Ndóʼó na̱ anciano kundiku̱nndó yichi̱ ta̱ Gedeón

1. Nda̱a̱ táki̱ʼva káchi 1 Pedro 5:2, ¿ndáa chiñu kúú ña̱ ta̱xi Jehová ndaʼa̱ na̱ anciano?

JEHOVÁ nda̱kaxinra na̱ anciano ña̱ kundaana na̱ congregación na̱ kúú ndikachi sa̱na̱ Ndióxi̱. Ta na̱ anciano chíndayáʼvinína chiñu yóʼo ta chíka̱a̱nína ndee̱ ña̱ kundaana na̱ hermano (Jer. 23:4; kaʼvi 1 Pedro 5:2). Táxiníyó tíxa̱ʼvi ndaʼa̱ Jehová xa̱ʼa̱ ña̱ íyo na̱ anciano na̱ va̱ʼaní chíndeétáʼan xíʼinyó ti̱xin congregación.

2. ¿Ndáaña íxayo̱ʼvi̱ xíʼin sava na̱ anciano?

² Na̱ anciano xíniñúʼu kachíñunína ña̱ va̱ʼa kundaana na̱ congregación, xa̱ʼa̱ ña̱yóʼo sava yichi̱ íxayo̱ʼvi̱níña xíʼinna. Ná ka̱ʼa̱nyó xa̱ʼa̱ ta̱ Tony iin ta̱ anciano ta̱ íyo chí Estados Unidos. Ta̱yóʼo ki̱ʼinra kuenta ña̱ va̱ása kivi keʼéra ndiʼi chiñu ña̱ táxina ndaʼa̱ra. Ta̱ Tony káchira: “Tá ki̱xáʼa ña̱ COVID-19, ni̱xi̱yoní chiñu saáchi xi̱niñúʼu chindeétáʼanndi̱ xíʼin na̱ hermano ña̱ va̱ʼa kotona reunión ta saátu ña̱ keena predicación. Ndiʼi chiñu ña̱ xi̱taxina ndaʼíi̱ xi̱keʼévai̱ña, soo ni xi̱chika̱a̱níi̱ ndee̱ ña̱ keʼíi̱ chiñu yóʼo ndiʼi tiempo ku̱a̱ʼání chiñu ni̱xi̱yo nu̱úi̱. Xa̱ʼa̱ ña̱ xi̱kunaáníi̱, kǒo níxi̱ka̱ʼa̱nkai̱ xíʼin Jehová, kǒo níxi̱kaʼvikai̱ Biblia ta kǒo níxi̱nandukúkai̱ xa̱ʼa̱ ña̱ xi̱kaʼvii̱”. Ta̱ Ilir, iin anciano ta̱ íyo chí Kosovo ni̱ya̱ʼara nu̱ú iin tu̱ndóʼo ña̱ i̱xayo̱ʼvi̱ní xíʼinra. Ni̱xi̱yora iin lugar nu̱ú íyoní guerra ta xi̱ ixayo̱ʼvi̱níña xíʼinra keʼéra ña̱ káʼa̱n na̱ ñuu Ndióxi̱. Ta̱yóʼo káchira: “Tá ni̱ka̱ʼa̱n na̱ hermano na̱ káchíñu Betel xíʼi̱n ña̱ ku̱ʼi̱n chindeétáʼi̱n xíʼin na̱ hermano, ni̱yi̱ʼvíníi̱ saáchi lugar nu̱ú ndóona i̱yoní káaña. Xa̱ʼa̱ ña̱kán xi̱niñúʼu ndakúní koo inii̱”. Iin ta̱ misionero ta̱ íyo chí Asia ta̱ naní Tim, xi̱ ixayo̱ʼvi̱níña xíʼinra saxínura ndiʼi chiñu ña̱ xi̱kuumiíra. Ta̱yóʼo káchira: “Xa̱ʼa̱ ña̱ xi̱kunaáníi̱, sava yichi̱ xi̱ ixayo̱ʼvi̱ña xíʼi̱n chindeétáʼi̱n xíʼin na̱ hermano”. Tá saá, ¿ndáaña kivi keʼé na̱ anciano tá ndóʼona táʼan ña̱yóʼo?

3. ¿Nda̱chun xíniñúʼu chika̱a̱yó ndee̱ ña̱ kundiku̱nyó yichi̱ ta̱ Gedeón?

