U̱vi̱ ta̱ Cuerpo Gobernante xa̱á

TÁ 5 TÍ OCTUBRE 2024, ti̱xin ña̱ reunión anual ni̱ka̱ʼa̱nna: Ta̱ Jody Jedele xíʼin ta̱ Jacob Rumph ni̱xa̱a̱ná ndu̱una Cuerpo Gobernante. U̱vi̱ saá na̱ ñaniyó yóʼo xa̱a̱ ku̱a̱ʼání ku̱i̱ya̱ káchíñuna nu̱ú Jehová.

Ta̱ Jedele ka̱kura chí Misuri (Estados Unidos). Na̱ yivára sa̱náʼa̱nara xa̱ʼa̱ ña̱ nda̱a̱. Nu̱ú xi̱ndoo na̱yóʼo loʼoní na̱ testigo Jehová ni̱xi̱yo. Xa̱ʼa̱ ña̱ xi̱xaʼa̱n na̱ hermano xi̱natúʼunna xa̱ʼa̱ Ndióxi̱ ñuu kán, va̱ʼa xi̱nitáʼanra xíʼin na̱ hermano na̱ ke̱e xa̱a̱ síín síín ñuu. Ña̱ xi̱xitora ña̱ kúʼvi̱-ini na̱ ñuu Ndióxi̱ xínitáʼanna ta viíní kítáʼanna chi̱ndeétáʼanña xíʼinra ña̱ sa̱kúaʼara xa̱ʼa̱ tu̱ʼun Ndióxi̱. Nda̱kuchira 15 tí octubre ña̱ ku̱i̱ya̱ 1983 ta xi̱kutóoníra ka̱ʼa̱nra xíʼin na̱ yiví xa̱ʼa̱ tu̱ʼun Ndióxi̱. Tá sa̱ndíʼira ka̱ʼvira escuela ki̱xáʼara kúúra precursor regular tá ku̱i̱ya̱ 1989.

Miíra xíʼin ku̱ʼvara tá ni̱xi̱yo válína na̱ yivána xi̱xa̱ʼa̱nna xíʼinna Betel. Ña̱yóʼo chi̱ndeétáʼan xíʼinna ña̱ kuni̱na kachíñuna Betel, tasaá ke̱ʼévana. Tá septiembre ña̱ ku̱i̱ya̱ 1990 ta̱ Jedele ki̱xáʼara káchíñura Betel ña̱ ndíkaa̱ chí Wallkill. Siʼnaka ka̱chíñura xíʼin Departamento ña̱ Limpieza ta tándi̱ʼi xíʼin ña̱ Departamento ña̱ Servicios Médicos.

Tiempo saá yatin kán ni̱xi̱yo congregación tu̱ʼun sáʼán, xa̱ʼa̱ ña̱ va̱xi ndu̱u ku̱a̱ʼákana xi̱xiniñúʼuna na̱ hermano na̱ chindeétáʼan xíʼinna. Ta̱ Jedele ki̱xáʼara xáʼa̱nra iin congregación yóʼo ta ki̱xáʼara sákuaʼara tu̱ʼun sáʼán. Tá ni̱ya̱ʼa loʼo tiempo xi̱nitáʼanra xíʼin iin ñá precursora ñá naní Dámaris, ta tá ni̱ya̱ʼa tiempo tindaʼa̱na ta inkáchi ki̱xáʼana káchíñuna Betel.

Tá ku̱i̱ya̱ 2005 ke̱ena Betel ña̱ va̱ʼa kundaana na̱ yivána. Tiempo saá xi̱kuuna precursor regular, ta sava yi̱chi̱ ta̱ Jedele xi̱sanáʼa̱ra ti̱xin Escuela nu̱ú Sákuaʼa na̱ Precursor. Saátu xi̱kachíñura xíʼin na̱ Comité na̱ nátúʼun xíʼin na̱ hospital ta saátu xíʼin na̱ Comité Regional de Construcción.

Tá ku̱i̱ya̱ 2013 ni̱ka̱ʼa̱n tukuna xíʼinna ña̱ ndíkó tukuna kachíñuna Betel, soo ña̱ kachíñuna nu̱ú kúva̱ʼa Betel ña̱ Warwick. Saátu xa̱a̱ ka̱chíñuna Patterson xíʼin Wallkill. Ta̱ Jedele xa̱a̱ ka̱chíñutura xíʼin na̱ Departamento Local ña̱ Diseño xíʼin Construcción ta saátu Departamento ña̱ naní Servicios de Información sobre Hospitales. Tá marzo ña̱ ku̱i̱ya̱ 2023 ki̱xáʼara káchíñura xíʼin na̱ chíndeétáʼan xíʼin na̱ Comité ña̱ Servicio. Ta̱yóʼo káʼa̱nra xa̱ʼa̱ chiñu ña̱ ke̱ʼéra, káchira: “Sava yi̱chi̱ ndíʼi̱-iniyó tá táxina iin chiñu ña̱ ta̱ʼán keʼéyó, soo saá kúú ña̱ xíniñúʼu kundaaka-iniyó Jehová chi iinlá ta̱yóʼo kúú ta̱ kivi chindeétáʼan xíʼinyó ña̱ kuchiñuyó keʼéyó ña̱yóʼo”.

