¿Nda̱saa na̱ testigo Jehová íyo iníísaá ñuyǐví?

¿Ndáa ki̱ʼva kúnda̱a̱-inina nda̱saa na̱ testigo Jehová íyo?

Ndákaʼvindi̱ na̱ kúú testigo Jehová nda̱saa na̱ nátúʼun xa̱ʼa̱ Reino Ndióxi̱ ndiʼi yo̱o̱ (Mateo 24:14). Na̱yóʼo kivi koona na̱ Testigo na̱ xa̱a̱ nda̱kuchi soo saátu na̱ yiví na̱ xa̱a̱ ni̱ka̱ʼa̱nna xíʼin ña̱ kivi natúʼunna xíʼin inkana xa̱ʼa̱ Ndióxi̱, soo ta̱ʼán ndakuchi na̱yóʼo.

¿Á xíniñúʼu taxiyó xu̱ʼún tasaá kooyó testigo Jehová?

Va̱ása. Saáchi kǒo xíniñúʼu taxiyó xu̱ʼún saá kooyó testigo á ña̱ kuumiíyó iin chiñu ti̱xin organización na̱ testigo (Hechos 8:18-20). Saáchi va̱ása káʼa̱nna ndáana kúú na̱ táxi xu̱ʼún. Ndiʼiva na̱ testigo xíniñúʼuna tiempona, ndee̱na ta saátu ña̱ʼa ña̱ kúúmiína ña̱ va̱ʼa natúʼunna xíʼin na̱ yiví xa̱ʼa̱ Ndióxi̱ (2 Corintios 9:7).

¿Ndáa ki̱ʼva kúnda̱a̱-inindó nda̱saa na̱ testigo nátúʼun xíʼin na̱ yiví xa̱ʼa̱ Ndióxi̱ ndiʼi yo̱o̱?

Ndiʼi yo̱o̱, na̱ testigo ndátaxina hora ña̱ nátúʼunna xíʼin na̱ yiví ndaʼa̱ na̱ congregación ta va̱ása íxandúxana xíʼinna ña̱ keʼéna ña̱yóʼo.

Ta ndákaʼvina ndiʼi hora yóʼo ta chíndaʼánaña ku̱a̱ʼa̱nña sucursal ña̱ kúúmiíndi̱. Ta na̱yóʼo chíndaʼánaña chí central mundial tasaá kéʼéna xíʼin iin iin país ta saátu xíʼin ñuu válí ña̱ kíʼinna kuenta xíʼin.

Tá ndíʼi ku̱i̱ya̱ ña̱ nátúʼunndi̱ xíʼin na̱ yiví,a kíʼinna kuenta nda̱saa kúú na̱ testigo na̱ íyo iin iin lugar. Tá ndíʼi ndákaʼvina ndiʼi na̱yóʼo ña̱ va̱ʼa kunda̱a̱-inina nda̱saa na̱ Testigo íyo iníísaá ñuyǐví. Ta nu̱ú táʼví ña̱ nani “Por todo el mundo” ña̱ va̱xi nu̱ú sitio ña̱ Internet ña̱ kúúmiíndi̱ káʼa̱nña xa̱ʼa̱ ña̱ kéʼéndi̱ iin iin país. Kúsi̱í-inindi̱ tá káʼvindi̱ ña̱yóʼo, ki̱ʼva saá xi̱keʼé na̱ cristiano na̱ ni̱xi̱yo tá siglo nu̱ú (Hechos 2:41; 4:4; 15:3).

¿Á ndákaʼvindó nda̱a̱ na̱ yiví na̱ va̱ása nátúʼun xa̱ʼa̱ Ndióxi̱, soo xáʼa̱nna reunión a sánáʼa̱ndona xa̱ʼa̱ Biblia?

Ni va̱ása ndákaʼvindi̱na, soo kúsi̱í-inindi̱ xa̱ʼa̱ ña̱ ndákutáʼanna xíʼinndi̱ reunión, soo ku̱a̱ʼání na̱yóʼo xáʼa̱nna ta xíyo ña̱ Ndákaʼándi̱ xa̱ʼa̱ ña̱ ni̱xi̱ʼi̱ ta̱ Jesús. Tasaá kúú ña̱ ndákaʼvindi̱ na̱ testigo xíʼin na̱ yiví na̱ xáʼa̱n reunión kán tasaá kúnda̱a̱-inindi̱ nda̱saa kúúna. Tá ku̱i̱ya̱ 2024, na̱ ni̱xa̱ʼa̱n ña̱ Conmemoración xi̱kuuna 21,119,442.

Ku̱a̱ʼání na̱ yiví va̱ása xáʼa̱nna reunión ña̱ kúúmiíndi̱ soo sánáʼa̱ndi̱na xa̱ʼa̱ Biblia ta kǒo xu̱ʼún kíʼinndi̱ xa̱ʼa̱ ña̱yóʼo. Tá ku̱i̱ya̱ 2024 yo̱o̱ ta yo̱o̱ ki̱ʼva 7,480,146 na̱ yiví ka̱ʼvindi̱ xíʼin. Soo sava yichi̱ ku̱a̱ʼána xi̱ndoo tá xi̱kaʼvindi̱ xíʼinna.

¿Nda̱chun ku̱a̱ʼáka kúú na̱ káʼa̱n ña̱ kúúna testigo Jehová tá kéʼé na̱ gobierno censo nu̱úka na̱ káʼa̱nndó kúú testigo?

Tá kéʼéna censo ña̱ kéʼéna kúú ña̱ ndáka̱tu̱ʼunna na̱ yiví ndáa religión kúú ña̱ kúúmiína. Ta kúú Oficina ña̱ Censo ña̱ íyo chí Estados Unidos iin ña̱ kúni̱na kunda̱a̱-inina tá ndáka̱tu̱ʼunna na̱ yiví kúú ña̱ á ndíku̱nna iin religión. Ña̱ káʼyí kuitína kúú ña̱ káʼa̱n na̱ yiví ta su̱ví ña̱ kéʼéna. Soo ndi̱ʼi̱ va̱ása káʼvindi̱ na̱ káʼa̱n kúú testigo Jehová chi na̱ káʼvindi̱ kúú na̱ ndátaxi hora ña̱ nátúʼunna xíʼin na̱ yiví xa̱ʼa̱ Ndióxi̱.