Pregunta ña̱ kéʼé na̱ káʼvi tutu yóʼo

¿Ndáaña chikaa̱ Jehová ini na̱ chíñu keʼéna ti̱xin loʼo tiempo?

Tá ná kixáʼa ña̱ gran tribulación, Apocalipsis 17:​16, 17 káʼa̱nña ña̱yóʼo: “Ta 10 ndiki̱ ña̱ xi̱niún ta saátu tí kití yukú, sa̱a̱ní-inina kunina ñá ñaʼá ñá kísi̱ xíʼin ku̱a̱ʼání ta̱a ta sandíʼi-xa̱ʼa̱nañá, ta ndakoo chálánañá. Ta kaxína ku̱ñuñá, ta kaʼmi níínañá xíʼin ñuʼu̱. Saáchi mií Ndióxi̱ chi̱kaa̱-inina ña̱ keʼéna ña̱ ndákanixi̱níra xa̱ʼa̱, ña̱yóʼo kúni̱ kachiña ña̱ saxínuna ña̱ inkáchi kúni̱na keʼéna, ña̱ ndataxina nda̱yí ña̱ kúúmiína ña̱ kúúna rey ndaʼa̱ tí kití yukú”. Tá ya̱chi̱ nu̱ú tutu ña̱ tává na̱ ñuu Ndióxi̱ xi̱kaʼa̱nña ña̱ chikaa̱ Jehová ini na̱ chíñu ña̱ sandíʼi-xa̱ʼa̱na ndiʼi veʼe-ñu̱ʼu vatá.

Soo vitin xíniñúʼu nasamayó ki̱ʼva ña̱ xi̱kunda̱a̱-iniyó xíʼin ña̱yóʼo. Ña̱ chikaa̱ Jehová ini na̱ chíñu keʼéna kúú, “ña̱ ndataxina nda̱yí ña̱ kúúmiína ña̱ kúúna rey ndaʼa̱ tí kití yukú”. ¿Ndáa ki̱ʼva xi̱nu ña̱yóʼo? Ná ndakuiinyó sava pregunta ña̱ va̱ʼa kunda̱a̱-iniyó xa̱ʼa̱ ña̱yóʼo.

¿Ndáana káʼa̱n profecía yóʼo xa̱ʼa̱? Profecía yóʼo káʼa̱nña xa̱ʼa̱ “ñaʼá ñá kísi̱ xíʼin ku̱a̱ʼání ta̱a”, saátu naníñá “Babilonia ña̱ káʼnu”, ta ñáyóʼo ndána̱ʼa̱ñá ndiʼi veʼe-ñu̱ʼu vatá ña̱ íyo nu̱ú ñuʼú yóʼo. “Tí kití yukú tí color kúáʼa ña̱ yéʼe̱ní,” ndána̱ʼa̱rí iin organización ña̱ kuva̱ʼa tá ku̱i̱ya̱ 1919 ta chiñu ña̱ kúúmiíña kúú ña̱ chindeétáʼanña xíʼin na̱ yiví ña̱ va̱ása koo ku̱a̱chi iníísaá nu̱ú ñuʼú, ña̱yóʼo xi̱naníña Sociedad de Naciones ta vitin naníña Organización de las Naciones Unidas (Apoc. 17:​3-5). Ta “10 ndiki̱” ndána̱ʼa̱ña ndiʼi na̱ chíñu na̱ chíndeétáʼan xíʼin kití yukú yóʼo.

¿Ndáa ki̱ʼva kítáʼan ñaʼá ñá kísi̱ xíʼin ku̱a̱ʼání ta̱a xíʼin tí kití yukú tí color kúáʼa ña̱ yéʼe̱ní? Ñaʼá ñá kísi̱ xíʼin ku̱a̱ʼání ta̱a íyoñá sa̱tá tí kití yukú, ta ña̱yóʼo kúni̱ kachiña ña̱ chíndeétáʼanñá xíʼin tíyóʼo ta kúni̱ñá kuniʼiñá yichi̱ nu̱úrí á kaʼndañá chiñu nu̱úrí.

