Segundo ña̱ Reyes

8 Ta̱ Eliseo ni̱ka̱ʼa̱nra xíʼin siʼí ta̱ loʼo ta̱ sa̱ndátakura: “Ndakiʼin na̱ veʼún, ta kúáʼanndó ndukúndó inka ñuu nu̱ú kivi kundoondó saáchi Jehová ni̱ka̱ʼa̱nra ña̱ u̱xa̱ ku̱i̱ya̱ kooní so̱ko ñuu yóʼo”. 2 Ñá ñaʼá yóʼo ke̱ʼéñá nda̱a̱ táki̱ʼva ni̱ka̱ʼa̱n ta̱a ta̱ káchíñu nu̱ú Ndióxi̱ ta̱ nda̱a̱ xíʼinñá. Nda̱kiʼinñá ku̱a̱ʼa̱nñá xíʼin na̱ veʼeñá ta ni̱xa̱a̱na xi̱kundoona nu̱ú ñuʼú na̱ filisteo u̱xa̱ ku̱i̱ya̱.

3 Tá ni̱ya̱ʼa u̱xa̱ ku̱i̱ya̱, ñá ñaʼá yóʼo ndi̱kóñá ñuuñá, ta ni̱xa̱ʼa̱nñá nu̱ú ta̱ rey ta ni̱ka̱ʼa̱nñá xíʼinra ña̱ ná ndataxina veʼeñá ta saátu ñuʼúñá. 4 Ta ta̱ Guehazí ta̱ xi̱kachíñu nu̱ú ta̱a ta̱ káchíñu nu̱ú Ndióxi̱ ta̱ nda̱a̱ íyora nátúʼunra xíʼin ta̱ rey, ta ta̱yóʼo ni̱ka̱ʼa̱nra xíʼinra: “Ixaún ña̱ ma̱ní natúʼun xíʼi̱n xa̱ʼa̱ ndiʼi ña̱ʼa ña̱ ndáyáʼviní ña̱ kéʼé ta̱ Eliseo”. 5 Tá nátúʼunra xíʼin ta̱ rey ndáa ki̱ʼva sa̱ndátaku ta̱ Eliseo iin na̱ ni̱xi̱ʼi̱, saá ni̱xa̱a̱ siʼí ta̱ loʼo ta̱ sa̱ndátakura ña̱ va̱ʼa ka̱ʼa̱nñá xíʼin ta̱ rey ña̱ ná ndataxina veʼeñá xíʼin ñuʼúñá. Ndi̱ku̱n saá ta̱ Guehazí ni̱ka̱ʼa̱nra: “Táta rey, ta̱ loʼo yóʼo kúú ta̱ sa̱ndátaku ta̱ Eliseo ta ñáyóʼo kúú siʼíra”. 6 Tasaá ta̱ rey ni̱nda̱ka̱tu̱ʼunra ñá ñaʼá yóʼo ndáa ki̱ʼva ku̱u ndiʼi ña̱yóʼo ta ñáyóʼo na̱túʼunñá xíʼinra. Tasaá ta̱ rey nda̱kaxinra iin ta̱ kúúmií iin chiñu ña̱ ndáyáʼvi nu̱úra ta ni̱ka̱ʼa̱nra xíʼinra: “Ndataxi ndiʼi ña̱ kúú kuentañá ndaʼa̱ñá, ta saátu ya̱ʼvi ndiʼi ña̱ʼa ña̱ ka̱na nu̱ú ñuʼúñá nani tá ki̱vi̱ ña̱ ke̱ena ku̱a̱ʼa̱nna ñuu yóʼo iinsaá nda̱a̱ ña̱ ndi̱kóna vitin”.

