Isaías

7 Tá ni̱xi̱yo ta̱ Acaz se̱ʼe ta̱ Jotán, se̱ʼe ta̱ Uzías ta̱ xi̱xaʼndachíñu chí Judá, ta̱ Rezín ta̱ xi̱xaʼndachíñu chí Siria xíʼin ta̱ Pécah se̱ʼe ta̱ Remalías, ta̱ xi̱xaʼndachíñu chí Israel, ni̱xa̱ʼa̱nna ka̱nitáʼanna xíʼin na̱ ñuu Jerusalén soo va̱ása níkuchiñuna.* 2 Tasaá na̱túʼunna ña̱yóʼo xíʼin na̱ chíñu na̱ ke̱e ti̱xin veʼe ta̱ David: “Na̱ Siria nda̱kutáʼanna xíʼin na̱ ñuu ta̱ Efraín ña̱ kanitáʼanna xíʼinyó”.

Ta ni̱yi̱ʼvíní ta̱ Acaz xíʼin na̱ ñuura, ta níma̱na ki̱xáʼaña kánditaña nda̱a̱ táki̱ʼva kánda̱ yitu̱n tá káni ta̱chí.

3 Tasaá, Jehová ni̱ka̱ʼa̱nra xíʼin ta̱ Isaías: “Miíún xíʼin se̱ʼún ta̱ Sear-Jasub,* kúáʼanndó ndakutáʼanndó xíʼin ta̱ Acaz nu̱ú ndíʼi chi̱chi, chí nu̱ú yáʼa ti̱kui̱í tá ñúʼu ini tanque ña̱ íyo nu̱ú súkun, yatin chí yichi̱ nu̱ú xáʼa̱n na̱ yiví ndákatana ti̱ko̱to̱na. 4 Ña̱yóʼo ka̱ʼún xíʼinra: ‘Kuenta koún ta va̱ása kundi̱ʼiní-iniún, va̱ása yi̱ʼvíún kuniún ta̱ Rezín xíʼin na̱ ñuu Siria ta saátu ta̱ se̱ʼe ta̱ Remalías, ni va̱ása ndakava-iniún saáchi ni sáa̱ní na̱yóʼo, íyona nda̱a̱ táki̱ʼva íyo titu̱n tú xa̱a̱ ku̱a̱ʼa̱n ndáʼva̱. 5 Saáchi na̱ ñuu Siria xíʼin na̱ ñuu ta̱ Efraín ta saátu ta̱ se̱ʼe ta̱ Remalías, xa̱a̱ ki̱ndoona ndáa ki̱ʼva kanitáʼanna xíʼún. Ña̱yóʼo kúú ña̱ ni̱ka̱ʼa̱nna: 6 “Ná ku̱ʼu̱nyó kanitáʼanyó xíʼin na̱ ñuu Judá, ná sandíʼi-xa̱ʼa̱yóna* ta ná ndakiʼinyóna, ta saátu ná taxiyó kaʼndachíñu se̱ʼe ta̱ Tabeel nu̱úna”.

 7 ”’Ña̱yóʼo kúú ña̱ káʼa̱n táta káʼnu Jehová:

Ti̱xin 65 ku̱i̱ya̱ ndiʼi-xa̱ʼa̱ ñuu ta̱ Efraín ta va̱ása kookaña iin ñuu.

10 Ta saátu ni̱ka̱ʼa̱n Jehová ña̱yóʼo xíʼin ta̱ Acaz: 11 “Ndukú iin señal nu̱ú yi̱ʼi̱ Jehová Ndióxi̱ún; nda̱a̱ ndáaka nu̱ú kúni̱ún ná kuuña kán kuuvaña, kivi kuuña nu̱ú kúnúní nda̱a̱ táki̱ʼva kúnú Ya̱vi̱* nu̱ú ndúxu̱nna, á kivi kuuña nu̱ú súkunní nda̱a̱ táki̱ʼva súkun ndiví”. 12 Soo ta̱ Acaz ka̱chira: “Va̱ása ndukúi̱ nda̱a̱ ni iin ña̱ʼa nu̱ú Jehová, ni va̱ása kotondosói̱ra”.

