xa̱ʼa̱na (Sal. 32:5; 38:18). Ta sana tá ná ndataka tuku na̱ anciano xíʼinna sana xa̱a̱ na̱samavana ki̱ʼva ña̱ ndákanixi̱nína xa̱ʼa̱ ña̱ ke̱ʼéna.

¹³ Ña̱ va̱ʼa chindeétáʼan na̱ anciano xíʼin na̱ ni̱ki̱ʼvi ku̱a̱chi ña̱ ndikó-inina, xíniñúʼu kunda̱a̱-inina xíʼin ña̱ ndóʼona ta va̱ʼa koo inina xíʼinna. Saátu xíniñúʼu ka̱ʼa̱nna xíʼin Jehová ña̱ ná chindeétáʼanra xíʼinna xa̱ʼa̱ ndiʼi ña̱ xa̱a̱ ke̱ʼéna xa̱ʼa̱ na̱ yiví na̱ ni̱ki̱ʼvi ku̱a̱chi ña̱ va̱ʼa vií ndakanixi̱nína ta ndandikó-inina (2 Tim. 2:​25, 26).

14. Tá ndándikó-ini iin na̱ ni̱ki̱ʼvi ku̱a̱chi, ¿ndáana ndixa chíndeétáʼan xíʼinna?

¹⁴ Tá ndándikó-ini iin na̱ ni̱ki̱ʼvi ku̱a̱chi, ndiʼivayó kúsi̱í-ini xíʼinna (Luc. 15:​7, 10). Ni chíndeétáʼanníva na̱ anciano xíʼin iin na̱ ni̱ki̱ʼvi ku̱a̱chi ña̱ ndikó-inina, ¿soo ndáana kúú mií na̱ ndixa chíndeétáʼan xíʼinna ña̱ nasamana ta ndikó-inina? Ta̱ Pablo ni̱ka̱ʼa̱nra ña̱ mií Ndióxi̱ chíndeétáʼan xíʼin na̱ yiví kán ña̱ ndikó-inina xa̱ʼa̱ ku̱a̱chi ña̱ ni̱ki̱ʼvina (2 Tim. 2:25). Ña̱kán tá násama iin na̱ ni̱ki̱ʼvi ku̱a̱chi ña̱ kéʼéna xíʼin ña̱ ndákanixi̱nína, mií Jehová kúú ta̱ chíndeétáʼan xíʼin na̱yóʼo ña̱ ndikó-inina xa̱ʼa̱ ña̱ ke̱ʼéna. Ta̱ Pablo ni̱ka̱ʼa̱nra ndáa ña̱ va̱ʼa ndákiʼin iin na̱ yiví na̱ ni̱ki̱ʼvi ku̱a̱chi tá ndándikó-inina: xa̱a̱na kuxini̱ va̱ʼana ña̱ nda̱a̱, kixáʼana vií ndakanixi̱nína tasaá va̱ása ndakavakana ndaʼa̱ ta̱ Ndi̱va̱ʼa (2 Tim. 2:26).

15. ¿Ndáaña kivi keʼéka na̱ anciano ña̱ va̱ʼa chindeétáʼanna xíʼin na̱ ndándikó-ini?

¹⁵ Tá ndándikó-ini iin na̱ ni̱ki̱ʼvi ku̱a̱chi, na̱ anciano ku̱ʼu̱nkavana kotonana ña̱ va̱ʼa chindeétáʼanna xíʼinna ña̱ ndakutáʼan viíkana xíʼin Ndióxi̱, ña̱ va̱ása keʼéna ña̱ kúni̱ ta̱ Ndi̱va̱ʼa ta saátu chindeétáʼanna xíʼinna ña̱ keʼéna ña̱ va̱ʼa (Heb. 12:​12, 13). Na̱ anciano va̱ása xíniñúʼu natúʼunna xíʼin inkana xa̱ʼa̱ ña̱ ke̱ʼé na̱ hermano yóʼo. ¿Soo ndáaña kivi natúʼun na̱ anciano xíʼin na̱ congregación?

