Ña̱ kéʼéndi̱ ña̱ va̱ʼa kundaandi̱ na̱ hermano ta saátu planeta yóʼo

Miíyó na̱ testigo Jehová kúnda̱a̱-iniyó ña̱ si̱lóʼo kúma̱ní ta sandíʼi-xa̱ʼa̱ Ndióxi̱ na̱ sándiʼi-xa̱ʼa̱ ñuʼú yóʼo (Apocalipsis 11:18). Soo nani ndátuyó ña̱ kixaa̱ ki̱vi̱ kán, chíkaa̱níyó ndee̱ ña̱ kundaayó ñuʼú yóʼo, tá kúú ku̱a̱ʼání ña̱ʼa kéʼéyó ña̱ va̱ʼa kundaayó ñuʼú yóʼo tá xa̱a̱ íxava̱ʼayó veʼe nu̱ú ndásakáʼnuyó Ndióxi̱.

Ña̱yóʼo naníña iniciativa ecológica ta chíndeétáʼanña xíʼin ñuʼú yóʼo ña̱ va̱ʼa kǒo kama ndiʼi-xa̱ʼa̱ña. ¿Ndáaña xa̱a̱ kéʼéyó? Ta, ¿ndáa ki̱ʼva chíndeétáʼanña xíʼinyó ña̱ kuniñúʼu viíyó donación?

Ña̱ ke̱ʼéyó ña̱ va̱ʼa kǒo niʼníní koo ini Salón ña̱ Asamblea

Salón ña̱ Asamblea ñuu Matola, ña̱ ndíkaa̱ ñuu Mozambique kǒo nama̱ kúúmiíña ta xi̱níña xíʼin lámina ku̱va̱ʼaña. Soo xi̱ndasaa̱níña xíʼin ñu̱ʼu ta xa̱ʼa̱ ña̱kán niʼníní ni̱xi̱yo iniña. Iin ta̱ hermano ta̱ íyo ñuu kán káchira: “Niʼníní ni̱xi̱yo, ta ndiʼi tiempo xi̱kee tati̱ín nu̱úndi̱, tá xi̱ndiʼi programa na̱ hermano kamakaví xi̱keena ña̱ va̱ʼa ndi̱ko loʼo xi̱nína”. ¿Ndáaña kivi keʼéyó ña̱ va̱ʼa va̱ása niʼníní koo ti̱xin salón kán ta kivi kuniso̱ʼo na̱ hermano programa?

Chi̱kaa̱yó ventilador ña̱ káva̱ xíʼin ta̱chí ta saátu ña̱ naní aislamiento térmico. Xa̱ʼa̱ ña̱ chi̱kaa̱yó aislamiento térmico va̱ása kíʼviníka kaʼni̱ ini salón ta ventilador yóʼo táváña ta̱chí vi̱xin. Kǒoví luz xíniñúʼu ventilador saáchi ta̱chí xíniñúʼuñá ña̱ va̱ʼa ka̱va̱ña. Ta̱chí ña̱ tává ventilador yóʼo chíndeétáʼanña ña̱ va̱ʼa kee ndiʼi yo̱ko̱ ña̱ ndákutú ini salón. Iin tá iin ventilador yóʼo ki̱ʼva 50 dólar ya̱ʼviña.a

Xa̱ʼa̱ ña̱ chi̱kaa̱yó ventilador yóʼo va̱ása niʼníka Salón ña̱ Asamblea. Xa̱ʼa̱ ña̱ va̱ása kíndo̱oka ta̱chí niʼní salón yóʼo va̱ása kamaka kúxuña. Xa̱ʼa̱ ña̱yóʼo loʼoka dióxido ña̱ carbono íyo ta ku̱a̱ʼáka oxígeno íyo, ta xa̱ʼa̱ ña̱yóʼo va̱ʼaka xíniso̱ʼo na̱ hermano ña̱ yáʼa asamblea. Ta hermano ta̱ xa̱a̱ ni̱ka̱ʼa̱nyó xa̱ʼa̱ káchira: “Kǒo xínukandi̱ kéendi̱ tá xa̱a̱ ndíʼi asamblea saáchi xa̱ʼa̱ ña̱ kǒo niʼníka ini salón ndóondi̱ nátúʼunndi̱ xíʼin na̱ hermano. Va̱ʼaní kúnindi̱ ndóondi̱ ti̱xin veʼe yóʼo saáchi vi̱xinní, nda̱a̱ táki̱ʼva íyo ña̱ ndóoyó xa̱ʼa̱ yitu̱n tú ndokoní ndaʼa̱ saá íyoña”.

