Viíní ndáandi̱ salón ña̱ kúúmiíndi̱

“Kútóoníi̱ salón nu̱ú ndákutáʼanndi̱”. Saá ni̱ka̱ʼa̱n ñá Nicole, iin ñá hermana loʼo ñá íyo ñuu Colombia. ¿Nda̱chun kútóoníñá salón nu̱ú xáʼa̱nñá? Ñáyóʼo káʼa̱nñá: “Saáchi yóʼo kúú nu̱ú ndákutáʼi̱n xíʼin na̱ ndásakáʼnu Ndióxi̱ ta íyona nda̱a̱ táki̱ʼva íyo na̱ veʼi̱”. ¿Á ndóʼún nda̱a̱ táki̱ʼva ndóʼo ñá Nicole?

Iníísaá ñuyǐví íyo na̱ testigo Jehová, ta ndátakandi̱ ti̱xin 63,000 salón. Va̱ʼaní íxava̱ʼandi̱ veʼe yóʼo ña̱ ndasakáʼnundi̱ Ndióxi̱. Ná kotoyó ña̱ káʼa̱n ta̱ David iin ta̱ precursor regular ta̱ ñuu Colombia, ta̱yóʼo káchira: “Tá xáʼa̱n na̱ yiví veʼe nu̱ú ndásakáʼnundi̱ Ndióxi̱, ndákanda̱ní-inina tá xítona ña̱ viíní ndáandi̱ña ta xa̱ʼa̱ ña̱ yóʼo kúni̱kana kunda̱a̱-inina xa̱ʼa̱ Ndióxi̱”. Ta va̱ʼaníva náʼa̱ veʼe nu̱ú ndátakandi̱ saáchi ku̱a̱ʼání chiñu kéʼéndi̱ ña̱ va̱ʼa vií kunaʼa̱ña. ¿Ndáa ki̱ʼva kéʼéndi̱ ña̱yóʼo?

¿Ndáa ki̱ʼva kéʼéndi̱ chiñu yóʼo?

Ndiʼi na̱ hermano na̱ xáʼa̱n ti̱xin salón, chíkaa̱na ndee̱ ña̱ ndasaviínaña ta kundaanaña, ña̱kán tá xa̱a̱ ndíʼi reunión ña̱ kúúmiíndi̱ ndáya̱kúnndi̱ salón. Ta tá íyo iin ña̱ʼa ña̱ xíniñúʼu nduvií ndi̱ku̱n kama ndásaviíndi̱ña.

Ña̱ va̱ʼa chindeétáʼanna xíʼin na̱ publicador ña̱ va̱ʼa kunda̱a̱-inina ndáa ki̱ʼva kundaana salón yóʼo. Na̱ Departamento Local ña̱ Diseño xíʼin Construcción (LDC) ndáka̱xinna sava na̱ hermano na̱ sanáʼa̱ na̱ publicador ndáa ki̱ʼva keʼéna chiñu yóʼo. Na̱ hermano na̱ ndáka̱xin na̱ LDC kíʼinna kuenta xíʼin ki̱ʼva seis á diez salón. Xáʼa̱nna xítona salón yóʼo ta sánáʼa̱na na̱ publicador ndáa ki̱ʼva kundaanaña. Tá xa̱a̱ xínu u̱ni̱ ku̱i̱ya̱ xáʼa̱nna xítona salón ta kíʼinna kuenta ndáa ña̱ʼa kúú ña̱ xíniñúʼu nduvií á ndáa ña̱ kivi keʼéna ña̱ va̱ʼa kǒo tu̱ndóʼo koo.

Ndiʼi na̱ hermano xíʼin ná hermana na̱ xa̱a̱ sa̱náʼa̱na ndáa ki̱ʼva keʼéna chiñu yóʼo kúsi̱íní-inina. Iin ñá hermana ñá ñuu India ñá naní Indhumathi, káchiñá: “Va̱ʼaní ña̱ sa̱náʼa̱na ndi̱ʼi̱ saáchi vitin kúnda̱a̱-inindi̱ ndáa ki̱ʼva kundaandi̱ salón ña̱ kúúmiíndi̱”. Ta̱ Evans, iin ta̱ hermano ta̱ ñuu Kenia, káchira: “Sa̱kúaʼandi̱ ña̱ kama xíniñúʼu ndasaviíndi̱ iin ña̱ʼa ña̱ ndi̱ʼi-xa̱ʼa̱, saáchi tá ná taxindi̱ ya̱ʼaka tiempo ku̱a̱ʼáka xu̱ʼún kuniñúʼundi̱ xíʼinña”.

