ARTÍCULO ÑA̱ KAʼVIYÓ 20
Apocalipsis káʼa̱nña xíʼinyó ndáaña kundoʼo na̱ sáa̱-ini xíni Ndióxi̱
“Ta sa̱ndákutáʼanna na̱ rey nu̱ú iin lugar ña̱ naní Armagedón, ta ña̱yóʼo tu̱ʼun hebreo kúúña” (APOC. 16:16).
YAA 150 Jehová kúú ta̱ sáka̱ku yóʼó
ÑA̱ KA̱ʼA̱NYÓ XA̱ʼA̱a
1. Nda̱a̱ táki̱ʼva káʼa̱n libro ña̱ Apocalipsis, ¿ndáaña kéʼé ta̱ Ndi̱va̱ʼa xíʼin na̱ ndásakáʼnu Ndióxi̱?
LIBRO ña̱ Apocalipsis káʼa̱nña ña̱ xa̱a̱ ki̱xáʼa xáʼndachíñu Reino Ndióxi̱ chí ndiví, ta ni̱ta̱xi̱ ta̱ Ndi̱va̱ʼa va̱xira nu̱ú ñuʼú yóʼo (Apoc. 12:1-9). Iin ña̱ va̱ʼaní kúú ña̱yóʼo nu̱ú na̱ ndóo chí ndiví, soo miíyó na̱ ndóo nu̱ú ñuʼú yóʼo tu̱ndóʼova ki̱xáʼa íyo nu̱úyó. ¿Nda̱chun? Saáchi ta̱ Ndi̱va̱ʼa sáa̱níra ta íxandi̱va̱ʼara xíʼin na̱ ndásakáʼnu Ndióxi̱ (Apoc. 12:12, 15, 17).
2. ¿Ndáaña chindeétáʼan xíʼinyó ña̱ nda̱kú koo iniyó xíʼin Ndióxi̱?
2 ¿Ndáaña xíniñúʼu keʼéyó ña̱ va̱ʼa nda̱kú koo iniyó xíʼin Ndióxi̱ tá sáxo̱ʼvi̱ ta̱ Ndi̱va̱ʼa miíyó? (Apoc. 13:10). Iin ña̱ chindeétáʼan xíʼinyó kúú ña̱ kunda̱a̱-iniyó xa̱ʼa̱ ña̱ kuu chí nu̱únínu. Tá kúú, nu̱ú libro ña̱ Apocalipsis ta̱ apóstol Juan ni̱ka̱ʼa̱nra xa̱ʼa̱ ña̱ va̱ʼa ña̱ xa̱a̱ ku̱nu̱mí ndakiʼinyó. Ta saátu ni̱ka̱ʼa̱nra ña̱ ndiʼi-xa̱ʼa̱ na̱ sáa̱-ini xíni Ndióxi̱. Ña̱kán ná kotoyó ndáaña káʼa̱n libro ña̱ Apocalipsis xa̱ʼa̱ na̱yóʼo, ta ndáaña kundoʼona.
KITÍ TÍ NDÁNA̱ʼA̱ NA̱ SÁA̱-INI XÍNI NDIÓXI̱
3. ¿Ndáa kití kúú tí káʼa̱n libro ña̱ Apocalipsis xa̱ʼa̱?
3 Nu̱ú kíxáʼa libro ña̱ Apocalipsis náʼa̱ña nu̱úyó ña̱ íyo ña̱ kúni̱ kachi ña̱ ni̱ka̱ʼyi̱ nu̱úña (Apoc. 1:1). Libro yóʼo káʼa̱nña xa̱ʼa̱ kití yukú tí ndána̱ʼa̱ na̱ sáa̱-ini xíni Ndióxi̱. Tá kúú, káʼa̱nña xa̱ʼa̱ iin “kití yukú tí ki̱ta ini mar”, “10 xi̱kuu ndiki̱rí ta 7 xi̱kuu xi̱nírí” (Apoc. 13:1). Tasaá “ki̱ta inka kití yukú chí nu̱ú ñuʼú”. Ta nda̱a̱ táki̱ʼva káʼa̱n iin dragón saá káʼa̱nrí, ta “nda̱a̱ kée ñuʼu̱ chí ndiví ta kóyoña nu̱ú ñuʼú íxaarí” (Apoc. 13:11-13). Tándi̱ʼi káʼa̱nña xa̱ʼa̱ iin “kití yukú tí color kúáʼa ña̱ yéʼe̱ní”, ta sa̱tá tíyóʼo kánuu iin ñaʼá ñá kísi̱ xíʼin ku̱a̱ʼání ta̱a. U̱ni̱ saá tí kití yukú yóʼo ndána̱ʼa̱rí na̱ xa̱a̱ ku̱a̱ʼání ku̱i̱ya̱ sáa̱-ini xíni Jehová xíʼin Reinora. Xa̱ʼa̱ ña̱kán ndáyáʼviní kunda̱a̱-iniyó ndáana kúú na̱yóʼo (Apoc. 17:1, 3).
