လုပ်ငန်းအတွက်မိမိလူမျိုးတော်ကို ယေဟောဝါစုစည်း၍တန်ဆာဆင်

ကမ္ဘာချီအယူဖောက်ပြန်မှု ရာစုနှစ်တစ်လျှောက် ပျံ့နှံ့ခဲ့သည်။ ချာ့ချ်ဂိုဏ်းဂဏများစွာ၌ ကျမ်းစာအတိုင်းသွန်သင်မှုအချို့ရှိသော်လည်း အဓိကအားဖြင့်လူ့ထုံးတမ်းဓလေ့များနှင့် ရုပ်တုကိုးကွယ်မှုမှ ဆင်းသက်လာသောထုံးစံများကို ကျင့်သုံးကြသည်။ ခရစ်တော်ပြန်လည်ရောက်ရှိခြင်းသည် အရေးမပါသောအခြေအနေသို့တွန်းပို့ခံခဲ့ရသည်။—မဿဲ ၁၃:၂၄-၃၀၊ ၃၇-၄၃ နှင့်နှိုင်းယှဉ်။

သို့ရာတွင်ယေရှုက မိမိပြန်လည်ရောက်ရှိခြင်းကို သတိပြုရန်ပြောခဲ့သည်။ အမေရိကန်ပြည်၊ ပဲင်စီလ်ဘေးနီးယားနယ်၊ အယ်လ်လက်ဂီနီ (ပစ္စဘာ့ဂ်) မြို့တွင် ဤသို့ပြုနေသောအဖွဲ့တစ်ဖွဲ့ရှိခဲ့သည်။ ၁၈၇၀ ပြည့်လွန်နှစ်များလောက်တွင် ချားလ်စ်၊ တေဇ်၊ ရပ်စယ်လ်နှင့် မိတ်ဆွေအချို့တို့သည် ဂိုဏ်းဂဏအစွဲမပါဘဲ၊ ခရစ်တော်ပြန်လည်ရောက်ရှိခြင်းနှင့်ပတ်သက်၍ ကျမ်းစာကိုအသေးစိတ်လေ့လာခဲ့ကြသည်။ ကျမ်းစာပါအခြားသောအခြေခံသမ္မာတရားအချို့ကို သူတို့စတင်ရှာဖွေလာကြသည်။ ဤကားခေတ်သစ်ယေဟောဝါသက်သေတို့၏ လှုပ်ရှားမှုအစဖြစ်သည်။—မဿဲ ၂၄:၄၂။

ဤလူစုသဘောပေါက်လာသည့်အချက်များကား သုံးပါးပေါင်းတစ်ဆူအယူဝါဒသည် ကျမ်းစာအယူဝါဒမဟုတ်ဘဲ၊ ယေဟောဝါတစ်ပါးတည်းသာလျှင် အနန္တတန်ခိုးရှင်နှင့်ဖန်ဆင်းရှင်ဖြစ်ကြောင်း၊ ယေရှုသည် ဘုရားသခင်ဦးဆုံးဖန်ဆင်းသူနှင့် တစ်ပါးတည်းသောသားတော်ဖြစ်ကြောင်း၊ သန့်ရှင်းသောဝိညာဉ်တော်သည် ပုဂ္ဂိုလ်တစ်ပါးမဟုတ်ဘဲ၊ ဘုရားသခင့်မျက်မြင်မရလှုပ်ရှားတတ်သော စွမ်းအားသာဖြစ်ကြောင်းစသည်တို့ဖြစ်သည်။ ဝိညာဉ်စိုးလ်သည် မသေနိုင်သည့်အရာမဟုတ်ဘဲ သေနိုင်ကြောင်း၊ သေသူများအတွက်မျှော်လင့်ချက်မှာ ရှင်ပြန်ထမြောက်ခြင်းဖြစ်ကြောင်း၊ နောင်တမယူသောဆိုးညစ်မှုအတွက် အပြစ်ဒဏ်မှာထာဝရညှဉ်းဆဲခြင်းမဟုတ်ဘဲ၊ ထာဝရဖျက်ဆီးခြင်းဖြစ်ကြောင်းတို့ကိုပါ ဤလူစုသဘောပေါက်လာသည်။