Míí kíʼinndi̱ xu̱ʼún ña̱ xíniñúʼundi̱

Ña̱ va̱ʼa kuniñúʼundi̱ iin salón ta saátu ña̱ ndasaviíndi̱ña, ku̱a̱ʼá xu̱ʼún xíniñúʼundi̱ ku̱i̱ya̱ tá ku̱i̱ya̱. Ta sava ñuu ku̱a̱ʼáka xu̱ʼún xíniñúʼundi̱, xa̱ʼa̱ lugar nu̱ú níndichiña, xa̱ʼa̱ tiempo ña̱ íyoña á xa̱ʼa̱ ña̱ ku̱a̱ʼá congregación xíniñúʼu salón kán. ¿Míí kána xu̱ʼún ña̱ cháʼvindi̱ ndiʼi ña̱yóʼo?

Donación ña̱ táxi na̱ hermano kúú ña̱ xíniñú’undi̱ ña̱ va̱’a cha’vindi̱ ndi’i ña̱’a. Iin ta̱ hermano ta̱ ñuu Kazajistán ta̱ naní Alexander káchira: “Xu̱ʼún ña̱ táxi na̱ hermano xíniñúʼundi̱ña ña̱ va̱ʼa chaʼvindi̱ internet, luz xíʼin ti̱kui̱í ta saátu ña̱ va̱ʼa kiʼinndi̱ inkaka ña̱ʼa tá kúú tutu, guante, ña̱ʼa ña̱ kuniñúʼuna tá ndáya̱kúnna salón xíʼin pintura”. Ta saátu chíndaʼándi̱ xu̱ʼún ku̱a̱ʼa̱nña obra mundial ña̱ kuniñúʼunaña tá ndásaviína salón á ña̱ ixava̱ʼana inkaka salón iníísaá ñuyǐví.

Chiñu nu̱ú xíniñúʼundi̱ ku̱a̱ʼáka xu̱ʼún

Sava yichi̱ ku̱a̱ʼáka xu̱ʼún xíniñúʼundi̱ ña̱ va̱ʼa ndasaviíndi̱ salón nu̱úka ña̱ xíniñúʼundi̱ tá xíyo reunión u̱vi̱ á u̱ni̱ yo̱o̱. Tá kúu ña̱yóʼo, na̱ anciano káʼa̱nna xíʼin ta̱ hermano ta̱ nda̱kaxin na̱ LDC. Tá káʼa̱n na̱ LDC ña̱ kivi keʼéndi̱ chiñu yóʼo, xu̱ʼún ña̱ ku̱a̱ʼa̱n obra mundial kúú ña̱ xíniñúʼundi̱ ña̱ va̱ʼa keʼéndi̱ chiñu yóʼo. Tá ku̱i̱ya̱ 2023 nda̱saviíndi̱ 8,793 salón. Ta ña̱ va̱ʼa ke̱ʼéndi̱ chiñu yóʼo xi̱niñúʼundi̱ 76,6 millón ña̱ dólar. Ná kotoyó u̱vi̱ chiñu yóʼo.

Ñuu Angola xi̱niñúʼu ndasaviíndi̱ iin salón, saáchi xa̱a̱ ku̱a̱ʼání ña̱ʼa xi̱xiniñúʼu nduvií, ta salón yóʼo xa̱a̱ 15 ku̱i̱ya̱ na̱kuva̱ʼaña. Xa̱a̱ xi̱xiniñúʼu nasamana cable ña̱ luz ta xa̱a̱ ku̱a̱ʼa̱n kue̱ʼe̱ nama̱ña. Ta saátu, na̱ vecino xi̱kaʼa̱nkúáchina ña̱ xi̱yaʼaní ti̱kui̱í yéʼéna. Ña̱ va̱ʼa ndasaviína ndiʼi ña̱yóʼo, na̱ LDC xi̱niñúʼuna 9,285 dólar. Na̱ vecino nda̱kanda̱ní-inina xa̱ʼa̱ ki̱ʼva ña̱ ke̱ʼé na̱ hermano chiñu yóʼo ta ta̱xinína tíxa̱ʼvi ndaʼa̱na.

