Ki̱vi̱ Jehová ndáyáʼviníña nu̱úyó

1, 2. ¿Nda̱chun va̱ʼa kúnda̱a̱-iniyó ña̱ ndáyáʼviní ki̱vi̱ Jehová nu̱ú ta̱ Jesús?

ÑA̱ NDÁYÁʼVINÍKA nu̱ú ta̱ Jesús kúú ki̱vi̱ Jehová. Ta̱yóʼo kúú ta̱ nu̱ú ndákiʼin tu̱ʼun Jehová. Nda̱a̱ táki̱ʼva xa̱a̱ ku̱ndaa̱-iniyó nu̱ú artículo ña̱ ni̱ya̱ʼa, nda̱a̱ ni̱xi̱ʼi̱ra xa̱ʼa̱ ki̱vi̱ Jehová ña̱ va̱ʼa ka̱ʼa̱nra ña̱ nda̱a̱ xa̱ʼa̱ra (Mar. 14:36; Heb. 10:​7-9). Tá ná ndiʼi kaʼndachíñura ti̱xin ña̱ mil ku̱i̱ya̱, sandándikóra chiñu yóʼo ndaʼa̱ yivára ña̱ va̱ʼa ndasayi̱i̱kara ki̱vi̱ra (1 Cor. 15:​26-28). Ndiʼi ña̱ ke̱ʼé ta̱ Jesús ta saátu ña̱ keʼéra xa̱ʼa̱ ki̱vi̱ Jehová, náʼa̱ña ña̱ kúʼvi̱ní-inira xínira yivára.

² Ta̱ Jesús ki̱xira nu̱ú ñuʼú yóʼo saáchi mií Jehová chi̱ndaʼá miíra (Juan 5:43; 12:13). Na̱túʼunra xíʼin na̱ discípulora xa̱ʼa̱ ki̱vi̱ yivára (Juan 17:​6, 26). Sa̱náʼa̱ra na̱ yiví ta ni̱na̱ʼa̱ra ña̱ mií Jehová ta̱xi ndee̱ ndaʼa̱ra ña̱ keʼéra milagro (Juan 10:25). Tá ke̱ʼéra iin oración ni̱ka̱ʼa̱nra xa̱ʼa̱ na̱ discípulora ta ni̱ka̱ʼa̱nra xíʼin Jehová: “Kundaa miína xa̱ʼa̱ ki̱vi̱ún” (Juan 17:11). Ña̱kán ki̱vi̱ Jehová xi̱ndayáʼviníña nu̱ú ta̱ Jesús. Ta, ¿nda̱chun káʼa̱n savana ña̱ kúúna cristiano soo kǒo xíni̱na xa̱ʼa̱ Jehová ta ni kǒo xíniñúʼuna ki̱vi̱ra?

3. ¿Ndáaña sakúaʼayó nu̱ú artículo yóʼo?

³ Miíyó na̱ ndásakáʼnu Ndióxi̱ chíkaa̱níyó ndee̱ ña̱ kundiku̱nyó yichi̱ ta̱ Jesús, ña̱kán ndáyáʼvinítu ki̱vi̱ra nu̱ú miíyó (1 Ped. 2:21). Nu̱ú artículo yóʼo sakúaʼayó ndáana kúú na̱ nátúʼun xa̱ʼa̱ “tu̱ʼun va̱ʼa xa̱ʼa̱ Reino Ndióxi̱” ta níʼina ki̱vi̱ Jehová (Mat. 24:14). Saátu kotoyó nda̱chun xíniñúʼu kundayáʼviní ki̱vi̱ Jehová nu̱ú iin tá iin miíyó.

“IIN ÑUU ÑA̱ VA̱ʼA KUNIʼI KI̱VI̱RA”

4. a) ¿Ndáaña ni̱ka̱ʼa̱n ta̱ Jesús xíʼin na̱ discípulora tá kúma̱níka ndikóra chí ndiví? b) ¿Ndáa pregunta kúú ña̱ ndakuiinyó?

