¿Á kúni̱ún xa̱ún koún anciano?

1, 2. ¿Ndáa chiñu kúú ña̱ kéʼé na̱ anciano?

TÁ XA̱A̱ ku̱a̱ʼá tiempo kúún siervo ministerial, sana xa̱a̱ kéʼévaún ku̱a̱ʼá ña̱ʼa ña̱ kivi chindeétáʼan xíʼún ña̱ va̱ʼa xa̱ún koún anciano. Soo, ¿á kivi chikaa̱ loʼokaún ndee̱ ña̱ va̱ʼa xa̱ún keʼún chiñu ña̱ kéʼé na̱ anciano? (1 Tim. 3:1).

² ¿Ndáa chiñu kúú ña̱ kéʼé iin ta̱ anciano? Siʼna mií na̱ anciano chínúu iin yichi̱ va̱ʼa nu̱ú inkana ña̱ keena predicación, ndáana na̱ hermano, sánáʼa̱nana ta chínúuna iin yichi̱ va̱ʼaní nu̱úna ña̱ va̱ʼa viíka ndasakáʼnuna Jehová. Ña̱kán Biblia káʼa̱nña xa̱ʼa̱ na̱ anciano ña̱ kúúna iin bendición (Efes. 4:8).

3. ¿Ndáaña xíniñúʼu keʼé iin ta̱ hermano ña̱ va̱ʼa xa̱a̱ra koora anciano? (1 Timoteo 3:​1-7; Tito 1:​5-9).

³ ¿Ndáaña xíniñúʼu keʼé iin ta̱ hermano ña̱ va̱ʼa xa̱a̱ra koora anciano? Tá ndúkúyó iin chiñu ña̱ kachíñuyó ndúkúna requisito nu̱úyó, ta sana kǒo xíni̱víyó keʼéyó ku̱a̱ʼá ña̱ʼa, soo nisaá táxivana chiñu kán ndaʼa̱yó. Soo síínva íyo requisito ña̱ xíniñúʼu sandákutú na̱ anciano, ña̱kán iin ta̱ hermano sana va̱ʼaníva sánáʼa̱ra ta kéera predicación, soo ña̱yóʼo kǒo kúni̱ kachiña ña̱ xa̱a̱ va̱ʼa xa̱a̱ra koora anciano chi xíniñúʼu keʼéra ña̱ káʼa̱n 1 Timoteo 3:​1-7 xíʼin Tito 1:​5-9 (kaʼviña). Nu̱ú artículo yóʼo sakúaʼayó xa̱ʼa̱ u̱ni̱ ña̱ʼa ña̱ kivi keʼé iin ta̱ kúni̱ koo anciano. Ña̱ nu̱ú, xíniñúʼu vií ka̱ʼa̱nna xa̱ʼa̱ra. Ña̱ u̱vi̱, vií kuniʼira yichi̱ nu̱ú na̱ veʼera. Ña̱ u̱ni̱, koo tu̱ʼvara ña̱ chindeétáʼanra xíʼin na̱ hermano.

VIÍ NÁ KA̱ʼA̱NNA XA̱ʼA̱RA

4. ¿Ndáaña xíniñúʼu keʼé iin ta̱ hermano ña̱ va̱ʼa kǒo ka̱ʼa̱nna ña̱ va̱ása va̱ʼa xa̱ʼa̱ra?

⁴ Ña̱ va̱ʼa xa̱a̱ iin ta̱ hermano koora anciano, xíniñúʼu viíní keʼéra ndiʼi ña̱ʼa ña̱ va̱ʼa kǒo ka̱ʼa̱nna ña̱ va̱ása va̱ʼa xa̱ʼa̱ra. Ña̱yóʼo kúni̱ kachiña ña̱ ndiʼi na̱ hermano xíniñúʼu ka̱ʼa̱n va̱ʼana xa̱ʼa̱ra, ta saátu nda̱a̱ na̱ kǒo ndásakáʼnu Ndióxi̱ xíniñúʼu ka̱ʼa̱n va̱ʼa xa̱ʼa̱ra. Sana sava na̱ yiví ka̱ʼa̱nvana ña̱ va̱ása va̱ʼa xa̱ʼa̱ra xa̱ʼa̱ ña̱ ndásakáʼnura Ndióxi̱. Soo ña̱ kǒo xíniñúʼu keʼéra kúú ña̱ sandáʼvira á ña̱ keʼéra ña̱ kini, chi tá ná keʼéra ña̱yóʼo saá kúú ña̱ kixáʼana ka̱ʼa̱nna ña̱ va̱ása va̱ʼa xa̱ʼa̱ Ndióxi̱ (Dan. 6:​4, 5). Ndakanixi̱ní xa̱ʼa̱ pregunta yóʼo: “¿Á va̱ʼa káʼa̱n na̱ hermano xíʼin inka na̱ yiví xa̱ʼíi̱?”.