13 Tasaá ni̱ka̱ʼa̱n ta̱ Isaías: “Ndóʼó na̱ veʼe ta̱ David, ixandó ña̱ ma̱ní kuniso̱ʼondó. Kǒo kúndeéka-ini na̱ ta̱a xíʼin ña̱ kéʼéndó, ¿á kǒo xáa̱-inindó xíʼin ña̱ kéʼéndó xíʼinna? ¿Á saátu kúni̱ndó keʼéndó xíʼin Ndióxi̱ ta kǒo kundeéka-inira xíʼinndó? 14 Jehová taxira señal yóʼo nu̱úndó. Kotondó, iin ñá loʼo kúa̱an, ke̱e se̱ʼeñá ta kaku iin ta̱ loʼo se̱ʼeñá ta kunaníra Emmanuel.* 15 Tá kúma̱níka sakúaʼara kundasíra ña̱ va̱ása va̱ʼa ta ndaka̱xinra keʼéra ña̱ va̱ʼa, kuxura mantequilla* xíʼin ñu̱ñú. 16 Saáchi tá kúma̱níka sakúaʼa ta̱ loʼo yóʼo kundasíra ña̱ va̱ása va̱ʼa ta ndaka̱xinra keʼéra ña̱ va̱ʼa, ndiʼi-xa̱ʼa̱ ñuu u̱vi̱ saá na̱ rey yóʼo, na̱ yíʼviún xíniún. 17 Jehová taxira ña̱ kixi tu̱ndóʼo nu̱ún, nu̱ú na̱ ñuún ta saátu nu̱ú na̱ veʼe yiváún, ki̱vi̱ yóʼo kooña nda̱a̱ táki̱ʼva ni̱xi̱yo ki̱vi̱ ña̱ nda̱taʼví na̱ ñuu ta̱ Efraín xíʼin na̱ ñuu Judá, saáchi Ndióxi̱ chindaʼára ta̱ rey ñuu Asiria ña̱ kanitáʼanra xíʼún.

18 ”Ki̱vi̱ saá, Jehová kanara tí ndikama tí xíkání íyo, tí íyo nda̱a̱ yu̱ta Nilo chí Egipto, ta kanatura tí ñu̱ñú tí íyo chí Asiria. 19 Tíyóʼo kixaa̱rí ta kundoorí yoso̱ nu̱ú yáʼa yu̱ta, ti̱xin yu̱u̱, ndaʼa̱ ndiʼi tú iñú ta saátu nu̱ú xíʼi kití ti̱kui̱í.

20 ”Ki̱vi̱ saá, Jehová kuniñúʼura iin na̱ yiví na̱ íyo chí yuʼú yu̱ta Éufrates, na̱ xíni̱ kaʼnda ixí* xi̱nína, na̱ chaʼvi ta̱ rey Acaz, ta kaʼndara ixí xi̱nína xíʼin ixí xa̱ʼa̱na ta saátu kaʼndara ixí yuʼúna.

21 ”Ki̱vi̱ saá, iin ta̱a taxira ña̱ kutaku iin si̱ndi̱ki̱ loʼo xíʼin u̱vi̱ ndikachi.* 22 Ta xa̱ʼa̱ ña̱ koo ku̱a̱ʼání leche, ta̱yóʼo kuxura mantequilla, saáchi ndiʼi na̱ ná kindo̱o ñuu kán kuxuna mantequilla xíʼin ñu̱ñú.

23 ”Ki̱vi̱ saá, nda̱a̱ ndáaka nu̱ú ni̱xi̱yo 1,000 yitu̱n tú uva, tú ya̱ʼvi 1,000 xu̱ʼún ña̱ plata, iñú kuitíva kindo̱o ta saátu ku̱ʼu̱ ña̱ va̱ása va̱ʼa. 24 Na̱ ta̱a ku̱ʼu̱nna kán xíʼin kuxu̱nna* ta saátu flechana, saáchi iníísaá ñuu kán kooní iñú xíʼin ku̱ʼu̱ ña̱ va̱ása va̱ʼa. 25 Xa̱ʼa̱ ña̱ yi̱ʼvíún kakaún nu̱ú íyo iñú saátu nu̱ú íyo ku̱ʼu̱ ña̱ va̱ása va̱ʼa, va̱ása kuyatiún yuku̱ nu̱ú xi̱xutuna; ñuʼú yóʼo nduuña nu̱ú xíxáʼan* si̱ndi̱ki̱ ta ndikachi kúú tí kaka nu̱úña”.