LECCIÓN 6

Viíní ndakaniún texto ña̱ káʼviún nu̱úna

Juan 10:33-36

Va̱ása kaʼvi kuitíún iin texto nu̱úna, ta ndi̱ku̱n kixaʼún ka̱ʼún xíʼinna xa̱ʼa inka ña̱ʼa. Chindeétáʼan xíʼin na̱ xíniso̱ʼo yóʼó, ná kunda̱a̱ va̱ʼa inina ndáa ki̱ʼva kítáʼan texto ña̱ káʼviún nu̱úna xíʼin ña̱ káʼún xa̱ʼa xíʼinna.

NDÁA KI̱ʼVA KEʼÚNÑA:

Ndaka̱xin tu̱ʼun ña̱ ndáyáʼvi va̱ʼaka. Tándi̱ʼi ka̱ʼviún iin texto, na̱ʼa̱ nu̱úna ndáa tu̱ʼun kúú ña̱ ndáyáʼvi va̱ʼaka kúni̱ún kunda̱a̱-inina xa̱ʼa. Iin ña̱ kivi keʼún kúúña ndandikó tukún kaʼviún tu̱ʼun ña̱ kúni̱ún kunda̱a̱-inina, á kivitu keʼún iin pregunta xíʼinna ña̱ va̱ʼa kunina ndáa tu̱ʼun kúú ña̱ kúni̱ún kunda̱a̱-inina xa̱ʼa.

Tá xíniñúʼún inkaka tu̱ʼun ña̱ va̱ʼa ka̱ʼún xíʼinna xa̱ʼa texto ña̱ ka̱ʼviún nu̱úna, ná kooña tu̱ʼun ña̱ kivi kunda̱a̱-inina xíʼin, ta ná kunina ña̱ kítáʼanña xíʼin ña̱ va̱xi nu̱ú texto.
Na̱ʼa̱ nu̱úna ndáa ña̱ʼa kúú ña̱ kúni̱ún ndakaʼánna xa̱ʼa. Tá kúni̱ún kaʼviún iin texto nu̱úna xa̱ʼa iin ña̱ʼa ña̱ káʼún xa̱ʼa xíʼinna, ka̱ʼa̱n xíʼinna ndáa tu̱ʼun ña̱ va̱xi nu̱úña kúú ña̱ kítáʼanka xíʼin ña̱ káʼún xa̱ʼa.

Tá natúʼun xíʼinna xa̱ʼa iin texto ña̱ ka̱ʼviún nu̱úna, va̱ása ndakasiún ña̱ texto yóʼo, ña̱yóʼo chindeétáʼanña xíʼinna ña̱ va̱ʼaka kunda̱a̱-inina ndáa ki̱ʼva kítáʼan ña̱ káʼún xa̱ʼa xíʼinna xíʼin ña̱ va̱xi nu̱ú Biblia.
Va̱ása yo̱ʼvi̱ ka̱ʼún xíʼinna. Va̱ása ka̱ʼún xíʼinna xa̱ʼa inkaka ña̱ʼa ña̱ va̱ása kítáʼan xíʼin ña̱ kúni̱ún kunda̱a̱-inina xa̱ʼa. Koto á xa̱a̱ xíni̱na sava ña̱ʼa xa̱ʼa tema ña̱ kúni̱ún ka̱ʼún xíʼinna, ta ndáa xa̱ʼa kúú ña̱ ndáyáʼvíní ña̱yóʼo. Tasaá kivi ndaka̱xiún ndáa ña̱ʼa kúú ña̱ kivi ka̱ʼún xa̱ʼa xíʼinna ña̱ va̱ʼaka kunda̱a̱-inina.