Ndióxi̱ ndiʼi tiempo ku̱ʼvi-inira kunira miíyó

1, 2. ¿Ndáaña ndóʼo ku̱a̱ʼání na̱ hermano tá yáʼana nu̱ú tu̱ndóʼo?

NDAKANIXI̱NÍ iin tú barco ndíkaa̱nú nu̱ú mar ta ndeéní kúún sa̱vi̱ ta káni ta̱chí. Ta mar ndeéní kánda̱ nu̱úra ta nda̱a̱ kivi sánduvara tú barco ta ña̱ va̱ʼa kǒo nduva túyóʼo xíniñúʼu sakánana iin ka̱a ña̱ naní ancla ti̱xin tá mar.

² ¿Á ndíka̱ún nu̱ú tu̱ndóʼo? Sana ndóʼún nda̱a̱ táki̱ʼva íyo tú barco yóʼo. Xa̱ʼa̱ ña̱ ndóʼún yóʼo kivi sandákavaña-iniún. Sana iin ki̱vi̱ kándíxaún ña̱ kúni̱ní Jehová xínira yóʼó ta chíndeétáʼanra xíʼún ta inka ki̱vi̱ ndákanixi̱níún ña̱ kǒo kíʼinvíra kuenta xíʼin ña̱ yáʼún nu̱ú (Sal. 10:1; 13:1). Sana iin na̱ migoún chi̱kaa̱na ndee̱ xíʼún ta̱ xa̱ʼa̱ ña̱kán va̱ʼa kúniún loʼo tiempo (Prov. 17:17; 25:11). Soo tá yáʼa loʼo tiempo xíka tuku iniún ta sana nda̱a̱ túviún ña̱ kǒo ndíʼi̱ka-ini Jehová xa̱ʼún. Tá saá ndóʼún, ¿ndáa ki̱ʼva kandíxaún ña̱ chíndeétáʼanva Jehová xíʼún ta kúʼvi̱-inira xínira yóʼó?

3. a) ¿Ndáaña kúni̱ kachi tu̱ʼun kúʼvi̱-ini? (Salmo 31:7; 136:1). b) ¿Nda̱chun iinlá Jehová kúú ta̱ va̱ʼaní náʼa̱ ña̱yóʼo? (Koto na̱ʼná).

³ Tá yáʼayó nu̱ú tu̱ndóʼo ña̱ yo̱ʼvi̱, iin ki̱ʼva ña̱ kundaa-iniyó Jehová kúú ña̱ ndakaʼányó ña̱ kúʼvi̱ní-inira xínira miíyó (kaʼvi Salmo 31:7;a 136:1).b Tu̱ʼun ña̱ “ndixaní kúʼvi̱-ini” táxiña kúnda̱a̱-iniyó ña̱ kúʼvi̱-ini inka na̱ yiví xínina inkana soo iinlá Jehová kúú ta̱ kivi na̱ʼa̱ ña̱yóʼo nu̱úyó. Biblia káʼa̱nña ña̱ ndixaní kúʼvi̱-inira xínira ndiʼi na̱ ndásakáʼnu miíra (Éx. 34:​6, 7; Sal. 86:5). Ña̱yóʼo kúni̱ kachiña, Jehová va̱ása sandákoondaʼa̱ra na̱ ndásakáʼnu miíra. Tá ná ndakaʼún xa̱ʼa̱ ña̱yóʼo kivi chindeétáʼanña xíʼún tá ná ya̱ʼún nu̱ú tu̱ndóʼo (Sal. 23:4).

SIʼNA SA̱KÚAʼAYÓ ÑA̱ KÚʼVI̱-INI JEHOVÁ XÍNIRA MIÍYÓ

4. a) ¿Ndáaña siʼna sa̱kúaʼayó nu̱ú Biblia? b) ¿Nda̱chun va̱ása taxiyó ña̱ sandáʼvi inkana miíyó?

