Isaías
22 Ña̱yóʼo kúú ña̱ kundoʼo Yoso̱ nu̱ú xítona visión:*
¿Ndáaña ndóʼo ndiʼi ndóʼó na̱ nda̱a sa̱tá veʼe?
2 Xuxankaví ni̱xi̱yo yuʼúndó;
iin káña̱ yuʼúndó ta ni̱nukaví kúnindó.
Kǒo níxaʼnína na̱ ñuundó xíʼin espada
ta ni kǒo níxi̱ʼi̱na nu̱ú ku̱a̱chi.
3 Ndiʼi na̱ xáʼndachíñu ñuundó xi̱nuna ku̱a̱ʼa̱nna.
Ni va̱ása níxiniñúʼuna kuxu̱n* ta nda̱kiʼinnana ku̱a̱ʼa̱n xíʼinna.
Ni xíká xi̱nuna ku̱a̱ʼa̱nna soo nda̱ni̱ʼívanana,
ta nda̱kiʼinnana ku̱a̱ʼa̱n xíʼinna.
4 Ña̱kán ni̱ka̱ʼi̱n: “Va̱ása kotondó nu̱úi̱;
ndeéní kuakui̱.
Va̱ása sandíkondó-inii̱
xa̱ʼa̱ ña̱ ndi̱ʼi-xa̱ʼa̱ na̱ ñui̱.
5 Saáchi iin ki̱vi̱ ña̱ kǒo kunda̱a̱-inina ndáaña keʼéna kúúña, yi̱ʼvína ta ndiʼi-xa̱ʼa̱na
saáchi táta káʼnu Jehová ta̱ xáʼndachíñu nu̱ú na̱ ángel kúú ta̱ keʼé ña̱yóʼo,
chí Yoso̱ nu̱ú xítona visión.
Xa̱a̱ sándiʼi-xa̱ʼa̱na nama̱
ta ndáʼyi̱ kóʼóna* chí yuku̱.
6 Na̱ ñuu Elam nda̱kiʼinna ña̱ʼa nu̱ú ñúʼu flecha
ta va̱xina xíʼin na̱ ta̱a na̱ ndóso sa̱tá carreta xíʼin kuáyi̱,
ta na̱ ñuu Quir íxatu̱ʼvana escudona.
7 Nu̱ú yoso̱ndó mií ña̱ va̱ʼaka
ndakutú carreta tú xíka nu̱ú ku̱a̱chi,
na̱ yósó* tí kuáyi̱ koo tu̱ʼvana kunditana chí yéʼé
8 ta kǒoka na̱ chindeétáʼan xíʼin na̱ ñuu Judá.
”Ki̱vi̱ saá ndakotondó veʼe ña̱ naní Veʼe ña̱ íyo chí yuku̱, chí nu̱ú ndóo ña̱ʼa ña̱ xíniñúʼundó tá xíkandó nu̱ú ku̱a̱chi, 9 ndakotondó ya̱vi̱ ña̱ ni̱ka̱a̱n nama̱ Ñuu ta̱ David. Ta tavándó ti̱kui̱í tá ñúʼu tanque ña̱ níndichi chí ni̱nu̱. 10 Ndakaʼvina veʼe ña̱ íyo chí Jerusalén, sakúachinaña ña̱ va̱ʼa ndasakútu̱na nama̱. 11 Ta ma̱ʼñú u̱vi̱ saá nama̱, kaanna iin ya̱vi̱ nu̱ú kuñuʼu ti̱kui̱í tá ñúʼu ini tanque yatá, soo va̱ása kotona ta̱ káʼnuní ta̱ i̱xava̱ʼa ña̱yóʼo, ta va̱ása kotona ta̱ ke̱ʼéña tiempo xi̱naʼá.
12 Ta ki̱vi̱ saá, táta káʼnu Jehová ta̱ xáʼndachíñu nu̱ú na̱ ángel
ka̱ʼa̱nra xíʼinna ná kuakuna ta kusuchí-inina,
ka̱ʼa̱nra xíʼinna ná xa̱tána xi̱nína ta ná ndakundixina ti̱ko̱to̱ ndayí.*
13 Soo nu̱úka ña̱ keʼéna ña̱yóʼo, vikóva keʼéna ta kusi̱í-inina,
kaʼnína si̱ndi̱ki̱ xíʼin ndikachi,*
kuxuna ku̱ñu ta koʼona vino.
