¿Ndáaña kivi chindeétáʼan xíʼinndó tá ni̱xi̱ʼi̱ iin na̱ veʼendó?: Ña̱ kivi keʼéndó

Tá nándukúndó ndáaña kivi chindeétáʼan xíʼinndó tá ni̱xi̱ʼi̱ iin na̱ veʼendó, ku̱a̱ʼáníva ña̱ ndani̱ʼíndó ta sava ña̱yóʼo kivi chindeétáʼan xíʼinndó. Nda̱a̱ táki̱ʼva ni̱ka̱ʼa̱nyó xa̱a̱ síín síín íyo ña̱ ndóʼo iin iinyó. Xa̱ʼa̱ ña̱yóʼo sana ña̱ chindeétáʼan xíʼin iin na̱ yiví va̱ása chindeétáʼanvíña xíʼin inkana.

Soo ni saá, íyova ña̱ kivi chindeétáʼan xíʼinndó. Nda̱a̱ na̱ xíni̱ va̱ʼa xa̱ʼa̱ ña̱yóʼo káʼa̱nna xa̱ʼa̱ ña̱ kivi chindeétáʼan xíʼin na̱ xíʼi̱ iin na̱ veʼe, ta ña̱yóʼo náʼa̱ña ña̱ ndíchiní íyo ña̱ ni̱ka̱ʼyi̱ nu̱ú Biblia, iin libro ña̱ xa̱a̱ ku̱a̱ʼání tiempo íyo.

1: TAXINDÓ ÑA̱ NÁ CHINDEÉTÁʼAN NA̱ VEʼENDÓ XÍʼIN NA̱ MIGONDÓ XÍʼINNDÓ

• 

  Ku̱a̱ʼání na̱ xíni̱ va̱ʼa xa̱ʼa̱ ña̱yóʼo káchina ña̱ va̱ʼaní chíndeétáʼan ña̱yóʼo xíʼinyó tá ni̱xi̱ʼi̱ iin na̱ veʼeyó. Soo ni saá, sava yichi̱ sana kuni̱yó koo mitúʼunyó ta nda̱a̱ kivi sa̱a̱yó tá kúni̱na chindeétáʼanna xíʼinyó. Ndiʼivana ndóʼo ña̱yóʼo.

• Va̱ása ndakanixi̱níndó ña̱ ndiʼi tiempo xíniñúʼu koona xíʼinndó, soo saátu va̱ása kuxíkándó nu̱ú inkana. Saáchi sana kuniñúʼundó ña̱ chindeétáʼanna xíʼinndó. Va̱ʼaní ka̱ʼa̱nndó xíʼin inkana xa̱ʼa̱ ña̱ xíniñúʼundó ta saátu xa̱ʼa̱ ña̱ va̱ása xíniñúʼundó.

• Ndakanixi̱níndó xa̱ʼa̱ ña̱ xíniñúʼundó ta tavándó ki̱ʼva nda̱saa tiempo koo mitúʼunndó ta nda̱saa tiempo kutáʼanndó xíʼin inkana.

TEXTO ÑA̱ VA̱XI NU̱Ú BIBLIA: “Va̱ʼaníka u̱vi̱na nu̱úka iinlána [...]. Saáchi tá iinna ná ndakavana, na̱ kítáʼan xíʼinna kivi ndaniʼinana” (Eclesiastés 4:​9, 10).

2: KIʼINNDÓ KUENTA XÍʼIN ÑA̱ XÍXINDÓ TA SAÁTU KEʼÉNDÓ EJERCICIO

• Tá viíní kíʼinndó kuenta xíʼin ña̱ xíxindó, ña̱yóʼo chindeétáʼan xíʼinndó ña̱ va̱ása kundi̱ʼi̱ní-inindó tá ni̱xi̱ʼi̱ iin na̱ veʼendó. Kaxindó ku̱i̱ʼi, kuxundó verdura ta saátu ña̱ʼa ña̱ kǒo ku̱a̱ʼá xa̱ʼan kúúmií.

