ဗျာဒိတ်

၁၉ ဤအရာများပြီးနောက် ကောင်းကင်ဘုံမှ ပရိသတ်ကြီး၏အသံနှင့်တူသော ကျယ်သောအသံကို ငါကြား၏။ သူတို့က “အသင် လူအပေါင်းတို့၊ ယ ကိုချီးမွမ်းကြလော့။* ငါတို့၏ ဘုရားသခင်သည် ကယ်တင်ခြင်း၊ ဘုန်းတော်နှင့် တန်ခိုးတော်တို့ကို ပိုင်တော်မူ၏။ ၂ အကြောင်းမူကား ကိုယ်တော်၏ တရားစီရင်ချက်များသည် မှန်ကန်ဖြောင့်မတ်ပါ၏။ ပြည့်တန်ဆာမကြီးသည် မိမိ၏ မတရားမေထုန်ဖြင့် မြေကြီးကို ပုပ်ပျက်စေသဖြင့် သူ့ကို ကိုယ်တော် ပြစ်ဒဏ်စီရင်တော်မူပြီ။ မိမိကျွန်တို့၏ သွေးအတွက် သူ့ကို လက်စားချေတော်မူပြီ” ဟုပြောဆိုကြ၏။ ၃ ထို့နောက် သူတို့က “အသင်လူအပေါင်းတို့၊ ယ ကိုချီးမွမ်းကြလော့။ ထိုမြို့မှမီးခိုးသည် အစဉ်ထာဝရ အထက်သို့ တက်လျက်ရှိ၏” ဟု ဒုတိယအကြိမ် ချက်ချင်းဆိုကြ၏။

၄ ထိုအခါ အကြီးအကဲ နှစ်ဆယ့်လေးပါးနှင့် သက်ရှိသတ္တဝါလေးပါးတို့က ပလ္လင်တော်ပေါ်တွင် ထိုင်နေသော ဘုရားသခင်အား ပျပ်ဝပ်ကိုးကွယ်လျက် “အာမင်။ အသင်လူအပေါင်းတို့၊ ယ ကိုချီးမွမ်းကြလော့” ဟုဆိုကြ၏။

၅ ထို့ပြင် ပလ္လင်တော်မှ ထွက်လာသော အသံက “ဘုရားသခင်အား ကြောက်ရွံ့သော အသင်ကျွန် အကြီးအငယ်အပေါင်းတို့၊ ငါတို့၏ ဘုရားသခင်အား ချီးမွမ်းကြလော့” ဟုဆို၏။

၆ ထို့နောက် ပရိသတ်ကြီး၏အသံနှင့်တူသော အသံ၊ စီးဆင်းနေသောရေထု၏ အသံနှင့်တူသောအသံ၊ ပြင်းထန်သော မိုးခြိမ်းသံနှင့်တူသော အသံတို့က ဤသို့ဆိုသည်ကို ငါကြား၏။ “အသင်လူအပေါင်းတို့၊ ယ ကိုချီးမွမ်းကြလော့။ အကြောင်းမူကား ငါတို့၏ ဘုရားသခင်၊ အနန္တတန်ခိုးရှင် ယေဟောဝါသည် ဘုရင်အဖြစ် စတင်စိုးစံတော်မူပြီ။ ၇ ငါတို့သည် ဝမ်းမြောက်၍ အလွန်ရွှင်လန်းကြစို့။ ဘုရားသခင်၏ ဘုန်းတော်ကို ချီးမွမ်းကြစို့။ အကြောင်းမူကား သိုးသငယ်၏ ထိမ်းမြားမင်္ဂလာပွဲ ရောက်ပြီဖြစ်၍ ကိုယ်တော်၏ဇနီးသည် မိမိကိုယ်ကို အသင့်ပြင်ဆင်ထားလေပြီ။ ၈ မှန်ပေသည်၊ သူသည် တောက်ပသန့်စင်သော ချည်ချောထည်ကို ဆင်မြန်းခွင့်ရ၏။ အကြောင်းမူကား ချည်ချောထည်သည် သန့်ရှင်းသူတို့၏ ဖြောင့်မတ်သော လုပ်ဆောင်မှုများကို ကိုယ်စားပြု၏။”

၉ ထို့နောက် သူက “ရေးမှတ်လော့။ သိုးသငယ်၏ ထိမ်းမြားမင်္ဂလာ ညစာစားပွဲသို့ ဖိတ်ကြားခံရသူတို့သည် ပျော်ရွှင်ကြ၏” ဟုငါ့အားဆို၏။ ထို့ပြင် “ဤကား ဘုရားသခင်၏မိန့်ဆိုချက် အစစ်အမှန်ဖြစ်၏” ဟူ၍လည်း ငါ့အားဆို၏။ ၁၀ ထိုအခါ၊ ငါသည် သူ၏ခြေရင်း၌ ပျပ်ဝပ်၍ သူ့အား ကိုးကွယ်လေ၏။ သို့သော် သူက “သတိထားလော့။ ဤသို့မပြုနှင့်။ ငါသည် သင်၏ကျွန်ချင်း၊ ယေရှုအကြောင်း သက်သေခံသော သင့်ညီအစ်ကိုများ၏ ကျွန်ချင်းသာဖြစ်၏။ ဘုရားသခင်အား ကိုးကွယ်လော့။ အကြောင်းမူကား ပရောဖက်ပြုရသည့် ရည်ရွယ်ချက်သည် ယေရှုအကြောင်း သက်သေခံရန်ဖြစ်၏” ဟုဆို၏။