7 Ta̱ Eliseo ni̱xa̱ʼa̱nra chí Damasco, ta tiempo saá ta̱ Ben-Hadad ta̱ rey ñuu Siria kúúmiíra kue̱ʼe̱. Ña̱kán ni̱ka̱ʼa̱nna xíʼinra: “Yóʼo ki̱xaa̱ ta̱a ta̱ káchíñu nu̱ú Ndióxi̱ ta̱ nda̱a̱”. 8 Tasaá ta̱ rey ni̱ka̱ʼa̱nra xíʼin ta̱ Hazael: “Kúáʼan kotoún ta̱a ta̱ káchíñu nu̱ú Ndióxi̱ ta̱ nda̱a̱, ta kuniʼún ña̱ʼa taxiún ndaʼa̱ra. Ka̱ʼa̱n xíʼinra ná nda̱ka̱tu̱ʼunra Jehová á ndaʼi̱ nu̱ú kue̱ʼe̱ yóʼo”. 9 Tasaá nda̱kiʼin ta̱ Hazael ku̱a̱ʼa̱nra kotorara ta níʼira ña̱ʼa ña̱ taxira ndaʼa̱ra: 40 camello kúú tí ndíso ndiʼi nu̱ú ña̱ʼa ña̱ va̱ʼa ña̱ ke̱e chí Damasco. Tá ni̱xa̱a̱ra, xi̱kundichira nu̱ú ta̱ Eliseo ta ni̱ka̱ʼa̱nra xíʼinra: “Ta̱ Ben-Hadad ta̱ kúú rey ñuu Siria ta̱ íyo nda̱a̱ táki̱ʼva íyo se̱ʼún chi̱ndaʼára yi̱ʼi̱ ña̱ nda̱ka̱tu̱ʼíi̱n yóʼó ‘¿Á ndaʼi̱ nu̱ú kue̱ʼe̱ yóʼo?’”. 10 Ta̱ Eliseo ni̱ka̱ʼa̱nra xíʼinra: “Kúáʼan ta ka̱ʼún xíʼinra ña̱ ndaʼavara. Ni ni̱ka̱ʼa̱nva Jehová xíʼi̱n ña̱ kuvira”. 11 Ta naʼá va̱ʼa xi̱to káxira nu̱ú ta̱ Hazael ta ta̱yóʼo va̱ása va̱ʼa níkunira. Ta ta̱ Eliseo ta̱ káchíñu nu̱ú Ndióxi̱ ta̱ nda̱a̱ ki̱xáʼara xákura. 12 Ta ta̱ Hazael ni̱nda̱ka̱tu̱ʼunrara: “¿Nda̱chun xákún táta?”. Ta ta̱ Eliseo ni̱ka̱ʼa̱nra xíʼinra: “Saáchi kúnda̱a̱-inii̱ ña̱ saxóʼvi̱níún* na̱ ñuu Israel. Kaʼmiún veʼena ña̱ kútu̱ní ku̱vaʼa, ta na̱ ta̱a na̱ xíni̱ní kanitáʼan kaʼníúnna xíʼin espada, kaniún se̱ʼena nda̱a̱ ná sakúachi válíúnna ta ndatáún ti̱xin ná ñaʼá ná ñúʼu se̱ʼe”. 13 Ta ta̱ Hazael ni̱ka̱ʼa̱nra: “Yi̱ʼi̱ ta̱ káchíñu nu̱ún nda̱a̱ táki̱ʼva íyo iin ti̱na* tí ni loʼo va̱ása ndáyáʼvi saá íyoi̱, nda̱a̱ ni loʼoví va̱ása keʼíi̱ ña̱yóʼo”. Soo ta̱ Eliseo ni̱ka̱ʼa̱nra xíʼinra: “Xa̱a̱ ni̱ka̱ʼa̱nva Jehová xíʼi̱n ña̱ miíún kúú ta̱ xa̱a̱ koo rey nu̱ú na̱ ñuu Siria”.

14 Tasaá nda̱koo ta̱ Hazael ta̱ Eliseo ta nda̱ndikóra nu̱ú ta̱ rey ta̱ káchíñura nu̱ú, ta ta̱yóʼo ni̱nda̱ka̱tu̱ʼunrara: “¿Ndáaña ni̱ka̱ʼa̱n ta̱ Eliseo xíʼún?”. Ta ta̱yóʼo ka̱chira: “Ni̱ka̱ʼa̱nra xíʼi̱n ña̱ ndaʼavaún”. 15 Soo tá inka ki̱vi̱, ta̱ Hazael ki̱ʼinra iin ti̱ka̱chí, sa̱ndáxiraña* xíʼin ti̱kui̱í tasaá ka̱tavi̱raña nu̱ú ta̱ rey nda̱a̱ tá ndi̱ʼi ta̱chíra ta ni̱xi̱ʼi̱ra. Ta mií ta̱ Hazael ni̱xa̱a̱ ndu̱u rey.

16 Tá xa̱a̱ u̱ʼu̱n ku̱i̱ya̱ xáʼndachíñu ta̱ Jehoram ta̱ xi̱kuu se̱ʼe ta̱ Acab ta̱ xi̱kuu rey chí ñuu Israel, ta̱ Jehoram se̱ʼe ta̱ rey Jehosafat ni̱xa̱a̱ra ndu̱ura rey chí Judá tá kúúka ta̱ Jehosafat rey chí Judá. 17 Xi̱kuumiíra 32 ku̱i̱ya̱ tá ni̱xa̱a̱ra ndu̱ura rey ta xa̱ʼndachíñura u̱na̱ ku̱i̱ya̱ chí ñuu Jerusalén. 18 Xi̱ndiku̱nra yichi̱ na̱ rey ñuu Israel nda̱a̱ táki̱ʼva ke̱ʼé na̱ veʼe ta̱ Acab, saáchi ti̱ndaʼa̱ra xíʼin se̱ʼe-síʼi ta̱ Acab. Ta ke̱ʼéra nina ña̱ va̱ása va̱ʼa nu̱ú Jehová. 19 Soo Jehová kǒo níxiinra sandíʼi-xa̱ʼa̱ra na̱ ñuu Judá xa̱ʼa̱ ña̱ ku̱ndáʼvi-inira xi̱nira ta̱ David ta̱ xi̱kachíñu nu̱úra, saáchi ki̱ndoora xíʼinra ña̱ miíra xíʼin na̱ se̱ʼera kaʼndachíñuna ñuu Israel ndiʼi tiempo.

