ကမ္ဘာ့ဖြစ်ရပ်အကဲခတ်

ဖိစီးမှုများတဲ့ မြို့ပြဘဝ

သုတေသနပြုမှုတွေအရ “ဖိစီးမှု ကြုံလာတဲ့အခါ မြို့ကြီးပြကြီးတွေမှာ နေတဲ့သူတွေဟာ မြို့ငယ်လေးတွေမှာ နေသူတွေထက် ခပ်ကြမ်းကြမ်း တုံ့ပြန်လေ့ရှိတယ်” လို့ ပိုလန်မဂ္ဂဇင်းတစ်စောင်က ဖော်ပြတယ်။ (Przekrój) “မြို့ကြီးတွေမှာ လူတွေဟာ ဒေါသထွက်စရာအကြောင်း အများကြီးနဲ့ ကြုံနေရတယ်” လို့ ဝါဆောစိတ်ပညာပေး လက်တွေ့စမ်းသပ်ခန်းက စိတ်ပညာရှင်တစ်ဦးက ပြောတယ်။ ဒီလိုလည်း ဆက်ပြောတယ်– “မြို့ပြတွေမှာ နေထိုင်သူတွေဟာ ကျေးလက်တွေမှာ နေထိုင်သူတွေထက် စိုးရိမ်ပူပန်ရနိုင်စရာအကြောင်း ၂၁ ရာခိုင်နှုန်း၊ စိတ်မူမမှန်စရာအကြောင်း ၃၉ ရာခိုင်နှုန်း ပိုများတယ်။” ဒီအတွက် မြို့ပြမှာ နေထိုင်သူတွေ ဘာလုပ်နိုင်ပါသလဲ။ “သင်မထိန်းချုပ်နိုင်တဲ့ အရာတွေအတွက် စိတ်မကောင်း ဖြစ်မနေပါနဲ့၊” “အလုပ်ကို အလုပ်မှာပဲ ထားခဲ့ပါ၊” “လမ်းလျှောက်ထွက်ပါ၊” “အားလပ်ခွင့်ယူဖို့ မတွန့်ဆုတ်ပါနဲ့” လို့ အဲဒီမဂ္ဂဇင်းက အကြံပြုတယ်။

ဖေ့စ်ဘုတ်မှာ ဘယ်လောက် သိမ်းဆည်းထားသလဲ

ဩစတြီးယားနိုင်ငံသား ဥပဒေကျောင်းသားတစ်ယောက်က ကမ္ဘာ့အကြီးဆုံး လူမှုကွန်ရက်ကို သုံးနှစ်ကြာ သုံးပြီးနောက် မိမိအကြောင်း ဘယ်လောက် သိမ်းထားသလဲဆိုတာ သိချင်တဲ့အတွက် အချက်အလက်တွေကို မိတ္တူပို့ပေးဖို့ တောင်းခံခဲ့တယ်။ ဖေ့စ်ဘုတ် (Facebook) က သူ့ကို စာမျက်နှာ ၁,၂၂၂ မျက်နှာပါတဲ့ စီဒီတစ်ချပ် ပေးပို့ခဲ့တယ်။ အဲဒီကျောင်းသားက ခုလိုပြောတယ်ဆိုပြီး ဂျာမန်သတင်းစာတစ်စောင် (Der Tagesspiegel) က ဖော်ပြတယ်– “အားလုံးကို မှတ်တမ်းတင်ထားတယ်။ စာအားလုံး၊ အပြန်အလှန် စာရေးခဲ့တဲ့ စကားလုံးတိုင်း ရှိနေတယ်။ သူငယ်ချင်းတွေနဲ့ ပတ်သက်တဲ့ အတွင်းရေးတွေတောင် ပါတယ်။” လုံးဝဖျက်ထုတ်လိုက်ပြီလို့ ယူမှတ်ထားတဲ့ အချက်အလက်တွေတောင် ရှိနေတယ်။