Isaías

59 Kotondó. Ndaʼa̱ Jehová kúúmiívaña ndee̱ ña̱ sakǎkuña ndóʼó

ta saátu su̱ví ta̱ sóʼó kúúra ña̱ va̱ása kuniso̱ʼora ndóʼó.

Xa̱ʼa̱ ku̱a̱chi ña̱ ni̱ki̱ʼvindó kúú ña̱ chi̱se̱ʼéra nu̱úra nu̱úndó

ta va̱ása xíínra kuniso̱ʼora ndóʼó.

 3 Saáchi chi̱chi ni̱i̱ ndaʼa̱ndó ta nu̱ú ndaʼa̱ndó ku̱yaku̱a̱ña xa̱ʼa̱ ku̱a̱chi ña̱ ni̱ki̱ʼvindó.

Ña̱ vatá* kúú ña̱ kée yuʼúndó ta nina ña̱ va̱ása va̱ʼa kúú ña̱ káʼa̱nndó.

 4 Kǒo na̱ káʼa̱n ña̱ ná keʼéna ña̱ nda̱kú

ta nda̱a̱ ni iinna kǒo káʼa̱nna ña̱ nda̱a̱ tá ndátiinna ku̱a̱chi xíʼinna.

 5 Ña̱ káʼa̱n-táʼanna keʼéna ña̱ va̱ása va̱ʼa, íyoña nda̱a̱ táki̱ʼva íyo ndi̱vi̱ tí ko̱o̱ kue̱ʼe̱*

ta xíniñúʼuna xi̱ndu̱ʼva̱ tí ti̱ndóo ña̱ keʼéna iin ti̱ko̱to̱.

Na̱ ná kaxí ndi̱vi̱ yóʼo, kuvina

ta ti̱xin ndi̱vi̱ ña̱ ná ta̱ʼví kita iin ko̱o̱.

 6 Va̱ása kivi ixava̱ʼana iin ti̱ko̱to̱ xíʼin xi̱ndu̱ʼva̱

ta ña̱ kéʼéna va̱ása kivi chindeétáʼanña xíʼinna.

Nina ña̱ va̱ása va̱ʼa kúú ña̱ kéʼéna

ta íxandi̱va̱ʼana xíʼin inkana.

 7 Xínuna ku̱a̱ʼa̱nna keʼéna ña̱ va̱ása va̱ʼa;

ta kamakaví ku̱a̱ʼa̱nna kaʼnína na̱ yiví na̱ kǒo ku̱a̱chi.

Nina ña̱ va̱ása va̱ʼa ndákanixi̱nína;

ndiʼi yichi̱ íxandi̱va̱ʼana xíʼin na̱ yiví ta sáxo̱ʼvi̱nana.*

 8 Va̱ása xíni̱na ndáa ki̱ʼva vií koona xíʼin inkana,

va̱ása xíkana yichi̱ ña̱ nda̱kú.

Násamana yichi̱ nu̱ú ku̱a̱ʼa̱nna

na̱ ná kaka yichi̱ yóʼo va̱ása vií koona xíʼin inkana.

 9 Xa̱ʼa̱ ña̱kán kúú ña̱ xíkání íyo ña̱ nda̱kú nu̱úyó

ta va̱ása kívi keʼéyó ña̱ nda̱kú.

Ndátuyó ná ndatuu̱n ñuʼu̱, soo ña̱ naava kúú ña̱ íyo;

ndátuyó ná ndaye̱ʼe̱, soo xíkakayó nu̱ú naa.

10 Xíka ndaʼa̱yó kándíka veʼe nda̱a̱ táki̱ʼva kéʼé na̱ kúáa;

xíka ndaʼa̱yó nda̱a̱ táki̱ʼva kéʼé na̱ kǒo nduchúnu̱ú.

Káʼñu* káchiʼiyó* nda̱a̱ táki̱ʼva káchiʼiyó tá xa̱a̱ ku̱a̱ʼa̱n kúñuú;

nda̱a̱ táki̱ʼva íyo na̱ ni̱xi̱ʼi̱ saá íyoyó nu̱ú na̱ ndakúní.

11 Ndiʼiyó ndáʼyi̱yó nda̱a̱ táki̱ʼva ndáʼyi̱ tí oso

xákuyó nda̱a̱ táki̱ʼva xáku tí paloma.

