LECCIÓN 14

Ka̱ʼa̱n xa̱ʼa mií ña̱ ndáyáʼvi va̱ʼaka

Hebreos 8:1

Chindeétáʼan xíʼin na̱ xíniso̱ʼo ña̱ káʼún ña̱ va̱ʼa ná kundiku̱nna ña̱ káʼún xa̱ʼa xíʼinna, ta ná kunina ndáa ki̱ʼva kítáʼanña xíʼin tema ña̱ káʼún xa̱ʼa ta saátu ndáa xa̱ʼa kúú ña̱ káʼúnña xíʼinna.

NDÁA KI̱ʼVA KEʼÚNÑA:

Ndaka̱xin ndáaña kúni̱ún keʼún. Ndakanixi̱ní ndáaña kúni̱ún keʼún xíʼin discurso ña̱ taxiún: kivi natúʼún xíʼinna xa̱ʼa iin ña̱ʼa, á sáxi̱nu̱ún-inina, á saátu chika̱ún ndée xíʼinna. Kiʼin va̱ʼún kuenta ña̱ va̱ʼa ndiʼi ña̱ ka̱ʼún xíʼinna ná chindeéña yóʼó ña̱ va̱ʼa sáxínún ña̱ nda̱kanixi̱níún keʼún.

Ndakanixi̱ní xa̱ʼa ña̱yóʼo: “¿Ndáa ña̱ʼa kúú ña̱ kivi nda̱ka̱tu̱ʼunna yi̱ʼi̱, á ndáa ña̱ʼa kúú ña̱ kivi ka̱ʼa̱nna xíʼi̱n xa̱ʼa ta ndáa ki̱ʼva keʼénaña?”. Tasaá kivi ka̱ʼún xíʼinna xa̱ʼa tá iin iinña ta va̱ʼaka kuniso̱ʼona yóʼó, saátu va̱ʼaka kundiku̱nna ña̱ káʼún xa̱ʼa xíʼinna, ta va̱ʼaka kunda̱a̱-inina xíʼinña.
Na̱ʼa̱ nu̱úna ndáa tema kúú ña̱ ka̱ʼún xa̱ʼa xíʼinna. Kivi ku̱a̱ʼá yichi̱ na̱ʼún nu̱úna ndáa tema kúú ña̱ káʼún xa̱ʼa xíʼinna, ta ña̱ va̱ʼa keʼún ña̱yóʼo, kivi kuniñúʼún sava tu̱ʼun válí ña̱ kítáʼan xíʼin ña̱ káʼún xa̱ʼa xíʼinna.
Káxiní ka̱ʼún xíʼinna xa̱ʼa ña̱ kúni̱ún kunda̱a̱-inina ta va̱ása yo̱ʼvi̱ keʼúnña. Kuití ña̱ kivi ka̱ʼún xa̱ʼa xíʼinna ti̱xin tiempo ña̱ kúúmiíún kivi ndaka̱xiún ka̱ʼún xíʼinna ta ná kitáʼanña xíʼin tema ña̱ káʼún xa̱ʼa. Loʼovaña kivi ka̱ʼún xa̱ʼa xíʼinna soo vií va̱ʼa ndakaniúnña nu̱úna. Kivi kundatu loʼún tasaá ya̱ʼún xíʼin inka ña̱ ka̱ʼún xa̱ʼa xíʼinna, va̱ása kamaní keʼúnña.

Kivi ka̱ʼún xíʼinna ndáa ña̱ʼa kúú ña̱ ka̱ʼún xa̱ʼa xíʼinna tá ná kixaʼún, ta saátu kivi sándakaʼúnna xa̱ʼaña tá ná sandiʼún.