5. ¿Ndáaña kúni̱ kachi ña̱ keʼéna ña̱ va̱ʼa?

⁵ Xíniñúʼu keʼún ña̱ va̱ʼa. Ña̱yóʼo kúni̱ kachiña, kotoún ña̱ va̱ʼa ña̱ kéʼé inkana ta ka̱ʼún xíʼinna ña̱ va̱ʼaní kéʼéna. Saátu kúni̱ kachiña ña̱ kusi̱í-iniún tá kéʼún ña̱ va̱ʼa xa̱ʼa̱ inkana. Ta sava yichi̱ nda̱a̱ kivi keʼún ku̱a̱ʼáka ña̱ʼa xa̱ʼa̱na, ña̱ kǒo níndakanixi̱nína keʼún xa̱ʼa̱na (1 Tes. 2:8). ¿Nda̱chun ndáyáʼviní ña̱ koo na̱ anciano saá? Saáchi xíniñúʼu tavána tiempo ña̱ va̱ʼa kundaana na̱ congregación ta saátu ña̱ kundaana na̱ veʼena (1 Ped. 5:​1-3). Tá ná keʼéna ña̱yóʼo saá kúú ña̱ kusi̱íníka-inina (Hech. 20:35).

6. ¿Ndáa ki̱ʼva náʼa̱ iin ta̱a ña̱ va̱ʼa-inira? (Hebreos 13:​2, 16; koto na̱ʼná).

⁶ Ta saátu xíniñúʼu va̱ʼa koo inira, soo su̱ví nda̱saa xíʼin na̱ kítáʼan va̱ʼa xíʼinra xíniñúʼu va̱ʼa koo inira (1 Ped. 4:9). Nda̱a̱ táki̱ʼva káʼa̱n iin diccionario ña̱ káʼa̱n xa̱ʼa̱ ña̱ Biblia, “iin ta̱a ta̱ va̱ʼa-ini kánara nda̱a̱ na̱ kǒo xíni̱ra ña̱ va̱ʼa ku̱ʼu̱nna veʼera ta vií ndákiʼinrana”. Ndakanixi̱ní xa̱ʼa̱ pregunta yóʼo: “¿Á vií ndákiʼi̱n na̱ xáʼa̱n veʼi̱?” (kaʼvi Hebreos 13:​2, 16). Ta̱a ta̱ va̱ʼa-ini táxira ña̱ va̱ʼa ña̱ kúúmiíra ndaʼa̱ na̱ nda̱ʼví xíʼin na̱ chíkaa̱ ndee̱ ña̱ kachíñu ku̱a̱ʼákana nu̱ú Ndióxi̱, tá kúú na̱ superintendente ña̱ circuito xíʼin na̱ xáʼa̱n táxi discurso ti̱xin congregación (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Ndáa ki̱ʼva náʼa̱ iin ta̱ anciano ña̱ kǒo kúni̱ra kuumiíra ku̱a̱ʼání xu̱ʼún?

⁷ “Ná kǒo kutóoníra kuumiíra xu̱ʼún”. Ña̱yóʼo kúni̱ kachiña ña̱ kǒo xíniñúʼu kundi̱ʼi̱ní-inira ña̱ kuumiíra ku̱a̱ʼá ña̱ʼa. Ni kúúra ta̱ nda̱ʼví á ta̱ ku̱i̱ká, ña̱ xíniñúʼu kundi̱ʼi̱ka-inira xa̱ʼa̱ kúú chiñu Ndióxi̱ (Mat. 6:33). Xíniñúʼu kuniñúʼura tiempora, ndee̱ra xíʼin ña̱ kúúmiíra ña̱ va̱ʼa ndasakáʼnura Jehová, saátu ña̱ kundaara na̱ veʼera xíʼin ña̱ chindeétáʼanra xíʼin na̱ hermano (Mat. 6:24; 1 Juan 2:​15-17). Ndakanixi̱ní xa̱ʼa̱ pregunta yóʼo: “¿Á ndíʼi̱ní-inii̱ xa̱ʼa̱ xu̱ʼún? ¿Á kúsi̱í-inii̱ xíʼin loʼo ña̱ʼa ña̱ xa̱a̱ kúúmiíi̱? ¿Á ku̱a̱ʼání káchíñui̱ ña̱ va̱ʼa koo ku̱a̱ʼá xu̱ʼíi̱n tasaá koo ku̱a̱ʼá ña̱ʼi̱?” (1 Tim. 6:​6, 17-19).

