¿Ndáaña keʼéyó tá xíka-iniyó?

1, 2. a) ¿Ndáaña kivi kixáʼayó ndakanixi̱níyó xa̱ʼa̱? b) ¿Ndáaña sakúaʼayó nu̱ú artículo yóʼo?

NDIʼI na̱ yiví xíka-ini sava yichi̱.a Tá kúú, iin ta̱ loʼo ta̱ʼán ndakuchira chi ndákanixi̱níra ña̱ kǒo kíʼin Jehová kuenta xíʼin ña̱ kéʼéra. Iin ta̱ hermano nda̱kaxinra ña̱ kachíñura nu̱ú Jehová tá ni̱xi̱yo loʼora nu̱úka ña̱ kuumiíra iin chiñu nu̱ú kiʼinra ku̱a̱ʼá xu̱ʼún, vitin xa̱a̱ ti̱ndaʼa̱ra ta íyo na̱ veʼera soo túvi̱ra ña̱ kǒo náni xu̱ʼún ña̱ taxira ña̱ xíniñúʼuna. Sana ña̱kán ndákanixi̱níra á vií íyo ña̱ nda̱kaxinra keʼéra. Iin ñá hermana ñá xa̱a̱ chée kǒoka ndee̱ kúúmiíñá ta ña̱kán ndákava-iniñá saáchi kǒo kívika keʼéñá nda̱a̱ táki̱ʼva xi̱keʼéñá tá ya̱chi̱. Sana xa̱a̱ ndákanixi̱níún xa̱ʼa̱ ña̱yóʼo: “¿Á kíʼin Jehová kuenta xíʼin ña̱ kéʼíi̱? Ku̱a̱ʼání ña̱ʼa sa̱ndákoi̱ ña̱ va̱ʼa kachíñui̱ nu̱ú Jehová, ¿á va̱ʼa íyo ña̱ nda̱kaxii̱n ke̱ʼíi̱? ¿Á kuniñúʼukara yi̱ʼi̱ ña̱ kachíñui̱ nu̱úra?”.

² Tá xíka-iniyó nda̱a̱ kivi sandákooyó ña̱ ndasakáʼnuyó Jehová ta kǒo kachíñukayó nu̱úra. Nu̱ú artículo yóʼo kotoyó ndáa ki̱ʼva chindeétáʼan Biblia xíʼinyó tá ndákanixi̱níyó ña̱ kǒo ndíʼi̱-ini Jehová xa̱ʼa̱yó á tá ndákanixi̱níyó ña̱ kǒo vií íyo ña̱ nda̱kaxinyó keʼéyó tá ya̱chi̱. Á saátu tá ndákanixi̱níyó ña̱ kǒo kuniñúʼukara miíyó ña̱ kachíñuyó nu̱úra.

¿NDÁAÑA KEʼÉYÓ TÁ XÍKA INIYÓ?

3. ¿Ndáaña chindeétáʼan xíʼinyó ña̱ kǒo kaka-iniyó?

³ Tá xíka-iniyó, tu̱ʼun Ndióxi̱ kúú ña̱ kivi chindeétáʼan xíʼinyó ña̱ va̱ʼa kǒo kaka-iniyó, ña̱yóʼo chindeétáʼanña xíʼinyó ña̱ kandíxakayó Jehová tasaá viíka kutáʼanyó xíʼinra (1 Cor. 16:13).

4. Táki̱ʼva káchi 1 Tesalonicenses 5:​21, ¿ndáaña kivi keʼéyó ña̱ va̱ʼa nandukúyó xa̱ʼa̱ ndiʼi ña̱ʼa?

⁴ (Kaʼvi 1 Tesalonicenses 5:21). Biblia káʼa̱nña xíʼinyó: “Viíní nandukúndó xa̱ʼa̱ ndiʼi ña̱ʼa”. ¿Ndáa ki̱ʼva keʼéyóña? Ña̱ kotoyó á inkáchi íyo ña̱ káʼa̱n Biblia xíʼin ña̱ ndákanixi̱níyó. Tá kúú, sana iin ta̱ loʼo kíxáʼa xíka-inira ta ndákanixi̱níra ña̱ kǒo kíʼin Jehová kuenta xíʼin ña̱ kéʼéra, ¿ndáaña xíniñúʼu keʼéra? Ña̱ xíniñúʼu keʼéra kúú ña̱ nandukúra nu̱ú Biblia ndáaña ndákanixi̱ní Jehová.