Salón ña̱ íyo ñuu Polonia xi̱xi̱ʼinníña, ta alfombra ña̱ xi̱kuumiíña xa̱a̱ ndi̱ʼi-xa̱ʼa̱ ndiʼiña. Ña̱kán, na̱ LDC ni̱ka̱ʼa̱nna ña̱ ná ndasaviína xi̱ní veʼe ta nasamana alfombra. Ña̱ va̱ʼa ke̱ʼéna chiñu yóʼo xi̱niñúʼuna 9,757 dólar. Xa̱ʼa̱ ña̱ nda̱saviína salón yóʼo, ku̱a̱ʼá ku̱i̱ya̱ kivi kuniñúʼunaña.

Tá vií ndáayó salón nu̱ú ndátakayó ndukáʼnu ki̱vi̱ Jehová

Tá ndáayó salón nu̱ú ndákutáʼanyó vií xíniñúʼuyó donación, ta saátu vií káʼa̱n na̱ yiví xa̱ʼa̱ Jehová. Iin ta̱ hermano ta̱ naní Shaun, ta̱ íyo iin isla ña̱ ndíkaa̱ chí Tonga, káchira: “Xa̱ʼa̱ ña̱ va̱ʼaní ndáandi̱ salón, va̱ʼa ndásakáʼnundi̱ Jehová ti̱xin iin salón limpio ta va̱ʼa íyo ndiʼi ña̱ʼa. Ta va̱ʼa káʼa̱n na̱ yiví xa̱ʼa̱ Jehová isla yóʼo. Kúsi̱íní-inindi̱ kánandi̱ ndiʼina ña̱ kixina ti̱xin salón yóʼo”.

Saátu miíún kivi chindeétáʼún xíʼinndi̱

Ndiʼiyó kivi ndaya̱kún ta ndasaviíyó salón nu̱ú ndásakáʼnuyó Ndióxi̱. Ta̱ Marino, iin ta̱ hermano ta̱ nda̱kaxin na̱ LDC ña̱ va̱ʼa sanáʼa̱ra na̱ hermano ndáa ki̱ʼva kundaana salón ñuu Australia, káchira: “Iin chiñu ña̱ ndáyáʼviní kúú ña̱ ndasaviíyó veʼe nu̱ú ndásakáʼnuyó Ndióxi̱, ta ndiʼiyó kivi chikaa̱ ndee̱ ña̱ keʼéyó ña̱yóʼo. Tá kéʼéyó saá, loʼo xu̱ʼún xíniñúʼuyó tasaá kivi kuniñúʼu na̱ hermano xu̱ʼún yóʼo nu̱ú kúma̱níka ndasaviína salón”.

Ta̱ Joel, iin ta̱ hermano ta̱ íyo ñuu India kútóoníra ndasaviíra salón nu̱ú xáʼa̱nra, ta̱yóʼo káchira: “Tá káchíñui̱ xíʼin na̱ hermano chíndeétáʼanña xíʼi̱n ña̱ ndakanixi̱níi̱ ña̱ ki̱ʼva saá kachíñuyó ñuyǐví xa̱á”. Ñá Nicole, ñá xa̱a̱ ni̱ka̱ʼa̱nyó xa̱ʼa̱, káchiñá: “Sa̱kán íyo loʼo, na̱ hermano nda̱saviína baño saáchi xi̱xita ti̱kui̱í. Ta yi̱ʼi̱ nda̱ya̱kún ti̱kui̱í nu̱ú piso. Su̱ví yi̱ʼi̱ví níndasavií baño, soo chi̱ndeétáʼi̱n xíʼinna ña̱ va̱ʼa kǒo ko̱yona”.

Tá kúni̱ún chindeétáʼún xíʼin na̱ hermano tá ndásaviína salón nu̱ú xáʼún, ka̱ʼa̱n xíʼin na̱ anciano. Su̱ví nda̱saa salón nu̱ú xáʼún ndásaviína xíʼin donación ña̱ táxiún, chi saátu xíniñúʼunaña ña̱ va̱ʼa nduvií inkaka salón ña̱ íyo iníísaá ñuyǐví. Kivi taxiún donación ti̱xin caja válí ña̱ íyo salón nu̱ú xáʼún á saátu nu̱ú sitio donate.jw.org. Tíxa̱ʼvindó xa̱ʼa̱ ña̱ va̱ʼaní inindó.