³ Ku̱a̱ʼání ña̱ va̱ʼa kivi sákuaʼa na̱ anciano xíʼin ña̱ ke̱ʼé ta̱ Gedeón ta̱ xi̱kuu juez ñuu Israel (Heb. 6:12; 11:32). Ta̱yóʼo xi̱ndaara na̱ ñuu Ndióxi̱ ta xi̱kiʼinra kuenta xíʼinna (Juec. 2:16; 1 Crón. 17:6). Nda̱a̱ táki̱ʼva ke̱ʼé ta̱ Gedeón, saátu kéʼé na̱ anciano na̱ íyo tiempo vitin saáchi ndáana na̱ hermano na̱ íyo ti̱xin congregación (Hech. 20:28; 2 Tim. 3:1). Ku̱a̱ʼání ña̱ kivi sákuaʼayó xíʼin ña̱ ke̱ʼé ta̱ Gedeón, saáchi xi̱kunda̱a̱-inira ña̱ va̱ása kivi keʼéra ndiʼi chiñu ña̱ xi̱taxina ndaʼa̱ra, vitá ni̱xi̱yo-inira ta xi̱xiniso̱ʼora ndiʼi ña̱ xi̱ka̱ʼa̱n Jehová xíʼinra. Kivi kundiku̱nyó yichi̱ ta̱ Gedeón ta ná kundayáʼvi chiñu ña̱ kéʼé na̱ anciano nu̱úyó ta ná kuniso̱ʼoyó ña̱ káʼa̱nna xíʼinyó (Heb. 13:17).

TÁ ÍXAYO̱ʼVI̱ÑA XÍʼINYÓ NDAKUNIYÓ ÑA̱ KǑO KÍVÍ KEʼÉYÓ KU̱A̱ʼÁNÍ ÑA̱ʼA

4. ¿Ndáaña ke̱ʼé ta̱ Gedeón tasaá ni̱na̱ʼa̱ra ña̱ vitá ni̱xi̱yo-inira?

⁴ Ta̱ Gedeón xi̱kunda̱a̱-inira ña̱ kǒo kíví keʼéra ndiʼi chiñu ña̱ táxina ndaʼa̱ra ta saátu vitá ni̱xi̱yo inira.b Tá ni̱ka̱ʼa̱n iin ángel xíʼin ta̱ Gedeón ña̱ mií Jehová kúú ta̱ nda̱kaxin ta̱yóʼo ña̱ sáka̱kura na̱ ñuu Israel, saáchi na̱ ñuu Madián xi̱ ixandi̱va̱ʼanína xíʼinna, ta̱ Gedeón vitá ni̱xi̱yo inira ta ni̱ka̱ʼa̱nra ña̱yóʼo: “Na̱ veʼi̱ kúú na̱ loʼoka ndáyáʼvi ti̱xin na̱ tribu ta̱ Manasés ta yi̱ʼi̱ kúú ta̱ loʼoka ndáyáʼvi ti̱xin veʼe yivái̱” (Juec. 6:15). Ta̱ Gedeón nda̱kanixi̱níra ña̱ va̱ása kuchiñura keʼéra chiñu yóʼo. Soo Jehová xi̱kunda̱a̱-inira ña̱ kiviva keʼéraña ta miíra chi̱ndeétáʼan xíʼinra.

5. ¿Nda̱chun kivi ixayo̱ʼvi̱ña xíʼin na̱ anciano ña̱ vitá koo inina?

⁵ Na̱ anciano ndiʼi tiempo kíʼinna kuenta ña̱ íyo sava chiñu ña̱ kivi keʼéna ta íyo sava ña̱ va̱ása kivi keʼéna, ta saátu vitá íyo inina (Miq. 6:8; Hech. 20:18, 19). Va̱ása kúta̱aní-inina tá va̱ʼaní kána chiñu ña̱ kéʼéna, ta tá va̱ása va̱ʼa kána chiñu ña̱ kéʼéna va̱ása ndákanixi̱nína ña̱ kǒo ndáyáʼvina. Tá kúú, iin ta̱ anciano kivi ixayo̱ʼvi̱ña xíʼinra kiʼinra kuenta ndáa chiñu kúú ña̱ kivi keʼéra ta ndáaña va̱ása kuchiñura keʼéra ta saátu ña̱ vitá koo inira. Sava yichi̱ ndákiʼinra ndiʼi chiñu ña̱ táxina ndaʼa̱ra, soo tándi̱ʼi kíʼinra kuenta ña̱ va̱ása kuchiñura xíʼin ndiʼiña. Sava yichi̱ va̱ʼaní ka̱ʼa̱nna xa̱ʼa̱ra tá va̱ʼaní ke̱ʼéra iin chiñu ta savatu kǒo ka̱ʼa̱n va̱ʼana xa̱ʼa̱ra tá va̱ása va̱ʼa níkana iin ña̱ ke̱ʼéra. Tá ndóʼo na̱ anciano táʼa̱n ña̱yóʼo. ¿Ndáa ki̱ʼva kundiku̱nna yichi̱ ta̱ Gedeón?

