Ña̱ va̱ʼaníka chindeétáʼan xíʼinndó tá xóʼvi̱ndó xa̱ʼa̱ ña̱ ni̱xi̱ʼi̱ iin na̱ veʼendó

TIEMPO VITIN XA̱A̱ KÚNDA̱A̱KA-INIYÓ NDÁA KI̱ʼVA NDÓʼO NA̱ XÍʼI̱ IIN NA̱ VEʼE. Nda̱a̱ táki̱ʼva xi̱niyó, ku̱a̱ʼání ña̱ káʼa̱n na̱ xíni̱ va̱ʼa xa̱ʼa̱ ña̱yóʼo kítáʼanña xíʼin ña̱ va̱xi nu̱ú tu̱ʼun Ndióxi̱ ta ña̱yóʼo náʼa̱ña ña̱ ndíchiní íyo ña̱ va̱xi nu̱úña. Xíʼin ña̱yóʼo kúnda̱a̱-iniyó ña̱ ndáyáʼviníva consejo ña̱ va̱xi nu̱úña nda̱a̱ vitin. Soo tu̱ʼun Ndióxi̱ va̱ása táxi kuitíña yichi̱ nu̱úyó saáchi sánáʼa̱ña miíyó xa̱ʼa̱ ña̱ʼa ña̱ kǒo kívi ndani̱ʼíyó nu̱ú inka libro, ta saátu tá ni̱xi̱ʼi̱ iin na̱ veʼeyó, va̱ʼaní sándi̱koña-iniyó.

• Náʼa̱ káxiña nu̱úyó ña̱ na̱ veʼeyó na̱ ni̱xi̱ʼi̱, va̱ása xóʼvi̱na.

  Tu̱ʼun Ndióxi̱ káʼa̱nña nu̱ú Eclesiastés 9:5, “na̱ ni̱xi̱ʼi̱ kǒoka ña̱ xíni̱na xa̱ʼa̱”. Kǒoka ña̱ ndákanixi̱nína (Salmo 146:4). Xa̱ʼa̱ ña̱yóʼo, Biblia káʼa̱nña ña̱ tá xíʼi̱yó nda̱a̱ táki̱ʼva íyo na̱ kísi̱ saá íyoyó (Juan 11:11).

• Tá kúnda̱a̱-iniyó ña̱ kúʼvi̱ní-ini Ndióxi̱ xínira miíyó, ña̱yóʼo sándi̱koña-iniyó.

  Biblia káchiña: “Jehováa xítora na̱ kéʼé ña̱ nda̱kú ta xíniso̱ʼora ña̱ káʼa̱nna tá ndúkúna ña̱ chindeétáʼanra xíʼinna” (Salmo 34:15). Tá káʼa̱nyó xíʼin Ndióxi̱, va̱ása chíndeétáʼan kuitíña xíʼinyó ña̱ va̱ʼa kuniyó á ña̱ vií ndakanixi̱níyó, chi ña̱yóʼo chíndeétáʼanña xíʼinyó ña̱ va̱ʼaníka kutáʼanyó xíʼin Ndióxi̱ tasaá kivi sandíkora-iniyó.

• Ña̱ va̱ʼa ndakiʼinyó chí nu̱únínu.

  Ku̱a̱ʼání yichi̱ káʼa̱n Biblia xa̱ʼa̱ ña̱ ndataku na̱ ni̱xi̱ʼi̱. Tá kúú tá káʼa̱nña xa̱ʼa̱ ndáa ki̱ʼva kundooyó nu̱ú ñuʼú yóʼo chí nu̱únínu, káchiña, Ndióxi̱ “ndaya̱kúnra ti̱kui̱í nu̱úna, ta va̱ása kuvikana, ni va̱ása kusuchíka-inina, ni va̱ása kuakukana, ni va̱ása xo̱ʼvi̱kana” (Apocalipsis 21:​3, 4). ¿Á xa̱a̱ ndákanixi̱níún ndáa ki̱ʼva koo ña̱yóʼo?