⁴ Tá yáʼayó nu̱ú tu̱ndóʼo ná ndakaʼányó xa̱ʼa̱ ña̱ siʼna sa̱kúaʼayó tá kúú ña̱ kúʼvi̱ní-ini Ndióxi̱ xínira miíyó ña̱yóʼo chíndeétáʼan xíʼinyó. ¿Ndáaña siʼna ki̱xáʼún sákuaʼún nu̱ú Biblia? Ku̱ndaa̱-iniún xa̱ʼa̱ ña̱ nda̱a̱ ña̱ va̱xi nu̱ú Biblia. Tá kúú ku̱ndaa̱-iniún ña̱ ki̱vi̱ Ndióxi̱ kúú Jehová, ta̱ Jesús kúú “se̱ʼera ta̱ nu̱ú”, na̱ ni̱xi̱ʼi̱ va̱ása ñúʼuka-inina xa̱ʼa̱ nda̱a̱ ni iin ña̱ʼa ta nu̱ú ñuʼú nduliviña ta na̱ xa̱a̱ koo nu̱úña kutakuna ndiʼi tiempo (Sal. 83:18; Ecl. 9:5; Juan 3:16; Apoc. 21:​3, 4). Tá ku̱ndaa̱-iniún ña̱ nda̱a̱ kúú ndiʼi ña̱yóʼo, ¿á su̱ví ña̱ nda̱a̱ va̱ása taxiún ña̱ sandáʼvi inkana yóʼó? Ña̱kán tá siʼna ña̱ ni̱xa̱ʼún ku̱ndaa̱-iniún xa̱ʼa̱ kúú ña̱ kúʼvi̱-ini Jehová xínira yóʼó, va̱ása taxiún ña̱ sandáʼvi inkana yóʼó ña̱ va̱ása ndíʼi̱-inira xa̱ʼún. Ná ka̱ʼa̱n loʼokayó xa̱ʼa̱ ña̱yóʼo.

5. ¿Ndáa ki̱ʼva xáa̱ iin na̱ yiví sándakoona ña̱ vatá ña̱ xi̱kandíxana?

⁵ Tá ki̱xáʼún káʼviún Biblia, ¿ndáaña chi̱ndeétáʼan xíʼún ña̱ nasamaún ña̱ ndákanixi̱níún? Sana chi̱táʼún ña̱ sa̱náʼa̱na yóʼo ti̱xin religión nu̱ú xi̱ndika̱ún xíʼin ña̱ sánáʼa̱ Biblia. Ná kachiyó ña̱ sana xi̱ndakanixi̱níún ta̱ Jesús kúú Ndióxi̱ soo tá ki̱xáʼún sákuaʼún sana nda̱kanixi̱níún: “¿Á ña̱ nda̱a̱ kúú ña̱yóʼo?”. Tasaá ki̱xáʼún sákuaʼa va̱ʼún xa̱ʼa̱ ña̱ káʼa̱n Biblia ta ki̱ʼún kuenta ña̱ vatáva kúú ña̱ sa̱náʼa̱na yóʼó. Ta ki̱xáʼún kándíxaún ña̱ nda̱a̱: Ta̱ Jesús kúú “ta̱ nu̱ú va̱ʼa na̱kuva̱ʼa nu̱ú ndiʼika ña̱ʼa” ta saátu kúúra “se̱ʼe mitúʼun Ndióxi̱” (Col. 1:15; Juan 3:18). Sana ixayo̱ʼvi̱vaña xíʼinyó ndakooyó ña̱ vatá ña̱ sa̱náʼa̱na miíyó tá ya̱chi̱ (2 Cor. 10:​4, 5). Soo tá xa̱a̱ nda̱kooyó ña̱ kandíxayó ña̱ vatá yóʼo, ná va̱ása ndikó tukuyó keʼéyóña (Filip. 3:13).