• Koʼondó ku̱a̱ʼá ti̱kui̱í.

• Tá va̱ása xíʼi̱ndó so̱ko, va̱ʼa loʼo kuití kuxundó, soo ku̱a̱ʼá yichi̱ keʼéndó ña̱yóʼo. Á kivitu nda̱ka̱tu̱ʼunndó iin ta̱ doctor ña̱ ná ka̱ʼa̱nra xíʼinndó ndáa inkaka ña̱ kivi chindeétáʼan xíʼinndó ña̱ va̱ʼa koo ndee̱ndó.a

• Inka ña̱ kivi chindeétáʼan xíʼinndó kúú ña̱ kunundó á keʼéndó inkaka ejercicio ña̱ kivi chindeétáʼan xíʼinndó, tasaá va̱ása ndakaniníxi̱níndó xa̱ʼa̱ ña̱ ndóʼondó. Savana xíniñúʼuna tiempo ña̱ kéʼéna ejercicio ña̱ ndakanixi̱nína xa̱ʼa̱ na̱ veʼena na̱ ni̱xi̱ʼi̱ ta savatuna va̱ása kéʼéna ña̱yóʼo.

TEXTO ÑA̱ VA̱XI NU̱Ú BIBLIA: “Ni iinna kǒo kúndasína xínina ku̱ñuna, chi sákuxunaña ta ndáanaña” (Efesios 5:​29, Santa Biblia: Dios habla hoy).

3: KU̱SU̱N VA̱ʼANDÓ

• 

  Tá ni̱xi̱ʼi̱ iin na̱ veʼendó ndáyáʼviní ña̱ ku̱su̱n va̱ʼandó, chi tá kúsuchí-iniyó kúnaáníkayó.

• Kiʼinndó kuenta xíʼin ña̱ xíʼinndó ña̱ va̱ʼa kǒo kasiña nu̱úndó ña̱ ku̱su̱nndó tá kúú ndiʼi ña̱ kúúmií cafeína á ndixi.

TEXTO ÑA̱ VA̱XI NU̱Ú BIBLIA: “Va̱ʼaníka ña̱ ndakindee̱ loʼoyó nu̱úka ña̱ ndeéní kachíñuyó ta kooyó nda̱a̱ táki̱ʼva íyo na̱ ndíku̱n sa̱tá ta̱chí” (Eclesiastés 4:6).

4: MIÍNDÓ XÍNIÑÚʼU NDAKA̱XIN NDÁAÑA KEʼÉNDÓ

• 

  Iin iinyó xa̱a̱ síín íyo ña̱ ndóʼoyó tá xíʼi̱ iin na̱ veʼeyó, ña̱kán xíniñúʼu viíní ndaka̱xinndó ña̱ keʼéndó.

• Savayó tá xíʼi̱ iin na̱ veʼeyó, va̱ʼaka kúniyó tá nátúʼunyó xíʼin inkana xa̱ʼa̱ ña̱ ndóʼoyó, soo savayó va̱ása kútóoyó keʼéyó ña̱yóʼo. Na̱ xíni̱ va̱ʼa káchina ña̱ íyo ku̱a̱ʼá ña̱ ndáyáʼviní ña̱ kivi keʼéyó ña̱ va̱ʼa na̱ʼa̱yó ña̱ kúsuchíní-iniyó tá xíʼi̱ iin na̱ veʼeyó. Tá kúni̱ndó ka̱ʼa̱nndó xíʼin iin na̱ yiví xa̱ʼa̱ ña̱ ndóʼondó soo íxayo̱ʼvi̱ña xíʼinndó, kivi loʼo tá loʼo kixáʼandó ka̱ʼa̱nndó xa̱ʼa̱ ña̱ ndóʼondó xíʼin iin na̱ va̱ʼaní kítáʼanndó xíʼin.