KU̱MÍ KITÍ TÍ NÁʼNUNÍ
“Kítarí ini mar” (Dan. 7:1-8, 15-17). Ndána̱ʼa̱rí na̱ chíñu náʼnu na̱ íxandi̱va̱ʼa xíʼin na̱ ñuu Ndióxi̱ nani tá tiempo ta̱ Daniel. (Koto párrafo 4 xíʼin 7)
4, 5. ¿Ndáa ki̱ʼva chíndeétáʼan Daniel 7:15-17 xíʼinyó ña̱ kunda̱a̱-iniyó ndáana ndána̱ʼa̱ tí kití tí káʼa̱n libro ña̱ Apocalipsis xa̱ʼa̱?
4 Ña̱ va̱ʼa kunda̱a̱-iniyó ndáana kúú na̱ sáa̱-ini xíni Ndióxi̱, siʼna xíniñúʼu kunda̱a̱-iniyó ndáana ndána̱ʼa̱ tí kití yóʼo. Ta ña̱ va̱ʼa kunda̱a̱-iniyó xa̱ʼa̱ tíyóʼo ná kotoyó ndáaña káʼa̱n tu̱ʼun Ndióxi̱ xa̱ʼa̱rí. Tí kití yukú tí káʼa̱n libro ña̱ Apocalipsis xa̱ʼa̱, xa̱a̱ káʼa̱n inkaka libro ña̱ va̱xi nu̱ú Biblia xa̱ʼa̱rí. Tá kúú, ti̱xin iin xa̱ni xi̱ni ta̱ profeta Daniel ña̱ ke̱e “ku̱mí kití tí náʼnuní” ini mar (Dan. 7:1-3). Ta̱ Daniel ni̱ka̱ʼa̱nra ña̱ ku̱mí tí kití tí náʼnuní yóʼo ndána̱ʼa̱rí “na̱ chíñu” (kaʼvi Daniel 7:15-17).b Ña̱yóʼo chíndeétáʼanña xíʼinyó kunda̱a̱-iniyó ña̱ saátu tí kití tí káʼa̱n Apocalipsis xa̱ʼa̱ ndána̱ʼa̱rí na̱ chíñu.
5 Vitin ná sakúaʼayó xa̱ʼa̱ tí kití yukú tí káʼa̱n libro ña̱ Apocalipsis xa̱ʼa̱. Ta tu̱ʼun Ndióxi̱ chindeétáʼan xíʼinyó kunda̱a̱-iniyó ndáaña ndána̱ʼa̱ tíyóʼo. Siʼna kixáʼayó kotoyó ndáana ndána̱ʼa̱ tí kití yukú. Tándi̱ʼi, sakúaʼayó ndáaña kundoʼorí. Tasaá kotoyó ndáaña sakúaʼayó xíʼin ña̱ profecía yóʼo.
NA̱YÓʼO KÚÚ NA̱ SÁA̱-INI XÍNI NDIÓXI̱
TÍ KITÍ YUKÚ TÍ KÚÚMIÍ U̱XA̱ XI̱NÍ
Kítarí ini mar ta 7 kúú xi̱nírí, 10 kúú ndiki̱rí ta 10 kúú corona ndósó ndiki̱rí (Apoc. 13:1-4). Tíyóʼo ndána̱ʼa̱rí ndiʼi na̱ chíñu na̱ xa̱a̱ xáʼndachíñu nu̱ú ñuʼú yóʼo. Ta u̱xa̱ xi̱nírí ndána̱ʼa̱ña u̱xa̱ na̱ chíñu náʼnu na̱ xa̱a̱ íxandi̱va̱ʼa xíʼin na̱ ñuu Ndióxi̱. (Koto párrafo 6 nda̱a̱ 8)
6. ¿Ndáana ndána̱ʼa̱ tí kití yukú tí u̱xa̱ xi̱ní tí káʼa̱n Apocalipsis 13:1-4 xa̱ʼa̱?