လူသားများအတွက် မိမိအသက်ကိုရွေးဖိုးအဖြစ် ယေရှုစွန့်ခဲ့ခြင်းသည် ကျမ်းစာ၏အခြေခံသွန်သင်ချက်တစ်ခုဖြစ်သည်။ ဦးဆုံးအနေနှင့် ပထမရာစုမှကျွန်ုပ်တို့ခေတ်တိုင် ၁၄၄,၀၀၀ သောယောက်ျား၊ မိန်းမများရွေးနှုတ်ခံရပြီး ကောင်းကင်နိုင်ငံတွင်ခရစ်တော်နှင့်အတူအမွေခံရကြမည်။ နောက်တွင်သေခြင်းမှ ထမြောက်လာသူအများစုပါဝင်သည့် သန်းပေါင်းများစွာသောသူတို့သည် ထိုနိုင်ငံတော်အုပ်ချုပ်မှုအောက်တွင် ထာဝရအသက်ရရန်အလားအလာဖြင့် လူသားစုံလင်မှုကို ယေရှုရွေးဖိုးအားဖြင့်ရရှိလာကြမည်။

ခရစ်တော်ရောက်ရှိခြင်းသည် မမြင်နိုင်သည့်နည်း နာမ်ဝိညာဉ်အားဖြင့်ဖြစ်ကြောင်းကိုလည်း ရပ်စယ်လ်နှင့်အပေါင်းအဖော်များနားလည်လာကြပြန်သည်။ ဘုရားသခင့်အချုပ်အခြာအာဏာတော်သည် မည်သည့်လူ့အစိုးရအားဖြင့်မျှ ကိုယ်စားပြုခြင်းမခံရသည့်အချိန်၊ တစ်ပါးအမျိုးသားအချိန်သည် ၁၉၁၄ ခုနှစ်တွင်ကုန်ဆုံးမည်။ ထို့နောက်ကောင်းကင်တွင် ဘုရားသခင်နိုင်ငံတော်တည်ထောင်မည်။ ဤသွန်သင်ချက်များသည် ယနေ့ယေဟောဝါသက်သေတို့၏ယုံကြည်ချက်ဖြစ်သည်။

ဤအမှန်တရားကို ရပ်စယ်လ်နှင့်သူ့အပေါင်းအဖော်တို့သည် ဟောပြော၍လည်းကောင်း၊ ပုံနှိပ်စာပေများဖြန့်ဝေခြင်းဖြင့်လည်းကောင်း ကျယ်ကျယ်ပြန့်ပြန့်ကြေညာခဲ့ကြသည်။ ၁၈၇၉ ခုနှစ်ဇူလိုင်လမှစ၍ ဇိအုန်ကင်းမျှော်စင် (ယခုကင်းမျှော်စင်) စာစောင်ကို ရပ်စယ်လ်စတင်ထုတ်ဝေခဲ့သည်။ ကျမ်းစာကျောင်းသားများ၏ ဟောပြောခြင်းလုပ်ငန်းသည် အလှူမကောက်ခံဘဲ စေတနာအရထည့်ဝင်လှူဒါန်းငွေကိုသာ လုံးဝအမှီပြုသင့်ကြောင်း၊ ဤသတင်းကိုယုံကြည်သူတို့၏ စေတနာလုပ်အားဖြင့်အခမဲ့ဖြန့်ဝေသင့်ကြောင်း ရပ်စယ်လ်ပြဌာန်းခဲ့သည်။ ထို့ကြောင့် ရပ်စယ်လ်ကိုယ်တိုင်ထိုအချိန်အထိ မိမိစီးပွားရေးလုပ်ငန်းမှ စုဆောင်းခဲ့သည်များကိုထည့်ဝင်လှူဒါန်းခဲ့သည်။

ကျမ်းစာကျောင်းသားများသည် နောင်တွင်အသင်းတော်ဟုခေါ်သော သင်တန်းအုပ်စုများကိုဖွဲ့စည်းခဲ့ကြသည်။ ဟောပြောချက်၊ ကျမ်းစာလေ့လာမှုနှင့် သက်သေအထောက်အထားအစည်းအဝေးများအတွက် တစ်ပတ်လျှင်သုံးကြိမ်သူတို့စုဝေးကြသည်။ သင်တန်းတစ်ခုစီ၌ ဝိညာဉ်ရေးရာများကို ဦးစီးကြီးကြပ်ရန်တာဝန်ခံယောက်ျားများကို အကြီးအကဲများအဖြစ်မှန်မှန်ရွေးကောက်တင်မြှောက်လာကြသည်။

