Isaías
5 Taxindó ná katai̱ iin yaa nu̱ú ta̱ kúʼvi̱ní-inii̱ xínii̱,
ná katai̱ iin yaa ña̱ káʼa̱n xa̱ʼa̱ ta̱ kúʼvi̱-inii̱ xínii̱ ta saátu xa̱ʼa̱ tú uvara.
Ta̱ kúʼvi̱ní-inii̱ xínii̱ xi̱kuumiíra tú uvara xa̱ʼa̱ iin yuku̱ nu̱ú va̱ʼaní xáʼnu ña̱ʼa.
2 Xa̱tara nu̱ú ñuʼú kán ta ta̱vára yu̱u̱ ña̱ íyo nu̱úña.
Chi̱ʼira uva kúáʼa tí va̱ʼaní,
ma̱ʼñú nu̱ú chi̱ʼira tú uva, i̱xava̱ʼara iin veʼe súkun
ta nu̱ú ñuʼú kán i̱xava̱ʼara nu̱ú kuʼnína tí uva.
Tasaá xi̱ndatura ná kana uva tí va̱ʼaní,
soo uva tí va̱ása va̱ʼava kúú tí ka̱na.
3 “Ta vitin ndóʼó na̱ ñuu Jerusalén xíʼin ndóʼó na̱ ta̱a na̱ ñuu Judá,
kotondó ña̱ ndo̱ʼi̱ xíʼin tú uvai̱.
4 Xa̱a̱ ku̱a̱ʼání ña̱ ke̱ʼíi̱ xa̱ʼa̱ tú uvai̱
¿á íyo inka ña̱ xi̱niñúʼu keʼíi̱ xa̱ʼa̱nú?
Uva va̱ʼava xi̱ndatui̱ taxinú,
¿nda̱chun ta̱xinú nina uva tí va̱ása va̱ʼa?
5 Vitin ná ka̱ʼi̱n xíʼinndó
ndáaña keʼíi̱ xíʼin tú uvai̱:
kindai̱ corra nu̱ú íyonú ta kaʼmii̱nú.
Sandúvai̱ nama̱ ña̱ íyo nu̱ú íyo tú uvai̱,
ta inkana ku̱a̱ñi̱naña.*
6 Ndasai̱ña iin ñuʼú ña̱ kǒo ña̱ʼa nu̱ú;
va̱ása ndasaviína ndaʼa̱ tú uva
ta ni va̱ása kutuna xa̱ʼa̱nú.
Ndakutú tú iñú nu̱ú ñuʼú yóʼo ta saátu yu̱ku̱ ña̱ va̱ása va̱ʼa,
ta ka̱ʼi̱n xíʼin vi̱kó ña̱ va̱ása sakúunña sa̱vi̱ nu̱úña.
7 Saáchi tú uva tú kúú kuenta Jehová ta̱ xáʼndachíñu nu̱ú na̱ ángel kúú na̱ ñuu Israel;
na̱ ta̱a na̱ ñuu Judá kúú na̱ xi̱kuʼvi̱-inira xi̱xinira, ta ni̱xi̱yona nda̱a̱ táki̱ʼva íyo tú uva tú chi̱ʼira.
Xi̱kuni̱ra ña̱ nda̱kú ná ndatiinna ku̱a̱chi,
soo va̱ása níxi̱ndiku̱nna ña̱ káʼa̱n ley;
xi̱kuni̱ra ná keʼéna ña̱ nda̱kú,
soo xi̱niso̱ʼora ña̱ xi̱xaku na̱ xi̱ ixandi̱va̱ʼana xíʼin”.
8 Ndáʼviní na̱ sátá* ku̱a̱ʼání veʼe
ta saátu na̱ sátá ku̱a̱ʼání ñuʼú,
na̱ ndákiʼin ndiʼi ña̱yóʼo ña̱ kooña kuentana
ta nda̱saa miína kúú na̱ ndóo nu̱ú ñuʼú yóʼo.