8. ¿Ndáaña kéʼé iin ta̱a ta̱ viíní kíʼin kuenta xíʼin ña̱ kéʼéra ta xáʼnu̱-inira?

⁸ Iin ta̱a ta̱ kíʼinní kuenta xíʼin ña̱ kéʼéra ta xáʼnu̱-inira, náʼa̱ra ña̱ viíní kéʼéra ndiʼi ña̱ʼa. Ña̱kán kíʼinníra kuenta ña̱ kǒo kuxu ku̱a̱ʼáníra á ña̱ koʼora ndixi nda̱a̱ xi̱niira. Xíniñúʼu kiʼinra kuenta xíʼin ti̱ko̱to̱ ña̱ ndíxira ta saátu xíʼin ki̱ʼva ña̱ ndásaviíra miíra. Ta viíní xíniñúʼu kuniñúʼura tiempora ta kǒo kéʼéra nda̱a̱ táki̱ʼva kéʼé na̱ ñuyǐví yóʼo (Luc. 21:34; Sant. 4:4). Ta ni kéʼénara ña̱ kúni̱na sasáa̱nara soo kǒo sáa̱ra. Na̱ anciano kǒo xíniñúʼu koʼona ndixi nda̱a̱ xi̱niina. Ndakanixi̱ní xa̱ʼa̱ pregunta yóʼo: “¿Á kíʼi̱n kuenta xíʼin ndiʼi ña̱ kéʼíi̱ ta xáʼnu̱-inii̱?”.

9. ¿Ndáaka ña̱ xíniñúʼu keʼé iin ta̱ anciano?

⁹ Ta̱ anciano náʼa̱ra ña̱ viíní ndákanixi̱níra tá nándukúra nu̱ú ña̱ Biblia ndiʼi ña̱ kúni̱ra kunda̱a̱-inira. Xa̱ʼa̱ ña̱ ndákanixi̱níra xa̱ʼa̱ ña̱ káʼa̱n ña̱ Biblia kíʼinra kuenta xíʼin ndiʼi ña̱ʼa, viíní kúnda̱a̱-inira xíʼin iin tá iin ña̱ʼa ta ndáka̱xin viíra ña̱ kéʼéra. Kǒo kamaní-inira chi siʼna nándukú va̱ʼara xa̱ʼa̱ iin tá iin ña̱ʼa (Prov. 18:13). Ña̱kán ndiʼi ña̱ ndáka̱xinra kéʼéra náʼa̱ña ña̱ kíʼinra kuenta xíʼin ña̱ ndákanixi̱ní Jehová. Ta saátu sáxi̱nura ña̱ káʼa̱nra ta vií kéʼéra ndiʼi ña̱ʼa. Tá ná keʼéra ña̱yóʼo kundaa-ininara chi ndíku̱nra ndiʼi ña̱ káʼa̱n na̱ ñuu Ndióxi̱ ta saátu káʼa̱n va̱ʼana xa̱ʼa̱ra. Vitin ná ka̱ʼa̱nyó xa̱ʼa̱ ndáaña xíniñúʼu keʼéra ña̱ va̱ʼa kuniʼira yichi̱ nu̱ú na̱ veʼera nda̱a̱ táki̱ʼva káʼa̱n Biblia.

¿NDÁAÑA KEʼÉRA ÑA̱ VA̱ʼA KUNIʼIRA YICHI̱ NU̱Ú NA̱ VEʼERA?

10. ¿Ndáaña kéʼé iin ta̱a ta̱ va̱ʼaní níʼi yichi̱ nu̱ú na̱ veʼera?