• Savayó xíniñúʼu kuakuyó ta savatuyó va̱ása kéʼéyó ña̱yóʼo tá xíʼi̱ iin na̱ veʼeyó.

TEXTO ÑA̱ VA̱XI NU̱Ú BIBLIA: “Iin iinyó xíni̱ ndáaña kúú ña̱ sáxo̱ʼvi̱-iniyó” (Proverbios 14:​10, Nueva Versión Internacional).

5: KǑO KEʼÉNDÓ ÑA̱ IXAYAKU̱A̱ KU̱ÑUNDÓ

• 

  Sava na̱ yiví tá xíʼi̱ na̱ veʼena kíxáʼana xíʼina ku̱a̱ʼání ndixi á xíniñúʼuna droga ña̱ va̱ʼa ya̱ʼa ña̱ kúsuchíní-inina. Tá ná keʼéyó ña̱yóʼo, nu̱úka ña̱ chindeétáʼanña xíʼinyó, sandíʼi-xa̱ʼa̱vaña miíyó. Ni savana túvina ña̱ chíndeétáʼan ña̱yóʼo xíʼinna soo kivi taváña kue̱ʼe̱ xíʼinna. Tá xóʼvi̱ní-inindó xa̱ʼa̱ ña̱ ni̱xi̱ʼi̱ iin na̱ veʼendó, kivi ndukúndó inka ña̱ kivi chindeétáʼan xíʼinndó ña̱ ndi̱ko-inindó.

TEXTO ÑA̱ VA̱XI NU̱Ú BIBLIA: “Ná kǒo ixayaku̱a̱yó ku̱ñuyó” (2 Corintios 7:1).

6: VIÍNÍ KUNIÑÚʼUNDÓ TIEMPONDÓ

• Savana xíniñúʼuna tiempona ña̱ ndaka̱xinna keʼéna iin ña̱ʼa ña̱ va̱ʼa kǒo kusuchíní-inina xa̱ʼa̱ ña̱ ni̱xi̱ʼi̱ na̱ veʼena.

• Savana ña̱ chíndeétáʼan xíʼinna kúú ña̱ ndukúna na̱ koo migona á ña̱ kuyatinkana nu̱ú na̱ xa̱a̱ kúú migona, savatuna ña̱ chíndeétáʼan xíʼinna kúú ña̱ sakúaʼana keʼéna inka ña̱ʼa ña̱ ta̱ʼán keʼéna.

• Loʼo tá loʼo kivi kixáʼandó nasamandó ña̱ kéʼéndó. Sana kiʼinndó kuenta ña̱ xa̱a̱ loʼoka tiempo kúú ña̱ xíniñúʼundó ña̱ ndakanixi̱níndó xa̱ʼa̱ ña̱ xóʼvi̱ndó ta ku̱a̱ʼáka tiempo xíniñúʼundó ña̱ keʼéndó inkaka ña̱ʼa. Xíʼin ña̱yóʼo kiʼinndó kuenta ña̱ xa̱a̱ loʼo tá loʼo ku̱a̱ʼa̱n nándósó-inindó xa̱ʼa̱ ña̱ ndóʼondó.

TEXTO ÑA̱ VA̱XI NU̱Ú BIBLIA: “Xa̱a̱ íyo iin tiempo ña̱ koo ndiʼi ña̱ʼa [...]: tiempo ña̱ kuakuyó saátu tiempo ña̱ ku̱a̱ku̱yó” (Eclesiastés 3:​1, 4).

7: NÁ KOO TU̱ʼVA ÑA̱ KEʼÉNDÓ

• 

  Kivi tuku ndikóndó keʼéndó ña̱ xi̱keʼéndó tá ya̱chi̱ tá kúma̱níka kuvi na̱ veʼendó.