Va̱ʼaní xíniñúʼuyó ñu̱ʼu á ña̱ka̱ndii

Iníí ñuyǐví veʼe nu̱ú ndásakáʼnuyó Ndióxi̱ xíniñúʼuyó paneles solares, saáchi ñu̱ʼu á ña̱ka̱ndii sándasa̱a̱ña ña̱yóʼo ta nduuña electricidad. Ña̱kán kǒo xíniñúʼuyó ku̱a̱ʼá electricidad ña̱ távána ti̱xin ñuʼú, tá kúú ña̱ carbón, petróleo xíʼin gas. Ña̱yóʼo chíndeétáʼanña xíʼinyó ña̱ kǒo ixayaku̱a̱níyó planeta.

Ku̱i̱ya̱ 2023 chi̱ndósona paneles solares xi̱ní Betel ñuu Eslovenia, ta ña̱yóʼo táxiña 30% ña̱ electricidad ña̱ xíniñúʼu veʼe yóʼo. Tá ná kixaa̱ ki̱vi̱ ña̱ ku̱a̱ʼáka electricidad taxiña, nda̱a̱ na̱ yiví na̱ ndóo ñuu yóʼo kivi kuniñúʼuña. 360,000 dólar cha̱ʼvina xa̱ʼa̱ ndiʼi panel yóʼo. Ta vitin, ña̱ sucursal loʼoka luz cháʼviña ta ti̱xin ku̱mí ku̱i̱ya̱ ndiʼi chaʼviyó ña̱yóʼo ta nda̱a̱ ndo̱oka xu̱ʼún ndaʼa̱yó.

Ku̱i̱ya̱ 2024 chi̱ndósondi̱ paneles solares ta saátu iin pila ña̱ káʼnuní xi̱ní Betel ñuu Sri Lanka ña̱ va̱ʼa kuniñúʼu na̱ hermanoña. Ki̱ʼva 3 millón ña̱ dólar cha̱ʼviyó xa̱ʼa̱ ña̱yóʼo, ta táxiña 70% ña̱ electricidad ña̱ xíniñúʼu Betel yóʼo. Ti̱xin u̱ni̱ ku̱i̱ya̱ sandíʼiyó chaʼviyóña, saáchi kǒo ku̱a̱ʼáka xu̱ʼún cháʼviyó xa̱ʼa̱ luz. Ku̱i̱ya̱ ni̱ya̱ʼa chi̱ndósoyó paneles solares xi̱ní Betel ñuu Países Bajos. Cha̱ʼviyó 1,100,000 dólar xa̱ʼa̱ ña̱yóʼo ta táxiña 35% ña̱ electricidad ña̱ xíniñúʼu Betel yóʼo. Ti̱xin nueve ku̱i̱ya̱ sandíʼiyó chaʼviyóña.

Ta saátu xa̱a̱ chi̱ndósondi̱ paneles solares xi̱ní sava oficina ña̱ traducción (ORT) ña̱ ñuu México, iin ña̱yóʼo kúú ORT ña̱ tarahumara central, ña̱ ndíkaa̱ ñuu Chihuahua. Yo̱o̱ ña̱ vi̱xinní kivi xa̱a̱ña nda̱a̱ 0 °C (32 °F) ta yo̱o̱ ña̱ ndeéní niʼní xáa̱ña nda̱a̱ 40 °C (104 °F) á ku̱a̱ʼáka. Xa̱ʼa̱ ña̱ yaʼviní cháʼvina luz, na̱ hermano kǒo níxi̱xiniñúʼuna calefacción ña̱ va̱ʼa ndasa̱ána ni ña̱ aire acondicionado ña̱ va̱ʼa nduvi̱xin. Iin ta̱ hermano ta̱ naní Jonathan, ta̱ káchíñu ORT yóʼo káchira: “Yo̱o̱ ña̱ vi̱xinní xi̱xiniñúʼundi̱ ti̱ka̱chí xíʼin chamarra ta yo̱o̱ ña̱ ndeéní niʼní xi̱xunándi̱ ventana ña̱ va̱ʼa kivi ta̱chí”.

