¿Ndáana ndaka̱xiún kaʼndachíñu nu̱ún? | ¿Ndáaña káʼa̱n Biblia xa̱ʼa̱ ña̱yóʼo?

Na̱ yiví ndáka̱xinna ndáana kaʼndachíñu nu̱úna.

¿Ndáaña káʼa̱n Biblia xa̱ʼa̱ ña̱yóʼo?

Íyo sava ña̱ va̱ása kívi keʼé na̱ chíñu

Tu̱ʼun Ndióxi̱ káʼa̱nña xa̱ʼa̱ iin ña̱ va̱ása kívi keʼé nda̱a̱ ni iin na̱ chíñu.

• “Va̱ása kundaa-inindó na̱ chíñu ni nda̱a̱ ni iin na̱ yiví, saáchi va̱ása kuchiñuna sakǎkuna ndóʼó. Tá xíʼi̱ na̱ yiví ndúu tukuna ñuʼú, tasaá kǒoka ña̱ ndákanixi̱nína xa̱ʼa̱” (Salmo 146:3, 4).

Ndiʼi na̱ chíñu xíʼi̱vana, ni va̱ʼaní xíni̱na keʼéna iin chiñu. Ta saátu ni va̱ʼaní íyo ña̱ kéʼéna sana su̱ví saáví keʼé inka na̱ kaʼndachíñu so̱ndíʼi (Eclesiastés 2:18, 19).

Biblia káʼa̱nña ña̱ va̱ása ní ixava̱ʼa Ndióxi̱ na̱ yiví ña̱ kaʼndachíñuna nu̱ú táʼan miína.

•  “Na̱ yiví va̱ása kúchiñuna kuniʼina yichi̱ nu̱ú miína” (Jeremías 10:23).

¿Á íyo iin na̱ kivi va̱ʼaní kaʼndachíñu nu̱úyó vitin?

Ta̱ chíñu ta̱ nda̱kaxin Ndióxi̱

Biblia káʼa̱nña ña̱ xa̱a̱ nda̱kaxin Ndióxi̱ iin ta̱ va̱ʼaní kuchiñu kaʼndachíñu nu̱ú na̱ yiví, ta̱yóʼo kúú ta̱ Jesucristo (Salmo 2:6). Ta̱yóʼo kúú ta̱ xáʼndachíñu ti̱xin Reino Ndióxi̱, ta ña̱yóʼo íyoña chí ndiví ta kán kúú nu̱ú xáʼndachíñura (Mateo 6:10).

¿Á ndaka̱xiún ta̱ Jesús ña̱ kaʼndachíñura nu̱ún? Biblia káʼa̱nña nda̱chun ndáyáʼviní keʼún ña̱yóʼo:

•  “Ixato̱ʼóndó se̱ʼe Ndióxi̱; chi tá va̱ása kéʼéndó ña̱yóʼo, sa̱a̱ní Ndióxi̱ xíʼinndó, ta kuvindó chí yichi̱, saáchi kamaní sáa̱ra. Si̱íní íyo ini na̱ ndáa-iniñaʼá” (Salmo 2:12).

Vitin kúú ña̱ xíniñúʼu viíní ndaka̱xiún ña̱ keʼún. Profecía ña̱ va̱xi nu̱ú Biblia káʼa̱nña ña̱ xa̱a̱ ki̱xáʼa ta̱ Jesús xáʼndachíñura tá 1914. Saátu káʼa̱nña ña̱ Reino Ndióxi̱ si̱lóʼoní kúma̱ní ta sandíʼi-xa̱ʼa̱ña ndiʼi na̱ chíñu na̱ íyo nu̱ú ñuyǐví yóʼo (Daniel 2:44).

Tá kúni̱ún kunda̱a̱ka-iniún ndáaña kivi keʼún ña̱ taxiún ña̱ kaʼndachíñu ta̱ Jesús nu̱ún, kaʼvi artículo ña̱ naní “Apoyemos ahora el Reino de Dios”.