5. ¿Ndáa ki̱ʼva kuniso̱ʼoyó ña̱ káʼa̱n Jehová xíʼinyó?

⁵ Tá káʼviyó Biblia nda̱a̱ táki̱ʼva íyo ña̱ káʼa̱n mií Jehová xíʼinyó saá íyoña. Soo ña̱ va̱ʼa kuniso̱ʼoyó ña̱ káʼa̱nra xíʼinyó xa̱ʼa̱ ña̱ xíka-iniyó xíniñúʼu keʼéyó inka ña̱ʼa. Xíniñúʼu nandukúyó texto ña̱ va̱xi nu̱ú Biblia ña̱ káʼa̱n xa̱ʼa̱ ña̱ sándi̱ʼi̱-iniyó, ta saátu kuniñúʼuyó ña̱ táxi na̱ ñuu Ndióxi̱ ndaʼa̱yó ña̱ va̱ʼa nandukúyó xa̱ʼa̱ ña̱ kúni̱yó kunda̱a̱-iniyó (Prov. 2:​3-6). Iin ña̱ ndáyáʼvi keʼéyó kúú ña̱ ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ ndani̱ʼíyó ña̱ kúni̱yó kunda̱a̱-iniyó xa̱ʼa̱. Tá xa̱a̱ nda̱ni̱ʼíyó ña̱ káʼa̱n Biblia ná kotoyó ndáa ki̱ʼva kuniñúʼuyóña, ta saátu kivi kotoyó ña̱ káʼa̱n Biblia xa̱ʼa̱ na̱ ni̱xi̱yo tiempo xi̱naʼá na̱ ni̱ya̱ʼa nu̱ú tu̱ndóʼo táʼan ña̱ yáʼayó nu̱ú.

6. ¿Ndáa ki̱ʼva chíndeétáʼan reunión xíʼinyó tá xíka-iniyó?

⁶ Tá xíniso̱ʼoyó ña̱ káʼa̱n Jehová xíʼinyó ta ndiʼi semana xáʼa̱nyó reunión, kivi kuniso̱ʼoyó ti̱xin iin discurso á iin comentario ña̱ táxi na̱ hermano iin ña̱ chindeétáʼan xíʼinyó ña̱ va̱ʼa kǒo kaka-iniyó (Prov. 27:17). Vitin ná ka̱ʼa̱nyó xa̱ʼa̱ sava ña̱ kivi sándi̱ʼi̱-iniyó ta ná kotoyó ndáaña kivi chindeétáʼan xíʼinyó.

¿Á NDIXA NDÍʼI̱-INI JEHOVÁ XA̱ʼÍI̱?

7. ¿Ndáaña sana ndákanixi̱níyó xa̱ʼa̱?

⁷ Sana xa̱a̱ ndákanixi̱níún: “¿Á ndíʼi̱-ini Jehová xa̱ʼíi̱?”. Tá túviún ña̱ kǒo ndáyáʼviún sana íxayo̱ʼvi̱ña xíʼún ndákanixi̱níún ña̱ koún migo Jehová. Sana saá íyo ña̱ nda̱kanixi̱ní ta̱ rey David. Xi̱ndakanda̱ní-inira tá xi̱kiʼinra kuenta ña̱ va̱ʼaní xi̱kiʼin Jehová kuenta xíʼin na̱ yiví, ña̱kán ni̱nda̱ka̱tu̱ʼúnra: “Jehová, ¿ndáana kúú na̱ yiví ña̱kán kíʼún kuenta xíʼinna? ¿Ndáana kúú se̱ʼe na̱ yiví ña̱kán ndáúnna?” (Sal. 144:3). Ná kotoyó á ndixa ndíʼi̱-ini Ndióxi̱ xa̱ʼa̱ na̱ yiví.