Ta̱ Rumph ka̱kura chí California (Estados Unidos). Tá ni̱xi̱yo loʼora, siʼíra va̱ása níxixaʼa̱nkañá reunión ta ni va̱ása níxinatúʼunkañá xíʼin na̱ yiví xa̱ʼa̱ Ndióxi̱, soo ñáyóʼo chi̱kaa̱níñá ndee̱ ña̱ sa̱náʼa̱ñá miíra xa̱ʼa̱ ña̱ nda̱a̱ ña̱ va̱xi nu̱ú Biblia. Ndiʼi ku̱i̱ya̱ ta̱yóʼo xi̱xa̱ʼa̱nra xi̱xitora xi̱tánra. Ñáyóʼo nda̱kúní ni̱xi̱yo-iniñá ka̱chíñuñá nu̱ú Jehová ta chi̱ndeétáʼanñá xíʼinra ña̱ ná sakúaʼara. Tá xi̱kuumiíra 13 ku̱i̱ya̱ ni̱ka̱ʼa̱nra xíʼin na̱ hermano ña̱ ná kaʼvina xíʼinra. Tá 27 tí septiembre ña̱ ku̱i̱ya̱ 1992 nda̱kuchira. Siʼíra ki̱xáʼa tukuñá xáʼa̱nñá reunión ta saátu ki̱xáʼañá nátúʼunñá xíʼin na̱ yiví xa̱ʼa̱ Ndióxi̱ ta yivára xíʼin na̱ ñanira nda̱kuchina.

Tá ni̱xi̱yo loʼo ta̱ Rumph xi̱xitora ña̱ si̱íní ni̱xi̱yo na̱ precursor ña̱kán tándi̱ʼi ka̱ʼvira escuela, ki̱xáʼara kúúra precursor tá septiembre ña̱ ku̱i̱ya̱ 1995. Ta tá ku̱i̱ya̱ 2000 nda̱kiʼinra ku̱a̱ʼa̱nra chí Ecuador, nu̱ú xi̱xiniñúʼukana na̱ natúʼun xa̱ʼa̱ Ndióxi̱. Kán xi̱nitáʼanra xíʼin iin ñá precursora ñá ñuu Canadá ñá naní Inga ta tá ni̱ya̱ʼa loʼo tiempo ti̱ndaʼa̱na. Tá ni̱ya̱ʼa loʼo ña̱ ti̱ndaʼa̱na, nda̱kiʼinna ku̱a̱ʼa̱nna iin ñuu loʼo ña̱ ndíkaa̱ chí Ecuador nu̱ú ni̱xi̱yo iin grupo na̱ publicador ta tiempo vitin iin congregación káʼnu kúú ña̱yóʼo.

Tá ni̱ya̱ʼa tiempo ni̱ka̱ʼa̱nna xíʼinna ña̱ kuuna precursor especial ta tándi̱ʼi ta̱ hermano yóʼo xi̱kuura superintendente ña̱ circuito. Tá ku̱i̱ya̱ 2011 ka̱nana miína ña̱ ku̱ʼu̱nna escuela ña̱ Galaad 132. Tándi̱ʼi ka̱ʼvina escuela yóʼo, xa̱a̱ síín síín ñuu chi̱ndaʼána miína ta xa̱a̱ síín síín chiñu xi̱keʼéna tá kúú xi̱kuuna betelita, misionero xíʼin superintendente ta ta̱ hermano yóʼo saátu sa̱náʼa̱ra ti̱xin Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱.

Tá ki̱xáʼa kue̱ʼe̱ COVID-19, ndi̱kóna chí Estados Unidos. Ta ni̱ka̱ʼa̱nna xíʼinna ña̱ kachíñuna Betel ña̱ ndíkaa̱ chí Wallkill ta ta̱ Rumph nda̱kiʼinra capacitación xíʼin na̱ Departamento na̱ Servicio. Tándi̱ʼi nda̱kiʼinna ku̱a̱ʼa̱nna chí Ecuador ta ta̱ Rumph ka̱chíñura xíʼin na̱ Comité ña̱ Sucursal. Tá ku̱i̱ya̱ 2023, chi̱ndaʼána miína chí Warwick ta tá yo̱o̱ enero ña̱ ku̱i̱ya̱ 2024 ki̱xáʼara chíndeétáʼanra xíʼin na̱ Comité ña̱ Servicio. Ta̱yóʼo nátúʼunra xa̱ʼa̱ ñuu nu̱ú ni̱xi̱kara, káchira: “Tá káchíñuyó nu̱ú Jehová ña̱ ndáyá’vika kúú ña̱ inkáchi kachíñuyó xíʼin na̱ hermano ta su̱ví ñuu nu̱ú xíkayó”.

Chíndayáʼviníyó chiñu ña̱ kéʼé na̱ hermano yóʼo ta̱ ndáyáʼvinína nu̱úyó (Filip. 2:29).