APÉNDICE 1

Sava ña̱ va̱xi nu̱ú Biblia ña̱ kútóoníyó sanáʼa̱yó na̱ yiví

Ta̱ Jesús ni̱ka̱ʼa̱nra ña̱ na̱ yiví na̱ ndixa kúni̱ sakúaʼa xa̱ʼa̱ Ndióxi̱ ndani̱ʼívana ña̱ nda̱a̱ (Juan 10:4, 27). Ña̱kán tá nátúʼunyó xíʼin na̱ yiví xa̱ʼa̱ Ndióxi̱ chíka̱a̱yó ndee̱ ña̱ va̱ása yo̱ʼvi̱ní koo ña̱ ka̱ʼa̱nyó xíʼinna. Tá iinna ni̱ka̱ʼa̱nna xíʼinyó ña̱ ni̱xi̱ʼi̱ iin na̱ veʼena á ndíʼi̱-inina xa̱ʼa̱ ña̱ va̱ása va̱ʼa kúu tiempo vitin, kivi nda̱ka̱tu̱ʼunyóna: “¿Á xa̱a̱ xíni̱ún ña̱ ndataku na̱ ni̱xi̱ʼi̱?”, “¿á xa̱a̱ xíniso̱ʼún ña̱ sandíʼi-xa̱ʼa̱ Ndióxi̱ na̱ yiví na̱ kéʼé ña̱ va̱ása va̱ʼa?”. Tándi̱ʼi ke̱ʼéyó pregunta yóʼo ná ka̱ʼa̱nyó xa̱ʼa̱ iin ña̱ va̱xi nu̱ú Biblia. Ta saátu ná kaʼviyó iin texto ña̱ káʼa̱n xa̱ʼa̱ pregunta ña̱ ke̱ʼéyó xíʼinna. Tá va̱ása yo̱ʼvi̱ káʼa̱nyó xíʼin na̱ yiví xa̱ʼa̱ ña̱ va̱xi nu̱ú tu̱ʼun Ndióxi̱, va̱ʼaní kunda̱a̱-inina xíʼinña. Ta nda̱a̱ táki̱ʼva íyo ña̱ chiʼiyó iin si̱ʼva loʼo níma̱na saá íyoña. Ta mií Ndióxi̱ kivi sákuaʼnu ña̱yóʼo (1 Cor. 3:6, 7).

Ku̱a̱ʼá na̱ yiví íyona ñuyǐví xa̱á ta kúsi̱íní-inina.

ÑA̱ KOO CHÍ NU̱ÚNÍNU

1. ¿Á xa̱a̱ xíni̱ún ña̱ si̱lóʼoní kúma̱ní tasaá nasama Ndióxi̱ ña̱ kúu nu̱ú ñuʼú yóʼo? (Mat. 24:3, 7, 8; Luc. 21:10, 11; 2 Tim. 3:1-5).
2. ¿Á xa̱a̱ xíni̱ún ña̱ va̱ása ndiʼi-xa̱ʼa̱ ñuʼú yóʼo? (Sal. 104:5; Ecl. 1:4).
3. ¿Á xa̱a̱ xíni̱ún ña̱ ndasavií Ndióxi̱ ndiʼi ña̱ va̱ása va̱ʼa ke̱ʼéna xíʼin ñuʼú yóʼo? (Is. 35:1, 2; Apoc. 11:18).
4. ¿Á xa̱a̱ xíni̱ún ña̱ kǒoka kue̱ʼe̱ kuumiíyó? (Is. 33:24; 35:5, 6).
5. ¿Á xa̱a̱ xíni̱ún ña̱ kivi kutakún ndiʼi saá tiempo nu̱ú ñuyǐví xa̱á? (Sal. 37:29; Mat. 5:5).

Iin na̱ familia kúsi̱íní-inina nátúʼun xíʼin táʼanna.