⁴ Tá si̱lóʼo kúma̱ní ndikó ta̱ Jesús chí ndiví ni̱ka̱ʼa̱nra xíʼin na̱ discípulora: “Natúʼunndó xa̱ʼíi̱ chí ñuu Jerusalén, xíʼin iníí chí Judea xíʼin Samaria, ta nda̱a̱ iníísaá nu̱ú ñuʼú” (Hech. 1:8). Xa̱ʼa̱ ña̱kán, su̱ví nda̱saa chí Israel natúʼunna xa̱ʼa̱ tu̱ʼun va̱ʼa saáchi tá ná ya̱ʼa tiempo, ndiʼi na̱ yiví na̱ ndóo nu̱ú ñuʼú kivi xa̱a̱na koona discípulo ta̱ Jesús (Mat. 28:​19, 20). Ná kotoyó ña̱ ni̱ka̱ʼa̱n mií ta̱ Jesús: “Natúʼunndó xa̱ʼíi̱”. ¿Á kúni̱ kachi ña̱yóʼo ña̱ iinlá xa̱ʼa̱ ta̱ Jesús xa̱a̱na natúʼunna á xa̱a̱tuna kunda̱a̱-inina xa̱ʼa̱ ki̱vi̱ Jehová? Hechos capítulo 15 chindeétáʼan xíʼinyó ña̱ kunda̱a̱-iniyó xa̱ʼa̱ ña̱yóʼo.

5. ¿Ndáa ki̱ʼva ni̱na̱ʼa̱ na̱ apóstol xíʼin na̱ anciano na̱ ñuu Jerusalén ña̱ ndáyáʼviní kunda̱a̱-inina xa̱ʼa̱ ki̱vi̱ Jehová? (Koto na̱ʼná).

⁵ Tá ku̱i̱ya̱ 49 tiempo vitin, na̱ apóstol xíʼin na̱ anciano na̱ ñuu Jerusalén nda̱kutáʼanna ña̱ va̱ʼa ka̱ʼa̱nna ndáaña xíniñúʼu keʼé na̱ va̱ása kúú judío ña̱ va̱ʼa xa̱a̱na koona cristiano. Tándi̱ʼi ni̱ka̱ʼa̱nna, ta̱ Santiago ñani ndáʼvi ta̱ Jesús ni̱ka̱ʼa̱nra: “Ta̱ Symeón na̱túʼun ndiʼira xíʼinyó xa̱ʼa̱ ña̱ ke̱ʼé Ndióxi̱ ña̱ nda̱kaʼánra xa̱ʼa̱ na̱ inka ñuu ta ti̱xin na̱kán tavára iin ñuu ña̱ va̱ʼa kuniʼi ki̱vi̱ra”. ¿Ndáana kuniʼi ki̱vi̱ra? Ni̱ka̱ʼa̱nra xa̱ʼa̱ ña̱ ni̱ka̱ʼa̱n ta̱ profeta Amós tá ka̱chira: “Xa̱ʼa̱ ña̱kán na̱ yiví na̱ ni̱ndo̱o, vií va̱ʼa ná nandukúna Jehová xíʼin ndiʼi na̱ yiví na̱ inka ñuu, na̱ yiví na̱ níʼi ki̱víi̱. Saá káchi Jehová” (Hech. 15:​14-18). Ña̱kán na̱ xa̱a̱ koo discípulo ta̱ Jesús su̱ví kunda̱a̱ kuití inina xa̱ʼa̱ Jehová chi saátu xa̱a̱na kuniʼina ki̱vi̱ra. Ña̱yóʼo kúni̱ kachiña ña̱ xa̱a̱na sanáʼa̱na na̱ yiví xa̱ʼa̱ ki̱vi̱ Ndióxi̱ ta na̱ yiví xa̱a̱na kunda̱a̱-inina ña̱ níʼiyó ki̱vi̱ra.

6, 7. a) ¿Ndáa xa̱ʼa̱ kúú ña̱ ki̱xi ta̱ Jesús nu̱ú ñuʼú yóʼo? b) Ta, ¿ndáa xa̱ʼa̱ kúú ña̱ ndáyáʼviníka ki̱xira?

