၁ ကောရိန္သု
၁၂ ညီအစ်ကိုတို့၊ ဘုရားသခင်ဆီက ဆုကျေးဇူးတွေအကြောင်း+ ခင်ဗျားတို့ကို မသိဘဲ မနေစေချင်ပါဘူး။ ၂ ခင်ဗျားတို့ဟာ ယုံကြည်သူတွေ မဖြစ်လာခင်တုန်းက စကားမပြောနိုင်တဲ့ ရုပ်တုတွေကို ကိုးကွယ်ခဲ့ကြတယ်+ မဟုတ်လား။ ရုပ်တုတွေ ခေါ်ဆောင်ရာနောက် တကောက်ကောက်လိုက်ပြီး လမ်းလွဲခဲ့ကြတယ် မဟုတ်လား။ ၃ ဘုရားသခင့် စွမ်းအားတော်ကို အမှီပြုရင် “ယေရှုဟာ ကျိန်ခြင်းခံရတယ်” လို့ ဘယ်သူမှ ပြောမှာမဟုတ်ဘူး။ အလားတူ၊ သန့်ရှင်းသော စွမ်းအားတော်ကို အမှီမပြုရင် “ယေရှုဟာ သခင်ပဲ” လို့ ဘယ်သူမှ မပြောနိုင်မှန်း+ ခင်ဗျားတို့ကို ကျွန်တော် သိစေချင်တယ်။
၄ ဆုကျေးဇူး အမျိုးမျိုးရှိတယ်။ ဒါပေမဲ့ စွမ်းအားတော်ကတော့ တစ်မျိုးတည်းပဲ။+ ၅ အမှုဆောင်လုပ်ငန်း အမျိုးမျိုးရှိတယ်။+ ဒါပေမဲ့ အားလုံးဟာ သခင်တစ်ဦးတည်းအတွက်ပဲ။ ၆ လုပ်ဆောင်မှု အမျိုးမျိုးရှိတယ်။ ဒါပေမဲ့ လူအသီးသီးကို အဲဒါတွေ လုပ်ဆောင်စေတဲ့ ဘုရားသခင် တစ်ဆူတည်းရှိတယ်။+ ၇ ဒါပေမဲ့ စွမ်းအားတော်က သူတို့ကို အဲဒီလိုလုပ်ဆောင်စေနိုင်မှန်း ထင်ရှားတယ်။ ဘုရားသခင်က သူတို့ကို အများကောင်းကျိုး လုပ်ဆောင်စေဖို့ စွမ်းအားတော် ပေးထားတယ်။+ ၈ ဘုရားသခင့် စွမ်းအားတော်ကြောင့် လူတစ်ယောက်က ဉာဏ်ပညာစကားကို ပြောနိုင်တယ်။ အဲဒီစွမ်းအားတော်ကြောင့်ပဲ နောက်တစ်ယောက်က အသိပညာစကားကို ပြောနိုင်တယ်။ ၉ အဲဒီစွမ်းအားတော်ကြောင့်ပဲ နောက်တစ်ယောက်က ယုံကြည်ခြင်း+ ရှိလာတယ်။ အဲဒီစွမ်းအားတော်ကြောင့်ပဲ နောက်တစ်ယောက်က ရောဂါကုသပေးနိုင်တယ်။+ ၁၀ တစ်ယောက်က တန်ခိုးပြနိုင်တဲ့အခွင့်၊+ တစ်ယောက်က ပရောဖက်ပြုနိုင်တဲ့အခွင့်၊ တစ်ယောက်က သတင်းစကားတွေကို ပိုင်းခြားသိမြင်နိုင်တဲ့အခွင့်၊+ တစ်ယောက်က ဘာသာစကားအမျိုးမျိုး ပြောဆိုနိုင်တဲ့အခွင့်၊+ တစ်ယောက်က ဘာသာပြန်ဆိုနိုင်တဲ့အခွင့်ကို ရတယ်။+ ၁၁ အဲဒီစွမ်းအားတော်ကပဲ ဒီအခွင့်အားလုံးကို လုပ်ဆောင်ပြီး အလိုရှိတဲ့အတိုင်း တစ်ဦးချင်းစီကို အဲဒီအခွင့်တွေ ဝေမျှပေးတယ်။
