¿Á íyo ki̱vi̱ Ndióxi̱?

Ña̱ káʼa̱n Biblia xa̱ʼa̱ ña̱yóʼo

Ndiʼi na̱ yiví íyo iin ki̱vi̱na, ¿á su̱ví saátu xíniñúʼu koo iin ki̱vi̱ Ndióxi̱? Ña̱ va̱ʼa xa̱a̱yó kuxini̱ va̱ʼayó iin na̱ yiví ndáyáʼviní kuxini̱yó ki̱vi̱na ta saátu kuniñúʼuyóña, ña̱kán ki̱ʼva saátu ndáyáʼviní kuxini̱yó ki̱vi̱ Ndióxi̱ ña̱ va̱ʼa xa̱a̱yó kutáʼanyó xíʼinra.

Nu̱ú Biblia káʼa̱n Ndióxi̱ xíʼinyó ndáaña kúú ki̱vi̱ra, káchira: “Yi̱ʼi̱ kúú Jehová. Ña̱yóʼo kúú ki̱víi̱” (Isaías 42:8). Ta saátu ku̱a̱ʼání ki̱ʼva káʼa̱nna xíʼinra, tá kúú “Ndióxi̱ ta̱ kúúmií ndiʼi ndee̱”, “táta ta̱ káʼnu” ta saátu “Ndióxi̱ ta̱ i̱xava̱ʼa miíyó”, soo káʼa̱nra xíʼin na̱ káchíñu nu̱úra ña̱ ná kuniñúʼuna ki̱vi̱ra ña̱ ka̱ʼa̱nna xíʼinra (Génesis 17:1; Hechos 4:24; 1 Pedro 4:19).

Nu̱ú inkaka Biblia, ki̱vi̱ Ndióxi̱ va̱xiña nu̱ú Éxodo 6:3. Nu̱ú ña̱ texto yóʼo, Ndióxi̱ káchira: “Tá xi̱kitai̱ nu̱ú ta̱ Abrahán, ta̱ Isaac xíʼin ta̱ Jacob, na̱yóʼo xi̱kunda̱a̱-inina xa̱ʼíi̱ ña̱ kúi̱ Ndióxi̱ ta̱ kúúmií ndiʼi ndee̱, soo va̱ása níxi̱kunda̱a̱-inina xa̱ʼa̱ ki̱víi̱ ña̱ naníi̱ Jehová”.

Xa̱a̱ ku̱a̱ʼání ku̱i̱ya̱ xíniñúʼuna ki̱vi̱ Ndióxi̱ ña̱ íyo tu̱ʼun sáʼán, ta ña̱yóʼo kúúña Jehová. Ni savana kútóokana ka̱ʼa̱nna xíʼinra Yavé, soo ki̱vi̱ra ña̱ xíni̱ ku̱a̱ʼáníkana kúú Jehová. Ña̱ nu̱ú táʼví Biblia ni̱ka̱ʼyi̱ña tu̱ʼun hebreo, ta tu̱ʼun yóʼo xi̱kaʼyi̱ña chí ndaʼa̱ kúáʼa ta xi̱ndiʼiña chí ndaʼa̱ yitin. Ki̱vi̱ Ndióxi̱ ña̱ íyo tu̱ʼun hebreo ni̱ka̱ʼyi̱ña xíʼin ku̱mí letra yóʼo: יהוה ta naníña Tetragrámaton, ta ku̱mí saá letra yóʼo kúúña YHWH.