6. ¿Ndáa ki̱ʼva kundiku̱n na̱ anciano yichi̱ ta̱ Gedeón? (Koto na̱ʼná).

⁶ Ka̱ʼa̱nndó xíʼin inkana ña̱ chindeétáʼanna xíʼinndó. Nda̱a̱ táki̱ʼva ke̱ʼé ta̱ Gedeón, ta̱yóʼo xi̱kunda̱a̱-inira ña̱ va̱ása kivi keʼéra ndiʼi chiñu ta ni̱ka̱ʼa̱nra xíʼin inkana ña̱ ná chindeétáʼanna xíʼinra (Juec. 6:27, 35; 7:24). Na̱ anciano na̱ va̱ʼaní ndákanixi̱ní á na̱ ndíchiní, kéʼéna nda̱a̱ táki̱ʼva ke̱ʼé ta̱ Gedeón. Ta̱ Tony ta̱ xa̱a̱ ni̱ka̱ʼa̱nyó xa̱ʼa̱ nu̱ú párrafo 2 káchira: “Ti̱xin veʼi̱ sa̱kúaʼi̱ ña̱ xíniñúʼu keʼíi̱ ndiʼi chiñu ña̱ táxina ndaʼíi̱ ni va̱ása táxiña tiempo keʼíi̱ ndiʼiña. Xa̱ʼa̱ ña̱kán tá ka̱ʼvii̱ xíʼin ñá síʼi̱, na̱túʼunndi̱ xa̱ʼa̱ tema ña̱ káʼa̱n ama kúú ña̱ xíniñúʼu ndakuniyó ndáaña kivi keʼéyó ta ndáaña va̱ása kivi keʼéyó, ta ni̱ka̱ʼi̱n xíʼinñá ndáaña ndákanixi̱níñá xa̱ʼa̱ ña̱yóʼo. Saátu xi̱toi̱ iin video ña̱ ndíkaa̱ nu̱ú jw.org ña̱ naní Ná keʼéyó táʼan ña̱ ke̱ʼé ta̱ Jesús ña̱ sanáʼa̱yó inkana keʼénaña”. Ta̱ Tony ki̱xáʼara káʼa̱nra xíʼin inkana ña̱ chindeétáʼanna xíʼinra. Ta̱yóʼo káʼa̱nra xíʼinyó ndáaña va̱ʼa nda̱kiʼinra xa̱ʼa̱ ña̱ ke̱ʼéra ña̱yóʼo: “Ndiʼi chiñu va̱ʼaní kánaña ti̱xin congregación ta vitin íyoka tiempo nu̱úi̱ ña̱ sakúaʼakai̱ xa̱ʼa̱ Jehová”.

7. ¿Ndáa ki̱ʼva kundiku̱n na̱ anciano yichi̱ ta̱ Gedeón tá káʼa̱n inkana ña̱ va̱ása va̱ʼa xa̱ʼa̱na? (Santiago 3:13).

⁷ Kǒo sa̱a̱ndó tá káʼa̱nna ña̱ va̱ása va̱ʼa xa̱ʼa̱ndó. ¿Ndáaña kivi keʼé na̱ anciano tá káʼa̱nna ña̱ va̱ása va̱ʼa xa̱ʼa̱na? Kivi kundiku̱nna yichi̱ ta̱ Gedeón, saáchi ta̱yóʼo xi̱kunda̱a̱-inira ña̱ su̱ví ndiʼiví chiñu ña̱ xi̱keʼéra va̱ʼa xi̱kanaña. Ta tá ni̱ka̱ʼa̱n na̱ tribu ta̱ Efraín ña̱ va̱ása va̱ʼa xa̱ʼa̱ra kúee ni̱xi̱yo-inira (Juec. 8:1-3). Ta nu̱úka ña̱ sa̱a̱ra vitá ni̱xi̱yo-inira, xi̱niso̱ʼora ña̱ ni̱ka̱ʼa̱nna xíʼinra tasaá sa̱ndíkora-inina ta chi̱kaa̱ra ndee̱ xíʼinna. Na̱ anciano na̱ ndíchiní ndákanixi̱ní íyona nda̱a̱ táki̱ʼva ni̱xi̱yo ta̱ Gedeón. Tá iin na̱ yiví káʼa̱nna ña̱ va̱ása va̱ʼa xa̱ʼa̱ na̱yóʼo, viíní xíniso̱ʼona ña̱ káʼa̱nna ta viíní káʼa̱nna xíʼinna (kaʼvi Santiago 3:13). Ta xa̱ʼa̱ ña̱ kéʼéna ña̱yóʼo ndiʼi na̱ hermano viíní kítáʼanna.