• Kivi koo iin hora ña̱ ku̱su̱nndó, ña̱ kachíñundó á ña̱ keʼéndó inkaka ña̱ʼa, loʼo tá loʼo tuku kixáʼa va̱ʼa kunindó nda̱a̱ táki̱ʼva xi̱kunindó tá ya̱chi̱.

• Kivi chika̱a̱ndó ndee̱ ña̱ keʼéndó ña̱ʼa ña̱ sákusi̱í-inindó, tá ná keʼéndó ña̱yóʼo, loʼo tá loʼo ndi̱ko-inindó.

TEXTO ÑA̱ VA̱XI NU̱Ú BIBLIA: “Va̱ása ndákaniníxi̱nína xa̱ʼa̱ ña̱ loʼoní tiempo tákuna, saáchi Ndióxi̱ ta̱ nda̱a̱ táxira chiñu ña̱ sákusi̱íní-inina ndaʼa̱na” (Eclesiastés 5:​20).

8: TÁ IIN ÑA̱ NDÁYÁʼVINÍ KÚÚ ÑA̱ NDAKA̱XINNDÓ KEʼÉNDÓ VA̱ÁSA NDI̱KU̱N KAMANÍ KEʼÉNDÓÑA

• Savana tá sa̱kán xíʼi̱ na̱ veʼena kamaní ndáka̱xinna ña̱ keʼéna soo tándi̱ʼi ndándikó-inina xa̱ʼa̱ ña̱yóʼo.

• Tá kúni̱ndó ku̱ʼu̱nndó koondó inka veʼe á nasamandó chiñu ña̱ kúúmiíndó á kúni̱ndó xi̱kóndó á saníʼi̱ndó ña̱ʼa ña̱ xi̱kuumií na̱ veʼendó na̱ ni̱xi̱ʼi̱, va̱ʼaka kundatundó loʼo tiempo.

TEXTO ÑA̱ VA̱XI NU̱Ú BIBLIA: “Na̱ ndákani vií xi̱ní xa̱ʼa̱ iin chiñu ña̱ kéʼéna viíní kánaña, soo na̱ kamaní kéʼéña va̱ása va̱ʼa kánaña” (Proverbios 21:5).

9: NDAKAʼÁNNDÓ XA̱ʼA̱ NA̱ VEʼENDÓ NA̱ NI̱XI̱ʼI̱

• 

  Iin ña̱ chíndeétáʼanní xíʼin savana kúú ña̱ ndakaʼánna xa̱ʼa̱ na̱ veʼena na̱ ni̱xi̱ʼi̱.

• Kivi kuumiíndó na̱ʼná na̱ veʼendó na̱ ni̱xi̱ʼi̱ ta saátu sava ña̱ʼa ña̱ xi̱kuumiína. Saátu kivi kaʼyíndó nu̱ú iin tutu sava fecha ña̱ si̱íní ni̱xi̱yondó xíʼin na̱ veʼendó. Ña̱yóʼo kivi chindeétáʼan xíʼinndó ña̱ ndi̱ko-inindó.

• Taxiva̱ʼandó ña̱ʼa ña̱ xi̱kutóonína kuniñúʼuna, ta tá xa̱a̱ va̱ʼa loʼo kúnindó kivi kotondó ña̱yóʼo.

TEXTO ÑA̱ VA̱XI NU̱Ú BIBLIA: “Ndakaʼán xa̱ʼa̱ ki̱vi̱ ña̱ ni̱ya̱ʼa” (Deuteronomio 32:7).

10: TAVÁNDÓ TIEMPO ÑA̱ NDAKINDEE̱NDÓ

• Ndaka̱xinndó ki̱vi̱ ña̱ kúni̱ndó ndakindee̱ndó.

• Tá kǒo kívi kiʼinndó ku̱a̱ʼá ki̱vi̱ ña̱ ndakindee̱ndó, kivi ndaka̱xinndó iin á u̱vi̱ ki̱vi̱ ña̱ ku̱ʼu̱n si̱índó. Kivi ku̱ʼu̱nndó yu̱ta á ku̱ʼu̱nndó kotondó na̱ veʼendó á nda̱a̱ ndáaka nu̱ú kúsi̱í-inindó ku̱ʼu̱nndó.