¹⁰ Ña̱ va̱ʼa xa̱a̱ iin ta̱ hermano ta̱ xa̱a̱ ti̱ndaʼa̱ koora anciano, xíniñúʼu chinúu na̱ veʼera iin yichi̱ va̱ʼa nu̱ú inkana. Xa̱ʼa̱ ña̱kán Biblia káʼa̱nña ña̱ xíniñúʼu viíní kuniʼira yichi̱ nu̱ú na̱ veʼera. Ndiʼina xíniñúʼu kuni ña̱ kúʼvi̱ní-inira xínira na̱ veʼera ta táxira ña̱ xíniñúʼuna. Miíra kúú ta̱ siʼna xíniñúʼu chikaa̱ ndee̱ ña̱ kundi̱ʼi̱-inira xa̱ʼa̱ chiñu Ndióxi̱. ¿Nda̱chun ndáyáʼviní keʼéra ña̱yóʼo? Saáchi nda̱a̱ táki̱ʼva ni̱ka̱ʼa̱n ta̱ apóstol Pablo, “tá iin ta̱a va̱ása xíni̱ra kuniʼira yichi̱ nu̱ú na̱ veʼera, ¿ndáa ki̱ʼva kundaara na̱ congregación Ndióxi̱?” (1 Tim. 3:5).

11, 12. ¿Ndáaña xíniñúʼu keʼé na̱ veʼe iin ta̱ hermano tá kúni̱na chindeétáʼanna xíʼinra ña̱ va̱ʼa xa̱a̱ra koora anciano? (Koto na̱ʼná).

¹¹ Tá íyo na̱ va̱lí se̱ʼéra ná kuniso̱ʼona ña̱ káʼa̱nra xíʼinna ta viíní ná keʼéna. Tá vií sánáʼa̱ra na̱ va̱lí se̱ʼera, va̱ʼaníva kuniso̱ʼonara ta to̱ʼó koo inina ta vií keʼéna xíʼin inkana. Ta saátu xíniñúʼu chindeétáʼanra xíʼin se̱ʼera ña̱ va̱ʼa vií kutáʼanna xíʼin Jehová tasaá kuniso̱ʼona ña̱ káʼa̱n Jehová ta xa̱a̱na ndakuchina.

¹² Tá íyo na̱ va̱lí se̱ʼera na̱ ndásakáʼnuna Ndióxi̱, ná kǒo keʼéna ña̱ kini ta ná kuniso̱ʼona ña̱ káʼa̱nra xíʼinna. Soo, tá iin se̱ʼera na̱ xa̱a̱ nda̱kuchi ke̱ʼéna iin ña̱ kini ta íyokana xíʼinra veʼera, ¿ndáaña kuu? Tá kǒo níchikaa̱ yivána ndee̱ ña̱ sanáʼa̱rana xa̱ʼa̱ Jehová, xa̱ʼa̱ ña̱kán ke̱ʼéna ña̱ kini kǒo kivi xa̱a̱ra koora anciano (koto ña̱ La Atalaya 15 tí octubre ku̱i̱ya̱ 1996, página 21, párrafos 6, 7).

CHINDEÉTÁʼAN XÍʼIN NA̱ HERMANO

13. ¿Ndáa ki̱ʼva náʼa̱ iin ta̱ anciano ña̱ vitá-inira ta kǒo kéʼéra ña̱ kúni̱ miíra?

¹³ Na̱ hermano na̱ va̱ʼaní kéʼé ña̱ káʼa̱n Ndióxi̱, kúúna iin bendición ti̱xin congregación. Ta̱ hermano ta̱ kúú anciano kǒo xíniñúʼu ndakanixi̱níra ña̱ xíniñúʼu keʼéna nda̱saa ña̱ káʼa̱n mií kuitíra, saáchi chíndeétáʼanra xíʼin inkana ña̱ vií kutáʼanna. Ña̱kán ña̱ kivi keʼún kúú ña̱ kuniso̱ʼún ña̱ káʼa̱n inkana ta kǒo kundatún ña̱ keʼéna ña̱ kúni̱ miíún. Tá kúú ndakanixi̱ní ña̱ kúúmiíún reunión na̱ anciano, ta inka na̱ anciano ndáka̱xinna inka ña̱ʼa soo kǒo kíndo̱o-iniún xíʼinña, ¿ndáaña kivi keʼún? ¿Á keʼún ña̱ nda̱kaxinna? Ndakaʼán chi iin ta̱ anciano va̱ása xíniñúʼu ndakanixi̱níra ña̱ nina ña̱ káʼa̱n miíra xíniñúʼu keʼéna, saáchi ndákunira ña̱ va̱ʼaníkava kána iin chiñu tá ku̱a̱ʼána táxi consejo (Gén. 13:​8, 9; Prov. 15:22). Kǒo xíniñúʼu kamaní sa̱a̱ra ta kǒo xíniñúʼu sakákura ku̱a̱chi. Nu̱úka ña̱ kue̱ʼe̱ní koora, va̱ʼaka vií ná ka̱ʼa̱nra xíʼin na̱ hermano ta va̱ʼa koo inira xíʼinna. Tá íyo iin na̱ kéʼé ña̱ va̱ása va̱ʼa xíʼinra ndi̱ku̱n ndásaviíra ku̱a̱chi xíʼinna chi kǒo kútóora ku̱a̱chi (Sant. 3:​17, 18). To̱ʼó káʼa̱nra xíʼin na̱ yiví, ta tá káʼa̱nna xíʼinra ña̱ su̱ví ña̱ ndixa kúú ña̱ kándíxara Ndióxi̱, vií ndákuiinra yuʼúna tasaá ndíʼi ku̱a̱chi (Juec. 8:​1-3; Prov. 20:3; 25:15; Mat. 5:​23, 24).

