Ta̱ Jesucristo níndúʼura nu̱ú trono, saáchi kúúra Rey ti̱xin Reino Ndióxi̱

¿Ndáaña kúú Reino Ndióxi̱?

Ña̱ káʼa̱n Biblia xa̱ʼa̱ ña̱yóʼo

Ña̱ Reino Ndióxi̱ kúú iin gobierno ña̱ chi̱ndúʼú mií Jehová Ndióxi̱. Ña̱ gobierno yóʼo chí ndiví íyoña, ña̱kán Biblia káʼa̱nña ña̱ naníña “Reino Ndióxi̱ ña̱ íyo chí ndiví” (Marcos 1:14, 15; Mateo 4:17). Ni kítáʼanva loʼo ña̱ chíñu yóʼo xíʼin ña̱ chíñu ñuyǐví yóʼo, soo káʼnuníkava ña̱ chíñu yóʼo nu̱ú ndiʼi ña̱ íyo ñuyǐví yóʼo.

Na̱ kaʼndachíñu. Ndióxi̱ nda̱kaxinra ta̱ Jesús ña̱ koora Rey ña̱ Reino yóʼo, ña̱kán ku̱a̱ʼání ndee̱ ta̱xira ndaʼa̱ra ta kǒo ni iin na̱ chíñu ñuyǐví yóʼo kúúmií ndee̱ ña̱ kúúmií ta̱ Jesús (Mateo 28:18). Ta̱ Jesús xíniñúʼura ndee̱ ña̱ kúúmiíra ña̱ keʼéra nina ña̱ va̱ʼa kuití. Tá ni̱xi̱yora nu̱ú ñuʼú yóʼo ni̱na̱ʼa̱ra ña̱ va̱ʼaní-inira ta kúndáʼvi-inira xínira na̱ yiví (Mateo 4:23; Marcos 1:40, 41; 6:31-34; Lucas 7:11-17). Ndióxi̱ chi̱ndeétáʼanra xíʼin ta̱ Jesús ña̱ nda̱kaxinra sava na̱ yiví na̱ xa̱a̱ síín síín ñuu ña̱ ku̱ʼu̱nna chí ndiví ta kaʼndachíñuna xíʼinra nu̱ú ñuʼú yóʼo (Apocalipsis 5:9, 10).
Ndáasa tiempo kaʼndachíñuña. Na̱ chíñu ñuyǐví yóʼo loʼova tiempo xáʼndachíñuna. Soo, Reino Ndióxi̱ ndiʼi tiempo kaʼndachíñuña ta va̱ása ndiʼi-xa̱ʼa̱ña (Daniel 2:44).
Na̱ koo ti̱xin Reino yóʼo. Ndiʼi na̱ kéʼé ña̱ kútóo Ndióxi̱ kivi koona ti̱xin Reino yóʼo ni nda̱a̱ ndáaka ñuu ke̱ena (Hechos 10:34, 35).
Ley. Na̱ koo ti̱xin Reino Ndióxi̱ xíniñúʼu ixato̱ʼóna chiñu ña̱ xáʼndara, ña̱yóʼo kúni̱ kachiña ña̱ kǒo xíniñúʼu keʼéna ña̱ kini soo saátu xíniñúʼu viíka koo ña̱ keʼéna. Tá kúú, Biblia káchiña: “‘Kuʼvi̱-iniún kuniún Jehová Ndióxi̱ún xíʼin ndiʼi níma̱ún, xíʼin ndiʼi ña̱ tákún ta xíʼin ndiʼi xi̱níúnʼ. Ña̱yóʼo kúú ña̱ nu̱ú ña̱ káʼnuka nu̱ú ndiʼiña. Ña̱yóʼo kúú ña̱ u̱vi̱: ‘Kuʼvi̱-iniún kuniún inka na̱ yiví nda̱a̱ táki̱ʼva kúʼvi̱-iniún xíniún miíún’” (Mateo 22:37-39). Ndiʼi na̱ koo ti̱xin Reino Ndióxi̱ kúʼvi̱-inina xínina Ndióxi̱ ta saátu inka na̱ yiví, ña̱yóʼo kúú ña̱ chindeétáʼan xíʼinna ña̱ va̱ʼa koo inina xíʼin ndiʼina.
Ña̱ sakúaʼana. Reino Ndióxi̱ táxiña ley ña̱ chindeétáʼan xíʼin na̱ kaʼndachíñuña nu̱ú ña̱ va̱ʼa koo inina xíʼin ndiʼina, soo saátu sánáʼa̱ñana ndáaña xíniñúʼu keʼéna ña̱ va̱ʼa saxínunaña (Isaías 48:17, 18).
Chiñu ña̱ keʼéña. Na̱ kaʼndachíñu ti̱xin Reino Ndióxi̱ va̱ása keʼéna ña̱ kúni̱ miína ni va̱ása kuni̱na ndukúikána nda̱a̱ táki̱ʼva kéʼé na̱ chíñu na̱ íyo tiempo vitin. Saáchi ña̱ kúni̱na kúú ña̱ sáxi̱nuna ña̱ kúni̱ Ndióxi̱ koo nu̱ú ñuʼú yóʼo. Ña̱ kúni̱ Ndióxi̱ kúú ña̱ ná ndulivi iníísaá nu̱ú ñuʼú yóʼo, ta na̱ kúʼvi̱-ini xínira ni̱ʼína ña̱ kutakuna ndiʼi tiempo (Isaías 35:1, 5, 6; Mateo 6:10; Apocalipsis 21:1-4).