NA̱ VEʼEYÓ

6. ¿Á xa̱a̱ xíni̱ún ña̱ ta̱ xa̱a̱ ti̱ndaʼa̱ xíniñúʼu kuʼvi̱-inira kunira ñá síʼira nda̱a̱ táki̱ʼva kúʼvi̱-inira xínira miíra? (Efes. 5:33; Col. 3:19).
7. ¿Á xa̱a̱ xíni̱ún ña̱ xíniñúʼu ixato̱ʼó ñá ti̱ndaʼa̱ yiíñá? (Efes. 5:33; Col. 3:18).
8. ¿Á xa̱a̱ xíni̱ún ña̱ na̱ ti̱ndaʼa̱ kǒo xíniñúʼu sandáʼvi-táʼanna? (Mal. 2:16; Mat. 19:4-6, 9; Heb. 13:4).
9. ¿Á xa̱a̱ xíni̱ún ña̱ na̱ va̱lí na̱ kándíxa ña̱ káʼa̱n yivá-siʼína kǒo tu̱ndóʼo kixi nu̱úna? (Prov. 1:8, 9; Efes. 6:1-3).

NDIÓXI̱

10. ¿Á xa̱a̱ xíni̱ún ña̱ íyova ki̱vi̱ Ndióxi̱? (Sal. 83:18; Jer. 10:10).
11. ¿Á xa̱a̱ xíni̱ún ña̱ íyo iin ña̱ ndáyáʼviní kúni̱ Ndióxi̱ kunda̱a̱-iniyó xa̱ʼa̱? (2 Tim. 3:16, 17; 2 Ped. 1:20, 21).
12. ¿Á xa̱a̱ xíni̱ún ña̱ nda̱kúní íyo ini Ndióxi̱ ta kǒo ndáka̱xinra na̱ yiví? (Deut. 10:17; Hech. 10:34, 35).
13. ¿Á xa̱a̱ xíni̱ún ña̱ Ndióxi̱ kúni̱ra chindeétáʼanra xíʼinyó? (Sal. 46:1; 145:18, 19).

ÑA̱ ORACIÓN

14. ¿Á xa̱a̱ xíni̱ún ña̱ Ndióxi̱ kúni̱ra ña̱ ka̱ʼa̱nyó xíʼinra? (Sal. 62:8; 65:2; 1 Ped. 5:7).
15. ¿Á xa̱a̱ xíni̱ún ña̱ Biblia sána̱ʼa̱ña miíyó ndáa ki̱ʼva ka̱ʼa̱nyó xíʼin Ndióxi̱? (Mat. 6:7-13; Luc. 11:1-4).
16. ¿Á xa̱a̱ xíni̱ún ña̱ ndiʼi ki̱vi̱ xíniñúʼu ka̱ʼa̱nyó xíʼin Ndióxi̱? (Mat. 7:7, 8; 1 Tes. 5:17).

TA̱ JESÚS

17. ¿Á xa̱a̱ xíni̱ún ña̱ va̱ʼaní sa̱náʼa̱ ta̱ Jesús ta ndiʼi consejo ña̱ ni̱ka̱ʼa̱nra va̱ʼaní chíndeétáʼanña xíʼinyó? (Mat. 6:14, 15, 34; 7:12).
18. ¿Á xa̱a̱ xíni̱ún ña̱ ta̱ Jesús ni̱ka̱ʼa̱nra xa̱ʼa̱ ña̱ xítoyó kúu tiempo vitin? (Mat. 24:3, 7, 8, 14; Luc. 21:10, 11).
19. ¿Á xa̱a̱ xíni̱ún ña̱ se̱ʼe Ndióxi̱ kúú ta̱ Jesús? (Mat. 16:16; Juan 3:16; 1 Juan 4:15).
20. ¿Á xa̱a̱ xíni̱ún ña̱ su̱ví Ndióxi̱ kúú ta̱ Jesús? (Juan 14:28; 1 Cor. 11:3).

