Kuniñúʼu video yóʼo ña̱ va̱ʼa kixáʼún kaʼviún xíʼin na̱ yiví

Kúúmiíyó ku̱mí video ña̱ káʼa̱n xa̱ʼa̱ ña̱ sánáʼa̱yó na̱ yiví xa̱ʼa̱ Ndióxi̱. ¿Ndáa xa̱ʼa̱ kúú ña̱ ku̱vaʼa ña̱ video yóʼo, ta ndáa ki̱ʼva kivi kuniñúʼuyóña tá ku̱a̱ʼa̱nyó predicación?

• 

  ¿Nda̱chun kaʼviyó Biblia? (iníísaá video). Ña̱yóʼo ku̱vaʼaña ña̱ chindeétáʼanña xíʼin na̱ yiví ña̱ kuni̱na sakúaʼana xa̱ʼa̱ Biblia, ni nda̱a̱ ndáaka religión kúúmiína. Chíndeétáʼanña xíʼinna ña̱ kuni̱na nandukúna xa̱ʼa̱ pregunta ña̱ kúúmiína nu̱ú Biblia, ta saátu va̱xi ejemplo ña̱ náʼa̱ ña̱ ndixava kúú ña̱ káʼa̱n Biblia xa̱ʼa̱ ña̱yóʼo. Ta nu̱ú ndíʼiña káʼa̱nña ndáa ki̱ʼva kivi ka̱ʼa̱nna xíʼin iinna ña̱ ku̱ʼu̱nna sanáʼa̱nana xa̱ʼa̱ Ndióxi̱.

• 

  ¿Nda̱chun kaʼviyó Biblia? (iin táʼvíña). Iin káchi íyo ña̱ va̱xi nu̱ú ña̱yóʼo xíʼin video ña̱ níí, soo xa̱ʼa̱ ña̱ loʼo kuití tiempo kéeña, va̱ʼaníka chíndeétáʼanña xíʼin na̱ yiví na̱ kǒo ku̱a̱ʼá tiempo nu̱ú.

• 

  ¿Ndáa ki̱ʼva sanáʼa̱ na̱ testigo Jehová na̱ yiví? Ku̱vaʼaña ña̱ chindeétáʼanña xíʼin na̱ yiví ña̱ kuni̱na ña̱ ná sanáʼa̱yóna xa̱ʼa̱ Ndióxi̱ ta saátu ndákuiinña pregunta ña̱ kúúmiína xa̱ʼa̱ ña̱yóʼo, tá kúú, ndáa ki̱ʼva ndukúna iin na̱ kaʼvi xíʼinna.

• 

  Kúsi̱íní-inindi̱ ña̱ kixáʼún kaʼviún Biblia. Ña̱ video yóʼo sánáʼa̱yóña nu̱ú na̱ yiví na̱ xa̱a̱ kixáʼayó kaʼviyó xíʼin. Ni ña̱ nu̱ú yichi̱ kúú ña̱ káʼa̱nña xa̱ʼa̱ ña̱ video yóʼo nu̱ú libro ña̱ naní Kivi koo si̱íún vitin ta saátu chí nu̱únínu página 2, kiviva na̱ʼa̱yóña nu̱ú na̱ yiví tá káʼviyó ña̱ ­folleto xíʼinna. Ña̱ video yóʼo káʼa̱nña xa̱ʼa̱ ndiʼi ña̱ va̱xi nu̱ú libro ta káʼa̱nña xíʼin na̱ sánáʼa̱yó ndáa ki̱ʼva kaʼviyó xíʼinna.

Ni xa̱a̱ íyo iin xa̱ʼa̱ kúú ña̱ ku̱vaʼa iin tá iin video yóʼo, soo kiviva na̱ʼa̱yóña nu̱ú nda̱a̱ ndáaka na̱ yiví á chindaʼáyóña ndaʼa̱na. Ná chikaa̱níyó ndee̱ ña̱ kuniñúʼuyó video yóʼo tá ku̱a̱ʼa̱nyó natúʼunyó xíʼin na̱ yiví xa̱ʼa̱ Ndióxi̱.