¿Ndáa xa̱ʼa̱ kúú ña̱ tákuyó
Ña̱ káʼa̱n Biblia xa̱ʼa̱ ña̱yóʼo
Ku̱a̱ʼání ña̱ kivi ka̱ʼa̱nyó xa̱ʼa̱ ña̱yóʼo. Sana iinna kivi nda̱ka̱tu̱ʼunna: “¿Nda̱chun íyoyó yóʼo?” á “¿Ndáa xa̱ʼa̱ kúú ña̱ tákuyó?”. Biblia káʼa̱nña ña̱ tákuyó va̱ʼa xa̱a̱yó kooyó migo Ndióxi̱. Ña̱ va̱ʼaka kunda̱a̱-iniyó xa̱ʼa̱ña, ná kotoyó ña̱ káʼa̱n tu̱ʼun Ndióxi̱.
Ndióxi̱ kúú ta̱ i̱xava̱ʼa miíyó. Biblia káchiña: “Ndióxi̱ kúú ta̱ i̱xava̱ʼa miíyó su̱ví miíyó” (Salmo 100:3; Apocalipsis 4:11).
Íyo iin xa̱ʼa̱ i̱xava̱ʼa Ndióxi̱ ndiʼi ña̱ʼa, ta nda̱a̱ na̱ yiví íyo iin xa̱ʼa̱ i̱xava̱ʼarana (Isaías 45:18).
Ndióxi̱ i̱xava̱ʼara miíyó ña̱ ku̱ni̱yó sakúaʼayó xa̱ʼa̱ra, ta ña̱yóʼo kúni̱ kachiña ña̱ kunda̱a̱-iniyó ndáa xa̱ʼa̱ kúú ña̱ tákuyó (Mateo 5:3). Ta kúni̱ra ña̱ ná chika̱a̱yó ndee̱ ña̱ keʼéyó ña̱yóʼo (Salmo 145:16).
Tá chíka̱a̱yó ndee̱ ña̱ kuxini̱yó Ndióxi̱ ta kooyó migora saá kúú ña̱ sákuaʼayó xa̱ʼa̱ra, ta ndiʼivayó kivi keʼé ña̱yóʼo. Biblia káʼa̱nña ña̱yóʼo xíʼinyó: “Kuyatinndó nu̱ú Ndióxi̱ ta ta̱kán kuyatinra nu̱úndó” (Santiago 4:8; 2:23).
Ña̱ va̱ʼa kooyó migo Ndióxi̱ xíniñúʼu saxínuyó ña̱ kúni̱ra keʼéyó. Biblia káxi káʼa̱nña xa̱ʼa̱ ña̱yóʼo: “Ña̱yóʼo kúú ña̱ ndáyáʼvika, ixato̱ʼó Ndióxi̱ ta̱ nda̱a̱ ta keʼé ña̱ káʼa̱nra” (Eclesiastés 12:13).
Chí nu̱únínu, tá ná sandíʼi-xa̱ʼa̱ Ndióxi̱ ña̱ sáxo̱ʼvi̱ miíyó ta taxira ña̱ kutaku na̱ migora ndiʼi tiempo, na̱yóʼo kúú na̱ nda̱kú íyo ini káchíñu nu̱úra, saá kúú ña̱ kuniyó ña̱ xi̱nu ña̱ kúni̱ Ndióxi̱ ná koo na̱ yiví (Salmo 37:10, 11).