⁶ Ná ndakaʼányó chi ki̱vi̱ ta̱ Jesús kúni̱ kachiña “Jehová kúú ta̱ sáka̱ku na̱ yiví”. Ta saá íyovaña, Jehová xi̱niñúʼura ta̱ Jesús ña̱ va̱ʼa sáka̱kura ndiʼi na̱ yiví na̱ kándíxa miíra. Ta̱ Jesús ki̱xira nu̱ú ñuʼú ña̱ ni̱xi̱ʼi̱ra xa̱ʼa̱yó (Mat. 20:28). Xa̱ʼa̱ ña̱ ni̱xi̱ʼi̱ra xa̱ʼa̱yó ndiʼiyó kivi ndoo ku̱a̱chi ta saátu ni̱ʼíyó ña̱ kutakuyó ndiʼi tiempo (Juan 3:16).

⁷ ¿Nda̱chun xi̱niñúʼu kuvi ta̱ Jesús xa̱ʼa̱ na̱ yiví? Xa̱ʼa̱ ña̱ ku̱u chí jardín ña̱ Edén. Nda̱a̱ táki̱ʼva xa̱a̱ sa̱kuaʼayó nu̱ú artículo ña̱ ni̱ya̱ʼa, na̱ nu̱ú yiváyó ta̱ Adán xíʼin ñá Eva kǒo níxiniso̱ʼokana ña̱ ni̱ka̱ʼa̱n Jehová ta kǒo níkivika ni̱ʼína ña̱ kutakuna ndiʼi tiempo (Gén. 3:​6, 24). Soo íyo inka ña̱ ndáyáʼviníka ña̱ xi̱niñúʼu nduvií saáchi ta̱ Ndi̱va̱ʼa ni̱ka̱ʼa̱nra ña̱ vatá xa̱ʼa̱ Jehová (Gén. 3:​4, 5). Soo su̱ví kuití ña̱ sa̱kákuna na̱ se̱ʼé ta̱ Adán xíʼin ñá Eva kúú ña̱ ki̱xi ta̱ Jesús xa̱ʼa̱, chi saátu ki̱xira ña̱ nda̱sayi̱i̱ra ki̱vi̱ Jehová. Iinlá ta̱ Jesús kúú ta̱ va̱ʼaní ni̱na̱ʼa̱ ña̱yóʼo saáchi na̱túʼunra ña̱ nda̱a̱ xa̱ʼa̱ Jehová ta ke̱ʼéra ndiʼi ña̱ ni̱ka̱ʼa̱nra xíʼinra.

8. Ndiʼi na̱ ni̱xa̱a̱ nda̱kundiku̱n ta̱ Jesús, ¿ndáaña xi̱niñúʼu kunda̱a̱-inina ta kandíxana?

⁸ Ndiʼi na̱ ni̱xa̱a̱ nda̱kundiku̱n ta̱ Jesús ni xi̱kuuna judío á na̱ inka ñuu xi̱niñúʼu kunda̱a̱-inina ta kandíxana ña̱ ta̱ saka̱ku miína kúú Jehová yivá ta̱ Jesús (Juan 17:3). Nda̱a̱ táki̱ʼva ni̱xi̱yo ta̱ Jesús saátu na̱yóʼo xi̱niñúʼu kuniʼina ki̱vi̱ Jehová. Saátu xi̱niñúʼu kunda̱a̱-inina ña̱ ndáyáʼviní ndasayi̱i̱na ki̱vi̱ Jehová saáchi ta̱yóʼo kúú ta̱ saka̱ku miína (Hech. 2:​21, 22). Ndiʼi na̱ discípulo ta̱ Jesús xi̱niñúʼu sakúaʼana xa̱ʼa̱ Jehová ta saátu xa̱ʼa̱ miíra. Xa̱ʼa̱ ña̱kán ta̱ Jesús ni̱ka̱ʼa̱nra tu̱ʼun yóʼo tá ke̱ʼéra oración ña̱ va̱xi nu̱ú Juan capítulo 17: “Na̱túʼi̱n xa̱ʼa̱ ki̱vi̱ún xíʼinna ta natúʼunkavai̱ xa̱ʼa̱ña, ña̱ va̱ʼa ná kuʼvi̱-inina kunina inka na̱ yiví nda̱a̱ táki̱ʼva ni̱kuʼvi̱-iniún xi̱niún yi̱ʼi̱ ta va̱ʼa inkáchi kutáʼi̱n xíʼinna” (Juan 17:26).

