LECCIÓN 25
¿Ndáa ki̱ʼva kúni̱ Ndióxi̱ ná koo ña̱ tákuyó?
Ña̱ Biblia káʼa̱nña ña̱ na̱ yiví “loʼoní tiempo íyona ta íyoní tu̱ndóʼo nu̱úna” (Job 14:1). Soo, ¿á saá kúni̱ Ndióxi̱ ná kutakuyó? Tá su̱ví saá íyoña, ¿ndáa ki̱ʼva kúni̱ Ndióxi̱ ná kutakuyó? ¿Á kixaa̱ iin ki̱vi̱ ña̱ xi̱nu ña̱ kúni̱ra? Va̱ʼaní ña̱ káʼa̱n Biblia xa̱ʼa̱ ña̱yóʼo.
1. ¿Ndáa ki̱ʼva kúni̱ Ndióxi̱ ná kutakuyó?
Jehová kúni̱ra ña̱ viíní ná kutakuyó, tá i̱xava̱ʼa Ndióxi̱ ta̱ Adán xíʼin ñá Eva ta̱xira koona nu̱ú iin ñuʼú ña̱ liviní: ña̱ jardín ña̱ Edén. “Tasaá, chi̱ka̱a̱ Ndióxi̱ bendiciónna ta ni̱ka̱ʼa̱nra xíʼinna: ‘Kaku se̱ʼendó ta ku̱a̱ʼá ná koona, ta sakutundó nu̱ú ñuʼú, ta kundaandóña’” (Génesis 1:28). Jehová xi̱kuni̱ra ña̱ ná koo se̱ʼena ta ná ndasalivina nu̱ú ñuʼú yóʼo ta saátu ná kundaana kití, ña̱ xi̱kuni̱ra kúú ña̱ ndiʼi na̱ yiví ná va̱ása kiʼin kue̱ʼe̱ miína ta kutakuna ndiʼi tiempo.
Ni su̱ví saá káa tiempo vitin,a soo ña̱ ni̱ka̱ʼa̱n Ndióxi̱ keʼéra ta̱ʼán nasamaña (Isaías 46:10, 11). Kúni̱kavara ña̱ na̱ yiví na̱ kándíxa miíra ná kutakuna ndiʼi tiempo ta va̱ása xo̱ʼvi̱kana (kaʼvi Apocalipsis 21:3, 4).
2. ¿Ndáa ki̱ʼva kusi̱í-iniyó tiempo vitin?
Jehová i̱xava̱ʼara miíyó ña̱ kuni̱yó sakuaʼayó xa̱ʼa̱ra, ta xa̱a̱yó ndasakáʼnuyóra (kaʼvi Mateo 5:3-6). Ndióxi̱ kúni̱ra ña̱ viíní ná kutáʼanyó xíʼinra, ta ná keʼéyó ndiʼi ña̱ káʼa̱nra ta ná kuʼvi̱-iniyó kuniyóra ta saátu xíʼin ndiʼi níma̱yó ná kachíñuyó nu̱úra (Deuteronomio 10:12; Salmo 25:14). Tá kéʼéyó ndiʼi ña̱yóʼo, si̱íníva kooyó ní íyo tu̱ndóʼo nu̱úyó. Tá ndásakáʼnuyó Jehová nda̱a̱ táki̱ʼva kúni̱ miíra kúnda̱a̱-iniyó ndáa xa̱ʼa̱ kúú ña̱ tákuyó, saáchi kéʼéyó ña̱ kúni̱ra.
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva ni̱na̱ʼa̱ Jehová ña̱ kúʼvi̱-inira xíni̱ra miíyó tá i̱xava̱ʼara ñuyǐví yóʼo ña̱ va̱ʼa kundooyó nu̱úña ta saátu ndáaña sánáʼa̱ tu̱ʼunra xa̱ʼa̱ ña̱ tákuyó.
3. Jehová kúni̱ra ña̱ viíní ná kutaku na̱ yiví
Kotondo VIDEO ta ka̱ʼa̱nndó xa̱ʼa̱ ña̱yóʼo:
¿Nda̱chun liviní i̱xava̱ʼa Ndióxi̱ ñuyǐví yóʼo?
Kaʼvindó Eclesiastés 3:11 ta ka̱ʼa̱nndó xa̱ʼa̱ ña̱yóʼo:
¿Ndáaña káʼa̱n ña̱yóʼo xa̱ʼa̱ Jehová?