9 Xi̱niso̱ʼi̱ ña̱ chi̱naʼá* Jehová ta̱ xáʼndachíñu nu̱ú na̱ ángel
ña̱ ku̱a̱ʼání veʼe, ni náʼnuníña ta ni liviníña,
ndiʼi-xa̱ʼa̱ña ta kǒoka na̱ kundoo iniña.
10 Iin ñuʼú káʼnuní nu̱ú íyo tú uva kana 22 litro* kuití tá vino,
tá ná chiʼina 160 kilo* si̱ʼva̱ ña̱ trigo, 16 kilo* kuití kana.
11 Ndáʼviní na̱ ya̱chi̱ní ndáko̱o ña̱ koʼona ndixi,
xíʼina nda̱a̱ tá kúñuú ta kininí kíxáʼana kéʼéna.
12 Tá kéʼéna vikó, sákaʼana arpa, instrumento tú kúúmií yi̱ʼva̱,
pandereta, flauta ta xíʼina vino;
soo va̱ása ndákanixi̱nína xa̱ʼa̱ ña̱ kéʼé Jehová
ta ni va̱ása xítona ña̱ i̱xava̱ʼara.
13 Ña̱kán ndakiʼinna na̱ ñui̱ ku̱ʼu̱n xíʼinna
xa̱ʼa̱ ña̱ kǒo kúnda̱a̱-inina;
ta na̱ ndáyáʼvi ti̱xin ñuu yóʼo kuni̱na kuxuna,
ta ndiʼi na̱ ñuuna kuni̱nína koʼona ti̱kui̱í.
14 Ña̱kán ndu̱káʼnuka Ya̱vi̱* nu̱ú ñúʼu na̱ ni̱xi̱ʼi̱
ta nda̱kuná kóʼó yuʼúña;
ta yóʼo ke̱e na̱ yiví na̱ ndáyáʼviní ti̱xin ñuu Jerusalén,
na̱ xuxanní yuʼú xíʼin na̱ yiví na̱ kútóoní vikó.
16 Jehová ta̱ xáʼndachíñu nu̱ú na̱ ángel ndukáʼnura xa̱ʼa̱ ña̱ nda̱kúní ndatiinra ku̱a̱chi;
Ndióxi̱ ta̱ nda̱a̱, nduyi̱i̱ra xa̱ʼa̱ ña̱ nda̱kúní keʼéra.
17 Tí ndikachi* válí kixáʼanrí* nu̱ú íyo ku̱a̱ʼání ña̱ kixáʼanrí;
na̱ inka ñuu kuxuna nu̱ú ni̱xi̱yo kití tí va̱ʼaní xi̱kixáʼan.
18 Ndáʼviní na̱ sándaʼvi chi táki̱ʼva íyo na̱ núʼni xíʼin ku̱a̱china saá íyona,
íyona nda̱a̱ táki̱ʼva íyo iin kití tí núʼnindaa sa̱tá iin carreta
ta ku̱a̱ʼa̱nrí nda̱a̱ ndáaka nu̱ú ñúu* carreta yóʼo miírí,
19 ndáʼviní na̱ káʼa̱n: “Kama ná koora keʼéra ña̱ kúni̱ra keʼéra;
kama ná keʼéraña ña̱ va̱ʼa ná kuniyóña;
ná xi̱nu ña̱ kúni̱ Ndióxi̱ na̱ ñuu Israel, Ndióxi̱ ta̱ yi̱i̱,
ña̱ va̱ʼa kunda̱a̱-iniyó xa̱ʼa̱ña”.
20 Ndáʼviní na̱ káʼa̱n ña̱ va̱ʼa kúú ña̱ va̱ása va̱ʼa, ta ña̱ va̱ása va̱ʼa kúú ña̱ va̱ʼa,
na̱ káʼa̱n ña̱ naa kúú ña̱ yéʼé, ta ña̱ yéʼé kúú ña̱ naa,
na̱ káʼa̱n ña̱ o̱va̱ kúú ña̱ vi̱si̱, ta ña̱ vi̱si̱ kúú ña̱ o̱va̱.
