Kivi xa̱ún koún migo Jehová

Jehová kúni̱ra ña̱ ná kunda̱a̱-iniún xa̱ʼa̱ra. ¿Nda̱chun? Saáchi Ndióxi̱ kúnda̱a̱-inira tá ná kunda̱a̱-iniún xa̱ʼa̱ ña̱ va̱ʼa ña̱ kúúmiíra xíʼin ki̱ʼva ña̱ kéʼéra ndiʼi ña̱ʼa ta saátu ña̱ keʼéra chí nu̱únínu, kuni̱kaún koún migora. Soo, ¿á ndixa kivi kooyó migo Ndióxi̱? (Kaʼvi Salmo 25:​14). ¿Ndáaña kivi keʼún ña̱ va̱ʼa koún migora? Ña̱ Biblia chíndeétáʼanña xíʼinyó ña̱ kunda̱a̱-iniyó xa̱ʼa̱ ña̱ pregunta yóʼo, ta saátu káʼa̱nña xíʼinyó ña̱ iin ña̱ ndáyáʼviní kúú ña̱ vií kitáʼanyó xíʼin Jehová.

1. ¿Ndáaña káʼa̱n Jehová xíʼún keʼún?

“Kuyatinndó nu̱ú Ndióxi̱ ta ta̱kán kuyatinra nu̱úndó” (Santiago 4:8). ¿Ndáaña kúni̱ kachi tu̱ʼun yóʼo? Jehová káʼa̱nra xíʼún ña̱ ná xa̱ún koún migora. Savana íxayo̱ʼvi̱ña xíʼinna ña̱ xa̱a̱na koona migo iin na̱ kǒo kívi kunina, tá kúú ña̱ koona migo Ndióxi̱ saáchi kǒo kívi kuninara. Soo ta̱xira tu̱ʼunra ña̱ Biblia ndaʼa̱yó, ta nu̱ú ña̱yóʼo va̱xi ña̱ káʼa̱n xa̱ʼa̱ ña̱ va̱ʼa ña̱ kúúmiíra ña̱ kivi chindeétáʼan xíʼinyó ña̱ kuyatinyó nu̱úra. Tá káʼviyó nu̱ú Biblia ña̱ kúni̱ Ndióxi̱ ná kunda̱a̱-iniyó xa̱ʼa̱, saá ndúndakúka ña̱ kítáʼanyó xíʼinra ni va̱ása kívi kuniyóra.

2. ¿Nda̱chun iinlá Jehová kúú ta̱ kivi va̱ʼaní koo migoún?

Iinlá Jehová kúú ta̱ kúʼvi̱níka-ini xíni yóʼó. Kúni̱ra ña̱ si̱í ná koún ta kúni̱ra ña̱ ná ka̱ʼún xíʼinra ña̱ chindeétáʼanra xíʼún. Kivi sandákoún ndiʼi ña̱ sándi̱ʼi̱-iniún ndaʼa̱ra chi ta̱kán ndíʼi̱-inira xa̱ʼún (1 Pedro 5:7). Jehová ndiʼi tiempo íyo tu̱ʼvara ña̱ chindeétáʼanra xíʼin na̱ migora, ña̱ sandíkora-inina ta saátu ña̱ kuniso̱ʼora ña̱ káʼa̱nna (kaʼvi Salmo 94:​18, 19).

3. ¿Ndáaña ndátu Jehová ná keʼé na̱ kúú migora?

Jehová kúʼvi̱-inira xínira ndiʼi na̱ yiví, soo viíka kítáʼanra xíʼin na̱ kéʼé ña̱ nda̱kú (Proverbios 3:​32). Jehová kúni̱ra ña̱ ná chika̱a̱ na̱ kúú migora ndee̱ ña̱ keʼéna ña̱ va̱ʼa ña̱ kútóora, ta saátu ña̱ ná kǒo keʼéna ña̱ʼa ña̱ va̱ása kútóora. Savana ndákanixi̱nína ña̱ va̱ása kuchiñuna keʼéna nda̱a̱ táki̱ʼva kúni̱ Jehová, soo kúnda̱a̱-inira xíʼin ña̱ ndóʼona, xa̱ʼa̱ ña̱ kúʼvi̱-inina xíninara táxira ña̱ ná kutáʼanna xíʼinra saáchi chíka̱a̱na ndee̱ ña̱ sakúsi̱ína-inira (Salmo 147:​11; Hechos 10:​34, 35).

NÁ SAKUAʼAKAYÓ XA̱ʼA̱ÑA

4. Ta̱ Abrahán xi̱kuura migo Jehová

Ña̱ va̱xi nu̱ú Biblia ña̱ nátúʼun xa̱ʼa̱ ta̱ Abrahán (ta saátu xi̱naníra Abrán) náʼa̱ña nu̱úyó ndáaña xíniñúʼu keʼéyó ña̱ va̱ʼa kooyó migo Ndióxi̱. Kaʼvindó ña̱ káʼa̱n xa̱ʼa̱ ta̱ Abrahán ña̱ va̱xi nu̱ú Génesis 12:​1-4 ta ka̱ʼa̱nndó xa̱ʼa̱ ña̱yóʼo:

• ¿Ndáaña ndu̱kú Jehová nu̱ú ta̱ Abrahán?

