Isaías
30 “Ndáʼviní na̱ ñuu na̱ so̱ʼoní káchi Jehová,
chi kéʼéndó ña̱ kúni̱ miíndó, su̱ví ña̱ kúni̱ yi̱ʼi̱,
ndákutáʼanndó xíʼin inkana ña̱ kuniʼina yichi̱ nu̱úndó,
soo kǒo kútói̱ ña̱ kéʼéndó ña̱yóʼo,
tasaá kíʼvindó ku̱a̱chi ta ndúku̱a̱ʼáka ku̱a̱chindó.
2 Ku̱a̱ʼa̱nndó chí Egipto ta va̱ása ndáka̱tu̱ʼunndó yi̱ʼi̱ xa̱ʼa̱ ña̱yóʼo,
ku̱a̱ʼa̱nndó nu̱ú ta̱ faraón ña̱ va̱ʼa kundaara ndóʼó,
tasaá chindeétáʼan na̱ ñuu Egipto xíʼinndó.
3 Soo kukaʼan nu̱úndó chi xi̱ndaaní-inindó ña̱ kundaa ta̱ faraón ndóʼó,
saátu kukaʼan nu̱úndó chi va̱ása chindeétáʼan na̱ ñuu Egipto xíʼinndó.
4 Saáchi na̱ kúúmií chiñu ña̱ ndáyáʼvi nu̱úra íyona chí Zoan,
ta na̱ chi̱ndaʼára ku̱a̱ʼa̱n xíʼin tu̱ʼun, ni̱xa̱a̱na chí Hanés.
5 Iin ñuu ña̱ va̱ása ndáyáʼvi kúú ña̱ sakúkaʼan nu̱ú ndiʼindó
iin ñuu ña̱ kǒo chindeétáʼan xíʼinndó
chi ña̱ sákukaʼan nu̱úndó kúúña”.
6 Ña̱yóʼo kúú ña̱ kundoʼo kití yukú tí íyo chí sur:
Na̱yóʼo níʼina ña̱ ku̱i̱ká ña̱ kúúmiína,
sa̱tá burro ta saátu sa̱tá camello níndoso ña̱ xíniñúʼuna,
ta ku̱a̱ʼa̱nna xíʼinña nu̱ú ñuʼú nu̱ú ndíʼi̱ní-inina, nu̱ú xóʼvi̱na,*
nu̱ú íyo tí ndikaʼa,* nu̱ú íyo ndikaʼa tí ndúkue̱ʼe̱
nu̱ú íyo ko̱o̱, nu̱ú íyo ko̱o̱ tí kamaní,
soo ndiʼi ña̱yóʼo va̱ása kundayáʼviña nu̱ú na̱ ñuu.
7 Saáchi va̱ása kundayáʼviví ña̱ chindeétáʼan na̱ ñuu Egipto xíʼinndó.
Xa̱ʼa̱ ña̱kán chi̱naníi̱ña “Rahab,* ña̱ kǒo kívi kanda̱”.
8 “Ta vitin, kúáʼan ta ná kuni na̱yóʼo kaʼyiúnña nu̱ú iin tabla tú káni̱
ta saátu kaʼyiúnña nu̱ú iin tutu,
ña̱ va̱ʼa kuniñúʼuna ña̱yóʼo chí nu̱únínu
ta kotona ña̱ kǒo nása̱ma ña̱ káʼi̱n.
9 Saáchi iin ñuu na̱ so̱ʼoní kúúna, se̱ʼi̱ kúúna ta sándaʼvina,
se̱ʼi̱ kúúna ta va̱ása xíínna kuniso̱ʼona ley ña̱ táxi yi̱ʼi̱ Jehová.
10 Na̱yóʼo káʼa̱nna xíʼin na̱ profeta ‘Va̱ása kotondó’,
ta káʼa̱nna ña̱yóʼo xíʼin na̱ káʼa̱n profecía ‘Va̱ása natúʼunndó xíʼinndi̱ xa̱ʼa̱ profecía ña̱ káʼa̱n ña̱ nda̱a̱.
Ka̱ʼa̱nndó tu̱ʼun ña̱ kútóondi̱; xa̱ʼa̱ profecía ña̱ va̱ása xi̱nu ka̱ʼa̱nndó xíʼinndi̱.
11 Ku̱taʼanndó yichi̱ nu̱ú ku̱a̱ʼa̱nndó; keendó yichi̱ nu̱ú ku̱a̱ʼa̱nndó.
Va̱ása ka̱ʼa̱nkandó xíʼinndi̱ xa̱ʼa̱ Ndióxi̱ na̱ ñuu Israel, Ndióxi̱ ta̱ yi̱i̱’”.