Ku̱i̱ya̱ 2024 chi̱ndósona paneles solares xi̱ní ORT yóʼo. Ta cha̱ʼviyó 21,480 dólar xa̱ʼa̱ ña̱yóʼo, soo xa̱ʼa̱ ña̱ kǒo ku̱a̱ʼáka xu̱ʼún cháʼviyó xa̱ʼa̱ luz ti̱xin cinco ku̱i̱ya̱ sandíʼiyó chaʼviyóña. Vitin xa̱a̱ kivi kuniñúʼu na̱ hermanoyó calefacción ña̱ va̱ʼa ndasa̱ána xíʼin aire acondicionado ña̱ va̱ʼa nduvi̱xin. Ta̱ Jonathan káchira: “Kúsi̱íní-inindi̱ kéʼéndi̱ chiñu vitin ta va̱ʼaníka kánaña, ta saátu va̱ʼa kúnindi̱ saáchi viíní xíniñúʼu na̱ ñuu Ndióxi̱ xu̱ʼún ña̱ táxi na̱ hermano ta ndáana ñuʼú yóʼo”.

Va̱ʼaní xíniñúʼuyó ti̱kui̱í sa̱vi̱

Sava salón ña̱ íyo África kǒo kúúmiíña ti̱kui̱í llave á ti̱kui̱í limpio tá koʼona, ña̱kán ni káni̱ní xáʼa̱n xáʼána salón soo ndísona ti̱kui̱í ku̱a̱ʼa̱n xíʼinna ña̱ va̱ʼa kuniñúʼunara. Ta sava salón na̱ hermano xíniñúʼu satána ti̱kui̱í tá kuniñúʼuna ta iin carro xáa̱ ndákara ndaʼa̱na soo nisaá yaʼviní íxi̱kóna ti̱kui̱í yóʼo, ta ña̱yóʼo kǒo chíndeétáʼanña xíʼin ñuʼú.

Ña̱ va̱ʼa kúúmií na̱ hermano ti̱kui̱í, ku̱a̱ʼání salón ña̱ íyo África chi̱ndósona tubo xi̱ní salón ña̱ va̱ʼa ndakayana ti̱kui̱í sa̱vi̱ tá kuniñúʼuna. Soo ña̱ va̱ʼa chindósona tubo xi̱ní salón siʼna xítona á kúun sa̱vi̱ ñuu kán. Ña̱ va̱ʼa kuumií salón ña̱yóʼo sava yichi̱ xíniñúʼuna ki̱ʼva 600 á nda̱a̱ 3,000 dólar. Xa̱ʼa̱ ña̱ kǒo cháʼvina xa̱ʼa̱ ti̱kui̱í, loʼova xu̱ʼún xíniñúʼu na̱ hermano xíʼin salón yóʼo.

Ti̱kui̱í sa̱vi̱ tá ndákayana va̱ʼaní chíndeétáʼanra xíʼin na̱ hermano. Iin ñá hermana ñá naní Noemia, ñá ñuu Mozambique, káchiñá: “Tá ya̱chi̱ káni̱ní xi̱xaʼa̱nndi̱ xa̱ʼa̱ ti̱kui̱í ta xi̱kunaakavíndi̱ tá xi̱xaandi̱ salón. Xa̱ʼa̱ ña̱ kǒo ku̱a̱ʼá ti̱kui̱í níxi̱yo ini salón xi̱ ixayo̱ʼvi̱níña xíʼinndi̱ ña̱ limpio koondi̱. Soo vitin, xa̱ʼa̱ ña̱ xa̱a̱ íyo ti̱kui̱í ndiʼindi̱ kivi ndaʼá, ta kǒo kúnaákandi̱ tá xa̱a̱ xáʼa̱nndi̱ reunión saáchi va̱ása xáʼa̱nkandi̱ xa̱ʼa̱ ti̱kui̱í. Tíxa̱ʼviníndó”.

¿Ndáa mií kíʼinyó xu̱ʼún ña̱ va̱ʼa keʼéyó ndiʼi chiñu yóʼo? Ña̱yóʼo kúú donación ña̱ táxi na̱ hermano xa̱ʼa̱ ña̱ obra mundial. Ku̱a̱ʼání na̱ hermano táxina xu̱ʼún ña̱ kúúmiína nu̱ú donate.jw.org. Tíxa̱ʼviníndó chi va̱ʼaní-inindó ña̱ táxindó xu̱ʼúnndó ña̱ kuniñúʼu na̱ ñuu Ndióxi̱.