6 ¿Ndáana ndána̱ʼa̱ tí kití yukú tí u̱xa̱ xi̱ní? (Kaʼvi Apocalipsis 13:1-4). Tu̱ʼun Ndióxi̱ káʼa̱nña xa̱ʼa̱ tí kití yóʼo ña̱ táki̱ʼva káa iin leopardo saá káarí, soo xa̱ʼa̱rí táki̱ʼva káa xa̱ʼa̱ oso saá káaña, ta yuʼúrí táki̱ʼva káa yuʼú león saá káaña, ta 10 kúú ndiki̱rí. Ta ku̱mí kití tí káʼa̱n libro ta̱ Daniel capítulo 7 xa̱ʼa̱ kúúmiíturí táʼan ña̱yóʼova, soo iinvaña kúúmií iin iinrí. Soo libro ña̱ Apocalipsis káʼa̱nña xa̱ʼa̱ iin kuití kití tí kúúmií ndiʼi ña̱yóʼo. Ta tí kití yukú yóʼo su̱ví nda̱saa iin kuití na̱ chíñu náʼnu ndána̱ʼa̱rí. Chi libro ña̱ Apocalipsis káʼa̱nña xa̱ʼa̱rí ña̱ “nda̱kiʼinrí nda̱yí ña̱ kaʼndachíñurí nu̱ú na̱ yiví ni nda̱a̱ ndáaka tribu kúúna, nda̱a̱ ndáaka tu̱ʼun káʼa̱nna ni kúúna na̱ ñuu válí á kúúna na̱ ñuu náʼnu”. Ña̱yóʼo náʼa̱ña nu̱úyó ña̱ kúúmiíníkarí ndee̱ nu̱ú iin kuití na̱ chíñu (Apoc. 13:7). Ña̱kán, tí kití yukú yóʼo ndána̱ʼa̱rí ndiʼi na̱ chíñu na̱ xa̱a̱ xáʼndachíñu nu̱ú ñuʼú yóʼo (Ecl. 8:9).c
7. ¿Ndáana ndána̱ʼa̱ u̱xa̱ xi̱ní tí kití yukú?
7 ¿Ndáana ndána̱ʼa̱ u̱xa̱ xi̱nírí? Libro ña̱ Apocalipsis capítulo 17 chíndeétáʼanña xíʼinyó kunda̱a̱-iniyó ndáana kúú na̱yóʼo, saáchi yóʼo káʼa̱nña xa̱ʼa̱ na̱ʼná tí kití yukú tí káʼa̱n capítulo 13 xa̱ʼa̱. Apocalipsis 17:10 “káʼa̱nña xa̱ʼa̱ 7 rey: 5 na̱yóʼo kǒokana íyo, iinna íyo vitin, ta inkana kúma̱ní kixaa̱ soo tá ná kixaa̱ na̱yóʼo, loʼova tiempo koona”. Xa̱a̱ ku̱a̱ʼání kúú na̱ chíñu na̱ xíniñúʼu ta̱ Ndi̱va̱ʼa, soo íyo u̱xa̱ na̱ kivi chitáʼanyó xíʼin xi̱ní tí kití yukú, saáchi síín ni̱xi̱yo ki̱ʼva ña̱ xi̱xaʼndachíñuna. Na̱yóʼo ku̱a̱ʼání ñuu xi̱xaʼndachíñuna nu̱ú, ta xi̱ ixandi̱va̱ʼana xíʼin na̱ ñuu Ndióxi̱. Tá tiempo ña̱ ni̱xi̱yo ta̱ apóstol Juan, u̱ʼu̱n na̱ chíñu yóʼo xa̱a̱ xa̱ʼndachíñuna ta xa̱a̱ ndi̱ʼi-xa̱ʼa̱na. Na̱yóʼo xi̱kuu: Egipto, Asiria, Babilonia, Medopersia xíʼin Grecia. Na̱ i̱ñu̱ xi̱kuu na̱ ñuu Roma, ta na̱yóʼo kúú na̱ xi̱xaʼndachíñu tá xi̱ni ta̱ Juan visión ña̱ va̱xi nu̱ú Apocalipsis. Tá saá, ¿ndáa na̱ chíñu kúú na̱ ndána̱ʼa̱ xi̱ní ña̱ u̱xa̱?
8. ¿Ndáana ndána̱ʼa̱ xi̱ní u̱xa̱ ña̱ kúúmií tí kití yukú?
8 Profecía ña̱ va̱xi nu̱ú Daniel chíndeétáʼanña xíʼinyó kunda̱a̱-iniyó ndáana ndána̱ʼa̱ xi̱ní ña̱ u̱xa̱ á xi̱ní ña̱ so̱ndíʼi ña̱ kúúmií tí kití yukú. Ña̱kán, ¿ndáana kúú na̱ xáʼndachíñu tiempo so̱ndíʼi vitin ña̱ kúú “ki̱vi̱ ña̱ ki̱xaa̱ tátayó”? (Apoc. 1:10). Na̱yóʼo kúú na̱ chíñu náʼnu na̱ Reino Unido xíʼin Estados Unidos. Ña̱kán kivi ka̱ʼa̱nyó ña̱ na̱yóʼo kúú na̱ ndána̱ʼa̱ xi̱ní u̱xa̱ ña̱ kúúmií tí kití yukú tí káʼa̱n Apocalipsis 13:1-4 xa̱ʼa̱.