• Ña̱ nasamandó ña̱ʼa ña̱ kéʼéndó chindeétáʼanña xíʼinndó ña̱ ndi̱ko-inindó.

TEXTO ÑA̱ VA̱XI NU̱Ú BIBLIA: “Naʼandó ná ku̱ʼu̱nyó chí nu̱ú kǒo ni iin na̱ yiví, ña̱ va̱ʼa ndakindee̱ loʼondó” (Marcos 6:31).

11: CHINDEÉTÁʼANNDÓ XÍʼIN INKANA

• 

  Ná kǒo nandósóyó ña̱ tá chíndeétáʼanyó xíʼin inkana, ña̱yóʼo sákusi̱íña-iniyó.

• Kivi kixáʼandó chindeétáʼanndó xíʼin iin na̱ kúsuchí-ini xa̱ʼa̱ ña̱ ni̱xi̱ʼi̱ iin na̱ veʼena á na̱ migona. Sana na̱yóʼo kúni̱na natúʼunna xa̱ʼa̱ ña̱ ndóʼona xíʼin inkana.

• Tá chíndeétáʼanndó xíʼin inkana ta sándi̱kondó-inina, ña̱yóʼo chindeétáʼanña xíʼinndó ña̱ kusi̱í tuku inindó. Tá ná keʼéndó ña̱yóʼo, va̱ʼaníka kunindó.

TEXTO ÑA̱ VA̱XI NU̱Ú BIBLIA: “Tá táxiyó ña̱ʼa ndaʼa̱ inkana ndeéka kúsi̱í-iniyó ta su̱víka ña̱ ndákiʼinyóña” (Hechos 20:35).

12: NDAKANI TUKU XI̱NÍNDÓ XA̱ʼA̱ MIÍ ÑA̱ NDÁYÁʼVIKA

• Tá xíʼi̱ iin na̱ veʼeyó kivi nasama ña̱ ndákanixi̱níyó xa̱ʼa̱ ña̱ʼa ña̱ ndáyáʼvika.

• Xíniñúʼu ndakani vií xi̱níndó xa̱ʼa̱ ndáa ki̱ʼva xíniñúʼundó ña̱ tákundó.

• Tá xíniñúʼu nasamandó iin ña̱ kéʼéndó, kivi nasamavandóña ña̱ va̱ʼa keʼéndó ña̱ ndáyáʼvika.

TEXTO ÑA̱ VA̱XI NU̱Ú BIBLIA: “Va̱ʼaka ná ku̱ʼu̱nyó veʼe nu̱ú ni̱xi̱ʼi̱na; nu̱úka ña̱ ku̱ʼu̱nyó veʼe nu̱ú íyo vikó, chi ndiʼivayó xíʼi̱, ta na̱ táku xíniñúʼu chika̱a̱na ña̱yóʼo níma̱na” (Eclesiastés 7:2).

Ná kǒo ndakanixi̱níyó ña̱ va̱ása xo̱ʼvi̱ka-iniyó xa̱ʼa̱ ña̱ ni̱xi̱ʼi̱ iin na̱ veʼeyó. Soo ku̱a̱ʼání na̱ ni̱xi̱ʼi̱ iin na̱ veʼe ka̱china ña̱ va̱ʼaní chi̱ndeétáʼan sava ña̱ va̱xi nu̱ú ña̱ artículo yóʼo xíʼinna ña̱ ndi̱ko-inina. Su̱ví ña̱yóʼo kúú ndiʼi ña̱ kivi keʼéyó ña̱ va̱ʼa ndi̱ko-iniyó, soo tá ná chika̱a̱yó ndee̱ ña̱ keʼéyó ña̱ káʼa̱n ña̱yóʼo kivi sandíkoña-iniyó.