8. ¿Ndáaña kivi keʼé na̱ anciano tá káʼa̱n va̱ʼanína xa̱ʼa̱na? Ka̱ʼa̱n xa̱ʼa̱ iin ejemplo.

⁸ Iinlá Jehová ndasakáʼnundó. Tá ni̱ka̱ʼa̱n na̱ ñuu xíʼin ta̱ Gedeón ña̱ va̱ʼaní ke̱ʼéra saáchi ku̱chiñura ka̱nitáʼanra xíʼin na̱ Madián, ta̱yóʼo ni̱ka̱ʼa̱nra ña̱ mií Jehová kúú ta̱ chi̱ndeétáʼan xíʼinra ña̱ ku̱chiñura ka̱nitáʼanra xíʼin na̱yóʼo (Juec. 8:22, 23). ¿Ndáa ki̱ʼva kundiku̱n na̱ anciano yichi̱ ta̱ Gedeón? Tá va̱ʼa kána chiñu ña̱ kéʼéna ná ndasakáʼnuna Jehová xa̱ʼa̱ ña̱yóʼo (1 Cor. 4:6, 7). Ña̱kán tá iin na̱ hermano káʼa̱nna xíʼin iin na̱ anciano ña̱ va̱ʼaní sánáʼa̱na, na̱yóʼo kivi ka̱ʼa̱nna: “Ndiʼi ña̱ sánáʼi̱ nu̱ú tu̱ʼun Ndióxi̱ távái̱ña, chi na̱ ñuu Ndióxi̱ va̱ʼaní sánáʼa̱na miíyó”. Ña̱kán ndáyáʼviní ndakanixi̱ní na̱ anciano xa̱ʼa̱ ki̱ʼva ña̱ sánáʼa̱na, á ndásakáʼnuna Jehová á ndásakáʼnuna miívana. Ná ka̱ʼa̱nyó xa̱ʼa̱ ña̱ ndo̱ʼo iin ta̱ hermano ta̱ naní Timothy. Tá ni̱xa̱a̱ra ku̱ura anciano xi̱kutóoníra taxira discurso. Ta̱yóʼo káchira: “Tá xi̱taxii̱ discurso ku̱a̱ʼání xi̱ka̱ʼi̱n ta xi̱xiniñú’i̱ ejemplo ña̱ ndíchiní. Ta xa̱ʼa̱ ña̱yóʼo xa̱ʼa̱ miívai̱ xi̱ka̱ʼa̱n va̱ʼana ta su̱ví xa̱ʼa̱ Jehová xíʼin xa̱ʼa̱ Biblia”. Tá ni̱ya̱ʼa tiempo ta̱ Timothy xi̱niñúʼu nasamara ki̱ʼva ña̱ sánáʼa̱ra ña̱ va̱ʼa ná kǒo ka̱ʼa̱n va̱ʼaní na̱ hermano xa̱ʼa̱ miíra (Prov. 27:21). Ta, ¿ndáaña ku̱u? Ta̱yóʼo káchira: “Vitin na̱ hermano káʼa̱nna ña̱ discurso ña̱ táxii̱ va̱ʼaní chíndeétáʼanña xíʼinna ña̱ va̱ʼa ya̱ʼana nu̱ú tu̱ndóʼo ña̱ kúúmiína, ña̱ va̱ʼa kuyatinkana nu̱ú Jehová. Kúsi̱íní-inii̱ ña̱ káʼa̱n na̱ hermano ña̱yóʼo, nu̱úka ña̱ xi̱ka̱ʼa̱nna tá ya̱chi̱”.

TÁ ÍXAYO̱ʼVI̱ÑA XÍʼINYÓ KUNISO̱ʼOYÓ TA NDAKÚ KOO INIYÓ

9. ¿Ama kúú ña̱ xi̱niso̱ʼo ta̱ Gedeón ña̱ ni̱ka̱ʼa̱n Jehová? (Koto na̱ʼná ña̱ va̱xi chí nu̱ú kíxáʼa tutu yóʼo).

