Ña̱ tási xíʼin ña̱ tu̱ʼva ña̱ vǎʼá á ña̱ ni̱kuu kúú ña̱yóʼo

Ra̱ Ndiva̱ʼa kúni̱ra ná kuniñúʼuyó ña̱ tási. Ku̱a̱ʼání na̱ yiví ndákuatuna á káʼa̱na xíʼin na̱ ni̱xi̱ʼi̱ ña̱ ná va̱ása saxuʼvi-ñaʼána. Kéʼéna ña̱yóʼo chi yíʼvi̱nína nu̱ú na̱ ni̱xi̱ʼi̱. Xíniñúʼuna ku̱a̱ʼání ña̱ʼa á katúntuna yiʼva ndaʼána á su̱kúna, ña̱ va̱ʼa chindiéña na, ta tíʼvíndi̱a̱ñaʼána xíʼin ita ta xíʼin ndi̱ví ña̱ va̱ʼa kunu kue̱ʼe̱ nu̱úna. Sava na̱ yiví chíseʼena ña̱ʼa ti̱xin veʼena ta ndákuatuna xíʼiña, ña̱ va̱ʼa ná kundiaaña miína. Íyotu na̱ xíniñúʼu ta̱tán ña̱ íxatu̱ʼvana xíʼin, ña̱ va̱ʼa ná xikóna ña̱ʼana, ta ta̱tán yóʼo su̱ví ta̱tán ña̱ nda̱a̱ kúúña, á savatuna íxatásina xíʼin ñaʼá ñá kútóona.

Ña̱ va̱ʼa ka̱kuyó nu̱ú ra̱ Ndiva̱ʼa xíniñúʼu kutáʼan va̱ʼayó xíʼin Jehová. Jehová xíʼin na̱ ángelra, íyoníka ndieéna nu̱ú ra̱ Ndiva̱ʼa xíʼin na̱ tachí ndiva̱ʼa ítáʼan xíʼin ra (Santiago 2:19; Revelación 12:9). Jehová kúni̱níra kuniñúʼura ndieéra ña̱ chindieéra na̱ ítáʼan va̱ʼa xíʼin ra, ndiʼi na̱ xíka nda̱kú xíʼinra chíndieéra (2 Crónicas 16:9).

Tu̱ʼun Ndióxi̱ káʼa̱n ña: ‘Va̱ása va̱ʼa kuniñúʼundó ña̱ tu̱ʼvaʼ. Jehová kúndasínu̱úra ña̱ tu̱ʼva xíʼin ña̱ tási, chi ña̱yóʼo sandakavaña miíyó ndaʼá ra̱ Ndiva̱ʼa á Diablo (Levítico 19:26).