၁၁ ထို့နောက် ကောင်းကင်ပွင့်၍ မြင်းဖြူတစ်စီးကို ငါမြင်၏။ မြင်းစီးသူသည် သစ္စာရှိ၍ စစ်မှန်သောအရှင် ဟုခေါ်ဆိုခံရ၏။ ကိုယ်တော်သည် ဖြောင့်မတ်စွာ တရားစီရင်၍ စစ်တိုက်တော်မူ၏။ ၁၂ မျက်စိတော်သည် မီးလျှံဖြစ်၍ ဦးခေါင်းတော်၌ သရဖူများစွာ ဆောင်းထား၏။ ကိုယ်တော်၌ မိမိမှတစ်ပါး အခြားမည်သူမျှမသိသော ရေးမှတ်ထားသည့် နာမတစ်ခုရှိ၏။ ၁၃ ကိုယ်တော်သည် သွေးစဉ်ထားသော ဝတ်ရုံကို ဝတ်ဆင်ထား၏။ ဘုရားသခင်၏နှုတ်ကပါဌ်တော်ဟူသော နာမဖြင့် ခေါ်ဆိုခံရ၏။ ၁၄ ထို့ပြင် ကောင်းကင်ဗိုလ်ခြေတို့လည်း မြင်းဖြူများကိုစီးလျက် နောက်တော်သို့ လိုက်ကြ၏။ သူတို့သည် ဖြူစင်သော ချည်ချောထည်ကို ဝတ်ဆင်ထားကြ၏။ ၁၅ လူမျိုးများကို တိုက်ခိုက်ရန် ခံတွင်းတော်မှ ထက်သောဓားရှည် ထိုးထွက်လျက်ရှိပြီး ကိုယ်တော်သည် ထိုသူတို့ကို သံလှံတံဖြင့် ထိန်းကျောင်းတော်မူမည်။ ကိုယ်တော်သည် အနန္တတန်ခိုးရှင် ဘုရားသခင်၏ အမျက်ဒေါသစပျစ်ကျင်းကိုလည်း နင်းနယ်တော်မူ၏။ ၁၆ ဝတ်ရုံတော်နှင့် ပေါင်တော်ပေါ်တွင် ဘုရင်တကာတို့၏ဘုရင်၊ သခင်တကာတို့၏သခင် ဟူသောနာမ ရေးထားလျက်ရှိ၏။

၁၇ ထို့နောက် နေထဲ၌ရပ်နေသော ကောင်းကင်တမန်တစ်ပါးကိုလည်း ငါမြင်၏။ သူသည် ကောင်းကင်အလယ်တွင် ပျံသန်းနေသော ငှက်အပေါင်းတို့အား “ဤနေရာသို့ လာကြ။ ဘုရားသခင်၏ ညစာစားပွဲကြီးသို့ စုဝေးကြ။ ၁၈ သင်တို့သည် ရှင်ဘုရင်တို့၏အသား၊ တပ်မှူးတို့၏အသား၊ ခွန်အားကြီးသူတို့၏အသား၊ မြင်းနှင့်မြင်းစီးသူရဲတို့၏အသား၊ လွတ်လပ်သူများ၊ ကျွန်များမှစ၍ လူအကြီးအငယ် အားလုံးတို့၏အသားကို စားကြရမည်” ဟုကျယ်သောအသံဖြင့် ကြွေးကြော်လေ၏။

၁၉ ထို့နောက် သားရဲမှစ၍ မြေကြီးဘုရင်များနှင့် သူတို့၏တပ်များသည် မြင်းစီးသူနှင့် သူ၏တပ်များကို စစ်တိုက်ရန် စုရုံးကြသည်ကို ငါမြင်၏။ ၂၀ သားရဲသည် အဖမ်းခံရ၏။ သားရဲ၏ အမှတ်တံဆိပ်ကိုခံသူများနှင့် သူ၏ရုပ်တုကို ကိုးကွယ်သူများအား လှည့်ဖြားရန် သားရဲ၏ရှေ့၌ နိမိတ်လက္ခဏာကိုပြသော ပရောဖက်အတုအယောင်သည်လည်း သားရဲနှင့်အတူ အဖမ်းခံရ၏။ သူတို့နှစ်ဦးစလုံးသည် ကန့်နှင့်လောင်သော မီးအိုင်ထဲသို့ အရှင်လတ်လတ် ပစ်ချခံရ၏။ ၂၁ ကျန်သောသူများမှာမူ မြင်းစီးသူ၏ ခံတွင်းမှထွက်သော ဓားရှည်ဖြင့် ကွပ်မျက်ခံရ၏။ ငှက်အပေါင်းတို့သည် သူတို့၏အသားကို ဝစွာစားကြ၏။