21 Ndáʼviní na̱ ndákanixi̱ní ña̱ ndíchinína
ta ndákanixi̱nína ña̱ viíní íyo ña̱ kéʼéna.
22 Ndáʼviní na̱ xíʼi ku̱a̱ʼání vino
xíʼin na̱ ta̱a na̱ ndákanixi̱ní ña̱ ndakúnína,
soo tá xíʼi kuitína ndixi tá ndásaka̱ saá kúú ña̱ ndúndakúní-inina,
23 na̱ kíʼin xu̱ʼún ña̱ va̱ʼa ka̱ʼa̱nna ña̱ kǒo ku̱a̱chi kúúmií na̱ ndi̱va̱ʼa-ini
ta va̱ása xíínna ndatiinna ku̱a̱chi xíʼin na̱ kéʼé ña̱ va̱ʼa.
24 Xa̱ʼa̱ ña̱kán, nda̱a̱ táki̱ʼva xíxi̱ ku̱ʼu̱ xíʼin ñuʼu̱
ta nda̱a̱ táki̱ʼva xíxi̱ yita* ña̱ ni̱yi̱chi̱ saá kundoʼona,
ta̱ʼyi̱ ti̱oʼona* ta yitana ndachíña ku̱ʼu̱nña nda̱a̱ táki̱ʼva kéʼé yáká,*
saáchi kǒo níxiinna kuniso̱ʼona ley Jehová ta̱ xáʼndachíñu nu̱ú na̱ ángel
ta kǒo ní ixato̱ʼóna tu̱ʼun Ndióxi̱ na̱ ñuu Israel, Ndióxi̱ ta̱ yi̱i̱.
25 Xa̱ʼa̱ ña̱kán sáa̱ní Jehová xíʼin na̱ ñuura,
taxira castigo ndaʼa̱na ta kanirana.
Ndeéní kisi yuku̱,
ta na̱ ná kuvi, kindo̱ona chí calle nda̱a̱ táki̱ʼva kíndo̱o mi̱ʼí.*
Ni ná kuu ndiʼi ña̱yóʼo, sa̱a̱kavara,
taxikara castigo ndaʼa̱na ta kanikarana.
26 Ka̱nindichira iin yitu̱n tú kuni iin ñuu ña̱ íyo xíká,
ka̱nara na̱ íyo xíká ña̱ kixina;
ta kotondó, ndeéní va̱xina.
27 Nda̱a̱ ni iinna ta̱ʼán kunaa ta ta̱ʼán ndakavana.
Nda̱a̱ ni iinna va̱ása kísi̱na ta ni va̱ása kúni̱ ku̱su̱nna.
Cinturón ña̱ ndíkaa̱ tokóna, ta̱ʼán nda̱xínña
ta ni ta̱ʼán ta̱ʼnda̱ ndu̱xa̱nna.
Chíi̱n kuáyi̱ sa̱na̱na táki̱ʼva íyo yu̱u̱ téʼé saá íyoña,
ta llanta carretana kamaní ku̱a̱ʼa̱nña nda̱a̱ táki̱ʼva ku̱a̱ʼa̱n ta̱chí.
Nda̱a̱ táki̱ʼva kéʼérí tá ndúkue̱ʼe̱rí tá tíinrí iin kití saá kéʼéna,
ndakiʼinna na̱ ti̱inna ta va̱ása koo na̱ ndatavána ndaʼa̱na.
30 Nda̱a̱ táki̱ʼva ndáʼyi̱ tá mar
saá nda̱ʼyi̱na tá ná tiinna na̱yóʼo.
Ta na̱ ná kuni ñuʼú yóʼo kunina ña̱ naaníña ta íyoní tu̱ndóʼo nu̱úña;
ta va̱ása kutuu̱n ñuʼu̱ nu̱úña chi ndakasi vi̱kó nu̱úña.