⁹ Tá nda̱kaxin Jehová ta̱ Gedeón ña̱ koora juez, ni̱ka̱ʼa̱nra xíʼinra ña̱ keʼéra sava ña̱ʼa, ta xi̱niñúʼu na̱ʼa̱ra ña̱ kǒo yíʼvira ta saátu ña̱ xíniso̱ʼora ña̱ káʼa̱nra xíʼinra. Jehová ni̱ka̱ʼa̱nra xíʼinra ña̱ keʼéra iin chiñu ña̱ yo̱ʼvi̱ní: ña̱ ku̱ʼu̱nra sandíʼi-xa̱ʼa̱ra altar ña̱ xíniñúʼu yivára ña̱ ndásakáʼnura ndióxi̱ vatá (Juec. 6:25, 26). Tá ni̱ya̱ʼa tiempo, ta̱ Gedeón sa̱ndátakara ku̱a̱ʼání na̱ soldado ña̱ va̱ʼa ku̱ʼu̱nna xíʼinra nu̱ú ku̱a̱chi, soo mií ki̱vi̱ saá u̱vi̱ yichi̱ ni̱ka̱ʼa̱n Jehová xíʼinra ña̱ loʼova na̱ soldado ku̱ʼu̱n xíʼinra (Juec. 7:2-7). Tándi̱ʼi, Jehová ni̱ka̱ʼa̱nra xíʼinra ña̱ ná ku̱ʼu̱nra tá xa̱a̱ ñuú ña̱ sandíʼi-xa̱ʼa̱ra na̱ xi̱sa̱a̱-ini xi̱xini na̱ ñuu Israel (Juec. 7:9-11).

10. ¿Ama kivi ixayo̱ʼvi̱ña xíʼin na̱ anciano kuniso̱ʼona ña̱ káʼa̱n na̱ ñuu Ndióxi̱?

¹⁰ Na̱ anciano xíniñúʼu koo tu̱ʼvana ña̱ kuniso̱ʼona (Sant. 3:17). Tá va̱ʼaní kándíxa na̱ anciano, saá va̱ʼaní ndíku̱nna ña̱ káʼa̱n Jehová xíʼinna nu̱ú tu̱ʼunra xíʼin ña̱ káʼa̱n na̱ ñuura, tasaá va̱ʼaní yichi̱ chínúuna nu̱ú inkana. Sava yichi̱ íxayo̱ʼvi̱ña xíʼinna kuniso̱ʼona ndiʼi ña̱ káʼa̱n na̱ ñuu Ndióxi̱ xíʼinna. Tá kúú, kamaní nása̱ma ña̱ʼa ti̱xin ñuu Ndióxi̱, xa̱ʼa̱ ña̱kán íxayo̱ʼvi̱ña xíʼinna keʼénaña. Ta sava yichi̱ ndákanixi̱nína á kuniso̱ʼona consejo ña̱ táxi na̱ ñuu Ndióxi̱ ndaʼa̱na á va̱ása. Savatu káʼa̱nna xíʼinna keʼéna iin ña̱ʼa, soo sana kivi chika̱a̱ na̱ chíñu miína veʼeka̱a xa̱ʼa̱ ña̱ keʼéna chiñu yóʼo. Tá ná kundoʼo na̱ anciano táʼa̱n ña̱yóʼo, ¿ndáa ki̱ʼva kundiku̱nna yichi̱ ta̱ Gedeón?

11. ¿Ndáaña kivi chindeétáʼan xíʼin na̱ anciano ña̱ kuniso̱ʼona ña̱ káʼa̱n na̱ ñuu Ndióxi̱?

¹¹ Kuniso̱ʼondó chiñu ña̱ xáʼndana nu̱úndó ta keʼéndóña. Ndióxi̱ ni̱ka̱ʼa̱nra xíʼin ta̱ Gedeón ndáa ki̱ʼva sandíʼi-xa̱ʼa̱ra altar nu̱ú xi̱ndasakáʼnu yivára ndióxi̱ vatá, ta saátu ni̱ka̱ʼa̱n Jehová xíʼinra ndáa míí ixava̱ʼara iin altar nu̱ú so̱kóra kití nu̱úra. Ta̱ Gedeón va̱ʼaní xi̱niso̱ʼora ña̱ ni̱ka̱ʼa̱n Jehová xíʼinra chi ndi̱ku̱n ke̱ʼéra ña̱ ni̱ka̱ʼa̱nra. Tiempo vitin na̱ ñuu Ndióxi̱ chíndaʼána carta á pauta nu̱ú na̱ anciano ña̱ va̱ʼa kunda̱a̱-inina ndáa ki̱ʼva kundaana na̱ congregación. Xa̱ʼa̱ ña̱ va̱ʼaní xíniso̱ʼo na̱ anciano ña̱ káʼa̱n na̱ ñuu Ndióxi̱ xíʼinna, kúʼvi̱ní-iniyó xíniyóna. Ta xa̱ʼa̱ ña̱yóʼo ku̱a̱ʼání ña̱ va̱ʼa ndákiʼin na̱ congregación (Sal. 119:112).