Ta ka̱ʼa̱nna ña̱yóʼo: ‘Ná kuxuyó ta ná koʼoyó chi taa̱n kuvivayó’”.
14 Tasaá, Jehová ta̱ xáʼndachíñu nu̱ú na̱ ángel ni̱ka̱ʼa̱nra ña̱yóʼo xíʼi̱n: “‘Va̱ása ndoo ku̱a̱chindó nda̱a̱ ná kuvindó’, káchi táta káʼnu Jehová ta̱ xáʼndachíñu nu̱ú na̱ ángel”.
15 Ña̱yóʼo kúú ña̱ káʼa̱n táta káʼnu Jehová ta̱ xáʼndachíñu nu̱ú na̱ ángel: “Kúáʼan nu̱ú ta̱ su̱tu̱ Sebná, ta̱ kíʼin kuenta xíʼin veʼe* ta̱ rey ta ka̱ʼún ña̱yóʼo xíʼinra: 16 ‘¿Ndáaña kúúmiíún yóʼo, ta ndáa na̱ táʼún ndíkaa̱ yóʼo ña̱kán íxava̱ʼún nu̱ú ndu̱xu̱ún?’. Iin nu̱ú súkun íxava̱ʼara nu̱ú ndu̱xu̱nra; káanra kándíka yu̱u̱ káʼnu ña̱ ndu̱xu̱nra. 17 ‘Jehová ndeéní kuunra yóʼó nu̱ú ñuʼú, ta tuunní tiinra yóʼó. 18 Kútu̱ní ndativíra* yóʼó, ta nda̱a̱ táki̱ʼva koo iin pelota saá koún, ta sakánara yóʼó nu̱ú iin ñuʼú ña̱ ndíka̱ní. Kán kuviún ta kán ndiʼi-xa̱ʼa̱ carreta tú ndáyáʼviní kúúmiíún, tasaá sakúkaʼún nu̱ú na̱ veʼe ta̱ káchíñún nu̱ú. 19 Taxíi̱n yóʼó ta kindai̱ chiñu ndaʼún.
20 ”’Ki̱vi̱ saá kanai̱ ta̱ káchíñu nu̱úi̱ ta̱ Eliaquim se̱ʼe ta̱ Hilquías, 21 ta ta̱yóʼo sandákundixii̱ ti̱ko̱to̱ káni̱ ña̱ ndíxiún ta tokóra ndakatúi̱n ti̱ko̱to̱ ña̱ núʼni tokóún, ta ndakiʼinra chiñu ña̱ kúúmiíún. Ta koora yivá na̱ ñuu Jerusalén ta saátu koora yivá na̱ veʼe ta̱ Judá. 22 Ta so̱ko̱ra chinúi̱ llave veʼe ta̱ David. Kunára ta kǒo na̱ ndakasi; ndakasira ta kǒo na̱ ndakuná. 23 Nda̱a̱ táki̱ʼva kánina iin clavo nu̱ú téʼéní saá keʼíi̱ xíʼinra, ta nda̱a̱ táki̱ʼva ndáyáʼvi tayi̱ nu̱ú xáʼndachíñuna saá xa̱a̱ra kundayáʼviníra ti̱xin veʼe yivára. 24 Ta nda̱a̱ táki̱ʼva koo ta̱ kundiso ña̱ʼa ña̱ ndáyáʼvi ña̱ íyo ti̱xin veʼe yivára saá koora, saátu kundisora na̱ se̱ʼe na̱yóʼo, kundisora ndiʼi ki̱si válí, ndiʼi ki̱si ña̱ íyo táki̱ʼva íyo ko̱ʼo̱ ta saátu ndiʼi jarra náʼnu.
25 ”’Ki̱vi̱ saá tavána clavo ña̱ kútu̱ní ka̱nina nu̱ú téʼéní, ndakavaña ta ndiʼi-xa̱ʼa̱ña, ta ña̱ xi̱tikaa sa̱tá ña̱yóʼo ta̱ʼvíña, chi mií Jehová kúú ta̱ ni̱ka̱ʼa̱n ña̱yóʼo. Káchi Jehová ta̱ xáʼndachíñu nu̱ú na̱ ángel’”.