Ndátuyó ña̱ ná koo ña̱ nda̱kú soo kǒovíña íyo,

ndátuyó ña̱ sakǎkuna miíyó soo kǒo na̱ sakǎku miíyó.

12 Ku̱a̱ʼání yichi̱ i̱xaso̱ʼondi̱ nu̱ún

iin tá iin ku̱a̱chindi̱ káʼa̱nña xa̱ʼa̱ndi̱ ña̱ kúúmiíndi̱ ku̱a̱chi.

Kúnda̱a̱va-inindi̱ xa̱ʼa̱ ku̱a̱chindi̱;

xíni̱vandi̱ ndáaña kúú ña̱ va̱ása va̱ʼa kéʼéndi̱.

13 Ni̱ki̱ʼviyó ku̱a̱chi ta káʼa̱nyó ña̱ va̱ása xíni̱yó Jehová;

kǒo níxiinkayó kuniyó Ndióxi̱yó.

Káʼa̱n-táʼanyó ña̱ ixaso̱ʼoyó ta saxóʼvi̱yó inkana;

káʼa̱nyó ña̱ vatá ta nina ña̱ vatá kúú ña̱ ndíkaa̱ níma̱yó.

14 Na̱ yiví va̱ása kúni̱na keʼéna ña̱ nda̱kú,

ta nda̱a̱ ni iinna va̱ása kéʼéna ña̱ nda̱kú,

ta chí nu̱ú ndátaka na̱ yiví,* nda̱a̱ ni iinna va̱ása káʼa̱nna ña̱ nda̱a̱

ta va̱ása kívi ku̱ʼu̱n na̱ kéʼé ña̱ nda̱kú yóʼo.

15 Ndi̱ʼi-xa̱ʼa̱ ña̱ nda̱a̱,

ndákiʼinna ndiʼi ña̱ʼa ña̱ kúúmií na̱ kéʼé ña̱ va̱ʼa.

Xi̱ni Jehová ña̱yóʼo ta va̱ása níkutóoraña

saáchi va̱ása níxikeʼéna ña̱ nda̱kú.

16 Xi̱nira ña̱ kǒo nda̱a̱ ni iin na̱ yiví na̱ chindeétáʼan xíʼinna

ta nda̱kanda̱-inira* tá xi̱nira ña̱ kǒo na̱ ka̱ʼa̱n xa̱ʼa̱na,

ña̱kán xi̱niñúʼura ndaʼa̱ra ña̱ kúúmiíní ndee̱ ña̱ sakǎkurana

ta ña̱ nda̱kúní-inira kúú ña̱ chi̱ndeétáʼan xíʼinra.

17 Tasaá ki̱xáʼara kéʼéra ña̱ nda̱kú ña̱ íyo nda̱a̱ táki̱ʼva íyo ka̱a ña̱ ndákasi kándíkara

ta ki̱xáʼara sáka̱kurana, ta ña̱ sáka̱kurana íyoña nda̱a̱ táki̱ʼva íyo iin casco ña̱ kánuu xi̱níra.

Ke̱ʼéra ña̱ nda̱kú ta ña̱yóʼo íyoña nda̱a̱ táki̱ʼva íyo ti̱ko̱to̱ ña̱ nda̱kundixira ña̱ taxira castigo ndaʼa̱ na̱ sáa̱-inira xínira,

ta chi̱kaa̱-inira keʼéra ña̱ va̱ʼa ta ña̱yóʼo íyoña nda̱a̱ táki̱ʼva íyo ti̱ko̱to̱* ña̱ nda̱kundixira.

19 Ta na̱ ndóo nu̱ú kíʼvi ñu̱ʼu* ixato̱ʼóna ki̱vi̱ Jehová,

ta na̱ ndóo chí nu̱ú kíta ñu̱ʼu ixato̱ʼónara xa̱ʼa̱ ña̱ káʼnuníra,

ta̱yóʼo kixira nda̱a̱ táki̱ʼva ku̱a̱ʼa̱n iin yu̱ta tá ndeéní xínu

tá chíndaʼá espíritu Jehová.

20 “Ta̱ nda̱satá ndóʼó kixira chí Sion,

kixira nu̱ú na̱ se̱ʼe ta̱ Jacob na̱ ná va̱ása ki̱ʼvika ku̱a̱chi”, káchi Jehová.