20 Tiempo tá xi̱xaʼndachíñu ta̱ Jehoram, na̱ ñuu Edom kǒo níxiinkana ña̱ kaʼndachíñu na̱ ñuu Judá nu̱úna ta nda̱kaxin miína ta̱ koo rey nu̱úna. 21 Ña̱kán ta̱ Jehoram nda̱kiʼinra ku̱a̱ʼa̱nra chí Zaír xíʼin ndiʼi carreta tú xíka nu̱ú ku̱a̱chi ña̱ kanitáʼanra xíʼinna. Na̱ edomita ni̱xa̱a̱na ni̱ka̱va̱nduuna yatin nu̱ú ni̱xa̱a̱ra íyora xíʼin na̱ ku̱a̱ʼa̱n xíʼinra xíʼin tú carreta, soo tá ñuú nda̱koora ta ku̱chiñura ka̱nitáʼanra xíʼinna ta xi̱nu ndiʼina ku̱a̱ʼa̱nna chí nu̱ú íyo veʼe válína. 22 Soo nda̱a̱ ki̱vi̱ vitin na̱ ñuu Edom íyokana contra xíʼin na̱ ñuu Judá.* Ta tiempo saátu kúú ña̱ ki̱xáʼa na̱ ñuu Libná íyona contra xíʼin na̱ ñuu Judá.

23 Ndiʼika ña̱ káʼa̱n xa̱ʼa̱ ta̱ Jehoram xíʼin ndiʼi ña̱ ke̱ʼéra, ni̱ka̱ʼyi̱ña nu̱ú libro ña̱ káʼa̱n xa̱ʼa̱ na̱ rey ñuu Judá. 24 Tándi̱ʼi, ta̱ Jehoram ni̱xi̱ʼi̱ra ta nda̱kindee̱ra xíʼin na̱ táʼanra na̱ xi̱ndoo xi̱naʼá ta sa̱ndúxu̱nnara Ñuu ta̱ David. Ta se̱ʼera ta̱ Ocozías kúú ta̱ ni̱xa̱a̱ ndu̱u rey.

25 Tá xa̱a̱ 12 ku̱i̱ya̱ xáʼndachíñu ta̱ Jehoram se̱ʼe ta̱ Acab ta̱ xi̱kuu rey chí ñuu Israel, ta̱ Ocozías se̱ʼe ta̱ Jehoram ta̱ xi̱kuu rey chí Judá ni̱xa̱a̱ra ndu̱ura rey. 26 Ta̱ Ocozías ni̱xa̱a̱ra ndu̱ura rey tá xi̱kuumiíra 22 ku̱i̱ya̱, ta xa̱ʼndachíñura iin ku̱i̱ya̱ chí ñuu Jerusalén. Siʼíra xi̱kuu ñá Atalía se̱ʼeñáni ta̱ Omrí ta̱ xi̱kuu rey chí ñuu Israel. 27 Ta ta̱ Ocozías nda̱kundeéra ke̱ʼéra nda̱a̱ táki̱ʼva ke̱ʼé na̱ veʼe ta̱ Acab ta ke̱ʼéra ña̱ʼa ña̱ va̱ása va̱ʼa nu̱ú Jehová, nda̱a̱ táki̱ʼva xi̱keʼé na̱ veʼe ta̱ Acab saáchi ñá síʼi yivára ki̱xiñá ti̱xin na̱ veʼe ta̱ Acab. 28 Ta ta̱yóʼo ni̱xa̱ʼa̱nra xíʼin ta̱ Jehoram se̱ʼe ta̱ Acab chí Ramot-Galaad ña̱ va̱ʼa kanitáʼanna xíʼin ta̱ Hazael ta̱ rey ñuu Siria, soo na̱ sirio sa̱túkue̱ʼe̱na ta̱ rey Jehoram. 29 Tasaá ta̱ rey Jehoram ndi̱kóra chí Jezreel ña̱ va̱ʼa ndaʼara, saáchi tu̱kue̱ʼe̱ra tá ni̱xa̱ʼa̱nra ka̱nitáʼanra xíʼin ta̱ Hazael ta̱ kúú rey ñuu Siria chí Ramá. Xa̱ʼa̱ ña̱ tu̱kue̱ʼe̱ ta̱ Jehoram se̱ʼe ta̱ Acab, ta̱ Ocozías se̱ʼe ta̱ Jehoram ta̱ xi̱xaʼndachíñu chí Judá ni̱xa̱ʼa̱nra chí Jezreel ña̱ va̱ʼa kotorara.