¿Á xi̱niñúʼu Ndióxi̱ ña̱ evolución ña̱ i̱xava̱ʼara ndiʼi nu̱ú ña̱ʼa ña̱ táku?
Ña̱ káʼa̱n Biblia xa̱ʼa̱ ña̱yóʼo
Va̱ása. Ña̱ Biblia káʼa̱n káxiña ña̱ mií Ndióxi̱ kúú ta̱ i̱xava̱ʼa ndiʼi na̱ yiví ta saátu ndiʼi nu̱ú kití xíʼin planta (Génesis 1:12, 21, 25, 27; Apocalipsis 4:11). Ña̱ Biblia káʼa̱nña ña̱ ndiʼi na̱ yiví se̱ʼe ta̱ Adán xíʼin ñá Eva kúúna (Génesis 3:20; 4:1). Ña̱ Biblia va̱ása káʼa̱nña xa̱ʼa̱ Ndióxi̱ ña̱ níxiniñúʼura ña̱ evolución ña̱ keʼéra ndiʼi na̱ yiví, ndiʼi nu̱ú kití xíʼin ndiʼi nu̱ú planta. Ña̱ Biblia va̱ása káʼa̱nña ña̱ su̱ví ña̱ ndixa kúú ña̱ káʼa̱n na̱ científico tá káʼa̱nna xa̱ʼa̱ sava ña̱ na̱kuva̱ʼa ni inkáchiva ña̱ʼa kúúña, soo nása̱mava loʼo ki̱ʼva ña̱ náʼa̱ña.a
¿Ndáaña ndákanixi̱ní sava na̱ yiví?
Ña̱ evolución teística kivitu ka̱ʼa̱nña xa̱ʼa̱ ña̱yóʼo: Ña̱ Encyclopædia Britannica, káchiña “iin iin mií ña̱ʼa ndáka̱xinña ndáa ki̱ʼva kooña á xáʼnu miíña ku̱a̱ʼa̱nvaña ta Ndióxi̱ kúú ta̱ táxi ña̱ kooña saá”.
Ña̱ káʼa̱nna xíʼin evolución teística kivi ka̱ʼa̱nña xa̱ʼa̱ ku̱a̱ʼá ña̱ʼa.
Ndiʼi ña̱ʼa ña̱ táku ña̱ íyo vitin iin kuitíva xi̱kuu nu̱ú ka̱naña tá tiempo xi̱naʼá.
Iin ña̱ʼa ña̱ táku kivi xa̱a̱ña nasa̱maníña ta síín va̱ʼa xa̱a̱ña ndu̱uña nu̱ú ki̱ʼva ña̱ ni̱xi̱yoña tá ya̱chi̱. Ña̱yóʼo kúú ña̱ káʼa̱nna xíʼin macroevolución.
Savana káchina ña̱ Ndióxi̱ kúú ta̱ kéʼé saá xíʼin ndiʼi ña̱yóʼo.
¿Á kítáʼan ña̱ káʼa̱n evolución xíʼin ña̱ káʼa̱n Biblia?
Tá ña̱ ndixa kúú ña̱ evolución teística, ña̱ va̱xi nu̱ú Génesis ña̱ káʼa̱n xa̱ʼa̱ ndáa ki̱ʼva na̱kuva̱ʼa ña̱ʼa su̱ví ña̱ ndixaví kúúña. Soo ta̱ Jesús ni̱ka̱ʼa̱nra xa̱ʼa̱ ña̱ va̱xi nu̱ú Génesis ña̱ kúúña ña̱ ndixa (Génesis 1:26, 27; 2:18-24; Mateo 19:4-6). Ña̱ Biblia káʼa̱nña xa̱ʼa̱ ta̱ Jesús, tá kúma̱níka kixira nu̱ú ñuʼú yóʼo, ni̱xi̱yora chí ndiví xíʼin Ndióxi̱ ta chi̱ndeétáʼanra xíʼinra ña̱ “i̱xava̱ʼara ndiʼi ña̱ʼa” (Juan 1:3). Xa̱ʼa̱ ña̱kán, ña̱ káʼa̱nna xa̱ʼa̱ Ndióxi̱ ña̱ xi̱niñúʼura evolución ña̱ ke̱ʼéra ndiʼi ña̱ʼa ña̱ táku ña̱ íyo nu̱ú ñuʼú, va̱ása kítáʼanña xíʼin ña̱ káʼa̱n Biblia.
¿Á ña̱ kamaní káan iin planta xíʼin kití nu̱ú íyorí kúni̱ kachiña ña̱ íyo evolución?
Ña̱ Biblia va̱ása káʼa̱nña xa̱ʼa̱ ña̱yóʼo, ni va̱ása káʼa̱nña á ku̱a̱ʼání xíniñúʼu nasa̱ma ki̱ʼva ña̱ náʼa̱ iin kití á iin planta. Ta ni va̱ása káʼa̱ntuña ña̱ va̱ása kivi nasa̱ma ki̱ʼva ña̱ náʼa̱ iin planta á iin kití ña̱ va̱ʼa ka̱anrí nu̱ú íyorí ta kivi ku̱i̱na̱rí. Savana káʼa̱nna tá nása̱ma loʼo ki̱ʼva ña̱ náʼa̱ iin ña̱ʼa evolución kúúña káchina, soo mií ña̱ nda̱a̱ su̱ví ña̱ nása̱ma loʼo ki̱ʼva ña̱ náʼa̱ iin ña̱ʼa kúni̱ kachiña ña̱ kúva̱ʼa xa̱á inka ña̱ʼa ña̱ táku.
a Ña̱ʼa ña̱ nása̱ma loʼo yóʼo kúú ña̱ káʼa̱nna xíʼin microevolución.