• ¿Ndáaña ni̱ka̱ʼa̱n Jehová taxira ndaʼa̱ra?

• ¿Ndáaña ke̱ʼé ta̱ Abrahán tándi̱ʼi ni̱ka̱ʼa̱n Jehová xíʼinra xa̱ʼa̱ ña̱ xíniñúʼu keʼéra?

5. Ña̱ kúni̱ Jehová ná keʼé na̱ kúú migora

Sava yichi̱ ndátuyó ña̱ ná keʼé na̱ migoyó sava ña̱ʼa.

• ¿Ndáaña kúni̱ún ná keʼé na̱ migoún?

Kaʼvindó 1 Juan 5:3 ta ka̱ʼa̱nndó xa̱ʼa̱ ña̱yóʼo:

• ¿Ndáaña kúni̱ Jehová ná keʼé na̱ migora?

Ña̱ va̱ʼa kuniso̱ʼoyó ña̱ káʼa̱n Jehová xíniñúʼu nasamayó ña̱ kéʼéyó ta saátu ki̱ʼva ña̱ íyoyó. Kaʼvindó Isaías 48:​17, 18 ta ka̱ʼa̱nndó xa̱ʼa̱ ña̱yóʼo:

• ¿Nda̱chun káʼa̱n Jehová xíʼin na̱ migora ña̱ ná nasamana ña̱ kéʼéna?

6. Ña̱ kéʼé Jehová xa̱ʼa̱ na̱ migora

VIDEO: Jehová sa̱kákura yi̱ʼi̱ (3:​20)

• ¿Ndáaña ke̱ʼé Jehová ña̱ va̱ʼa chindeétáʼanra xíʼin ñá ñaʼá ñá xi̱toyó nu̱ú video ña̱ va̱ása ndakanikaxi̱níñá xa̱ʼa̱ ña̱ ndo̱ʼoñá?

Kaʼvindó Isaías 41:​10, 13 ta ka̱ʼa̱nndó xa̱ʼa̱ ña̱yóʼo:

• ¿Ndáaña káʼa̱n Jehová keʼéra xa̱ʼa̱ ndiʼi na̱ migora?

• ¿Á kándíxaún ña̱ kivi va̱ʼaní xa̱ún kitaún xíʼin Jehová? Ta, ¿nda̱chun?

7. Ña̱ va̱ʼa kitáʼanyó xíʼin Jehová ndáyáʼviní ña̱ ka̱ʼa̱nyó xíʼinra

Va̱ʼaníka xáa̱yó kítáʼanyó xíʼin na̱ migoyó tá nátúʼunyó xíʼinna. Kaʼvindó Salmo 86:6, 11 ta ka̱ʼa̱nndó xa̱ʼa̱ ña̱yóʼo:

• ¿Ndáa ki̱ʼva kivi ka̱ʼa̱nyó xíʼin Jehová?

• ¿Ndáa ki̱ʼva káʼa̱n Jehová xíʼinyó?

ÑA̱ XA̱A̱ SA̱KUAʼAYÓ

Jehová kúni̱ra koora migoún ta chindeétáʼanra xíʼún ña̱ va̱ʼa kuyatiún nu̱úra.

Ná ndakaʼányó xa̱ʼa̱ ña̱yóʼo

• ¿Ndáa ki̱ʼva chíndeétáʼan Jehová xíʼin na̱ migora?

• ¿Nda̱chun káʼa̱n Jehová xíʼin na̱ migora ña̱ ná nasamana ña̱ kéʼéna?

• ¿Á túviún ña̱ yo̱ʼvi̱ní xa̱a̱yó kooyó migo Jehová? ¿Nda̱chun ndákanixi̱níún saá?

NANDUKÚKA XA̱ʼA̱ÑA

¿Ndáaña va̱ʼa ndakiʼún tá ná xa̱ún koún migo Ndióxi̱?

“Ndáyáʼviní ña̱ kuxini̱yó Jehová Ndióxi̱” (La Atalaya, 15 tí febrero ku̱i̱ya̱ 2003)

Sakuaʼa ña̱ vií kutáʼún xíʼin Ndióxi̱.

“¿Ndáa ki̱ʼva kivi xa̱i̱ koi̱ migo Ndióxi̱?” (Lo que los jóvenes preguntan. Respuestas prácticas, volumen 2, capítulo 35)

Koto nda̱chun káʼa̱n iin ñá ñaʼá xa̱ʼa̱ ña̱ vií kítáʼanñá xíʼin Jehová sa̱kákuña miíñá.

“Va̱ása níxi̱kuni̱i̱ kuvii̱” (La Atalaya, núm. 1, 2017)

Kuniso̱ʼo ña̱ ndákanixi̱ní sava na̱ va̱lí kúa̱an xa̱ʼa̱ Jehová.

¿Ndáaña kúni̱ kachi ña̱ kooyó migo Ndióxi̱? (1:​46)