“NU̱Ú NDIʼINA KA̱ʼÚN XÍʼIN NA̱ NI̱KI̱ʼVI KU̱A̱CHI ÑA̱ VA̱ÁSA VA̱ʼA ÑA̱ KE̱ʼÉNA”

16. ¿Ndáaña xi̱kuni̱ kachi ta̱ Pablo nu̱ú 1 Timoteo 5:20?

¹⁶ (Kaʼvi 1 Timoteo 5:20). Xa̱ʼa̱ ña̱ xi̱kuu ta̱ Timoteo anciano, ta̱ Pablo ni̱ka̱ʼa̱nra ña̱yóʼo xíʼinra: “Nu̱ú ndiʼina ka̱ʼún xíʼin na̱ ni̱ki̱ʼvi ku̱a̱chi ña̱ va̱ása va̱ʼa ña̱ ke̱ʼéna”. ¿Á ña̱ xi̱kuni̱ kachi ta̱ Pablo kúú ña̱ ná ka̱ʼa̱nna nu̱ú ndiʼi na̱ congregación xa̱ʼa̱ na̱ ni̱ki̱ʼvi ku̱a̱chi? Ña̱ xi̱kuni̱ kachi ta̱ Pablo xíʼin ta̱ Timoteo kúú ña̱ ná ka̱ʼa̱nra xíʼin sava na̱ hermano na̱ ku̱ndaa̱-ini xa̱ʼa̱ ña̱ ke̱ʼé na̱ ni̱ki̱ʼvi ku̱a̱chi, sana xi̱ninu̱úna ña̱ ke̱ʼéna á mií na̱ ni̱ki̱ʼvi ku̱a̱chi yóʼo na̱túʼun xíʼinna xa̱ʼa̱ ña̱ ke̱ʼéna. Ña̱kán xíʼin na̱yóʼo kuitíva natúʼun na̱ anciano ña̱ xa̱a̱ ndu̱vií ku̱a̱chi yóʼo.

17. Tá ku̱a̱ʼánína ku̱ndaa̱-ini xa̱ʼa̱ ña̱ ke̱ʼé na̱ ni̱ki̱ʼvi ku̱a̱chi, ¿ndáa anuncio kúú ña̱ taxi na̱ anciano ta nda̱chun?

¹⁷ Sava yichi̱ iníísaá congregación kúnda̱a̱-ini xa̱ʼa̱ ku̱a̱chi ña̱ ni̱ki̱ʼvi iin na̱ hermano á sana xa̱a̱na kunda̱a̱-inina xa̱ʼa̱ña. Saá kúú ña̱ kivi natúʼunna xíʼin ndiʼi na̱ congregación. Ña̱kán iin na̱ anciano taxina anuncio ti̱xin congregación xa̱ʼa̱ na̱ ni̱ki̱ʼvi ku̱a̱chi ta ka̱ʼa̱nna ña̱ íyo censurado na̱yóʼo. ¿Nda̱chun kéʼéna ña̱yóʼo? Ta̱ Pablo ka̱chira: “Ña̱ va̱ʼa ná kuni inkana” tasaá va̱ása ki̱ʼvina ku̱a̱chi ndeé.

18. ¿Ndáaña kéʼé na̱ anciano tá iin na̱ va̱lí kúú na̱ ni̱ki̱ʼvi ku̱a̱chi ndeé? (Koto na̱ʼná).