14. ¿Nda̱chun kǒo kívi xa̱a̱ iin ta̱ hermano ta̱ sa̱kán nda̱kuchi koora anciano? Ta, ¿ndáa ki̱ʼva náʼa̱ra ña̱ nda̱kú íyo inira xíʼin Jehová?

¹⁴ Iin ta̱ hermano ta̱ sa̱kán nda̱kuchi kǒo kívi koora anciano saáchi xíniñúʼu ya̱ʼa tiempo ña̱ va̱ʼa viíka kutáʼanra xíʼin Jehová, ta saátu xíniñúʼu sakúaʼara kuniñúʼura tu̱ʼun Ndióxi̱ tasaá ndaka̱xin viíra ña̱ keʼéra. Ña̱ siʼna xíniñúʼu keʼé iin ta̱ hermano ña̱ va̱ʼa xa̱a̱ra koora anciano kúú ña̱ keʼéra nda̱a̱ táki̱ʼva ke̱ʼé ta̱ Jesús. Xíniñúʼu vitá koo inira ta chikaa̱ra ndee̱ ña̱ keʼéra ña̱ kúni̱ Jehová, ta kǒo sa̱a̱ra tá kǒo táxi kamana iin chiñu ndaʼa̱ra ti̱xin congregación (Mat. 20:23; Filip. 2:​5-8). Ta saátu xíniñúʼu na̱ʼa̱ra ña̱ nda̱kú íyo inira xíʼin Jehová, ta iin ki̱ʼva ña̱ na̱ʼa̱ra ña̱yóʼo kúú ña̱ keʼéra ña̱ káʼa̱n na̱ ñuu Ndióxi̱ (1 Tim. 4:15).

15. Ña̱ va̱ʼa koo iin ta̱ hermano anciano, ¿á xíniñúʼu kuxini̱níra taxira discurso?

¹⁵ Biblia káʼa̱nña ña̱ iin ta̱ hermano ta̱ kúni̱ kuumií iin chiñu ti̱xin congregación xíniñúʼu koo tu̱ʼvara ña̱ sanáʼa̱ra. ¿Á kúni̱ kachi ña̱yóʼo ña̱ xíniñúʼu kuxini̱níra taxira discurso? Su̱ví saáví íyoña, ku̱a̱ʼání na̱ anciano íxayo̱ʼvi̱ña xíʼinna taxina discurso, soo tá ku̱a̱ʼa̱nna predicación va̱ʼaníva sánáʼa̱na na̱ yiví, ta saátu va̱ʼaní chíndeétáʼanna xíʼin na̱ hermano tá kéʼéna visita ña̱ pastoreo (kivi nandukún ña̱ káʼa̱n 1 Corintios 12:​28, 29 xíʼin Efesios 4:11). Soo ta̱ hermano ta̱ kúni̱ koo anciano xíniñúʼu chikaa̱ra ndee̱ ña̱ sanáʼa̱ viíra inkana. ¿Ndáaña kivi chindeétáʼan xíʼinra?

16. ¿Ndáaña xíniñúʼu keʼé iin ta̱ hermano ña̱ va̱ʼa viíka sanáʼa̱ra? (Koto na̱ʼná).