12. Tá násama na̱ ñuu Ndióxi̱ sava ña̱ʼa, ¿ndáa ki̱ʼva kundiku̱n na̱ anciano ña̱ káʼa̱n Hebreos 13:17?

¹² Tá násama na̱ ñuu Ndióxi̱ sava ña̱ʼa, koo tu̱ʼvandó ña̱ keʼéndóña. Jehová ni̱ka̱ʼa̱nra xíʼin ta̱ Gedeón ña̱ ka̱ʼa̱nra xíʼin ku̱a̱ʼání na̱ soldado ña̱ ndikóna veʼena ta si̱lóʼo na̱yóʼo kindo̱o ña̱ ku̱ʼu̱nna xíʼinra nu̱ú ku̱a̱chi (Juec. 7:8). Sana nda̱kanixi̱níra: “¿Á kuniso̱ʼi̱ ña̱ ni̱ka̱ʼa̱n Jehová xíʼi̱n? ¿Á kuchiñui̱ ku̱ʼi̱n nu̱ú ku̱a̱chi xíʼin loʼoní na̱ soldado?”. Soo ni saá, ta̱ Gedeón xi̱niso̱ʼora ña̱ ni̱ka̱ʼa̱n Jehová xíʼinra. Tiempo vitin tá násama na̱ ñuu Ndióxi̱ sava ña̱ʼa ta va̱ʼaní xíniso̱ʼo na̱ anciano ndiʼi ña̱ káʼa̱nna xíʼinna, saá kúú ña̱ náʼa̱na ña̱ va̱ʼaní ndíku̱nna yichi̱ ta̱ Gedeón (kaʼvi Hebreos 13:17). Tá kúú, tá ku̱i̱ya̱ 2014 na̱ Cuerpo Gobernante ni̱ka̱ʼa̱nna ndáa ki̱ʼva taxiyó xu̱ʼún ña̱ kuva̱ʼa veʼe nu̱ú ndásakáʼnuyó Ndióxi̱ xíʼin Salón ña̱ Asamblea (2 Cor. 8:12-14). Tá ya̱chi̱ na̱ ñuu Ndióxi̱ xi̱taxina xu̱ʼún ña̱ va̱ʼa kuva̱ʼa salón, soo tándi̱ʼi xi̱niñúʼu chaʼviyó ña̱yóʼo. Tiempo vitin na̱ ñuu Ndióxi̱ xíniñúʼuna xu̱ʼún ña̱ táxi na̱ congregación na̱ íyo iníísaá ñuyǐví ña̱ va̱ʼa ixava̱ʼana veʼe yóʼo, ni loʼo á ku̱a̱ʼá kúú xu̱ʼún ña̱ táxi na̱ hermano ñuu nu̱ú íyona kiviva kuva̱ʼa ña̱yóʼo. Tá ku̱nda̱a̱-ini iin ta̱ anciano ta̱ naní José xa̱ʼa̱ ña̱yóʼo ni̱xi̱ka loʼo inira, ta ni̱ka̱ʼa̱nra: “Sana kivi keʼéna ña̱yóʼo inka ñuu, soo ñuu nu̱ú íyoi̱ yóʼo kǒo kiviví keʼénaña. Ta nda̱a̱ ni iin salón nu̱ú ndákutáʼanyó va̱ása kuva̱ʼa”. Soo ta̱yóʼo xi̱niso̱ʼovara ña̱ ni̱ka̱ʼa̱n na̱ ñuu Ndióxi̱. ¿Nda̱chun? Ta̱yóʼo káchira: “Nda̱kaʼíi̱n ña̱ káʼa̱n Proverbios 3:5, 6, ña̱ xíniñúʼu kandíxai̱ ña̱ káʼa̱n Jehová xíʼi̱n ta xa̱ʼa̱ ña̱yóʼo ndiʼi ña̱ ke̱ʼéndi̱ va̱ʼaníva ka̱naña. Ku̱a̱ʼání veʼe nu̱ú ndásakáʼnuyó Ndióxi̱ i̱xava̱ʼandi̱. Soo saátu sa̱kúaʼandi̱ ña̱ xíniñúʼu taxindi̱ loʼo xu̱ʼún ña̱ kúúmiíndi̱ ña̱ va̱ʼa kuva̱ʼa ku̱a̱ʼáka ña̱yóʼo”.

13. a) ¿Ndáaña xi̱kandíxaní ta̱ Gedeón? b) ¿Ndáaña kivi keʼé na̱ anciano ña̱ va̱ʼa kundiku̱nna yichi̱ra? (Koto na̱ʼná).

