LECCIÓN 28
Na̱ʼa̱ ña̱ ndáyáʼvi ña̱ ke̱ʼé Jehová xíʼin ta̱ Jesús xa̱ʼún
¿Ndáaña ndóʼún tá iin na̱ migoún táxina iin regalo ña̱ ndáyáʼviní ndaʼún? Sana kúsi̱íní-iniún, ta kúni̱ún na̱ʼún nu̱ú na̱ migoún ña̱ ndáyáʼviní ña̱ regalo yóʼo nu̱ún, Jehová xíʼin ta̱ Jesús ta̱xina iin regalo ña̱ ndáyáʼviní ndaʼa̱yó nu̱úka ña̱ kivi taxi inkana ndaʼa̱yó, ña̱yóʼo kúú: ña̱ sa̱kǎku ta̱ Jesús miíyó. Ná kotoyó ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱yóʼo.
1. ¿Ndáa ki̱ʼva na̱ʼa̱yó ña̱ chíndayáʼviyó ña̱ ke̱ʼé Ndióxi̱ xíʼin ta̱ Cristo xa̱ʼa̱yó?
Ña̱ Biblia káʼa̱nña, na̱ kándíxa ta̱ Jesús, kivi kutakuna ndiʼi tiempo (Juan 3:16). ¿Ndáa ki̱ʼva na̱ʼa̱yó ña̱ kándíxayó ta̱ Jesús? Va̱ása xíniñúʼu kandíxa kuitíyóra chi saátu xíniñúʼu na̱ʼa̱yóña xíʼin ña̱ ndáka̱xinyó keʼéyó (Santiago 2:17). Tá náʼa̱yó ña̱ kándíxayó Ndióxi̱ xíʼin ña̱ kéʼéyó saátu xíʼin ña̱ káʼa̱nyó ndásandakúyó ña̱ kítáʼanyó xíʼin ta̱ Jesús ta saátu xíʼin yivára, Jehová (kaʼvi Juan 14:21).
2. ¿Ndáa ki̱vi̱ ña̱ ndáyáʼviní kivi na̱ʼa̱yó ña̱ táxiyó tíxa̱ʼvi ndaʼa̱ Jehová xíʼin ta̱ Jesús?
Ñuú tá kúma̱níka kuvi ta̱ Jesús, ni̱ka̱ʼa̱nra xíʼin na̱ xi̱ndiku̱n miíra xa̱ʼa̱ inka ki̱ʼva ña̱ taxina tíxa̱ʼvi xa̱ʼa̱ ña̱ ke̱ʼéra. Ña̱yóʼo va̱xiña nu̱ú Biblia ta ni̱ka̱ʼa̱nra ña̱ ná ndakaʼányó xa̱ʼa̱ ña̱ ni̱xi̱ʼi̱ra (1 Corintios 11:20). Ta̱ Jesús ke̱ʼéra ña̱yóʼo ña̱ va̱ʼa ná ndakaʼán na̱ apóstol xa̱ʼa̱ra ta saátu na̱ cristiano na̱ nda̱a̱, ña̱ ndakaʼánna xa̱ʼa̱ ña̱ ni̱xi̱ʼi̱ra xa̱ʼa̱yó, ta̱ Jesús xa̱ʼndara chiñu yóʼo nu̱úna: “Kǒo sandákoondó keʼéndó ña̱yóʼo” (Lucas 22:19). Tá ná ku̱ʼún ña̱ Conmemoración saá kúú ña̱ náʼún ña̱ chíndayáʼviníún ña̱ kúʼvi̱ní-ini Jehová xíʼin ta̱ Jesús xínina miíyó.
NÁ SAKUAʼAKAYÓ XA̱ʼA̱ÑA
Ná sakuaʼayó inka ki̱ʼva ña̱ kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ kúʼvi̱ní-ini Jehová xíʼin ta̱ Jesús xínina miíyó, ta ná kotoyó nda̱chun ndáyáʼviní ndakaʼányó xa̱ʼa̱ ña̱ ni̱xi̱ʼi̱ ta̱ Cristo.