IIN KITÍ YUKÚ TÍ KÚÚMIÍ U̱VI̱ NDIKI̱ TÁʼAN ÑA̱ KÚÚMIÍ TÍ NDIKACHI
Kítarí chí nu̱ú ñuʼú ta “káʼa̱nrí nda̱a̱ táki̱ʼva káʼa̱n iin tí dragón”. “Nda̱a̱ kée ñuʼu̱ chí ndiví ta kóyoña nu̱ú ñuʼú yóʼo íxarí”, ta saátu kúúrí “ta̱ profeta vatá” ta kéʼérí ku̱a̱ʼání milagro (Apoc. 13:11-15; 16:13; 19:20). Tí kití yukú tí kúúmií u̱vi̱ ndiki̱ xíʼin ta̱ profeta vatá, ndána̱ʼa̱rí na̱ chíñu náʼnu na̱ Reino Unido xíʼin na̱ Estados Unidos, saáchi sándaʼvina na̱ ndóo nu̱ú ñuʼú yóʼo ta káʼa̱nna xíʼinna ña̱ ná ixava̱ʼana na̱ʼná tí kití yukú tí kúúmií 7 xi̱ní xíʼin 10 ndiki̱. (Koto párrafo 9)
9. ¿Ndáana ndána̱ʼa̱ tí kití yukú tí kúúmií u̱vi̱ ndiki̱ ña̱ íyo “nda̱a̱ táki̱ʼva íyo ndiki̱ tí ndikachi”?
9 Apocalipsis capítulo 13 káʼa̱nña xíʼinyó ndáaña kéʼé na̱ Reino Unido ta saátu na̱ Estados Unidos, na̱ ndána̱ʼa̱ xi̱ní u̱xa̱ ña̱ kúúmií tí kití yukú. Ta saátu ndána̱ʼa̱na inka kití, ta ña̱yóʼo káʼa̱nña ndáa ki̱ʼva íyorí: “Íyo u̱vi̱ ndiki̱rí ta ña̱yóʼo íyoña nda̱a̱ táki̱ʼva íyo ndiki̱ tí ndikachi ta ki̱xáʼarí káʼa̱nrí nda̱a̱ táki̱ʼva káʼa̱n iin tí dragón”. Ta tí kití yukú yóʼo “ku̱a̱ʼání ña̱ʼa kéʼérí; nda̱a̱ kée ñuʼu̱ chí ndiví ta kóyoña nu̱ú ñuʼú íxaarí ta xíni ndiʼi na̱ yiví ña̱yóʼo” (Apoc. 13:11-15). Ta nu̱ú Apocalipsis capítulo 16 xíʼin 19 káʼa̱nña xa̱ʼa̱na ña̱ kúúna “ta̱ profeta vatá” (Apoc. 16:13; 19:20). Ta ki̱ʼva saátu íyo profecía ña̱ ni̱ka̱ʼa̱n ta̱ Daniel xa̱ʼa̱ na̱ Gran Bretaña xíʼin na̱ Estados Unidos, chi ni̱ka̱ʼa̱nra ña̱ ku̱a̱ʼání ña̱ʼa sandíʼi-xa̱ʼa̱na (Dan. 8:19, 23, 24, nota). Tasaá ku̱uva tá ni̱xi̱yo Segunda Guerra Mundial. Saáchi na̱ científico na̱ Reino Unido xíʼin na̱ Estados Unidos kúú na̱ i̱xava̱ʼa u̱vi̱ bomba ña̱ s̱a̱káʼndi̱na ña̱ va̱ʼa ni̱ya̱a̱ ku̱a̱chi yóʼo. Saá kúú ña̱ sa̱xínu na̱ Reino Unido xíʼin na̱ Estados Unidos profecía yóʼo: “Nda̱a̱ kée ñuʼu̱ chí ndiví ta kóyoña nu̱ú ñuʼú íxaarí”.
IIN KITÍ YUKÚ TÍ COLOR KÚÁʼA ÑA̱ YÉʼE̱NÍ
Sa̱tá tíyóʼo kánuu iin ñaʼá ñá kísi̱ xíʼin ku̱a̱ʼání ta̱a, ñá naní Babilonia ña̱ káʼnu. Ta tí kití yukú yóʼo ndána̱ʼa̱rí rey na̱ u̱na̱ (Apoc. 17:3-6, 8, 11). Tá xa̱ʼa̱, ñá ñaʼá ñá kísi̱ xíʼin ku̱a̱ʼá ta̱a xáʼndachíñuñá nu̱ú tí kití yukú, soo tándi̱ʼi, miírí kúú tí sa̱ndíʼi-xa̱ʼa̱ ñáyóʼo. Ñá ñaʼá yóʼo ndána̱ʼa̱ñá ndiʼi religión vatá ña̱ íyo nu̱ú ñuʼú yóʼo. Ta tí kití yukú ndána̱ʼa̱rí na̱ Organización de las Naciones Unidas, na̱ chíndeétáʼan xíʼin ndiʼi na̱ chíñu na̱ íyo nu̱ú ñuʼú yóʼo. (Koto párrafo 10 xíʼin 14 nda̱a̱ 17)
10. ¿Ndáana ndána̱ʼa̱ “na̱ʼná kití yukú”? (Apocalipsis 13:14, 15; 17:3, 8, 11).