6. ¿Nda̱chun ku̱a̱ʼání yichi̱ káʼa̱n Salmo 136 ña̱ “ndiʼi tiempo náʼa̱ra ña̱ ndixaní kúʼvi̱-inira xínira miíyó”?

⁶ Tá yáʼún nu̱ú tu̱ndóʼo ta kíxáʼún ndákanixi̱níún ña̱ va̱ása kúni̱ka Jehová xínira yóʼó, kivi nda̱ka̱tu̱ʼún ña̱yóʼo miíún: “¿Á ña̱ ndixa kúú ña̱yóʼo?” Kivi chitáʼún ña̱ xíka-iniún xíʼin ña̱ sánáʼa̱ Biblia ña̱ kúʼvi̱ní-ini Jehová xínira yóʼó ña̱ va̱xi nu̱ú Salmo 136:1 texto nu̱ú ka̱na artículo yóʼo. ¿Nda̱chun káʼa̱n Jehová ña̱ kúʼvi̱ní-inira xínira miíyó? Ta, ¿nda̱chun 26 yichi̱ va̱xi tu̱ʼun “ndiʼi tiempo náʼa̱ra ña̱ ndixaní kúʼvi̱-inira xínira miíyó” nu̱ú ña̱ salmo yóʼo? Nda̱a̱ táki̱ʼva xa̱a̱ ku̱ndaa̱-iniyó, Ndióxi̱ kúʼvi̱-inira xínira na̱ ñuura ta ña̱yóʼo kúú iin ña̱ nda̱a̱ ña̱ siʼna sa̱kúaʼayó xa̱ʼa̱. Ña̱ ndákanixi̱níyó ña̱ va̱ása ndíʼi̱-ini Jehová xa̱ʼa̱yó, iin ña̱ vatá kúú ña̱yóʼo ña̱kán va̱ása xíniñúʼu ndakanixi̱níyó saá nda̱a̱ táki̱ʼva kǒo níkandíxakayó ña̱ vatá ña̱ sa̱náʼa̱na miíyó tá ya̱chi̱.

7. ¿Ndáa texto kúú ña̱ náʼa̱ nu̱úyó ña̱ ndixa kúʼvi̱-ini Jehová xínira miíyó?

⁷ Nu̱ú Biblia ndáni̱ʼíyó ku̱a̱ʼání texto ña̱ náʼa̱ nu̱úyó ña̱ ndixa kúʼvi̱-ini Jehová xínira miíyó. Ná kotoyó u̱vi̱ texto ña̱ káʼa̱n xa̱ʼa̱ ña̱yóʼo. Ta̱ Jesús ni̱ka̱ʼa̱nra xíʼin na̱ discípulora: “Ndáyáʼviníkava ndóʼó nu̱ú ku̱a̱ʼá tí saa válí” (Mat. 10:31). Ta kǒo níka̱ʼa̱nra: “Sana ndáyáʼviníva ndóʼó nu̱ú tí saa válí”. Mií Jehová ni̱ka̱ʼa̱n ña̱yóʼo xíʼin na̱ ñuura: “Yi̱ʼi̱ taxi ndee̱ ndaʼún. Yi̱ʼi̱ chindeétáʼan xíʼún. Xíʼin ndaʼa̱ kúaʼi̱ ña̱ kéʼíi̱ ña̱ nda̱kú tii̱n yóʼó” (Is. 41:10). Jehová kǒo níka̱ʼa̱nra: “Sana chindeétáʼi̱n xíʼún”. Texto yóʼo kǒo káʼa̱nña á kivi keʼéraña chi káʼa̱n káxivaña ña̱ kiviva keʼéraña. Ña̱kán tá yáʼún nu̱ú iin tu̱ndóʼo ta ndákanixi̱níún ña̱ va̱ása kúʼvi̱ka-ini Ndióxi̱ xínira yóʼó, texto yóʼo kivi chindeétáʼanña xíʼún ña̱ kandíxaún ña̱ kúʼvi̱níva-ini Jehová xínira yóʼó. Ndakanixi̱ní xa̱ʼa̱ ña̱yóʼo ta ka̱ʼa̱n xíʼin Jehová xa̱ʼa̱ ña̱ xíka-iniún xa̱ʼa̱. Tá ná keʼún saá kivi ka̱ʼún nda̱a̱ táki̱ʼva ni̱ka̱ʼa̱n na̱ cristiano na̱ ni̱xi̱yo tá siglo nu̱ú tá ka̱china: “Miíyó ni̱xa̱a̱yó na̱kunda̱a̱-iniyó ña̱ kúʼvi̱-ini Ndióxi̱ xínira miíyó ta va̱ása xíka-iniyó xa̱ʼa̱ ña̱yóʼo” (1 Juan 4:16).c