3. ¿Ndáaña kivi keʼéyó ña̱ na̱ʼa̱yó ña̱ táxiyó tíxa̱ʼvi ndaʼa̱ra?
Ndakanixi̱ní ña̱ ni̱ki̱ʼviún ti̱xin iin yu̱ta ta kúni̱ kuviún xíʼin ti̱kui̱í ta iinna sa̱kǎkuna yóʼó. ¿Á kama nandósó-iniún xa̱ʼa̱ ña̱ ke̱ʼéna xa̱ʼún? ¿Á ndukún ki̱ʼva ña̱ taxiún tíxa̱ʼvi ndaʼa̱na?
Xa̱ʼa̱ ña̱ ke̱ʼé Jehová kivi kutakuyó ndiʼi tiempo. Kaʼvindó 1 Juan 4:8-10 ta ka̱ʼa̱nndó xa̱ʼa̱ ña̱yóʼo:
¿Nda̱chun iin regalo ña̱ ndáyáʼviní kúú ña̱ ni̱xi̱ʼi̱ ta̱ Jesús xa̱ʼa̱yó?
¿Ta ndáaña ndóʼún tá ndákanixi̱níún xa̱ʼa̱ ña̱ ke̱ʼé Jehová xíʼin ta̱ Jesús xa̱ʼún?
¿Ndáa ki̱ʼva kivi na̱ʼa̱yó ña̱ chíndayáʼviyó ña̱ ke̱ʼé Jehová ta saátu ta̱ Jesús xa̱ʼa̱yó? Kaʼvindó 2 Corintios 5:15 ta saátu 1 Juan 4:11 xíʼin 5:3. Tándi̱ʼi kaʼvindó iin tá iin versículo yóʼo, ka̱ʼa̱nndó xa̱ʼa̱ ña̱yóʼo:
¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱na?
4. Ná keʼéyó táʼan ña̱ ke̱ʼé ta̱ Jesús
Inka ki̱ʼva ña̱ kivi na̱ʼa̱yó ña̱ táxiyó tíxa̱ʼvi kúú ña̱ keʼéyó nda̱a̱ táki̱ʼva ke̱ʼé ta̱ Jesús. Kaʼvindó 1 Pedro 2:21 ta ka̱ʼa̱nndó xa̱ʼa̱ ña̱yóʼo:
¿Ndáa ki̱ʼva viíní kundiku̱ún ña̱ ke̱ʼé ta̱ Jesús?
Ta̱ Jesús xi̱kuʼvi̱-inira xi̱xinira tu̱ʼun Ndióxi̱, xi̱natúʼunra xa̱ʼa̱ tu̱ʼun va̱ʼa ta xi̱chindeétáʼanra xíʼin na̱ yiví.
5. Ná ku̱ʼu̱nyó Conmemoración ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Cristo
Ña̱ va̱ʼa kunda̱a̱-iniún ndáaña kúú ña̱ nu̱ú yichi̱ ña̱ nda̱kaʼánna xa̱ʼa̱ ña̱ ni̱xi̱ʼi̱ ta̱ Jesús, kaʼvindó Lucas 22:14, 19, 20. Ta tá ndi̱ʼi ka̱ʼa̱nndó xa̱ʼa̱ ña̱yóʼo:
¿Ndáa ki̱ʼva ni̱ka̱ʼa̱n ta̱ Jesús xíʼinna ña̱ ndakaʼánna xa̱ʼa̱ra?
¿Ndáaña ndákiʼin nu̱ú si̱táva̱ʼa xíʼin tá vino? (Kotondó versículo 19 xíʼin 20).