12 Xa̱ʼa̱ ña̱kán, ña̱yóʼo kúú ña̱ káʼa̱n Ndióxi̱ ta̱ yi̱i̱, Ndióxi̱ na̱ ñuu Israel:
“Xa̱ʼa̱ ña̱ va̱ása xíínndó kuniso̱ʼondó tu̱ʼun yóʼo,
ta kándíxandó na̱ sándaʼvi ndóʼó ta saátu na̱ káʼa̱n ña̱ vatá,*
ta ndáa-inindó na̱yóʼo,
13 ña̱ va̱ása va̱ʼa kéʼéndó íyoña nda̱a̱ táki̱ʼva íyo iin nama̱ ña̱ ni̱nda̱ta̱,
nda̱a̱ táki̱ʼva íyo iin nama̱ súkun ña̱ níndichi síi̱n,* ña̱ xa̱a̱ kúni̱ ndakava.
Ta iin kama kuití nduvaña ta ndiʼi-xa̱ʼa̱ña.
14 Ta̱ʼvíña nda̱a̱ táki̱ʼva táʼvi̱ iin ki̱si káʼnu ña̱ i̱xava̱ʼana,
kuachi válí ndiʼiña ta ni va̱ása kivika kuniñúʼunaña ña̱ tavána ñuʼu̱ xíʼinña
á ña̱ kachiʼina ti̱kui̱í nu̱ú ñúʼurá”.*
15 Saáchi ña̱yóʼo kúú ña̱ káʼa̱n táta káʼnu Jehová, Ndióxi̱ na̱ ñuu Israel, Ndióxi̱ ta̱ yi̱i̱:
“Tá kúni̱ndó ka̱kundó, xíniñúʼu ndikóndó nu̱úi̱ ta kundatundó;
tá va̱ása ndíʼi̱-inindó ta ndáa-inindó yi̱ʼi̱, ndakú koondó”.
Soo ndóʼó va̱ása níxiinndó keʼéndó ña̱yóʼo.
16 Nu̱úka ña̱ keʼéndó saá, ña̱yóʼova ni̱ka̱ʼa̱nndó: “Va̱ása. Xíʼin kuáyi̱ kunundi̱ ku̱ʼu̱nndi̱”.
Kunuvandó ku̱ʼu̱nndó.
Ta ni̱ka̱ʼa̱nndó:
“Kosondi̱* kuáyi̱ tí ndeéní xínu”.
Soo na̱ kundiku̱n sa̱tándó, kamaka koo na̱yóʼo nu̱úndó.
17 Iin kuitívana kuchiñu sayíʼvi mil ndóʼó;
ta u̱ʼu̱n kuitívana kunundó nu̱ú
ta na̱ ki̱ndoo kunaʼa̱na nda̱a̱ táki̱ʼva náʼa̱ iin yitu̱n tú níndichi xi̱ní iin yuku̱,
koona nda̱a̱ táki̱ʼva íyo iin yitu̱n tú kuni ndiʼina, tú níndichi xi̱ní iin xi̱kí.
18 Soo Jehová kúee íyo inira ta ndátura ña̱ na̱ʼa̱ra ña̱ va̱ʼa-inira xíʼinndó,
ta na̱ʼa̱ra ña̱ kúndáʼvi-inira xínira ndóʼó.
Saáchi Jehová kúúra iin Ndióxi̱ ta̱ kéʼé ña̱ nda̱kú.
Si̱íní íyo na̱ ndáa-iniñaʼá xíʼin ndiʼi níma̱na.
19 Tá ná kundoo na̱ ñuu chí yuku̱ Sion, ña̱ íyo chí Jerusalén, va̱ása kuakukandó. Tá ná kana kóʼóndó* ña̱ chindeétáʼanra xíʼinndó, ta̱yóʼo kundáʼvi-inira kunira ndóʼó; kama ndakuiinra yuʼúndó tá ná kuniso̱ʼora ndóʼó. 20 Ni ná taxi Jehová ña̱ kundi̱ʼi-inindó ta saátu ña̱ xo̱ʼvi̱ndó ndiʼi ki̱vi̱, ta ná kooña nda̱a̱ táki̱ʼva íyo ña̱ xíxindó xíʼin ti̱kui̱í tá xíʼindó, ta̱ va̱ʼaní sánáʼa̱ ndóʼó va̱ása koose̱ʼékara nu̱úndó. Kuninu̱úndó ta̱ va̱ʼaní sánáʼa̱ ndóʼó. 21 Ta tá ná kitandó yichi̱ nu̱ú ku̱a̱ʼa̱nndó ta ná ku̱ʼu̱nndó chí ndaʼa̱ kúaʼa á chí ndaʼa̱ yitin, kuniso̱ʼondó tu̱ʼun yóʼo chí sa̱tándó: “Ña̱yóʼo kúú yichi̱. Yichi̱ yóʼo kúú ña̱ ku̱ʼu̱nndó nu̱ú”.