8. ¿Ndáaña kivi keʼéyó tá xíkaka-iniyó ña̱ kǒo kúni̱ Jehová xínira miíyó?

⁸ Tá xíkaka-iniún ña̱ kǒo kúni̱ Jehová xínira yóʼó, chitáʼan ña̱ ndóʼún xíʼin ña̱ xa̱a̱ xíni̱ún xa̱ʼa̱. Ni túviún ña̱ kǒo kúʼvi̱-ini Jehová xínira yóʼó su̱ví ña̱ ndixaví kúú ña̱yóʼo, saáchi Biblia sánáʼa̱ña miíyó ña̱ kúʼvi̱níva-ini Jehová xínira miíyó. Ndakaʼán chi Biblia nina ña̱ nda̱a̱ káʼa̱nña, soo ña̱ ndóʼoyó kiviva sandáʼviña miíyó. Tá kǒo kándíxayó ña̱ kúʼvi̱-ini Ndióxi̱ xínira miíyó yáʼandosóyó ña̱ káʼa̱n Biblia xa̱ʼa̱ra ña̱ kúúra iin Ndióxi̱ ta̱ kúʼvi̱-ini xíni na̱ yiví (1 Juan 4:8).

NÁ NDAKANIXI̱NÍYÓ ÑA̱ KÚNI̱NÍVA NDIÓXI̱ XÍNIRA MIÍYÓ

9, 10. ¿Ndáaña xi̱kuni̱ kachi ta̱ Jesús tá ni̱ka̱ʼa̱nra “Yivái̱ kúʼvi̱níva-inira xínira ndóʼó”? (Juan 16:​26, 27; koto na̱ʼná).

⁹ Inka ña̱ chindeétáʼan xíʼinyó ña̱ kandíxayó ña̱ kúʼvi̱níva-ini Jehová xínira miíyó kúú ña̱ ndakanixi̱níyó xa̱ʼa̱ ña̱ ni̱ka̱ʼa̱n ta̱ Jesús xíʼin na̱ discípulora: “Saáchi yivái̱ kúʼvi̱níva-inira xínira ndóʼó” (kaʼvi Juan 16:​26, 27). ¿Nda̱chun ni̱ka̱ʼa̱nra ña̱yóʼo? ¿Á ni̱ka̱ʼa̱nra ña̱yóʼo ña̱ va̱ʼa kusi̱í kuití inina? Va̱ása, saáchi texto ña̱ chí sa̱ta va̱ása káʼa̱nña xa̱ʼa̱ ña̱ xi̱ndoʼo na̱ discípulo chi xa̱ʼa̱ oración ni̱ka̱ʼa̱nra xíʼinna.