¹⁶ Xíniñúʼu viíní kuniñúʼura tu̱ʼun Ndióxi̱. Ña̱ va̱ʼa viíní sanáʼa̱ iin ta̱ anciano ta saátu ña̱ taxira consejo, xíniñúʼu viíní sakúaʼara kuniñúʼura Biblia. Ña̱kán xíniñúʼu kaʼvira Biblia ndiʼi ki̱vi̱ ta saátu xíniñúʼu kaʼvira tutu ña̱ tává na̱ ñuu Ndióxi̱ (Prov. 15:28; 16:23). Xíniñúʼu kotora ndáa ki̱ʼva viíní kuniñúʼura versículo ña̱ va̱xi nu̱ú Biblia. Ta tá sánáʼa̱ra chíndeétáʼanra xíʼin na̱ xíniso̱ʼo miíra ña̱ kuʼvi̱-inina kunina Jehová ta saátu ña̱ keʼéna ña̱ sákuaʼana. Inka ña̱ chindeétáʼan xíʼinra ña̱ sanáʼa̱ra inkana kúú ña̱ ndukúra consejo nu̱ú na̱ anciano na̱ xa̱a̱ ku̱a̱ʼá ku̱i̱ya̱ ñúʼu ti̱xin ñuu Ndióxi̱, ta keʼéra ña̱ káʼa̱nna xíʼinra (1 Tim. 5:17). Na̱ anciano xíniñúʼu chikaa̱na ndee̱ xíʼin na̱ hermano, ta saátu xíniñúʼu taxina consejo ndaʼa̱na. Ta nda̱a̱ sava yichi̱ xíniñúʼu ka̱ʼa̱nna xíʼinna xa̱ʼa̱ ña̱ va̱ása va̱ʼa kéʼéna, soo xíniñúʼu vií ka̱ʼa̱nna xíʼinna. Tá vií káʼa̱nna xíʼin na̱ hermano ta íxato̱ʼónana ta xíniñúʼuna Biblia tá sánáʼa̱nana, saá xa̱a̱na keʼéna nda̱a̱ táki̱ʼva ke̱ʼé ta̱ Jesús (Mat. 11:​28-30; 2 Tim. 2:24).

KIVIVA KOÚN ANCIANO

17. a) ¿Ndáaña kivi chikaa̱ ndee̱ xíʼin na̱ siervo ministerial ña̱ va̱ʼa xa̱a̱na koona anciano? b) ¿Ndáaña xíniñúʼu ndakaʼán na̱ anciano tá xa̱a̱ xítona ndáana kúú na̱ kivi xa̱a̱ koo anciano? (Koto recuadro “Ndáaña xíniñúʼu kiʼinna kuenta xíʼin tá xa̱a̱ ndáka̱xinna iin ta̱ hermano ña̱ koora anciano”).

¹⁷ Vitin ña̱ xa̱a̱ xi̱toyó ndáa requisito kúú ña̱ xíniñúʼu keʼé iin ta̱ hermano ña̱ va̱ʼa xa̱a̱ra koora anciano, sana sava na̱ siervo ministerial kivi ndakanixi̱nína ña̱ kǒo kiviví xa̱a̱na koona anciano. Soo ndakaʼánndó chi ni Jehová ni na̱ ñuura kǒo ndátuna ña̱ viíní keʼéndó ña̱yóʼo (1 Ped. 2:21). Jehová taxira espíritu santora ndaʼa̱ndó ña̱ va̱ʼa xa̱a̱ndó keʼéndó chiñu yóʼo (Filip. 2:13). ¿Á íyo iin ña̱ ni̱ka̱ʼa̱nyó xa̱ʼa̱ nu̱ú artículo yóʼo ña̱ xíniñúʼu viíka keʼún? Tá saá ka̱ʼa̱n xíʼin Jehová, nandukú xa̱ʼa̱ ña̱ kúni̱ún viíka keʼún, ta ka̱ʼa̱n xíʼin na̱ anciano ná ka̱ʼa̱nna xíʼún ndáaña xíniñúʼu viíka keʼún.

18. ¿Ndáaña xíniñúʼu keʼé ndiʼi na̱ siervo ministerial?

¹⁸ Nda̱a̱ na̱ xa̱a̱ kúú anciano xíniñúʼu chikaa̱na ndee̱ ña̱ viíníka keʼéna ña̱ sa̱kúaʼayó nu̱ú artículo yóʼo (Filip. 3:16). Tá siervo ministerial kúún, chikaa̱ ndee̱ ña̱ va̱ʼa xa̱ún koún anciano. Ka̱ʼa̱n xíʼin Jehová ná sanáʼa̱ra yóʼó ta ná chindeétáʼanra xíʼún ña̱ va̱ʼa viíka kachíñún nu̱úra ta saátu ña̱ chindeétáʼún xíʼin na̱ hermano (Is. 64:8). Mií Jehová chindeétáʼan xíʼún ña̱ va̱ʼa xa̱ún koún anciano.