Ta̱ Jesús xi̱kuni̱ra na̱ discípulora ná ndakaʼánna xa̱ʼa̱ ña̱ ni̱xi̱ʼi̱ra, iin yichi̱ nu̱ú ku̱i̱ya̱ mií ki̱vi̱ ña̱ ni̱xi̱ʼi̱ra. Xa̱ʼa̱ ña̱kán ndi̱ʼi̱ na̱ testigo Jehová ndákutáʼanndi̱ ndiʼi ku̱i̱ya̱ ña̱ va̱ʼa ndakaʼánndi̱ xa̱ʼa̱ ña̱ ni̱xi̱ʼi̱ ta̱ Cristo, ta kéʼéndi̱ña nda̱a̱ táki̱ʼva ni̱ka̱ʼa̱nra, ña̱ va̱ʼa kunda̱a̱-iniún ndáa ki̱ʼva xíyo reunión ña̱ ndáyáʼviní yóʼo, kotondó VIDEO. Ta tá ndi̱ʼi ka̱ʼa̱nndó xa̱ʼa̱ ña̱yóʼo:
¿Ndáaña kéʼéna tá xíyo Conmemoración?
Si̱táva̱ʼa xíʼin tá vino íyo iin ña̱ ndánaʼa̱ña, si̱táva̱ʼa ndánaʼa̱ña ku̱ñu ta̱ Jesús ña̱ kǒo ku̱a̱chi kúúmií ña̱ ta̱xira xa̱ʼa̱ ndiʼiyó. Ta tá vino ndánaʼa̱rá ni̱i̱ra.
ÑA̱ KÁʼA̱N SAVA NA̱ YIVÍ: “Ña̱ va̱ʼa ka̱kún, xíniñúʼu kandíxa kuitíún ta̱ Jesús”.
¿Ndáa ki̱ʼva kuniñúʼún Juan 3:16 xíʼin Santiago 2:17 ña̱ va̱ʼa ka̱ʼún xíʼinna ña̱ íyo inka ña̱ʼa ña̱ xíniñúʼu keʼéna?
ÑA̱ XA̱A̱ SA̱KUAʼAYÓ
Náʼa̱yó ña̱ táxiyó tíxa̱ʼvi xa̱ʼa̱ ña̱ ke̱ʼé ta̱ Jesús xa̱ʼa̱yó tá náʼa̱yó ña̱ kándíxayóra ta saátu tá xáʼa̱nyó ña̱ Conmemoración ña̱ ndakaʼányó xa̱ʼa̱ ña̱ ni̱xi̱ʼi̱ra.
Ná ndakaʼányó xa̱ʼa̱ ña̱yóʼo
¿Ndáa ki̱ʼva náʼa̱yó ña̱ kándíxayó ta̱ Jesús?
¿Á kúni̱ún na̱ʼún nu̱ú Jehová ta saátu ta̱ Jesús ña̱ ndáyáʼviní ña̱ ke̱ʼéna xa̱ʼún? ¿Ndáa ki̱ʼva kúni̱ún keʼúnña?
¿Nda̱chun ndáyáʼviní ña̱ ku̱ʼu̱nyó Conmemoración ña̱ ndakaʼányó ña̱ ni̱xi̱ʼi̱ ta̱ Cristo?
NANDUKÚKA XA̱ʼA̱ÑA
Kuniso̱ʼo ndáaña kivi keʼéyó xa̱ʼa̱ ña̱ ni̱xi̱ʼi̱ ta̱ Cristo xa̱ʼa̱yó.
Sakúaʼaka xa̱ʼa̱ ña̱ kándíxayó Ndióxi̱, ta nda̱saa kivi keʼéyóña.
“Ná kandíxayó ña̱ káʼa̱n Jehová” (La Atalaya, tí octubre ku̱i̱ya̱ 2016)
Tá ku̱nda̱a̱-ini iin ñá ñaʼá ña̱ kúni̱ kachi ña̱ ni̱xi̱ʼi̱ ta̱ Jesús xa̱ʼa̱yó na̱samañá ki̱ʼva ña̱ tákuñá. Kaʼvi ña̱ káʼa̱n xa̱ʼa̱ñá “Va̱ása yaku̱a̱ka kúnii̱, ta va̱ʼa íyoi̱ vitin”.
“Biblia chi̱ndeétáʼan xíʼinna ña̱ na̱samana” (La Atalaya, 1 tí agosto ku̱i̱ya̱ 2011)
Koto nda̱chun loʼona xíxi si̱táva̱ʼa ta xíʼina vino tá xíyo Conmemoración.