Eclesiastés
1 Ña̱ ni̱ka̱ʼa̱n ta̱ sándataka na̱ yiví, se̱ʼe ta̱ David ta̱ kúú rey ñuu Jerusalén.
2 “Kǒo miíví ña̱ ndáyáʼvi, káchi ta̱ sándataka na̱ yiví,
kǒo miíví ña̱ ndáyáʼvi, va̱ása ndáyáʼvi nda̱a̱ ni iin ña̱ʼa”.
3 ¿Ndáaña ndákiʼin na̱ yiví xa̱ʼa̱ ña̱ ndeéní káchíñuna,
ña̱ ndeéní káchíñuna xa̱ʼa̱ nu̱ú ñuʼú yóʼo?
4 Na̱ kákuva, na̱ xíʼi̱va
soo ñuʼú yóʼo kooña ndiʼi tiempo.
6 Ta̱chí ku̱a̱ʼa̱nña chí sur ta káva̱ña ku̱a̱ʼa̱nña chí norte.
Káva̱ña ta káva̱ña... Ta va̱ása xíku̱ndichiña.
7 Ndiʼi yu̱ta xáa̱rá nda̱a̱ mar soo va̱ása chútú tá mar.
Yu̱ta ndíkórá nu̱ú ke̱erá ña̱ va̱ʼa kunu tukurá.
8 Ndiʼi ña̱ʼa sákunaaña miíyó,
ta kǒo na̱ kuchiñu ka̱ʼa̱n xa̱ʼa̱ ndiʼi ña̱yóʼo.
Va̱ása kúsi̱í-iniyó xíʼin ña̱ xítoyó
ta ni va̱ása kúsi̱í-iniyó xíʼin ña̱ xíniso̱ʼoyó.
9 Ña̱ xa̱a̱ ku̱u tá ya̱chi̱ kúú ña̱ kuu tukuva,
ta ña̱ xa̱a̱ ke̱ʼéna kúú ña̱ keʼé tukuna.
Kǒo nda̱a̱ ni iin ña̱ʼa xa̱á nu̱ú ñuʼú yóʼo.
10 ¿Á íyo ña̱ kivi ka̱ʼa̱nyó xa̱ʼa̱ “Koto, ña̱ xa̱á kúú ña̱yóʼo”?
Xa̱a̱ xi̱naʼáví íyo ña̱yóʼo,
xa̱a̱ íyo ña̱yóʼo tá kúma̱níka kakuyó.
11 Kǒo na̱ ndákaʼán xa̱ʼa̱ na̱ xi̱ndoo xi̱naʼá
saátu kǒo na̱ ndakaʼán xa̱ʼa̱ na̱ koo chí nu̱únínu;
ta ni na̱ kaku chí nu̱únínuka kǒo na̱ ndakaʼán xa̱ʼa̱na.
12 Yi̱ʼi̱ ta̱ sándataka na̱ yiví, kúi̱ rey nu̱ú na̱ ñuu Israel chí Jerusalén. 13 Xi̱niñúʼi̱ ña̱ ndíchi ña̱ va̱ʼa sakúaʼi̱ ta na̱ndukúva̱ʼi̱ xa̱ʼa̱ ndiʼi ña̱ ke̱ʼéna nu̱ú ñuʼú..., xítoi̱ ña̱ va̱ása kúsi̱í-ini na̱ yiví tá kéʼéna chiñu ña̱ ta̱xi Ndióxi̱ ndaʼa̱na.
14 Xi̱toi̱ ndiʼi ña̱ ke̱ʼéna nu̱ú ñuʼú
ta ki̱ʼii̱n kuenta ña̱ va̱ása ndáyáʼviña
chi nda̱a̱ táki̱ʼva íyo na̱ ndíku̱n sa̱tá ta̱chí saá íyona.
15 Ña̱ ku̱yakúá va̱ása kívi ndunda̱kúña,
ta ña̱ kúma̱ní va̱ása kívi ndakaʼvinaña.
16 Tasaá ki̱xáʼíi̱ ndákani-inii̱: “Ku̱a̱ʼání ña̱ ndíchi kúúmiíi̱, ndíchiníkai̱ nu̱ú na̱ xi̱ndoo tá ya̱chi̱ chí ñuu Jerusalén; ku̱a̱ʼání ña̱ ndíchi kúúmiíi̱ ta xíni̱níi̱”. 17 Xi̱niñúʼi̱ tiempoi̱ ña̱ sakúaʼi̱ xa̱ʼa̱ ña̱ ndíchi saátu ña̱ kunda̱a̱-inii̱ xa̱ʼa̱ ña̱ kíʼví, ta saátu ña̱yóʼo íyoña nda̱a̱ táki̱ʼva íyo ña̱ kundiku̱nyó sa̱tá ta̱chí.
18 Saáchi tá kúúmiíyó ku̱a̱ʼání ña̱ ndíchi, ña̱yóʼo ndeéní sándi̱ʼiña-iniyó,
ña̱kán tá ku̱a̱ʼáníka ña̱ʼa xíni̱yó xa̱ʼa̱, xóʼvi̱níkayó.