Isaías

20 Ta̱ rey Sargón ta̱ ñuu Asiria chi̱ndaʼára ta̱ xi̱niʼi yichi̱ nu̱ú na̱ soldado* chí Asdod, ta mií ku̱i̱ya̱ ña̱ chi̱ndaʼára ta̱yóʼo, ka̱nitáʼanra xíʼin na̱ ñuu Asdod ta ku̱chiñura nda̱kiʼinra ñuu kán. 2 Tá tiempo saá, Jehová xi̱niñúʼura ta̱ Isaías se̱ʼe ta̱ Amoz ña̱ ni̱ka̱ʼa̱nra ña̱yóʼo: “Kúáʼan ta taváún ti̱ko̱to̱ ndayí* ña̱ núʼni tokóún ta taváún ndu̱xa̱ún”. Tasaá ke̱ʼévara; ni̱xi̱ka chálára* ta kǒo ndu̱xa̱n níxi̱ñuʼu xa̱ʼa̱ra.

3 Saá ni̱ka̱ʼa̱n Jehová ña̱yóʼo: “Nda̱a̱ táki̱ʼva ke̱ʼé ta̱ Isaías ta̱ káchíñu nu̱úi̱, ña̱ ti̱xin u̱ni̱ ku̱i̱ya̱ ni̱xi̱ka chálára ta kǒo ndu̱xa̱n níxi̱ñuʼu xa̱ʼa̱ra ña̱ va̱ʼa na̱ʼa̱ra ndáaña kundoʼo na̱ ñuu Egipto xíʼin na̱ ñuu Etiopía, 4 saá keʼé ta̱ rey ñuu Asiria tá ná ndakiʼinra na̱ ñuu Egipto ku̱ʼu̱n xíʼinra ta saátu na̱ ñuu Etiopía, kúúna na̱ va̱lí á na̱ xa̱a̱ ku̱chée, koo chálána ta kǒo ndu̱xa̱n kuñuʼu xa̱ʼa̱na ta kutuvi te̱ʼé-kaʼána tasaá kukaʼan nu̱ú na̱ ñuu Egipto. 5 Yi̱ʼvíkavína ta kukaʼan nu̱úna xíʼin na̱ ñuu Etiopía, na̱ xi̱ndaa-inina ta saátu na̱ ñuu Egipto na̱ xi̱kuta̱aní-inina xíʼin. 6 Ki̱vi̱ saá, na̱ yiví na̱ ndóo chí yuʼú mar kachina: ‘Kotondó ña̱ ndo̱ʼo na̱ xi̱ndaaní-iniyó na̱ ni̱xa̱ʼa̱nyó nu̱ú ña̱ ná chindeétáʼanna xíʼinyó ña̱ va̱ʼa ka̱kuyó nu̱ú ta̱ rey ñuu Asiria. ¿Ndáaña keʼéyó ña̱ va̱ʼa ka̱kuyó vitin?’”.