Sakuaʼaka ña̱ va̱ʼa sanáʼa̱kaún: kaʼvi xíʼin na̱ yiví chí yéʼéna xíʼin folleto Ndióxi̱ káʼa̱nra tu̱ʼun va̱ʼa xíʼinyó
¿Nda̱chun xíniñúʼu sakuaʼayó? Xíniñúʼu sakuaʼayó ña̱ va̱ʼa sanáʼa̱ viíyó na̱ yiví xa̱ʼa Ndióxi̱ (Mat. 28:19, 20). Ndiʼiyó va̱ʼa sakuaʼayó ña̱ sánáʼa̱ viíyó na̱ yiví tá kéʼéyó ña̱ káʼa̱n na̱ ñuu Ndióxi̱ xíʼinyó. Iin tutu ña̱ kivi chindeé táʼan xíʼinyó kúú folleto Ndióxi̱ káʼa̱nra tu̱ʼun va̱ʼa xíʼinyó. Kivi kuniñúʼuyóña ña̱ kixaʼáyó kaʼviyó xíʼin na̱ yiví chí yéʼéna ña̱ yichi̱ nu̱ú.
Keʼé ña̱yóʼo yo̱o̱ yóʼo:
Keʼé oración nu̱ú Jehová ña̱ ná chindeéra yóʼó ña̱ kusi̱í-iniún kaʼviún xíʼin iinna. Ka̱ʼa̱n xíʼinra ña̱ ná chindeéra yóʼó ña̱ ndani̱ʼún iinna kaʼviún xíʼin, ta ná chindeéra yóʼó ña̱ sanáʼa̱ viíúnna (Filip. 2:13).
Tá káʼvindó xíʼin na̱ veʼendó á tá kaʼvi mitúʼun miíndó xa̱kaʼvi kueendó ndáaña ka̱ʼa̱nndó tá ku̱ʼu̱nndó veʼe tá veʼe na̱ yiví. Tasaá kúú ña̱ va̱ása yo̱ʼvi̱ka kooña nu̱úndó ña̱ kixaʼándó kaʼvindó xíʼin na̱ yiví chí yéʼéna.