¹⁰ Ta̱ Jesús ni̱ka̱ʼa̱nra xíʼin na̱ discípulora ná kuniñúʼuna ki̱vi̱ra tá ná ka̱ʼa̱nna xíʼin Ndióxi̱ soo su̱ví xíʼin miíra ka̱ʼa̱nna (Juan 16:​23, 24). Xi̱niñúʼu kiʼinnína kuenta xíʼin ña̱yóʼo. ¿Nda̱chun? Saáchi xa̱ʼa̱ ña̱ ni̱xa̱a̱na ndu̱una migo ta̱ Jesús, na̱yóʼo xi̱nina tá nda̱takura ta nda̱a̱ kivi kixáʼana ka̱ʼa̱nna xíʼin miíra ta su̱víka xíʼin Ndióxi̱. Xa̱ʼa̱ ña̱ xi̱kuni̱ní ta̱ Jesús na̱yóʼo kivi ndakanixi̱nína, va̱ʼaka xíʼin miíra ka̱ʼa̱nna tasaá ta̱yóʼo ka̱ʼa̱nra xíʼin yivára ña̱ káʼa̱nna xíʼinra. Soo ta̱ Jesús ni̱ka̱ʼa̱nra xíʼinna ña̱ va̱ása va̱ʼaví ndakanixi̱nína saá, saáchi ka̱chira xíʼinna: “Yivái̱ kúʼvi̱níva-inira xínira ndóʼó”. Kúni̱ní Jehová xínira miíyó ña̱kán xíniso̱ʼora oración ña̱ káʼa̱nyó xíʼinra ta ña̱yóʼo kúú ña̱ sánáʼa̱ Biblia miíyó xa̱ʼa̱ oración. Ndakanixi̱ní ndáaña kúni̱ kachi ña̱yóʼo nu̱ú miíún, tá ki̱xáʼún káʼviún Biblia ku̱ndaa̱-iniún xa̱ʼa̱ ta̱ Jesús ta ki̱xaún kúʼvi̱-iniún xíniúnra (Juan 14:21). Nda̱a̱ táki̱ʼva ke̱ʼe na̱ discípulo na̱ ni̱xi̱yo tá siglo nu̱ú, va̱ása kaka-iniún ña̱ ka̱ʼún xíʼin Ndióxi̱ tá ná ka̱ʼún xíʼinra chi kuniso̱ʼovara miíún ta kúni̱ra xínira yóʼó. Ndiʼi yi̱chi̱ ña̱ káʼún xíʼin Jehová náʼún ña̱ kándíxavaúnra ta saátu ña̱ kúni̱ra xínira yóʼó (1 Juan 5:14).

NÁ KOTOYÓ NDA̱CHUN KÚÚ ÑA̱ XÍKA-INIYÓ

11. ¿Ndáana kúsi̱í-ini tá kíxáʼayó xíka-iniyó ña̱ kúʼvi̱-ini Jehová xínira miíyó?

¹¹ Tá xíka-iniyó sana ndákanixi̱níyó ta̱ Ndi̱va̱ʼa kúú ta̱ kúni̱ ña̱ ná kaka-iniyó ta ña̱ ndixa kúúva ña̱yóʼo. Kúni̱ra sandíʼi-xa̱ʼa̱ra iin tá iin miíyó ta saátu kúni̱ra ña̱ ná ndakanixi̱níyó ña̱ va̱ása kúni̱ví Jehová xínira miíyó (1 Ped. 5:8). Ta xa̱ʼa̱ ña̱ ni̱kuʼvi̱-ini Jehová xi̱nira miíyó ta̱xira se̱ʼera ña̱ ni̱xi̱ʼi̱ra xa̱ʼa̱yó. Soo ta̱ Ndi̱va̱ʼa kúni̱ra ña̱ ná ndakanixi̱níyó ña̱ va̱ása níxiniñúʼuví kuvi ta̱ Jesús xa̱ʼa̱yó chi ku̱a̱ʼáníva ku̱a̱chi kíʼviyó nu̱ú Ndióxi̱ (Heb. 2:9). ¿Ndáana kúsi̱í-ini tá xíka-iniyó á ndixa kúʼvi̱-ini Jehová xínira miíyó? Ta̱ Ndi̱va̱ʼa. Ta saátu, ¿ndáana kúsi̱í-ini tá ndákava-iniyó tá yáʼayó nu̱ú tu̱ndóʼo? Suvi mií ta̱ Ndi̱va̱ʼa. Soo ná ndakaʼányó chi ta̱yóʼova kúú ta̱ va̱ása kúʼvi̱ka-ini Ndióxi̱ xínira, ta kúni̱ra ña̱ ná ndakanixi̱níyó ña̱ miíyó kúú na̱ va̱ása kúʼvi̱ka-ini Ndióxi̱ xínira (Efes. 6:11). Ña̱ kúnda̱a̱-iniyó ndáaña kúú ña̱ kúni̱ra keʼéra xíʼinyó ña̱yóʼo chindeétáʼanña xíʼinyó ña̱ kǒo sandáʼvira miíyó (Sant. 4:7).