22 Ixayaku̱a̱ndó plata ña̱ chi̱kaa̱ndó sa̱tá ña̱ʼa ña̱ i̱xava̱ʼandó ña̱ ndasakáʼnundó, ta saátu ixayaku̱a̱ndó oro ña̱ chi̱kaa̱ndó sa̱tá ña̱ʼa ña̱ ka̱a ña̱ ndásakáʼnundó ta katandóña nda̱a̱ táki̱ʼva xátandó ti̱ko̱to̱ ña̱ xíniñúʼu ná ñaʼá tá núu ni̱i̱ná ta ka̱ʼa̱nndó xíʼinña “Kúáʼan chí káa”.* 23 Ta̱yóʼo sakúunra sa̱vi̱ sa̱tá ñuʼú nu̱ú chi̱ʼindó, ku̱a̱ʼání koo ña̱ kuxundó ña̱ kana nu̱ú ñuʼú yóʼo ta va̱ʼaní kooña. Ki̱vi̱ saá, kití sa̱na̱ndó kixáʼanrí* nu̱ú ñuʼú ña̱ ndíka̱ní. 24 Ta va̱ʼaní koo ña̱ kixáʼan si̱ndi̱ki̱ xíʼin burro sa̱na̱ndó tí táʼví nu̱ú ñuʼúndó, chi ndaka̱xinnaña ta tavána xe̱ʼe̱* xíʼinña.* 25 Tá ná kaʼnína ku̱a̱ʼánína, tá ná nduva veʼe súkun, koo yu̱ta ndiʼi yuku̱ súkun xíʼin ndiʼi xi̱kí súkun. 26 Ta ki̱vi̱ ña̱ ná kuniñúʼu Jehová venda ña̱ ndasukúndaara* nu̱ú tu̱kue̱ʼe̱ na̱ ñuura ta tá ná sandáʼara nu̱ú ndeéní sa̱túkue̱ʼe̱rana, tí yo̱o̱ ndaye̱ʼe̱rí nda̱a̱ táki̱ʼva yéʼe̱ ñu̱ʼu* ta nda̱a̱ u̱xa̱ka yichi̱ ndeéka ndaye̱ʼe̱ ñu̱ʼu nda̱a̱ táki̱ʼva yéʼe̱ u̱xa̱ ki̱vi̱.
27 Kotondó. Nda̱a̱ nu̱ú xíká ki̱ta Jehová va̱xira,
sáa̱níra va̱xira ta íyoní vi̱kó nu̱ú va̱xira.
Sáa̱níra káʼa̱nra
ta nda̱a̱ táki̱ʼva íyo iin ñuʼu̱ ña̱ ndeéní xíxi̱, saá íyo nu̱ú yáa̱ra.*
28 Ta̱chíra kooña nda̱a̱ táki̱ʼva íyo yu̱ta tá kée, ta nda̱a̱ su̱kúnna ndakutúrá,
ña̱ va̱ʼa kisira na̱ ñuu ta saxíxinrana nu̱ú iin ña̱ʼa ña̱ sandíʼi-xa̱ʼa̱na;
ta yuʼú ndiʼi na̱ ñuu kundikaa̱ ka̱a ta tavánana yichi̱ nu̱ú ku̱a̱ʼa̱nna.
29 Soo katandó nda̱a̱ táki̱ʼva xítana iin ñuú
tá íxatu̱ʼvana miína ña̱ ku̱ʼu̱nna vikó
ta kusi̱íní-inindó nda̱a̱ táki̱ʼva kúsi̱í-ini iin na̱ tívi flauta
ta ku̱a̱ʼa̱nna chí yuku̱ Jehová, ta̱ kúú Ndióxi̱ na̱ ñuu Israel,
ta̱ íyo nda̱a̱ táki̱ʼva íyo iin yu̱u̱ káʼnu.
30 Ndeéní kutaku̱ ña̱ ka̱ʼa̱n Jehová
ta taxira ná kunina ña̱ íyoní ndee̱ ndaʼa̱ra xa̱ʼa̱ ña̱ sáa̱níra,
ta kixira xíʼin iin ñuʼu̱ ña̱ ndeéní xíxi̱,
sa̱vi̱ tá ndeéní kúun, taxa xíʼin ñíí.*
31 Saáchi xa̱ʼa̱ ña̱ ndeéní ka̱ʼa̱n Jehová, na̱ ñuu Asiria yi̱ʼvínína;
ta̱yóʼo kanirana xíʼin iin yitu̱n.
32 Ndiʼi yichi̱ ña̱ ná kani Jehová na̱ ñuu Asiria
xíʼin yitu̱n tú xíniñúʼura ña̱ táxira castigo
kaʼa pandereta xíʼin arpa,
nani ndániʼira ndaʼa̱ra ña̱ kanitáʼanra xíʼinna.
33 Ta̱yóʼo, xa̱a̱ i̱xatu̱ʼvara nu̱ú sandíʼi-xa̱ʼa̱rana;*
saátu xa̱a̱ i̱xatu̱ʼvara nu̱ú sandíʼi-xa̱ʼa̱ra ta̱ rey.
Kúnúní nu̱ú xáʼmira ñuʼu̱ ta ndíka̱níña,
ku̱a̱ʼání ñuʼu̱ chi̱kaa̱ra ta ku̱a̱ʼání titu̱n ta̱ánra.
Tá ná tivi Jehová ta̱chí yuʼúra, kooña nda̱a̱ táki̱ʼva íyo iin yu̱ta tá ñuʼu̱.