10 Vitin ná ka̱ʼa̱nyó xa̱ʼa̱ inka kití. Ta tíyóʼo tá kúni̱ koo tí kití yukú tí kúúmií u̱xa̱ xi̱ní saá kúni̱ koorí, soo tíyóʼo tí color kúáʼa ña̱ yéʼe̱ní kúúrí. Ta libro ña̱ Apocalipsis káʼa̱nña ña̱ kúúrí “na̱ʼná tí kití yukú” ta kúúrí “rey tí u̱na̱” (kaʼvi Apocalipsis 13:14, 15; 17:3, 8, 11).d Apocalipsis káʼa̱nña xa̱ʼa̱rí ña̱ ni̱xi̱yorí loʼo tiempo tasaá kǒokarí níxi̱yo, soo tándi̱ʼi tuku kixáʼa íyorí. Ña̱yóʼo kítáʼanníña xíʼin ña̱ ndo̱ʼo na̱ Organización de las Naciones Unidas, na̱ chíndeétáʼan xíʼin na̱ chíñu na̱ íyo iníísaá nu̱ú ñuʼú. Tá ki̱xáʼa íyona xi̱nanína Sociedad de Naciones. Soo tá ni̱xi̱yo Segunda Guerra Mundial kǒokana níxi̱yo. Ta tá ni̱ya̱ʼa tiempo ki̱xáʼa íyo tukuna, tasaá kúú ña̱ nda̱kunanína Organización de las Naciones Unidas.
11. ¿Ndáaña keʼé na̱ chíñu, ta nda̱chun va̱ása xíniñúʼu yi̱ʼvíyó?
11 Tí kití yukú tí ndána̱ʼa̱ na̱ chíñu chíka̱a̱rí-ini na̱ yiví ña̱ ku̱ʼu̱nna contra Jehová xíʼin na̱ ñuura. Na̱yóʼo sandákutáʼanna “na̱ rey na̱ íyo nu̱ú ñuʼú ña̱ kanitáʼanna xíʼin Ndióxi̱ ta̱ kúúmií ndiʼi ndee̱ tá ná kixaa̱” ña̱ Armagedón (Apoc. 16:13, 14, 16). Soo va̱ása xíniñúʼu yi̱ʼvíyó, saáchi Jehová Ndióxi̱yó kama sakǎkura na̱ chíndeétáʼan xíʼin Reinora (Ezeq. 38:21-23).
12. ¿Ndáaña kundoʼo ndiʼi tí kití yukú?
12 ¿Ndáaña kundoʼo ndiʼi tí kití yukú? Apocalipsis 19:20 káʼa̱nña ndáaña kundoʼorí, káchiña: “Ta̱ yósó tí kuáyi̱, ti̱inra tí kití yukú ta saátu ta̱ profeta vatá ta̱ ke̱ʼé ku̱a̱ʼání milagro nu̱ú tíyóʼo ña̱ sa̱ndáʼvira na̱ yiví na̱ nda̱kiʼin tuni̱ tí kití yukú ta saátu na̱ nda̱sakáʼnu na̱ʼná tíyóʼo. Nani tákuka tí kití yukú xíʼin ta̱ profeta vatá, ta̱ yósó tí kuáyi̱ sa̱kánara na̱yóʼo nu̱ú ñúʼu ñuʼu̱ ña̱ xíxi̱ xíʼin azufre”. Ña̱kán naní xáʼndachíñuka na̱ chíñu na̱ íyo nu̱ú ñuʼú yóʼo, Ndióxi̱ sandíʼi-xa̱ʼa̱rana.
13. ¿Ndáaña kéʼé na̱ chíñu xíʼinyó?