¹⁸ Soo tá iin na̱ va̱lí na̱ xa̱a̱ kúú testigo Jehová ni̱ki̱ʼvina ku̱a̱chi ndeé ta ta̱ʼán xi̱nuna 18 ku̱i̱ya̱, ¿ndáaña keʼé na̱ anciano? Ndaka̱xinna u̱vi̱ na̱ anciano ña̱ ndatakana xíʼin na̱yóʼo ta saátu xíʼin na̱ yivána na̱ kúú Testigo.c Na̱ anciano yóʼo ndukúna ki̱ʼva ña̱ kunda̱a̱-inina ndáaña xa̱a̱ kéʼé yivá na̱ va̱lí yóʼo ña̱ va̱ʼa chindeétáʼanna xíʼinna ña̱ nasamana ña̱ kéʼéna ta ndikó-inina. Tá na̱ va̱lí yóʼo va̱ʼaní xíniso̱ʼona consejo ña̱ táxi na̱ yivána ndaʼa̱na ta násamana ña̱ kéʼéna xíʼin ña̱ ndákanixi̱nína, u̱vi̱ na̱ anciano yóʼo kivi ndaka̱xinna ña̱ va̱ása xíniñúʼuví ndataka na̱yóʼo xíʼin iin comité na̱ anciano. Saáchi Ndióxi̱ táxira chiñu yóʼo ndaʼa̱ yivá na̱ va̱lí yóʼo ña̱ taxina consejo ndaʼa̱na (Deut. 6:​6, 7; Prov. 6:20; 22:6; Efes. 6:​2-4). Tándi̱ʼi, na̱ anciano kivi nda̱ka̱tu̱ʼunna yivá na̱ va̱lí yóʼo ña̱ va̱ʼa kunda̱a̱-inina á táxikana consejo ndaʼa̱ na̱ va̱lí se̱ʼena. Soo, ¿ndáaña kivi keʼé na̱ anciano tá va̱ása xíín na̱ va̱lí yóʼo nasamana ta kéʼékana ña̱ va̱ása va̱ʼa? Saá kúú ña̱ ndataka iin comité na̱ anciano xíʼin na̱ va̱lí yóʼo ta saátu xíʼin na̱ yivána na̱ kúú Testigo.

“KÚNI̱NÍ JEHOVÁ XÍNIRA MIÍYÓ TA KÚNDÁʼVINÍ-INIRA XÍNIRA MIÍYÓ”

19. ¿Ndáa ki̱ʼva ndíku̱n na̱ anciano yichi̱ Jehová tá chíndeétáʼanna xíʼin iin na̱ ni̱ki̱ʼvi ku̱a̱chi ndeé?

¹⁹ Na̱ anciano na̱ ndáka̱xinna ña̱ keʼéna iin comité xíʼin na̱ kíʼvi ku̱a̱chi kúni̱na kundaana congregación ña̱ va̱ása koo na̱ kíʼvi ku̱a̱chi ti̱xinña chi ña̱yóʼo kúú chiñu ta̱xi Jehová ndaʼa̱na (1 Cor. 5:7). Soo saátu chíkaa̱nína ndee̱ ña̱ chindeétáʼanna xíʼin na̱ ni̱ki̱ʼvi ku̱a̱chi ña̱ ndikó-inina, ña̱kán tá chíndeétáʼanna xíʼin na̱yóʼo ndátuna ña̱ ná nasamana ña̱ kéʼéna. Tá kéʼéna ña̱yóʼo saá kúú ña̱ ndíku̱nna yichi̱ Jehová chi ta̱kán kúni̱níra xínira miíyó ta kúndáʼvi-inira xínira miíyó (Sant. 5:11). Ná kotoyó ndáaña kúú ña̱ ka̱ʼyi ta̱ apóstol Juan tá xa̱a̱ ku̱chéera: “Se̱ʼe miíi̱, káʼi̱n ña̱yóʼo xíʼinndó ña̱ va̱ʼa ná kǒo ki̱ʼvindó ku̱a̱chi. Soo tá íyo iin ndóʼó ni̱ki̱ʼvi ku̱a̱chi, íyo iin ta̱ chíndeétáʼan xíʼinyó ta íyora xíʼin yiváyó: ta̱yóʼo kúú ta̱ Jesucristo iin ta̱ nda̱kúní-ini” (1 Juan 2:1).

20. ¿Ndáaña sakúaʼayó nu̱ú inka artículo?

²⁰ Sava na̱ kíʼvi ku̱a̱chi ndeé va̱ása ndíkó-inina. Tá kúu ña̱yóʼo saá kúu ña̱ xíniñúʼu keena ti̱xin congregación. Soo, ¿ndáaña keʼé na̱ anciano tá ná kuu ña̱yóʼo? Nu̱ú inka artículo sakúaʼayó xa̱ʼa̱ ña̱yóʼo.