8. Táki̱ʼva káchi 1 Samuel 16:​6, 7, 10-12, ¿ndáaña kíʼin Jehová kuenta xíʼin?

⁸ Biblia káʼa̱nña ña̱ kíʼinva Jehová kuenta xíʼin na̱ ndákanixi̱ní ña̱ kǒo ndáyáʼvina. Tá kúú, chi̱ndaʼára ta̱ profeta Samuel ña̱ ku̱ʼu̱nra veʼe ta̱ Jesé ña̱ va̱ʼa ndaka̱xinra iin se̱ʼe ta̱yóʼo ña̱ xa̱a̱ra koora rey nu̱ú na̱ ñuu Israel. Ta̱ Jesé ka̱nara u̱xa̱ ta̱a se̱ʼera ña̱ ná kunditana nu̱ú ta̱ Samuel. Soo, nu̱ú ndiʼi na̱yóʼo ta̱ David xi̱kuu ta̱ loʼo, soo kǒo níkanarara.b Soo, Jehová nda̱kaxinra ta̱ David ña̱ koora rey (kaʼvi 1 Samuel 16:​6, 7,c 10-12).d ¿Nda̱chun nda̱kaxin Jehová ta̱ David ña̱ koora rey? Saáchi xi̱nira ña̱ xi̱kuʼvi̱ní-inira xi̱xinirara ta saátu ña̱ xi̱kuni̱ra keʼéra ña̱ va̱ʼa.

9. ¿Nda̱chun kivi kandíxaún ña̱ ndíʼi̱-ini Jehová xa̱ʼún? (Koto na̱ʼná).

⁹ Ndakanixi̱ní xa̱ʼa̱ ña̱ kéʼé Jehová ña̱ va̱ʼa na̱ʼa̱ra ña̱ ndíʼi̱-inira xa̱ʼún. Táxira consejo ndaʼún mií tiempo ña̱ xíniñúʼúnña (Sal. 32:8). Ta xíni̱vara ndáa ki̱ʼva íyoún ña̱kán va̱ʼa táxira consejo ndaʼún (Sal. 139:1). Tá ná kuniso̱ʼún consejo ña̱ káʼa̱n Jehová xíʼún ta kéʼúnña saá kiʼún kuenta ña̱ viíní kana ña̱ kéʼún, tasaá kandíxakaún ña̱ ndíʼi̱va-ini Jehová xa̱ʼún (1 Crón. 28:9; Hech 17:​26, 27). Jehová kíʼinra kuenta xíʼin ndiʼi ña̱ kéʼún xa̱ʼa̱ra ta saátu xítora ña̱ va̱ʼa kúúmiíún (Jer. 17:10). Kúni̱ra ná kuyatiún nu̱úra saáchi kúni̱ra koora migoún (1 Juan 4:19).

¿Á VIÍ ÍYO ÑA̱ NDA̱KAXII̱N KEʼÍI̱?

