¿Á kúúmií xu̱ʼún ku̱a̱chi xa̱ʼa̱ ndiʼi ña̱ va̱ása va̱ʼa kúu?

Ña̱ káʼa̱n Biblia xa̱ʼa̱ ña̱yóʼo

Biblia va̱ása káʼa̱nña ña̱ va̱ása va̱ʼa xu̱ʼún, ta kǒo káʼa̱nña ña̱ ndiʼi ña̱ va̱ása va̱ʼa kúuña xa̱ʼa̱ xu̱ʼún. Savana káʼa̱nna ku̱a̱chi xu̱ʼún kúú ña̱ kúuní tu̱ndóʼo. Soo, ¿á ña̱ ndixa kúú ña̱yóʼo? Biblia káchiña: “Ta xa̱ʼa̱ ña̱ kútóonína kuumiína xu̱ʼún, ku̱a̱ʼání tu̱ndóʼo kíxi nu̱úna” (1 Timoteo 6:10).a

• ¿Ndáaña káʼa̱n Biblia xa̱ʼa̱ xu̱ʼún?

• ¿Nda̱chun i̱yoní ña̱ kutóoyó kuumiíyó xu̱ʼún?

• ¿Ndáaña va̱ʼa ndakiʼinyó tá kéʼéyó ña̱ káʼa̱n Biblia?

• Consejo ña̱ táxi Biblia xa̱ʼa̱ xu̱ʼún

¿Ndáaña káʼa̱n Biblia xa̱ʼa̱ xu̱ʼún?

Biblia káʼa̱nña xíʼinyó tá vií xíniñúʼuyóña, va̱ʼa chindeétáʼanña xíʼinyó ta nda̱a̱ kivi kundaaña miíyó (Eclesiastés 7:12). Ta va̱ʼaní káʼa̱nña xa̱ʼa̱ na̱ yiví na̱ va̱ʼa-ini tá chíndeétáʼanna xíʼin inkana xíʼin xu̱ʼúnna (Proverbios 11:25).

Soo Biblia sándakaʼánña miíyó ña̱ va̱ása xíniñúʼu kundayáʼvi xu̱ʼún nu̱úyó. Hebreos 13:5 káchiña: “Kǒo kutóoníndó kuumiíndó xu̱ʼún, va̱ʼaka kusi̱í-inindó xíʼin ña̱ʼa ña̱ xa̱a̱ kúúmiíndó”. ¿Ndáaña sánáʼa̱ ña̱yóʼo miíyó? Xíniñúʼuvayó xu̱ʼún soo ná kǒo kundayáʼviníña nu̱úyó. Ná kusi̱í-iniyó xíʼin ña̱ʼa ña̱ ndixa xíniñúʼuyó. Tá kúú: ña̱ kuxuyó, ña̱ kundixiyó xíʼin veʼe nu̱ú kooyó (1 Timoteo 6:8).

¿Nda̱chun i̱yoní ña̱ kutóoyó kuumiíyó xu̱ʼún?

Na̱ yiví na̱ kútóoní koo ña̱ʼa va̱ása ni̱ʼína ña̱ kutakuna ndiʼi tiempo (Efesios 5:5). Chi na̱ kútóoní koo ku̱a̱ʼá ña̱ʼa, íyona nda̱a̱ táki̱ʼva íyo na̱ ndásakáʼnu Ndióxi̱ vatá (Colosenses 3:5). Na̱ kútóoní kuumií ña̱ʼa, sava yichi̱ yáʼandosóna ña̱ káʼa̱n Ndióxi̱. Proverbios 28:20 káchiña “na̱ kúni̱ kamaní koo kúiká va̱ása nda̱kúka koo inina”. Savana kúni̱na sandáʼvina na̱ yiví ña̱ kindaana xu̱ʼún ndaʼa̱na á ña̱ ixakuíʼnana na̱ yiví ta nda̱a̱ kúni̱na kaʼnínana.

Ni kǒo kéʼéyó ña̱ va̱ása va̱ʼa yóʼo, soo ña̱ kutóoyó kuumiíyó xu̱ʼún kivi taxiña ku̱a̱ʼání tu̱ndóʼo nu̱úyó. Biblia káʼa̱nña ña̱yóʼo: “Ta na̱ kúni̱ní ndukúiká, íyoní ña̱ sándaʼvi miína ta kóyona ndaʼa̱ña ta kíxáʼa kútóona ku̱a̱ʼání ña̱ʼa ña̱ va̱ása ndáyáʼvi” (1 Timoteo 6:9).

¿Ndáaña va̱ʼa ndakiʼinyó tá kéʼéyó ña̱ káʼa̱n Biblia?

Tá ndákanixi̱níyó nda̱a̱ táki̱ʼva ndákanixi̱ní Ndióxi̱ ta va̱ása yáʼandosóyó ña̱ káʼa̱nra xíʼinyó ña̱ ni̱ʼíyó xu̱ʼún, va̱ása kukaʼan nu̱úyó ta kusi̱í-ini Ndióxi̱ xíʼinyó. Tá chíkaa̱yó ndee̱ ña̱ kiʼinyó kuenta xíʼin ña̱ káʼa̱n Ndióxi̱, miíra káʼa̱n ña̱yóʼo xíʼinyó: “Nda̱a̱ ni iin yichi̱ va̱ása sandákoi̱ yóʼó ta nda̱a̱ ni iin yichi̱ va̱ása sañándaʼíi̱ yóʼó” (Hebreos 13:5, 6). Ta saátu káʼa̱nra ña̱yóʼo xíʼinyó “na̱ yiví na̱ nda̱kú-ini ku̱a̱ʼání bendición ndakiʼinna” (Proverbios 28:20).