၁၂ ခန္ဓာကိုယ်ဟာ တစ်ခုတည်းဖြစ်ပေမဲ့ အစိတ်အပိုင်းတွေ အများကြီးရှိတယ်။ အစိတ်အပိုင်းတွေ အများကြီးရှိပေမဲ့ ခန္ဓာကိုယ်ကတော့ တစ်ခုတည်းပဲ။+ ခရစ်တော်ရဲ့ ခန္ဓာကိုယ်လည်း အဲဒီအတိုင်းပါပဲ။ ၁၃ ဘာလို့လဲဆိုတော့ ဂျူးဖြစ်စေ၊ ဂရိဖြစ်စေ၊ ကျွန်ဖြစ်စေ၊ လူလွတ်ဖြစ်စေ ကျွန်တော်တို့အားလုံးဟာ ခန္ဓာကိုယ်တစ်ခုတည်း ဖြစ်လာအောင် စွမ်းအားတော် တစ်မျိုးတည်းနဲ့ နှစ်ခြင်းခံထားလို့ပဲ၊ ကျွန်တော်တို့အားလုံး အဲဒီစွမ်းအားတော်ကို ရရှိထားတယ်။
၁၄ ခန္ဓာကိုယ်မှာ အစိတ်အပိုင်းတစ်ခုမက အများကြီးရှိတယ်။+ ၁၅ ခြေထောက်က “ငါက လက်မှ မဟုတ်တာ။ ခန္ဓာကိုယ်နဲ့ မဆိုင်ဘူး” လို့ပြောရင် အဲဒီလိုပြောတဲ့အတွက် ခန္ဓာကိုယ်နဲ့မဆိုင်တော့တာ မဟုတ်ဘူး။ ၁၆ နားကလည်း “ငါက မျက်စိမှ မဟုတ်တာ။ ခန္ဓာကိုယ်နဲ့ မဆိုင်ဘူး” လို့ပြောရင် အဲဒီလိုပြောတဲ့အတွက် ခန္ဓာကိုယ်နဲ့ မဆိုင်တော့တာ မဟုတ်ဘူး။ ၁၇ တစ်ကိုယ်လုံးဟာ မျက်စိဖြစ်နေရင် ဘယ်လိုကြားနိုင်မှာလဲ။ တစ်ကိုယ်လုံးဟာ နားဖြစ်နေရင် ဘယ်လို အနံ့ခံနိုင်မှာလဲ။ ၁၈ အခုတော့ ဘုရားသခင်က အလိုရှိတဲ့အတိုင်း ခန္ဓာကိုယ်အစိတ်အပိုင်းတွေကို သူ့နေရာနဲ့သူ ထားပေးတယ်။
၁၉ အစိတ်အပိုင်းအားလုံးက တစ်မျိုးတည်းဖြစ်နေရင် ခန္ဓာကိုယ် ဘယ်ရှိတော့မလဲ။ ၂၀ အခုတော့ အစိတ်အပိုင်းတွေ အများကြီးရှိပေမဲ့ ခန္ဓာကိုယ်ကတော့ တစ်ခုတည်းရှိတယ်။ ၂၁ မျက်စိက လက်ကို “မင်းကို ငါမလိုအပ်ဘူး” လို့ ပြောလို့မရဘူး။ ဦးခေါင်းကလည်း ခြေထောက်ကို “မင်းကို ငါမလိုအပ်ဘူး” လို့ ပြောလို့မရဘူး။ ၂၂ သိပ်အရေးမပါဘူးထင်ရတဲ့ ခန္ဓာကိုယ် အစိတ်အပိုင်းတွေဟာ တကယ်တော့ မရှိလို့မဖြစ်ဘူး။ ၂၃ အသရေ သိပ်မရှိဘူးလို့ ထင်ရတဲ့ ခန္ဓာကိုယ်အစိတ်အပိုင်းတွေကို ပိုလို့တောင် ဂရုစိုက်ကြတယ်။ သိပ်ကြည့်မကောင်းဘူးလို့ ထင်ရတဲ့ ခန္ဓာကိုယ် အစိတ်အပိုင်းတွေကို ပိုကြည့်ကောင်းအောင် အလှဆင်ကြတယ်။+ ၂၄ တင့်တယ်ပြီးသား ခန္ဓာကိုယ် အစိတ်အပိုင်းတွေကတော့ အလှဆင်စရာ မလိုဘူး။ ဒါပေမဲ့ ဘုရားသခင်က အသရေနည်းတဲ့ ခန္ဓာကိုယ် အစိတ်အပိုင်းတွေကို အသရေပိုရှိစေဖို့ ခန္ဓာကိုယ် အစိတ်အပိုင်းတွေကို ပေါင်းစပ်ပေးထားတယ်။ ၂၅ ဒါကြောင့် ခန္ဓာကိုယ် အစိတ်အပိုင်း အချင်းချင်း ကွဲပြားမှုမရှိတော့ဘူး။ အစိတ်အပိုင်းတွေဟာ အပြန်အလှန် ဂရုစိုက်ရမယ်။+ ၂၆ အစိတ်အပိုင်းတစ်ခု ဝေဒနာခံစားရရင် ကျန်တဲ့အစိတ်အပိုင်းအားလုံး ထပ်တူခံစားရတယ်။+ အစိတ်အပိုင်းတစ်ခု ချီးမွမ်းခံရရင် ကျန်တဲ့အစိတ်အပိုင်းအားလုံး ထပ်တူဝမ်းမြောက်ကြတယ်။+
၂၇ အခု ခင်ဗျားတို့ဟာ ခရစ်တော်ရဲ့ ခန္ဓာကိုယ်ဖြစ်တယ်။+ တစ်ယောက်စီဟာ ခန္ဓာကိုယ် အစိတ်အပိုင်းတွေဖြစ်တယ်။+ ၂၈ ဘုရားသခင်က အသင်းတော်မှာ တာဝန်ခန့်အပ်တဲ့အခါ ဦးဆုံး တမန်တော်တွေ၊+ ဒုတိယ ပရောဖက်တွေ၊+ တတိယ ဆရာတွေ၊+ အဲဒီနောက် တန်ခိုးပြနိုင်သူ၊+ ရောဂါကုသပေးနိုင်သူ၊+ ထောက်ပံ့မစသူ၊ ညွှန်ကြားနိုင်စွမ်းရှိသူ၊+ ဘာသာစကားအမျိုးမျိုး ပြောနိုင်စွမ်းရှိသူ+ ဆိုပြီး အသီးသီး ခန့်ထားတယ်။ ၂၉ အားလုံးဟာ တမန်တော်တွေလား။ အားလုံးဟာ ပရောဖက်တွေလား။ အားလုံးဟာ ဆရာတွေလား။ အားလုံး တန်ခိုးပြနိုင်ကြသလား။ ၃၀ အားလုံးဟာ ရောဂါကုသပေးနိုင်တဲ့ ဆုကျေးဇူး ရထားသလား။ အားလုံးဟာ ဘာသာစကားအမျိုးမျိုး ပြောဆိုနိုင်သလား။+ အားလုံးဟာ ဘာသာပြန်နိုင်ကြသလား။+ ၃၁ ဒါကြောင့် အမြတ်ဆုံး ဆုကျေးဇူးတွေရဖို့ အမြဲကြိုးစားကြပါ။+ သာလွန်ကောင်းမြတ်တဲ့ လမ်းစဉ်ကို ခင်ဗျားတို့ကို ကျွန်တော်ပြပေးမယ်။+