10. Vitin ña̱ xa̱a̱ ni̱ya̱ʼa ku̱a̱ʼá ku̱i̱ya̱, ¿ndáaña kivi ndakanixi̱ní savana?

¹⁰ Tá xa̱a̱ yáʼa ku̱i̱ya̱, sana savana kivi ndakanixi̱nína á ndixa vií íyo ña̱ nda̱kaxinna ke̱ʼéna tá ya̱chi̱. Sana sa̱ndákoona chiñu ña̱ xi̱kuumiína á nda̱kaxinna ña̱ kǒo kuumiína iin negocio ña̱ va̱ʼa kachíñukana nu̱ú Jehová, soo vitin ña̱ xa̱a̱ ni̱ya̱ʼa ku̱i̱ya̱ xítona ña̱ sava na̱ xíni̱táʼanna xíʼin xa̱ʼa̱ ña̱ ka̱chíñuna ña̱ kuumiína xu̱ʼún va̱ʼaní íyona. Ta sana xa̱ʼa̱ ña̱kán káʼa̱nna: “ku̱a̱ʼání ña̱ʼa sa̱ndákoi̱ ña̱ kachíñui̱ nu̱ú Jehová soo, ¿á ndáyáʼvi ndiʼi ña̱ ke̱ʼíi̱ ña̱ va̱ʼa kachíñui̱ nu̱úra? ¿Á viíkava koi̱ tá inka ña̱ʼa níndakaxii̱n keʼíi̱?”.

11. ¿Nda̱chun ni̱ndi̱ʼi̱ní-ini ta̱ ka̱ʼyí Salmo 73?

¹¹ Tá ndákanixi̱níún ña̱ kǒo vií íyo ña̱ nda̱kaxiún, ndakanixi̱ní xa̱ʼa̱ ña̱ ndo̱ʼo ta̱ ka̱ʼyí ña̱ Salmo 73. Ta̱yóʼo ki̱ʼinra kuenta ña̱ va̱ʼaní ni̱xi̱yo na̱ kǒo ndásakáʼnu Jehová chi kǒo kue̱ʼe̱ níxi̱kuumiína ta kúíkaní ni̱xi̱yona (Sal. 73:​3-5, 12). Xa̱ʼa̱ ña̱ va̱ʼaní ni̱xi̱yona, ta̱ ka̱ʼyí salmo yóʼo xi̱ndakanixi̱níra ña̱ kǒo ndáyáʼvi ndiʼi ña̱ xi̱keʼéra xa̱ʼa̱ Jehová, ta̱ ndiʼi ki̱vi̱ xi̱ndiʼi-inira chi ña̱yóʼo kuití xi̱ndakanixi̱níra xa̱ʼa̱ (Sal. 73:​13, 14). Soo, ¿ndáaña chi̱ndeétáʼan xíʼinra?

12. Táki̱ʼva káchi Salmo 73:​16-18, ¿ndáaña chi̱ndeétáʼan xíʼin ta̱ ka̱ʼyí ña̱ salmo yóʼo?

¹² (Kaʼvi Salmo 73:​16-18).e Ta̱ ka̱ʼyí salmo yóʼo ni̱xa̱ʼa̱nra templo Jehová. Tá ni̱xa̱a̱ra kán kǒoka ña̱ nísandi̱ʼi̱-inira tasaá vií nda̱kanixi̱níra. Ki̱ʼinra kuenta ña̱ ni va̱ʼaníva íyo savana, soo kǒo ña̱ va̱ʼaví ndakiʼinna chí nu̱únínu. Ña̱kán ki̱ʼinra kuenta ña̱ siʼnaka Jehová xíniñúʼu ndasakáʼnura tasaá kǒoka ña̱ níndi̱ʼi̱-inira xa̱ʼa̱ ta chi̱kaa̱níra ndee̱ ña̱ nda̱kú koo inira xíʼin Jehová (Sal. 73:​23-28).

13. ¿Ndáaña kivi keʼéyó ña̱ va̱ʼa kǒo kundi̱ʼi̱ní-iniyó? (Koto na̱ʼná).