13 Ña̱ sákuaʼayó. Miíyó na̱ ndásakáʼnu Ndióxi̱ xíniñúʼu nda̱kú koo iniyó xíʼinra ta saátu xíʼin Reinora (Juan 18:36). Ta ña̱ va̱ʼa keʼéyó ña̱yóʼo va̱ása xíniñúʼu ki̱ʼviyó xíʼin ña̱ política ña̱ íyo ñuyǐví yóʼo. Soo íxayo̱ʼvi̱va ña̱yóʼo xíʼinyó, saáchi na̱ chíñu íxandúxana xíʼinyó ña̱ ná chindeétáʼanyó xíʼinna xíʼin ña̱ káʼa̱nyó á xíʼin ña̱ kéʼéyó. Soo na̱ chíndeétáʼan xíʼin na̱ chíñu ndákiʼinna tuni̱ tí kití yukú (Apoc. 13:16, 17). Ta va̱ása kandíxaka Jehová kutáʼanra xíʼin na̱ ndákiʼin tuni̱ yóʼo, ta saátu va̱ása taxira kutakuna ndiʼi tiempo nu̱ú ñuyǐví xa̱á (Apoc. 14:9, 10; 20:4). Ña̱kán ndáyáʼviní nda̱kú koo iniyó xíʼin Ndióxi̱ ni ná ixandúxa na̱ chíñu xíʼinyó ña̱ chindeétáʼanyó xíʼinna.
IIN ÑA̱ KAʼANNÍ NU̱Ú KUNDOʼO ÑÁ KÍSI̱ XÍʼIN KU̱A̱ʼÁNÍ TA̱A
14. ¿Ndáaña sa̱ndákanda̱ní-ini ta̱ apóstol Juan? (Apocalipsis 17:3-5).
14 Ta̱ apóstol Juan xi̱nira inka ña̱ ndeéní sa̱ndákanda̱-inira. ¿Ndáaña kúúña? Xi̱nira iin ñaʼá ñá kánuu sa̱tá iin kití yukú tí ndeéní kue̱ʼe̱ (Apoc. 17:1, 2, 6). Ta tu̱ʼun Ndióxi̱ káʼa̱nña xa̱ʼa̱ñá ña̱ kísi̱ñá xíʼin ku̱a̱ʼání ta̱a ta naníñá “Babilonia ña̱ káʼnu”. Ta ñáyóʼo kísi̱ñá xíʼin ndiʼi na̱ rey na̱ íyo nu̱ú ñuʼú yóʼo (kaʼvi Apocalipsis 17:3-5).
15, 16. ¿Ndáaña kúú “Babilonia ña̱ káʼnu”, ta nda̱chun va̱ʼa kúnda̱a̱-iniyó ña̱yóʼo?
15 ¿Ndáaña kúú “Babilonia ña̱ káʼnu”? Ñá ñaʼá yóʼo va̱ása ndána̱ʼa̱ñá na̱ chíñu na̱ íyo nu̱ú ñuʼú yóʼo, saáchi libro ña̱ Apocalipsis káʼa̱nña ña̱ kísi̱ñá xíʼin na̱ chíñu yóʼo (Apoc. 18:9). Ta saátu káʼa̱nña xa̱ʼa̱ñá ña̱ kánuuñá sa̱tá tí kití yukú, ña̱yóʼo kúni̱ kachiña ña̱ kúni̱ñá kaʼndachíñuñá nu̱úrí. Saátu va̱ása ndána̱ʼa̱ñá na̱ íxi̱kó ña̱ʼa nu̱ú ñuyǐví ta̱ Ndi̱va̱ʼa yóʼo, saáchi chí nu̱úkaví káʼa̱n libro ña̱ Apocalipsis xa̱ʼa̱ na̱ íxi̱kó yóʼo (Apoc. 18:11, 15, 16).
16 Tá káʼa̱n Biblia xa̱ʼa̱ na̱ ndásakáʼnu ndióxi̱ vatá á na̱ kítáʼan xíʼin na̱ ñuyǐví yóʼo, chítáʼanñana xíʼin iin na̱ kísi̱ xíʼin ku̱a̱ʼání na̱ yiví (1 Crón. 5:25; Sant. 4:4). Soo tá káʼa̱nña xa̱ʼa̱ iin na̱ yiví na̱ nda̱kúní-ini xíʼin Ndióxi̱ chítáʼanñana xíʼin iin na̱ kúa̱an á na̱ ta̱ʼán ku̱su̱n xíʼin nda̱a̱ ni iin na̱ yiví (2 Cor. 11:2; Apoc. 14:4). Tá tiempo xi̱naʼá ku̱a̱ʼání ndióxi̱ vatá xi̱ndasakáʼnuna ti̱xin ñuu Babilonia. Ña̱kán, Babilonia ña̱ káʼnu ndána̱ʼa̱ña ndiʼi religión vatá ña̱ íyo nu̱ú ñuʼú yóʼo (Apoc. 17:5, 18; koto apéndice ña̱ va̱xi nu̱ú libro ña̱ naní ¿Ndáaña kúú míí ña̱ ndixa sánáʼa̱ Biblia?, página 219 “¿Ndáaña kúú ‘Babilonia ña̱ káʼnu’?”).
17. ¿Ndáaña kundoʼo Babilonia ña̱ káʼnu?