¹³ Ndakú koo inindó ta keʼéndó ña̱ káʼa̱n Jehová xíʼinndó. Ni ni̱yi̱ʼvíní ta̱ Gedeón, ke̱ʼévara ña̱ ni̱ka̱ʼa̱n Jehová xíʼinra (Juec. 9:17). Tá ni̱ka̱ʼa̱n Jehová xíʼin ta̱ Gedeón ña̱ chindeétáʼanvara xíʼinra, ta̱yóʼo kǒo níxi̱kaka-inira ña̱ kuchiñuvara sáka̱kura na̱ ñuura. Na̱ anciano na̱ íyo ñuu nu̱ú kǒo xíínna taxina ndasakáʼnuyó Jehová íyona nda̱a̱ táki̱ʼva ni̱xi̱yo ta̱ Gedeón, saáchi kǒo yíʼvina ta ndákundeéna kéʼéna reunión ña̱ va̱ʼa ndakutáʼan na̱ hermano ta saátu ña̱ keena predicación. Ni kivi tiin na̱ chíñu na̱yóʼo ña̱ ku̱ʼu̱nna veʼeka̱a á tavánana nu̱ú káchíñuna á ña̱ ixandi̱va̱ʼana xíʼinna.c Tá ná koo ña̱ gran tribulación, na̱ anciano xíniñúʼu kuniso̱ʼona ña̱ ka̱ʼa̱n na̱ ñuu Ndióxi̱ xíʼinna ni sava yichi̱ i̱yo kuvina. Ta sana iin ña̱ ka̱ʼa̱n na̱ ñuu Ndióxi̱ xíʼinna keʼéna kúú, ña̱ kixáʼayó natúʼunyó xíʼin na̱ yiví ña̱ xa̱a̱ ku̱nu̱míní ndiʼi-xa̱ʼa̱na. Ta ña̱ ka̱ʼa̱nyó xíʼin na̱ yiví yóʼo kooña nda̱a̱ táki̱ʼva íyo ñíí náʼnu, á sanatu ka̱ʼa̱nna xíʼin na̱ anciano ndáaña kivi keʼéyó ña̱ va̱ʼa chise̱ʼéyó miíyó tá ná kixáʼa na̱ yiví xíʼin na̱ chíñu ixandi̱va̱ʼana xíʼinyó (Ezeq. 38:18; Apoc. 16:21).

TÁ ÍXAYO̱ʼVI̱ÑA XÍʼINYÓ NDAKÚ KOO INIYÓ

14. ¿Ama ni̱na̱ʼa̱ ta̱ Gedeón ña̱ ndakúníra?

¹⁴ Xa̱ʼa̱ ña̱ xi̱kuu ta̱ Gedeón juez ña̱ ñuu Israel, ku̱a̱ʼání ña̱ʼa xi̱xiniñúʼu keʼéra ta xi̱kunaáníra. Tá ñuú tá ni̱xa̱ʼa̱n ta̱ Gedeón ka̱nitáʼanra xíʼin na̱ Madián, na̱yóʼo xi̱nuna ku̱a̱ʼa̱nna ta ta̱yóʼo xi̱kundiku̱nra ku̱a̱ʼa̱nra sa̱tána. Ke̱era chí Jezreel ta ni̱xa̱a̱ra nda̱a̱ chí yu̱ta Jordán ta sana ni̱xi̱yoní tú iñú chí yuʼú yu̱ta yóʼo (Juec. 7:22). Tá saá, ¿ndáaña ke̱ʼéra? ¿Á va̱ása níxa̱ʼa̱nkara sa̱tána? Ni̱xa̱ʼa̱nvara sa̱tána. Ni ku̱naáníra xíʼin na̱ 300 ta̱a na̱ ku̱a̱ʼa̱n xíʼinra, nda̱kundeéna xi̱nuna ku̱a̱ʼa̱nna sa̱tá na̱ ñuu Madián ta ni̱ko̱so̱kavana tá yu̱ta Jordán ta nda̱ni̱ʼívana na̱yóʼo ta sa̱ndíʼi-xa̱ʼa̱nana (Juec. 8:4-12).

15. ¿Ndáaña kivi sakúnaá na̱ anciano?

¹⁵ Xa̱ʼa̱ ña̱ kíʼin na̱ anciano kuenta xíʼin na̱ congregación ta ndáana na̱ veʼena, kivi kunaánína. Tá saá ndóʼo na̱ anciano, ¿ndáa ki̱ʼva kundiku̱nna yichi̱ ta̱ Gedeón?

16, 17. a) ¿Ndáaña chi̱ndeétáʼan xíʼin ta̱ Gedeón ña̱ ku̱ndeé-inira? b) ¿Ndáaña kivi kandíxa na̱ anciano? (Isaías 40:28-31; koto na̱ʼná).