¹³ Nda̱a̱ táki̱ʼva ke̱ʼé ta̱ ka̱ʼyí ña̱ salmo, saátu miíún íyo ña̱ kivi keʼún ña̱ va̱ʼa kǒo kundi̱ʼi̱ní-iniún. ¿Ndáaña kivi keʼún? Tá kúú, kivi ndakanixi̱níún xa̱ʼa̱ ndiʼi ña̱ va̱ʼa ña̱ xa̱a̱ kúúmiíún ta saátu ndiʼi bendición ña̱ xa̱a̱ táxi Jehová ndaʼún. Soo, ¿ndáaña kúúmií na̱ kǒo ndásakáʼnu Jehová? Ña̱ kúúmií kuitína kúú ña̱ íyo nu̱ú ñuʼú yóʼova, saáchi chíkaa̱nína ndee̱ ña̱ kachíñuna xa̱ʼa̱ ku̱a̱ʼá ña̱ʼa, soo kǒo ña̱ va̱ʼa ndátuna ndakiʼinna chí nu̱únínu. Soo, Jehová káʼa̱nra xíʼin miíyó ña̱ ku̱a̱ʼáníva ña̱ʼa taxira ndaʼa̱yó (Sal. 145:16). Kǒo kúnda̱a̱ví-iniyó ndáa ki̱ʼva kooyó vitin tá níndaka̱xinyó keʼéyó inka ña̱ʼa, soo xíni̱yó ña̱ ndiʼi na̱ nda̱kaxin ndasakáʼnu Jehová kǒo ña̱ʼa kúma̱ní nu̱úna.

¿Á KUNIÑÚʼUKA JEHOVÁ YI̱ʼI̱ ÑA̱ KACHÍÑUI̱ NU̱ÚRA?

14. ¿Ndáaña ndóʼo sava na̱ ndásakáʼnu Jehová, ta ndáaña sana ndákanixi̱nína?

¹⁴ Sava na̱ ndásakáʼnu Jehová kúni̱na kachíñu ku̱a̱ʼákana nu̱úra, soo kǒo kívi keʼéna ña̱yóʼo xa̱ʼa̱ ña̱ xa̱a̱ ku̱chéena, xa̱ʼa̱ ña̱ kúúmiína iin kue̱ʼe̱ á íyo inkaka ña̱ sási nu̱úna. Xa̱ʼa̱ ña̱kán túvina ña̱ kǒo ndáyáʼvikana nu̱ú Jehová ta nda̱a̱ ndákanixi̱nína: “¿Á kivika kuniñúʼu Jehová yi̱ʼi̱ ña̱ kachíñui̱ nu̱úra?”

15. ¿Ndáaña xi̱kandíxa ta̱ ka̱ʼyí Salmo 71?

¹⁵ Saátu ndo̱ʼo ta̱ ka̱ʼyí Salmo 71. Ta̱yóʼo ni̱ka̱ʼa̱nra xíʼin Jehová: “Tá kǒoka ndeíi̱ kǒo sandákoo ndaʼún yi̱ʼi̱” (Sal. 71:​9, 18). Soo, ta̱ ka̱ʼyí salmo yóʼo xi̱kandíxara ña̱ tá nda̱kú íyo inira xíʼin Ndióxi̱ kundavarara ta chindeétáʼanvara xíʼinra. Na̱kunda̱a̱-inira ña̱ kúsi̱íva-ini Jehová xíʼin na̱ chíkaa̱ ndee̱ ña̱ kachíñuna nu̱úra ni íyo ña̱ sási nu̱úna (Sal. 37:​23-25).

16. ¿Á xíniñúʼuka Jehová na̱ hermano na̱ xa̱a̱ chée? (Salmo 92:​12-15).