17 ¿Ndáaña kundoʼo Babilonia ña̱ káʼnu? Apocalipsis 17:16, 17 káʼa̱nña ndáaña kundoʼoña: “Ta 10 ndiki̱ ña̱ xi̱niún ta saátu tí kití yukú, sa̱a̱ní-inina kunina ñá ñaʼá ñá kísi̱ xíʼin ku̱a̱ʼání ta̱a ta sandíʼi-xa̱ʼa̱nañá, ta ndakoo chálánañá. Ta kaxína ku̱ñuñá, ta kaʼmi níínañá xíʼin ñuʼu̱. Saáchi mií Ndióxi̱ chi̱ka̱a̱-inina ña̱ keʼéna ña̱ ndákanixi̱níra xa̱ʼa̱”. Jehová chika̱a̱ra-ini na̱ chíñu ña̱ kuniñúʼuna tí kití yukú tí color kúaʼa ña̱ yéʼe̱ní, tí ndána̱ʼa̱ na̱ Naciones Unidas, ña̱ va̱ʼa kanitáʼanna xíʼin ndiʼi veʼe-ñu̱ʼu vatá ña̱ íyo nu̱ú ñuʼú yóʼo ta sandíʼi-xa̱ʼa̱naña (Apoc. 18:21-24).
18. ¿Ndáaña xíniñúʼu keʼéyó ña̱ va̱ása ki̱ʼviyó xíʼin Babilonia ña̱ káʼnu?
18 Ña̱ sákuaʼayó. Ndáyáʼviní “vií koo ña̱ ndasakáʼnuyó” Ndióxi̱ ta “va̱ása kuumiíña ña̱ yaku̱a̱” (Sant. 1:27). Ná va̱ása kandíxayó ña̱ vatá ña̱ sánáʼa̱ Babilonia ña̱ káʼnu, ná va̱ása keʼéyó vikó ña̱ táváña, ná va̱ása keʼéyó ña̱ kini táʼan ña̱ kéʼéña ta ná va̱ása keʼéyó ña̱ tási táʼan ña̱ kéʼéña á inkaka ña̱ kúu kuenta ta̱ Ndi̱va̱ʼa. Ta ná ndakundeéyó ka̱ʼa̱nyó xíʼin na̱ yiví: “Keendó ti̱xinña”. Chi tá ná keena ti̱xin Babilonia ña̱ káʼnu saá kúú ña̱ va̱ása kuisona ku̱a̱chi xíʼin ña̱ kéʼéña (Apoc. 18:4).
CASTIGO ÑA̱ NDAKIʼIN TA̱ KÚÚ CONTRA NDIÓXI̱
DRAGÓN TÍ COLOR KÚÁʼA ÑUʼU̱
Ta̱ Ndi̱va̱ʼa táxira ña̱ ná kaʼndachíñu tí kití yukú (Apoc. 12:3, 9, 13; 13:4; 20:2, 10). Ta̱ Ndi̱va̱ʼa ta̱ sáa̱ní-ini xíni Jehová, ndasira kundika̱a̱ra 1,000 ku̱i̱ya̱ ini ya̱vi̱ naá. Tándi̱ʼi, sakánanara “nu̱ú ñúʼu ñuʼu̱ ña̱ xíxi̱ xíʼin azufre”. (Koto párrafo 19 xíʼin 20)
19. ¿Ndáana ndána̱ʼa̱ tí “dragón tí káʼnuní tí color kúaʼa ñuʼu̱”?
19 Libro ña̱ Apocalipsis káʼa̱ntuña xa̱ʼa̱ “iin dragón tí káʼnuní tí color kúáʼa ñuʼu̱” (Apoc. 12:3). Tí dragón yóʼo kánitáʼanrí xíʼin ta̱ Jesús ta saátu xíʼin na̱ ángel na̱ kítáʼan xíʼinra (Apoc. 12:7-9). Ta saátu íxandi̱va̱ʼarí xíʼin na̱ ñuu Ndióxi̱ ta táxirí ndee̱ ndaʼa̱ kití yukú tí ndána̱ʼa̱ na̱ chíñu (Apoc. 12:17; 13:4). ¿Ndáana ndána̱ʼa̱ tí dragón yóʼo? Tíyóʼo kúú ko̱o̱ tí nu̱ú, tí naní Diablo xíʼin Satanás (Apoc. 12:9, nota; 20:2). Ta ta̱yóʼo kúú ta̱ chíka̱a̱-ini inka na̱ yiví ña̱ ku̱ʼu̱nna contra Jehová.
20. ¿Ndáaña kundoʼo tí dragón?