¹⁶ Ndóʼó na̱ anciano, kǒo kaka-inindó ña̱ chindeétáʼan Jehová xíʼinndó. Chi ña̱yóʼo kúú ña̱ ke̱ʼé ta̱ Gedeón ta chi̱ndeétáʼanva Jehová xíʼinra (Juec. 6:14, 34). Iin yichi̱ u̱vi̱ na̱ rey na̱ ñuu Madián nándosóna sa̱tá camello saáchi na̱ xínu ku̱a̱ʼa̱n kúúna nu̱ú ta̱ Gedeón, soo ta̱ Gedeón xíʼin na̱ ta̱a kítáʼan xíʼinra ki̱xáʼana xínuna ku̱a̱ʼa̱nna sa̱tá na̱yóʼo (Juec. 8:12, 21). Soo Jehová chi̱ndeétáʼanra xíʼin ta̱ Gedeón xíʼin na̱ kítáʼan xíʼinra ta ku̱chiñuna ni̱ni̱ʼína na̱yóʼo ta xa̱ʼnínana. Saátu ndóʼó na̱ anciano, kivi kandíxandó ña̱ mií Jehová taxi ndee̱ ndaʼa̱ndó, saáchi kǒo kúnaára ta miíra taxi ndee̱ ña̱ xíniñúʼundó (kaʼvi Isaías 40:28-31).d

¹⁷ Ná ka̱ʼa̱nyó xa̱ʼa̱ ña̱ ndo̱ʼo ta̱ Matthew, ta̱yóʼo ndíkaa̱ra ti̱xin na̱ Comité na̱ nátúʼun xíʼin na̱ Hospital. ¿Ndáaña chíndeétáʼan xíʼinra ña̱ kundeé-inira? Ta̱yóʼo káchira: “Xa̱a̱ kíʼi̱n kuenta ña̱ ndixaní kúú ña̱ káʼa̱n Filipenses 4:13. Saáchi tá xa̱a̱ kúnaaníi̱ tá kǒoka ndeéi̱, káʼi̱n xíʼin Jehová ná chindeétáʼanra xíʼi̱n ña̱ va̱ʼa ndakundeíi̱ chindeétáʼi̱n xíʼin na̱ hermano. Tá xa̱a̱ ndíʼi káʼi̱n xíʼin Jehová, kíʼi̱n kuenta ña̱ miíra táxi ndee̱ ndaʼíi̱”. Nda̱a̱ táki̱ʼva ke̱ʼé ta̱ Gedeón saá kéʼé na̱ anciano na̱ íyo tiempo vitin. Ni kúnaánína á ni yáʼana nu̱ú tu̱ndóʼo, soo ni saá chíka̱a̱ní na̱yóʼo ndee̱ ña̱ chindeétáʼanna xíʼin na̱ congregación. Soo ndóʼó na̱ anciano, vitá koo inindó ta ndakunindó ña̱ sava yichi̱ xa̱ʼa̱ ña̱ kúnaáníndó kǒo kivi keʼéndó ku̱a̱ʼání ña̱ʼa xa̱ʼa̱ na̱ hermano, soo ndakundeéndó kandíxandó Jehová saáchi miíra taxivara ndee̱ ndaʼa̱ndó (Sal. 116:1; Filip. 2:13).

18. ¿Ndáa ki̱ʼva kundiku̱n na̱ anciano yichi̱ ta̱ Gedeón?

¹⁸ Nda̱a̱ táki̱ʼva xi̱toyó, na̱ anciano kivi sákuaʼana ku̱a̱ʼání ña̱ʼa xíʼin ña̱ ke̱ʼé ta̱ Gedeón. Xíniñúʼu ndakunina ña̱ su̱ví ndiʼi tiempo kivi keʼéna ndiʼi chiñu. Saátu xíniñúʼu vitá koo inina tá káʼa̱n va̱ʼana xa̱ʼa̱na ta saátu tá káʼa̱nna ña̱ va̱ása va̱ʼa xa̱ʼa̱na. Ta xíniñúʼu kuniso̱ʼona ta keʼéna ña̱ káʼa̱n na̱ ñuu Jehová ta ndakú koo inina. Ndáyáʼviní keʼéna ña̱yóʼo vitin saáchi xa̱a̱ ku̱nu̱míní kixaa̱ ki̱vi̱ Jehová. Ta kǒo xíniñúʼu kaka-inina ña̱ mií Jehová taxi ndee̱ ndaʼa̱na ña̱ kundeé-inina. Ndiʼiyó chíndayáʼviníyó chiñu ña̱ kéʼé na̱ anciano saáchi va̱ʼaní íyo ña̱ kéʼéna (Filip. 2:29).