Ku̱a̱ʼání na̱ yiví na̱ kándíxa Jehová, kándíxana ña̱ káʼa̱n tu̱ʼunra ña̱ sandátakura na̱ veʼena na̱ ni̱xi̱ʼi̱, ta ña̱yóʼo chíndeétáʼanña xíʼinna ña̱ ndi̱ko-inina tá xíʼi̱ iin na̱ veʼena. Tá kúú, ñá Ann, 65 ku̱i̱ya̱ ni̱xi̱yoñá xíʼin yiíñá ta ni̱xi̱ʼi̱ra, ñáyóʼo káchiñá: “Nu̱ú Biblia sa̱kuaʼi̱ ña̱ na̱ veʼeyó na̱ ni̱xi̱ʼi̱ va̱ása xóʼvi̱na ta Ndióxi̱ sandátakura ndiʼi na̱ ndákaʼánra xa̱ʼa̱. Ndákanixi̱níi̱ xa̱ʼa̱ ña̱yóʼo tá ndákaʼíi̱n xa̱ʼa̱ yiíi̱ ta ña̱yóʼo kúú ña̱ chíndeétáʼan xíʼi̱n ña̱ kundeé-inii̱ ta saátu ña̱ ndi̱ko-inii̱”.

Ñá Tina ñá xa̱a̱ ni̱ka̱ʼa̱nyó xa̱ʼa̱ káchiñá: “Nda̱a̱ tá ni̱xi̱ʼi̱ ta̱ Timo ta nda̱a̱ vitin xítoi̱ ña̱ chíndeétáʼanní Ndióxi̱ xíʼi̱n tá ndíʼi̱ní-inii̱. Kándíxanívai̱ ña̱ káʼa̱n Biblia ña̱ ndataku na̱ ni̱xi̱ʼi̱ ta ña̱yóʼo kúú ña̱ chíndeétáʼanní xíʼi̱n nda̱a̱ ná kixaa̱ ki̱vi̱ ña̱ ndataku ta̱ Timo”.

Saátu ndákanixi̱ní ku̱a̱ʼání na̱ yiví na̱ kándíxa ña̱ káʼa̱n tu̱ʼun Ndióxi̱. Tá ndákanixi̱níndó ña̱ sana va̱ása xi̱nu ña̱ káʼa̱n tu̱ʼun Ndióxi̱, kivi kaʼvindóña tasaá kunda̱a̱-inindó ña̱ va̱ʼaní consejo va̱xi nu̱úña, saá kandíxandó ña̱ ndixa xi̱nu ña̱ káʼa̱n Ndióxi̱ keʼéra chí nu̱únínu. Tasaá kunindó ña̱ va̱ʼaní sándi̱ko Biblia ini na̱ yiví tá xíʼi̱ iin na̱ veʼena.

¿Á KÚNI̱ÚN KUNDA̱A̱KA-INIÚN NDÁA KI̱ʼVA KOO ÑA̱ NDATAKU NA̱ YIVÍ NA̱ NI̱XI̱ʼI̱?

Nu̱ú sitio ña̱ Internet, jw.org, ndani̱ʼún video ña̱ káʼa̱nka xa̱ʼa̱ ña̱yóʼo.

¿NDÁAÑA NDÓʼO NA̱ XÍʼI̱?

¿Ndáaña ndóʼo na̱ ni̱xi̱ʼi̱? Ña̱ káʼa̱n Biblia xa̱ʼa̱ ña̱yóʼo sándi̱koníña-iniyó.

Ki̱ʼvi NU̱Ú ÑÚʼU NDIʼIÑA > VIDEO (ki̱ʼvi nu̱ú káʼa̱nña video: Ña̱ Biblia).

¿Á KÚNI̱ÚN KUNISO̱ʼÚN TU̱ʼUN VA̱ʼA?

Tiempo vitin íyoní noticia ña̱ va̱ása va̱ʼa, soo ¿á íyo iin noticia ña̱ va̱ʼa? Video yóʼo káʼa̱nña xa̱ʼa̱ folleto Ndióxi̱ káʼa̱nra tu̱ʼun va̱ʼa xíʼinyó.

Ki̱ʼvi NU̱Ú ÑÚʼU NDIʼIÑA > VIDEO (ki̱ʼvi nu̱ú káʼa̱nña video: Reunión xíʼin predicación).