12, 13. ¿Nda̱chun kivi kixáʼa kaka-iniyó á ndixa kúʼvi̱-ini Jehová xínira miíyó?

¹² Su̱ví nda̱sa ta̱ Ndi̱va̱ʼa kúni̱ ña̱ ná kaka-iniyó á ndixa kúʼvi̱-ini Jehová xínira miíyó chi saátu xa̱ʼa̱ ña̱ kúúyó na̱ yiví ku̱a̱chi á kéʼéyó ña̱ va̱ása va̱ʼa kúú ña̱ kíxáʼa xíka-iniyó á kúʼvi̱-ini Jehová xínira miíyó (Sal. 51:5; Rom. 5:12). Ku̱a̱chi kúú ña̱ sa̱kúxíká miíyó nu̱ú Ndióxi̱ xa̱ʼa̱ ña̱yóʼo kúú ña̱ va̱ása va̱ʼa ndákanixi̱níyó á káni kue̱ʼe̱ miíyó.

¹³ Xa̱ʼa̱ ña̱ kúúyó na̱ yiví ku̱a̱chi kúú ña̱ kíxáʼayó ndíʼi̱-iniyó xa̱ʼa̱ ña̱ va̱ása va̱ʼa kéʼéyó, káni kue̱ʼe̱ miíyó tá kúú ña̱ ansiedad, xíka-iniyó ta kúkaʼan nu̱úyó. Ña̱yóʼo kivi kundoʼoyóña tá kíʼviyó ku̱a̱chi. Xa̱ʼa̱ ña̱ kúnda̱a̱-iniyó ña̱ kúúyó na̱ yiví ku̱a̱chi ndóʼovayó ña̱yóʼo nda̱a̱ tiempo vitin, soo su̱ví ña̱yóʼo kúú ña̱ níxikuni̱ Ndióxi̱ ná kundoʼoyó (Rom. 8:​20, 21). Xa̱ʼa̱ ña̱ kúúmiíyó ku̱a̱chi va̱ása kívi vií ndakanixi̱níyó nda̱a̱ táki̱ʼva xi̱kuni̱ Ndióxi̱ tá xa̱ʼa̱, nda̱a̱ táki̱ʼva ndóʼo iin carro ni va̱ʼaníva káchíñunú soo tá kǒo ta̱chí iin llantanú va̱ása kívi kakanú. Ña̱kán kivi kaka-iniyó á ndixa kúʼvi̱-ini Jehová xínira miíyó. Ná ndakaʼányó chi Jehová “Ndióxi̱ ta̱ íyoní ndee̱ [...] náʼa̱ra ña̱ ndixaní kúʼvi̱-inira xínira na̱ kúni̱ xíni miíra ta kéʼéna ña̱ káʼa̱nra xíʼinna” (Neh. 1:5).

14. Ña̱ ni̱xi̱ʼi̱ ta̱ Jesús xa̱ʼa̱yó, ¿ndáa ki̱ʼva chíndeétáʼanña xíʼinyó ña̱ kǒo kaka-iniyó ña̱ kúni̱va Jehová xínira miíyó? (Romanos 5:8; koto recuadro ña̱ naní “Ná kiʼinyó kuenta xíʼin ‘ndee̱ ña̱ kúúmií ku̱a̱chi’”).