REINO NDIÓXI̱

21. ¿Á xa̱a̱ xíni̱ún ña̱ Reino Ndióxi̱ íyoña chí ndiví? (Dan. 2:44; 7:13, 14; Mat. 6:9, 10; Apoc. 11:15).
22. ¿Á xa̱a̱ xíni̱ún ña̱ Reino Ndióxi̱ sandíʼi-xa̱ʼa̱ña ndiʼi na̱ chíñu na̱ íyo nu̱ú ñuʼú yóʼo? (Sal. 2:7-9; Dan. 2:44).
23. ¿Á xa̱a̱ xíni̱ún ña̱ iinlá Reino Ndióxi̱ kivi ndasavií ndiʼi tu̱ndóʼo ña̱ íyo nu̱ú ñuʼú yóʼo? (Sal. 37:10, 11; 46:9; Is. 65:21-23).

Iin na̱ matrimonio kúsuchíní-inina xítona se̱ʼena ña̱ ndíka̱a̱ra hospital.

ÑA̱ XÓʼVI̱YÓ

24. ¿Á xa̱a̱ xíni̱ún ña̱ su̱ví ku̱a̱chi Ndióxi̱ kúú ña̱ xóʼvi̱yó? (Deut. 32:4; Sant. 1:13).
25. ¿Á xa̱a̱ xíni̱ún ña̱ ta̱ Ndi̱va̱ʼa kúú ta̱ xáʼndachíñu ñuyǐví yóʼo? (Luc. 4:5, 6; 1 Juan 5:19).
26. ¿Á xa̱a̱ xíni̱ún ña̱ Ndióxi̱ xítora ña̱ xóʼvi̱ún ta kúni̱ra chindeétáʼanra xíʼún? (Sal. 34:17-19; Is. 41:10, 13).
27. ¿Á xa̱a̱ xíni̱ún ña̱ xa̱a̱ ku̱nu̱mí sandíʼi-xa̱ʼa̱ Ndióxi̱ ña̱ sáxo̱ʼvi miíyó? (Is. 65:17; Apoc. 21:3, 4).

Iin na̱ matrimonio xákuna nu̱ú ni̱nduxu̱n na̱ veʼena.

ÑA̱ XÍʼI̱ NA̱ YIVÍ

28. ¿Á xa̱a̱ xíni̱ún ña̱ na̱ ni̱xi̱ʼi̱ kǒoka ña̱ xínitúni̱na ta kǒo xóʼvi̱kana? (Ecl. 9:5; Juan 11:11-14).
29. ¿Á xa̱a̱ xíni̱ún ña̱ na̱ ni̱xi̱ʼi̱ kǒo kivi chindeétáʼanna xíʼinyó ni ña̱ ixandiva̱ʼana xíʼinyó? (Sal. 146:4; Ecl. 9:6, 10).
30. ¿Á xa̱a̱ xíni̱ún ña̱ na̱ veʼeyó na̱ xa̱a̱ ni̱xi̱ʼi̱ ndatakuvana? (Job 14:13-15; Juan 5:28, 29; Hech. 24:15).
31. ¿Á xa̱a̱ xíni̱ún ña̱ “va̱ása kuvika” na̱ yiví? (Apoc. 21:3, 4; Is. 25:8).

RELIGIÓN

32. ¿Á xa̱a̱ xíni̱ún ña̱ su̱ví ndiʼi religión va̱ʼa nu̱ú Ndióxi̱? (Jer. 7:11; Mat. 7:13, 14, 21-23).
33. ¿Á xa̱a̱ xíni̱ún ña̱ Ndióxi̱ kúndasíra xínira religión na̱ sándaʼvi na̱ yiví? (Is. 29:13; Miq. 3:11; Mar. 7:6-8).
34. ¿Á xa̱a̱ xíni̱ún ña̱ na̱ ndixa ndásakáʼnu Ndióxi̱ kúʼvi̱-inina xínitáʼanna? (Miq. 4:3; Juan 13:34, 35).