Viíní kaʼviún

1 Timoteo 4:13

Nda̱a̱ táki̱ʼva ni̱ka̱ʼyi̱ña saá kaʼviúnña.

NDÁA KI̱ʼVA KEʼÚNÑA:

• Viíní sákuaʼúnña. Ndakanixi̱ní ndáa xa̱ʼa kúú ña̱ ni̱ka̱ʼyi̱ texto ña̱ káʼviún. Tá sákuaʼúnña, ku̱a̱ʼá tu̱ʼun sákitáʼún kaʼviún, va̱ása kaʼviún iinlá iinláña. Kiʼún kuenta ña̱ va̱ʼa ná kǒo ndachinúukaún tu̱ʼun ka̱ʼún, á ña̱ kindaúnña á nasamaúnña xíʼin inkaña. Kiʼún kuenta xíʼin coma, punto á inkaka ña̱ʼa ña̱ kúúmiíña.

• Viíní ka̱ʼún tá iin iin tu̱ʼun. Tá va̱ása kúnda̱a̱-iniún nda̱saa ka̱ʼún xíʼin iin tu̱ʼun, nandukúña nu̱ú diccionario, á kuniso̱ʼo nda̱saa káʼvinaña ti̱xin grabación, á kivitu ka̱ʼún xíʼin iin na̱ xíni va̱ʼa kaʼvi ná chindeétáʼanna xíʼún.

• Káxiní ka̱ʼún. Viíní ka̱ʼún tu̱ʼun ña̱ káʼviún, ndaniʼi nu̱ún ta kuná va̱ʼún yuʼún tá káʼviún. Chika̱ún ndée ña̱ vií va̱ʼa kaʼviún tá iin iin sílaba.