LECCIÓN 11

Xíʼin ña̱ si̱í-ini ka̱ʼún

Romanos 12:11

Xíʼin ña̱ si̱í-ini ka̱ʼún ña̱kán va̱ʼa ná chindeétáʼanña xíʼin na̱ káʼún xíʼin.

Xa̱a̱ ya̱chi̱ka̱ kaʼviún ña̱ ka̱ʼún xa̱ʼa xíʼinna. Tá sákuaʼún xa̱ʼa ña̱ ka̱ʼún xíʼinna, ndakanixi̱ní ndáa xa̱ʼa kúú ña̱ ndáyáʼviña. Nandukú va̱ʼún xa̱ʼaña ña̱ va̱ʼa káxí ka̱ʼún xíʼinna xa̱ʼaña.
Ndakanixi̱ní xa̱ʼa na̱ xíniso̱ʼo ña̱ káʼún. Ndakanixi̱ní nda̱saa kunina xíʼin ña̱ ka̱ʼún xíʼinna á ña̱ kaʼviún nu̱úna. Ndakanixi̱ní nda̱saa kivi ka̱ʼún xíʼinna ña̱ va̱ʼa ná kunda̱a̱ va̱ʼaka inina xíʼin ña̱ kúni̱ún sanáʼúnna, tasaá chindayáʼvikanaña.
Livi va̱ʼa ná koo ña̱ ka̱ʼún xíʼinna. Xíʼin ña̱ si̱í-ini ka̱ʼún xíʼinna. Na̱ʼa̱ xíʼin nu̱ún ta saátu xíʼin ña̱ kánda̱ ndaʼún ña̱ xíʼin ndinuʼu-iniún káʼún xíʼinna.

Va̱ása inkáchi keʼún ndiʼi yichi̱ ña̱ káʼún xíʼinna, ña̱kán va̱ʼa kuniso̱ʼona yóʼó. Xa̱a̱ síín síín keʼún tá iin iin yichi̱, soo kiʼin va̱ʼún kuenta ña̱ ná kitáʼanña xíʼin ña̱ káʼún xa̱ʼa xíʼinna. Tá káʼún xíʼinna xa̱ʼa mií ña̱ ndáyáʼvi va̱ʼaka á xa̱ʼa iin ña̱ʼa ña̱ kivi keʼéna, saá kúúña xíniñúʼuníka ka̱ʼún xíʼinna xíʼin ña̱ si̱í-ini. Tá ku̱a̱ʼání tiempo ná ka̱ʼún xíʼinna xíʼin ña̱ si̱í-ini sana kuxúxanvana nu̱ún.