“NDÓʼÓ KÚÚNDÓ TESTIGOI̱”

9. ¿Ndáa ki̱ʼva kivi na̱ʼa̱yó ña̱ ndáyáʼviní ki̱vi̱ Jehová nu̱úyó?

⁹ Nda̱a̱ táki̱ʼva xa̱a̱ ku̱ndaa̱-iniyó, ña̱ nduyi̱i̱ ki̱vi̱ Jehová xíniñúʼu kundayáʼviníña nu̱ú miíyó na̱ ndixa ndásakáʼnu Ndióxi̱ (Mat. 6:​9, 10). Nu̱ú miíyó iinlá ki̱vi̱ Jehová kúú ña̱ káʼnuníka ta ndáyáʼviníña nu̱úyó. Ta xíniñúʼu na̱ʼa̱yóña xíʼin ña̱ kéʼéyó. ¿Ndáaña xíniñúʼu keʼéyó ña̱ va̱ʼa ndasayi̱i̱yó ki̱vi̱ Jehová ta saá na̱ʼa̱yó ña̱ ni̱ka̱ʼa̱n ta̱ Ndi̱va̱ʼa xa̱ʼa̱ra ña̱ vatá kúúña?

10. Nda̱a̱ táki̱ʼva káchi Isaías 42 nda̱a̱ 44, ¿ndáaña káʼa̱n Jehová xíʼin na̱ yiví keʼéna xa̱ʼa̱ ndióxi̱na? (Isaías 43:9; 44:​7-9; koto na̱ʼná).

¹⁰ Nu̱ú Isaías capítulo 42 nda̱a̱ 44 káʼa̱nña ndáaña xíniñúʼu keʼéyó ña̱ va̱ʼa ndasayi̱i̱yó ki̱vi̱ Jehová. Nu̱ú capítulo yóʼo Jehová káʼa̱nra xíʼin na̱ yiví na̱ kǒo ndásakáʼnu miíra ña̱ ná na̱ʼa̱na ña̱ ndióxi̱ ña̱ ndásakáʼnuna ndixa íyoña ta saátu káʼa̱nra ña̱ ná koo na̱ testigo na̱ ka̱ʼa̱n ña̱ ndixa íyona soo nda̱a̱ ni iinna kǒo kúchiñu na̱ʼa̱ ña̱yóʼo (kaʼvi Isaías 43:9;a 44:​7-9).b

11. Nda̱a̱ táki̱ʼva káchi Isaías 43:​10-12, ¿ndáaña káʼa̱n Jehová xíʼin na̱ ndásakáʼnu miíra?

¹¹ (Kaʼvi Isaías 43:​10-12).c Jehová káʼa̱nra xíʼin na̱ ndásakáʼnu miíra: “Ndóʼó kúúndó testigoi̱ [...], ta yi̱ʼi̱ kúú Ndióxi̱ndó”. Ta káʼa̱nra xíʼinna ña̱ ná ndakuiinna pregunta yóʼo: “¿Á íyo inka Ndióxi̱ ta̱ íyo táki̱ʼva íyo yi̱ʼi̱?” (Is. 44:8). Miíyó kivi ndakuiinyó pregunta yóʼo xíʼin ki̱ʼva ña̱ kéʼéyó ta saátu ña̱ káʼa̱nyó. Náʼa̱yó ña̱ iinlá Jehová kúú Ndióxi̱ ta̱ nda̱a̱ ta iinlá ki̱vi̱ ta̱yóʼo kúú ña̱ ndáyáʼviníka nu̱úyó. Ta xíʼin ki̱ʼva ña̱ tákuyó náʼa̱yó ña̱ xíʼin ndinuʼu-iniyó kúʼvi̱-iniyó xíniyó Jehová, ni yo̱ʼvi̱ní prueba chíndúʼú ta̱ Ndi̱va̱ʼa nu̱úyó ni saá nda̱kúní íyo iniyó xíʼin Jehová. Saá kúú ña̱ ndásayi̱i̱yó ki̱vi̱ra.