20 ¿Ndáaña kundoʼo tí dragón? Apocalipsis 20:1-3 káʼa̱nña xa̱ʼa̱ iin ángel ña̱ sakánara ta̱ Ndi̱va̱ʼa ini iin ya̱vi̱ naá ta nda̱a̱ táki̱ʼva koo veʼeka̱a saá koo ña̱yóʼo nu̱úra. Ta 1,000 ku̱i̱ya̱ ndasira kundika̱a̱ra yóʼo, tasaá va̱ása ndikókara sandáʼvira na̱ yiví nda̱a̱ ná ya̱ʼa ndiʼi ku̱i̱ya̱ yóʼo. Tándi̱ʼi, sakánana ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra “nu̱ú ñúʼu ñuʼu̱ ña̱ xíxi̱ xíʼin azufre”. Ña̱yóʼo kúni̱ kachiña ña̱ ndiʼi-xa̱ʼa̱ va̱ʼana (Apoc. 20:10). Ña̱kán, si̱íní kundooyó saáchi va̱ása kooka ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra.
21. ¿Nda̱chun kúsi̱í-iniyó xíʼin ña̱ ka̱ʼviyó nu̱ú libro ña̱ Apocalipsis?
21 Tá kúnda̱a̱-iniyó ndáaña kúni̱ kachi iin tá iin ña̱ káʼa̱n libro ña̱ Apocalipsis xa̱ʼa̱, chíka̱a̱níña ndee̱ xíʼinyó. Xa̱a̱ ku̱nda̱a̱-iniyó ndáana kúú na̱ sáa̱-ini xíni Ndióxi̱, ta ndáaña kundoʼona. Ña̱kán, “si̱íní íyo na̱ ndeé va̱ʼa káʼvi nu̱ú inkana tu̱ʼun ña̱ káʼa̱n xa̱ʼa̱ ña̱ kuu chí nu̱únínu, ta saátu si̱íní íyo na̱ xíniso̱ʼo [...] ña̱ ni̱ka̱ʼyi̱ nu̱úña” (Apoc. 1:3). Soo tá ná ndiʼi-xa̱ʼa̱ na̱ sáa̱-ini xíni Jehová, ¿ndáaña va̱ʼa ndakiʼin na̱ nda̱kú íyo ini xíʼinra? Ña̱yóʼo sakúaʼayó nu̱ú inka artículo.
YAA 23 Xa̱a̱ ki̱xaʼá xáʼndachíñu Jehová
a Nu̱ú libro ña̱ Apocalipsis káʼa̱nña xa̱ʼa̱ kití tí ndána̱ʼa̱ na̱ sáa̱-ini xíni Ndióxi̱, ta libro ta̱ Daniel chíndeétáʼanña xíʼinyó ña̱ kunda̱a̱ka-iniyó xa̱ʼa̱ iin tá iin tíyóʼo. Nu̱ú artículo yóʼo chitáʼanyó profecía ña̱ va̱xi nu̱ú libro ta̱ Daniel xíʼin ña̱ va̱xi nu̱ú libro ña̱ Apocalipsis, ta ña̱yóʼo chindeétáʼanña xíʼinyó kunda̱a̱-iniyó ndáana kúú na̱ sáa̱-ini xíni Ndióxi̱. Tándi̱ʼi, sakúaʼayó ndáaña kundoʼona.
b Daniel 7:15-17: “Ta ki̱xáʼíi̱ ndíʼi̱ní-inii̱ chi ni̱yi̱ʼvíníi̱ tá xi̱nii̱ visión yóʼo. 16 Ña̱kán ku̱yatii̱n nu̱ú iin ta̱ níndichi kán ña̱ va̱ʼa nda̱ka̱tu̱ʼíi̱nra ndáaña kúni̱ kachi ndiʼi ña̱yóʼo. Ta ta̱yóʼo nda̱kuiinra yuʼíi̱ ta ka̱chira: 17 Ku̱mí kití tí náʼnuní, kúú ku̱mí na̱ chíñu na̱ koo nu̱ú ñuʼú”.
c Ta saátu, xa̱ʼa̱ ña̱ kúúmiírí “10 ndiki̱” ndána̱ʼa̱rí ndiʼi na̱ chíñu na̱ íyo nu̱ú ñuʼú yóʼo. Saáchi tá káʼa̱n tu̱ʼun Ndióxi̱ xa̱ʼa̱ número 10 ndána̱ʼa̱ña iin ña̱ʼa ña̱ íyo níí.
d Kití yukú tí nu̱ú, ndósó corona ndiki̱rí soo na̱ʼná tí kití yukú kǒoña kúúmiírí (Apoc. 13:1). Saáchi ti̱xin na̱ u̱xa̱ rey ka̱narí ta na̱yóʼova kúú na̱ táxi ná kaʼndachíñurí (koto artículo ña̱ va̱xi nu̱ú jw.org ña̱ naní “¿Qué es la bestia de color escarlata del capítulo 17 de Apocalipsis?”).