¹⁶ Tá xa̱a̱ ku̱cheún ndakanixi̱ní ndáa ki̱ʼva xíto Jehová yóʼó, ni túviún ña̱ kǒo ku̱a̱ʼá ña̱ kivi keʼún nu̱ú Jehová, soo kivi kuniñúʼura yóʼó ña̱ chindeétáʼún xíʼin inkana (kaʼvi Salmo 92:​12-15).f Nu̱úka ña̱ kundi̱ʼi̱ní-iniún xa̱ʼa̱ ña̱ kǒo kívi keʼún, ndakanixi̱ní xa̱ʼa̱ ña̱ kivi keʼún. Kivi chika̱ún ndee̱ xíʼin inkana ta saátu kivi kundi̱ʼi̱-iniún xa̱ʼa̱na. Kivi natúʼún xíʼinna xa̱ʼa̱ ndáa ki̱ʼva chi̱ndeétáʼan Jehová xíʼún tá ya̱chi̱ ta saátu kivi natúʼún xíʼinna xa̱ʼa̱ ña̱ xa̱a̱ kúni̱ún ná xi̱nu ña̱ káʼa̱n Jehová taxira chí nu̱únínu. Ta saátu, ndakaʼán ña̱ tá kéʼún oración xa̱ʼa̱na kivi chindeétáʼanníña xíʼinna (1 Ped. 3:12). Ni nda̱a̱ ndáaka ña̱ yáʼayó nu̱ú kiviva keʼéyó ku̱a̱ʼá ña̱ʼa xa̱ʼa̱ Jehová ta saátu xa̱ʼa̱ inkana.

17. ¿Nda̱chun kǒo xíniñúʼu chitáʼún ña̱ kéʼún xíʼin ña̱ kéʼé inkana?

¹⁷ Sana kúsuchí-iniún xa̱ʼa̱ ña̱ kǒo kívi keʼún chiñu nu̱ú Jehová nda̱a̱ táki̱ʼva kúni̱ún, soo ndakaʼán chi ndiʼi ña̱ kéʼún ndáyáʼvinívaña nu̱úra. Sava yichi̱ kuni̱ún chitaʼún ña̱ kéʼún xíʼin ña̱ kéʼé inkana soo kǒo keʼún ña̱yóʼo, ¿nda̱chun? Saáchi Jehová kǒo chítáʼanra ña̱ kéʼún xíʼin ña̱ kéʼé inkana (Gál. 6:4). Tá kúú, ñá María sa̱táñá iin aceite tá xáʼa̱n támi tá yaʼviní ta chi̱kaa̱ñára xa̱ʼa̱ ta̱ Jesús (Juan 12:​3-5). Ta ñaʼá ñá ni̱xi̱ʼi̱ yi̱i̱ chi̱kaa̱ñá u̱vi̱ xu̱ʼún válí ña̱ loʼoní ndáyáʼvi ini caja ña̱ xi̱ndita ini templo (Luc. 21:​1-4). Nu̱ú ta̱ Jesús ña̱ ke̱ʼé u̱vi̱ saá ná ñaʼá yóʼo xi̱ndayáʼviníña saáchi xi̱kandíxaníná Ndióxi̱. Ni túviún ña̱ loʼoníva chiñu kéʼún nu̱ú Jehová, soo ndáyáʼviníña nu̱úra saáchi kúni̱ún xíniúnra ta kúni̱ún ndasakáʼnúnra.

18. ¿Ndáaña chindeétáʼan xíʼún ña̱ kǒo kaka-iniún? (Koto recuadro ña̱ naní “Tu̱ʼun Ndióxi̱ chindeétáʼanña xíʼún ña̱ kǒo kaka-iniún”).

¹⁸ Ndiʼivayó xíka-ini sava yichi̱. Nda̱a̱ táki̱ʼva sa̱kúaʼayó, ña̱ Biblia chíndeétáʼanña xíʼinyó ña̱ kǒo kaka-iniyó. Ña̱kán nandukú ña̱ kúni̱ún kunda̱a̱-iniún xa̱ʼa̱ nu̱úña, tasaá kǒoka ña̱ kaka-iniún xa̱ʼa̱ ta xíʼin ndiʼi níma̱ún kandíxaún ña̱ káʼa̱n Jehová. Ndiʼi ña̱ kéʼún nu̱ú Jehová ndáyáʼvinívaña ta káʼa̱nra taxira ña̱ va̱ʼa ndaʼún xa̱ʼa̱ ña̱ káchíñún nu̱úra. Ta kǒo nandósó-iniún, Jehová kúni̱ra xíni̱ra iin tá iin na̱ ndásakáʼnu miíra ta ndáarana.