12. ¿Ndáa ki̱ʼva ni̱xi̱nu profecía ña̱ va̱xi nu̱ú Isaías 40:​3, 5?

¹² Ta Isaías ni̱ka̱ʼa̱nra ña̱ koo na̱ ndasavií “yichi̱ Jehová” (Is. 40:3). ¿Ndáa ki̱ʼva ni̱xi̱nu profecía yóʼo? Ta̱ Juan ta̱ xi̱sandákuchi na̱ yiví, nda̱saviíra yichi̱ ña̱ va̱ʼa kixi ta̱ Jesús ta̱ nda̱kaxin mií Ndióxi̱ ta ta̱yóʼo na̱túʼunra xa̱ʼa̱ Jehová (Mat. 3:3; Mar. 1:​2-4; Luc. 3:​3-6). Ta̱ Isaías ni̱ka̱ʼa̱ntura: “Ndiʼina kunina ndee̱ ña̱ kúúmií Jehová” (Is. 40:5). ¿Ndáa ki̱ʼva ni̱xi̱nu tu̱ʼun yóʼo? Tá ki̱xi ta̱ Jesús nu̱ú ñuʼú yóʼo va̱ʼaní ni̱na̱ʼa̱ra ña̱ va̱ʼa ña̱ kúúmií yivára, nda̱a̱ táki̱ʼva íyo ña̱ mií Jehová kúú ta̱ ki̱xi (Juan 12:45).

13. ¿Ndáa ki̱ʼva kivi kundiku̱nyó yichi̱ ta̱ Jesús?

¹³ Tá káʼa̱nyó ña̱ nda̱a̱ xa̱ʼa̱ ki̱vi̱ Jehová ndíku̱nyó yichi̱ ta̱ Jesús. Kúúyó testigo Jehová saáchi níʼiyó ki̱vi̱ra ta nátúʼunyó xíʼin na̱ yiví xa̱ʼa̱ ndiʼi ña̱ʼa ña̱ liviní ke̱ʼéra. Soo ña̱ va̱ʼa vií sáxi̱nuyó chiñu yóʼo saátu xíniñúʼu ka̱ʼa̱nyó xa̱ʼa̱ ndiʼi ña̱ ke̱ʼé ta̱ Jesús xíʼin ña̱ keʼéra chí nu̱únínu ña̱ va̱ʼa ndasayi̱i̱ra ki̱vi̱ Jehová (Hech. 1:8). Ta̱ Jesús kúú testigo mií Jehová ta̱ ndáyáʼviní ta miíyó ndíku̱nyó yichi̱ra (Apoc. 1:5). ¿Ndáa inka ki̱ʼva kivi na̱ʼa̱yó ña̱ ndáyáʼviní ki̱vi̱ Jehová nu̱úyó?

¿NDA̱CHUN NDÁYÁʼVINÍ KI̱VI̱ JEHOVÁ NU̱ÚYÓ?

14. Nda̱a̱ táki̱ʼva káchi Salmo 105:​3, ¿ndáa ki̱ʼva íyo ki̱vi̱ Jehová nu̱ú miíyó?

¹⁴ Ndáyáʼviní ki̱vi̱ Jehová nu̱úyó (kaʼvi Salmo 105:3).d Jehová kúsi̱íní-inira tá káʼa̱nyó xa̱ʼa̱ ki̱vi̱ra (Jer. 9:​23, 24; 1 Cor. 1:31; 2 Cor. 10:17). Ña̱ ka̱ʼa̱nyó xa̱ʼa̱ Jehová kúni̱ kachiña ña̱ kúsi̱íní-iniyó ña̱ kúúra Ndióxi̱yó. Nu̱ú miíyó iin ña̱ ndáyáʼviní kúú ña̱ ndasakáʼnuyó ki̱vi̱ Jehová ta saátu ña̱ ndasayi̱i̱yóña. Nda̱a̱ ni iin yichi̱ va̱ása xíniñúʼu kukaʼan nu̱úyó xa̱ʼa̱ ña̱ kúúyó testigo Jehová ni kúúña nu̱ú káchíñuyó á nu̱ú xáʼa̱nyó escuela á ñuu nu̱ú íyoyó á nda̱a̱ ndáaka nu̱ú xíkayó. Ta̱ Ndi̱va̱ʼa kúni̱ra ña̱ ná va̱ása natúʼunkayó xa̱ʼa̱ Jehová (Jer. 11:21; Apoc. 12:17). Miíra xíʼin na̱ kítáʼan xíʼinra kúni̱na ña̱ ná nandóso-ini na̱ yiví xa̱ʼa̱ ki̱vi̱ Jehová (Jer. 23:​26, 27). Soo miíyó kúʼvi̱ní-iniyó xíniyóra ta kúni̱yó ndasakáʼnuyó ki̱vi̱ra ndiʼi ki̱vi̱ (Sal. 5:11; 89:16).