¿Ndáaña ndoʼo ñaʼá ñá kísi̱ xíʼin ku̱a̱ʼání ta̱a? Tí kití yukú xíʼin na̱ chíñu na̱ ndána̱ʼa̱ 10 ndiki̱ ña̱ chíndeétáʼan xíʼin ñáyóʼo, “sa̱a̱ní-inina kunina ñá ñaʼá ñá kísi̱ xíʼin ku̱a̱ʼání ta̱a”. Kindaana ndiʼi ña̱ ku̱i̱ká ña̱ kúúmiíñá ta na̱ʼa̱na ña̱ va̱ása va̱ʼa kéʼéñá nu̱ú ndiʼina. Tasaá saxínuna ña̱ ni̱ka̱ʼa̱n Jehová ta sandíʼi-xa̱ʼa̱na ñá ñaʼá yóʼo (Apoc. 17:1; 18:8). Saá kúú ña̱ ndiʼi-xa̱ʼa̱ ndiʼi veʼe-ñu̱ʼu vatá. Soo tá kúma̱níka kuu ña̱yóʼo, Jehová chikaa̱ra-ini na̱ chíñu ña̱ keʼéna iin ña̱ʼa ña̱ nda̱a̱ ni iin yichi̱ ta̱ʼán kuu.

¿Ndáaña chikaa̱ Jehová ini na̱ chíñu keʼéna? Nda̱a̱ táki̱ʼva xa̱a̱ ku̱ndaa̱-iniyó, chikaa̱ra-ini na̱ chíñu na̱ ndána̱ʼa̱ 10 ndiki̱ ña̱ keʼéna ña̱ “ndákanixi̱níra xa̱ʼa̱”: ña̱ ndataxina ndee̱ ña̱ kúúmiína ña̱ kúúna rey ndaʼa̱ tí kití yukú tí color kúáʼa ña̱ yéʼe̱ní, tí ndána̱ʼa̱ na̱ Naciones Unidas (Apoc. 17:13). Ndakanixi̱ní ndáaña kúni̱ kachi ña̱yóʼo. ¿Á mií na̱ chíñu kuni̱ keʼé ña̱yóʼo? Va̱ásaví chi profecía káʼa̱nña ña̱ mií Jehová kúú ta̱ chikaa̱-inina ña̱ keʼéna ña̱yóʼo (Prov. 21:1; chitáʼanña xíʼin Isaías 44:28). ¿Á loʼo tá loʼo ndataxina ndee̱ ña̱ kúúmiína? Va̱ása, chi iin sana kixáʼana keʼénaña. Ta tá ná ndakiʼin na̱ Naciones Unidas ndee̱ yóʼo sandíʼi-xa̱ʼa̱na ndiʼi veʼe-ñu̱ʼu vatá tasaá xi̱nu ña̱ ni̱ka̱ʼa̱n Jehová.

Tá saá, ¿ndáaña ndátuyó kuu chí nu̱únínu? Ná kǒo kundatuyó ña̱ ka̱ʼa̱nna ña̱ loʼo tá loʼo kixáʼa na̱ chíñu chindeétáʼanna xíʼin na̱ Naciones Unidas. Chi ndátuyó ña̱ iin kama chikaa̱ Jehová ini na̱ chíñu ña̱ ndataxina ndee̱ ña̱ kúúmiína ndaʼa̱ tí kití yukú tí ndána̱ʼa̱ na̱ Naciones Unidas. Tá ná kuu ña̱yóʼo kunda̱a̱-iniyó ña̱ xa̱a̱ ku̱nu̱mí kixáʼa ña̱ gran tribulación. Ña̱kán, ná kunditoyó ta viíní ná ndakanixi̱níyó saáchi iin kama nasa̱ma ndiʼi ña̱ʼa (1 Tes. 5:6).