4. Ña̱ kúni̱ Jehová keʼéra ta̱ʼán nasa̱maña
Kaʼvindó Salmo 37:11, 29 xíʼin Isaías 55:11, ta ka̱ʼa̱nndó xa̱ʼa̱ ña̱yóʼo:
¿Nda̱chun va̱ʼa kúnda̱a̱-iniyó ña̱ ta̱ʼán nasa̱ma ña̱ kúni̱ Jehová keʼéra xa̱ʼa̱yó?
Iin veʼe ña̱ xa̱a̱ ku̱yatá kivi ndaʼaña. Saátu íyo ñuyǐví yóʼo: Na̱ yiví xa̱a̱ ku̱a̱ʼa̱n sándiʼi-xa̱ʼa̱naña, soo Ndióxi̱ sandáʼaraña ña̱ va̱ʼa koo na̱ yiví na̱ kúʼvi̱-ini xíni miíra nu̱úña.
5. Tá ndásakáʼnuyó Jehová kúnda̱a̱-iniyó ndáa xa̱ʼa̱ kúú ña̱ tákuyó
Tá kúnda̱a̱-iniyó ndáa xa̱ʼa̱ kúú ña̱ tákuyó sákusi̱íña-iniyó. Kotondó VIDEO ta ka̱ʼa̱nndó xa̱ʼa̱ ña̱yóʼo:
Xa̱ʼa̱ ña̱ ku̱nda̱a̱-ini ñá Terumi ndáa xa̱ʼa̱ kúú ña̱ tákuyó, ¿ndáa ki̱ʼva chi̱ndeétáʼanña xíʼinñá?
Kaʼvindó Eclesiastés 12:13 ta ka̱ʼa̱nndó xa̱ʼa̱ ña̱yóʼo:
Xa̱ʼa̱ ña̱ ku̱a̱ʼání ña̱ʼa ke̱ʼé Jehová xa̱ʼa̱yó, ¿ndáaña xíniñúʼu keʼéyó ña̱ va̱ʼa táxiyó tíxa̱ʼvi ndaʼa̱ra?
ÑA̱ NDÁKA̱TU̱ʼUN SAVA NA̱ YIVÍ: “¿Ndáa xa̱ʼa̱ kúú ña̱ íyoyó? ¿Ndáa xa̱ʼa̱ kúú ña̱ tákuyó?”.
¿Ndáaña ndakuiún?
ÑA̱ XA̱A̱ SA̱KUAʼAYÓ
Jehová kúni̱ra ña̱ si̱í ná kooyó nu̱ú ñuʼú yóʼo ndiʼi tiempo ta vií kooyó. Nda̱a̱ tiempo vitin kúnda̱a̱-iniyó ndáa xa̱ʼa̱ kúú ña̱ tákuyó tá ndásakáʼnuyó Jehová xíʼin ndiʼi níma̱yó.
Ná ndakaʼányó xa̱ʼa̱ ña̱yóʼo
Tá i̱xava̱ʼa Jehová ta̱ Adán xíʼin ñá Eva, ¿ndáa ki̱ʼva xi̱kuni̱ra kutakuna?
¿Nda̱chun va̱ʼa kúnda̱a̱-iniyó ña̱ ki̱ʼva ña̱ xi̱kuni̱ Ndióxi̱ ná koo na̱ yiví ta̱ʼán nasa̱maña?
¿Ndáaña chindeétáʼan xíʼún ña̱ viíní koún?
NANDUKÚKA XA̱ʼA̱ÑA
Koto nda̱chun kivi kandíxayó ña̱ ndixa ni̱xi̱yo jardín ña̱ Edén.
“¿Á ndixa ni̱xi̱yo ña̱ jardín ña̱ Edén?” (La Atalaya, 1 tí enero ku̱i̱ya̱ 2011)
Koto nda̱chun kúú ña̱ kándíxandi̱ ña̱ va̱ása ndiʼi-xa̱ʼa̱ ñuʼú yóʼo.
“¿Á ndiʼi-xa̱ʼa̱ ñuʼú yóʼo?” (Artículo ña̱ va̱xi nu̱ú jw.org)
Kunda̱a̱-ini ndáaña káʼa̱n Biblia xa̱ʼa̱ ña̱ tákuyó.
“¿Ndáa xa̱ʼa̱ kúú ña̱ tákuyó?” (Artículo ña̱ va̱xi nu̱ú jw.org)
Koto iin ta̱a ta̱ xi̱ndakanixi̱ní ña̱ xi̱kuumiíra ndiʼi ña̱ʼa soo ki̱ʼinra kuenta ña̱ xi̱kuma̱ní iin ña̱ʼa nu̱úra.
a Nu̱ú inka lección kunda̱a̱ka-iniyó xa̱ʼa̱ ña̱yóʼo.