15. ¿Ndáaña kúni̱ kachi ña̱ ka̱ʼa̱nyó xa̱ʼa̱ ki̱vi̱ Jehová?

¹⁵ Ná ka̱ʼa̱nkayó xa̱ʼa̱ ki̱vi̱ Jehová (Joel 2:32; Rom. 10:​13, 14). Ña̱ ka̱ʼa̱nyó xa̱ʼa̱ ki̱vi̱ Jehová va̱ása kúni̱ kachiña ña̱ kuxini̱yó ki̱vi̱ra ta kuniñúʼuyóña chi xíniñúʼu kuxiniva̱ʼayóra, kundaa-iniyóra ta tá yáʼayó nu̱ú tu̱ndóʼo ka̱ʼa̱nyó xíʼinra ña̱ ná chindeétáʼanra xíʼinyó ta ná kuniʼira yichi̱ nu̱úyó (Sal. 20:7; 99:6; 116:4; 145:18). Ta saátu natúʼunyó xíʼin na̱ yiví xa̱ʼa̱ ki̱vi̱ra xíʼin ña̱ va̱ʼa ña̱ kúúmiíra ta chindeétáʼanyó xíʼinna ña̱ ná ndikó-inina ta nasamana ña̱ kéʼéna ta saá kusi̱í-ini Jehová xíʼinna (Is. 12:4; Hech. 2:​21, 38).

16. ¿Ndáa ki̱ʼva kivi na̱ʼa̱yó ña̱ vatá kúú ña̱ ka̱ʼa̱n ta̱ Ndi̱va̱ʼa?

¹⁶ Ni ná ya̱ʼayó nu̱ú tu̱ndóʼo ndasakáʼnukavayó Jehová (Sant. 5:​10, 11). Tá nda̱kú íyo iniyó xíʼin Jehová ni yáʼayó nu̱ú tu̱ndóʼo ña̱ yo̱ʼvi̱ní, náʼa̱yó ña̱ vatá kúú ña̱ káʼa̱n ta̱ Ndi̱va̱ʼa. Tiempo ña̱ ni̱xi̱yo ta̱ Job, ta̱ Ndi̱va̱ʼa ni̱ka̱ʼa̱nra ña̱yóʼo xa̱ʼa̱ ndiʼi na̱ ndásakáʼnu Ndióxi̱: “Ndiʼi ña̱ kúúmií na̱ yiví taxinaña xa̱ʼa̱ ña̱ kúni̱na kutakuna” (Job 2:4). Ña̱ xi̱kuni̱ kachira kúú ña̱ na̱ yiví ndasakáʼnuna Jehová nani kǒo nda̱a̱ ni iin ña̱ʼa ndóʼona soo tá ná ya̱ʼana nu̱ú tu̱ndóʼo va̱ása ndasakáʼnukanara. Soo ña̱ nda̱kú ni̱xi̱yo ini ta̱ Job ni̱na̱ʼa̱ra ña̱ vatá kúú ña̱ ni̱ka̱ʼa̱n ta̱ Ndi̱va̱ʼa. Ta saátu miíyó ni yáʼayó nu̱ú prueba íxaa ta̱ Ndi̱va̱ʼa, va̱ása ndakooyó ña̱ ndasakáʼnuyó Jehová. Kándíxaníyó ña̱ mií Jehová kundaara miíyó xa̱ʼa̱ ña̱ ndásakáʼnuyóra (Juan 17:11).