¹⁴ Sava yichi̱ kivi kixáʼayó ndakanixi̱níyó ña̱ va̱ása xíniñúʼu kuʼvi̱ví-ini Jehová kunira miíyó. Ta saá íyovaña, soo Jehová náʼa̱vara ña̱ kúni̱ra xínira miíyó. Soo su̱ví xa̱ʼa̱ ña̱ kéʼéyó kúú ña̱ kivi na̱ʼa̱ Jehová ña̱ kúni̱ra xínira miíyó. Ta xa̱ʼa̱ ña̱ kúni̱ra xínira miíyó nda̱a̱ ta̱xira se̱ʼera ni̱xi̱ʼi̱ra xa̱ʼa̱yó ña̱ va̱ʼa ixakáʼnu-inira xa̱ʼa̱yó (1 Juan 4:10). Ná ndakaʼányó chi ta̱ Jesús kǒo níkixira ña̱ sakákura na̱ yiví na̱ kǒo ku̱a̱chi kúúmií, chi ki̱xira xa̱ʼa̱ na̱ kúúmií ku̱a̱chi (kaʼvi Romanos 5:8). Jehová kǒo ndátura ña̱ va̱ʼaní ná keʼéyó ndiʼi ña̱ʼa saáchi kúnda̱a̱-inira ña̱ va̱ása viíví keʼéyó ndiʼi ña̱ʼa. Xa̱ʼa̱ ña̱ kúnda̱a̱-iniyó ña̱ kúúyó na̱ yiví ku̱a̱chi kivi kaka-iniyó á ndixa kúʼvi̱-ini Jehová xínira miíyó soo ña̱yóʼo kivi chindeétáʼanña xíʼinyó ña̱ kǒo ndakanixi̱níyó saá (Rom. 7:​24, 25).

NDA̱KÚ NÁ KOO INIYÓ

15, 16. Tá nda̱kú íyo iniyó xíʼin Jehová, ¿ndáaña kivi kandíxayó ta nda̱chun? (2 Samuel 22:26).

¹⁵ Tá yáʼayó nu̱ú tu̱ndóʼo, Jehová kúni̱ra ña̱ nda̱kú ná koo iniyó ta vií ná koo ña̱ ndaka̱xinyó keʼéyó ta ná kundaa-iniyóra (Deut. 30:​19, 20). Tá nda̱kú íyo iniyó xíʼinra, kivi kandíxayó ña̱ saátu miíra nda̱kú koo inira xíʼinyó ta va̱ása sandákoondaʼa̱ra miíyó ni nda̱a̱ ndáaka ña̱ ndóʼoyó (kaʼvi 2 Samuel 22:26).

¹⁶ Nda̱a̱ táki̱ʼva xa̱a̱ ku̱ndaa̱-iniyó tá yáʼayó nu̱ú tu̱ndóʼo ña̱ kivi keʼéyó kúú ña̱ nda̱kú koo iniyó. Ná ndakaʼányó ña̱ kúʼvi̱va-ini Jehová xínira miíyó ta íyo tu̱ʼvara ña̱ chindeétáʼanra xíʼinyó. Tá sava yichi̱ xíka-iniyó á ndixa kúʼvi̱-ini Jehová xínira miíyó, ná kǒo nandósoyó chi xa̱a̱ síín kúú ña̱ ndákanixi̱níyó ta xa̱a̱ síín kúú ña̱ kúnda̱a̱-iniyó xa̱ʼa̱. Ná kǒo nandóso-iniyó xa̱ʼa̱ ña̱ xa̱a̱ sa̱kúaʼayó nu̱ú Biblia, ña̱ ndiʼi tiempo kúʼvi̱-ini Jehová xínira miíyó.