17. Táki̱ʼva káʼa̱n 1 Pedro 2:​12, ¿ndáa inka ki̱ʼva kivi ndasakáʼnuyó ki̱vi̱ Jehová?

¹⁷ Náʼa̱yó ña̱ íxato̱ʼóyó ki̱vi̱ Jehová (Prov. 30:9; Jer. 7:​8-11). Xa̱ʼa̱ ña̱ níʼiyó ki̱vi̱ Jehová ta káʼa̱nyó xa̱ʼa̱ra, xíʼin ña̱ kéʼéyó kivi ndasakáʼnuyó á kivi ixayaku̱ayó ki̱vi̱ra (kaʼvi 1 Pedro 2:12). Ña̱kán kúni̱yó ndasakáʼnuyó Jehová xíʼin ndiʼi ña̱ káʼa̱nyó ta saátu ña̱ kéʼéyó ni kúúyó na̱ yiví ku̱a̱chi kiviva ndasakáʼnuyó ki̱vi̱ Jehová.

18. ¿Ndáa inka ki̱ʼva kivi na̱ʼa̱yó ña̱ ndáyáʼviní ki̱vi̱ Jehová nu̱úyó? (Saátu koto nota).

¹⁸ Ndáyáʼviníka ña̱ ka̱ʼa̱n va̱ʼana xa̱ʼa̱ ki̱vi̱ Jehová nu̱úka miíyó (Sal. 138:2). ¿Nda̱chun káʼa̱nyó ña̱yóʼo? Xa̱ʼa̱ ña̱ kúʼvi̱ní-iniyó xíniyó ki̱vi̱ Jehová kéʼéyó ndiʼi ña̱ kútóora. Xa̱ʼa̱ ña̱ kéʼéyó ndiʼi ña̱yóʼo na̱ yiví kúsi̱kindaana miíyó ta káʼa̱n kúáchina xa̱ʼa̱yó.e Ta̱ Jesús nda̱a̱ chi̱kaa̱-inira kuvira ta ke̱ʼéna xíʼinra nda̱a̱ táki̱ʼva kéʼéna xíʼin iin ta̱ kui̱ʼná xa̱ʼa̱ ña̱ kúni̱ra ña̱ ná nduyi̱i̱ ki̱vi̱ Jehová. Nda̱a̱ táki̱ʼva káchi Hebreos 12:​2-4, “kǒo níndi̱ʼi̱-inira xa̱ʼa̱ ña̱ kukaʼan nu̱úra”, ña̱yóʼo kúni̱ kachiña ña̱ kǒo níndi̱ʼi̱-inira xa̱ʼa̱ ndáaña ndakanixi̱ní inkana xa̱ʼa̱ra chi ña̱ ni̱ndi̱ʼi̱ka-inira xa̱ʼa̱ kúú ña̱ keʼéra chiñu nu̱ú Ndióxi̱ (Mat. 26:39).

19. ¿Ndáaña ndákanixi̱níún xa̱ʼa̱ ki̱vi̱ Jehová ta nda̱chun?

¹⁹ Kúsi̱íní-iniyó ña̱ níʼiyó ki̱vi̱ Jehová ta saátu ña̱ ndákuni na̱ yiví miíyó ña̱ kúúyó testigora. Ña̱kán va̱ása ndíʼi̱-iniyó ña̱ kúsi̱kindaana miíyó á ña̱ káʼa̱n kúáchina xa̱ʼa̱yó. Ndáyáʼviníka ña̱ ka̱ʼa̱n va̱ʼana xa̱ʼa̱ ki̱vi̱ Jehová nu̱úka ña̱ ka̱ʼa̱n va̱ʼana xa̱ʼa̱ miíyó. Xa̱a̱ chi̱kaa̱va-iniyó ña̱ ndasakáʼnuyó Jehová ni nda̱a̱ ndáaka prueba ná chindúʼú ta̱ Ndi̱va̱ʼa nu̱úyó. Tá ná keʼéyó nda̱a̱ táki̱ʼva ke̱ʼé ta̱ Jesús na̱ʼa̱yó ña̱ ndáyáʼviní ki̱vi̱ Jehová nu̱úyó.