၁၈၈၄ ခုနှစ်တွင် ဇိအုန်ကင်းမျှော်စင်ဝေစာအသင်းသည် အမြတ်အစွန်းမယူသော ကော်ပိုရေးရှင်းတစ်ခုအဖြစ် ပဲင်စီလ်ဘေးနီးယားတွင်ဖွဲ့စည်းတည်ထောင်ခဲ့သည်။ ကော်ပိုရေးရှင်းဥက္ကဌကိုနှစ်စဉ်ရွေးကောက်တင်မြှောက်ရန်ဖြစ်သည်။ ဤသို့ဖြင့် တစ်ဦးတစ်ယောက်၏လက်အောက်ခံအဖြစ်မဟုတ်ဘဲ ကျမ်းပညာပေးလုပ်ငန်းကို တရားဝင်လုပ်ကိုင်နိုင်ခဲ့သည်။ ချားလ်စ်တေဇ်ရပ်စယ်လ်ဥက္ကဌအဖြစ်ရွေးချယ်ခံခဲ့ရပြီး သူ့ရုံးခန်းကိုဌာနချုပ်အဖြစ်သတ်မှတ်ခဲ့သည်။

အခြားနိုင်ငံများသို့ လုပ်ငန်းတိုးချဲ့ရန်ကြိုးစားအားထုတ်လာကြရာ ၁၈၈၀ ပြည့်လွန်နှစ်များစောစောပိုင်းတွင် ကနေဒါ၊ အင်္ဂလန်နိုင်ငံများသို့ရောက်လာခဲ့သည်။ ဥရောပနှင့်အရှေ့အလယ်ပိုင်းဒေသများသို့ သမ္မာတရားပိုမိုပျံ့နှံ့ရောက်ရှိရေးကို မည်သို့ဆောင်ရွက်နိုင်ကြောင်းသိရှိရန်အတွက် ၁၈၉၁ ခုနှစ်တွင်ရပ်စယ်လ်သွားရောက်လှည့်လည်ခဲ့သည်။ ၁၉၀၀ ပြည့်လွန်နှစ်များတွင် ဗြိတိန်၊ ဂျာမနီ၊ ဩစတြေးလျတို့၌အသင်း၏ဌာနခွဲရုံးများ ဖွင့်လှစ်နိုင်ခဲ့သည်။

၁၉၀၉ ခုနှစ်ရောက်သောအခါ ဟောပြောခြင်းလုပ်ငန်းကို ကမ္ဘာချီတိုးချဲ့နိုင်ရန်အတွက် ကင်းမျှော်စင်အသင်းဌာနချုပ်ကို ဘရွတ်ကလင်နယူးယောက်သို့ပြောင်းရွှေ့ခဲ့သည်။ နယူးယောက်ပြည်နယ်ဥပဒေအရ ယခုကင်းမျှော်စင်သမ္မာကျမ်းစာနှင့်ဝေစာအသင်းကို ပူးတွဲကော်ပိုရေးရှင်းအဖြစ်ဖွဲ့စည်းရန်လိုအပ်လာခဲ့သည်။ ၁၉၁၄ ခုနှစ်တွင်ဗြိတိသျှဓနသဟာယအတွင်း ကျမ်းစာကျောင်းသားများ၏ လှုပ်ရှားဆောင်ရွက်မှုကိုတိုးမြှင့်ရန် လန်ဒန်မြို့၌အပြည်ပြည်ဆိုင်ရာကျမ်းစာကျောင်းသားများအသင်းကို ဖွဲ့စည်းခဲ့သည်။ ယခုအခါ ကမ္ဘာအရပ်ရပ်ရှိနိုင်ငံများတွင် တရားဝင်ဖွဲ့စည်းထားသောကော်ပိုရေးရှင်းနှင့် အသင်းအဖွဲ့အစည်း ၇၀ တို့သည် ကင်းမျှော်စင်အသင်း၏ရည်ရွယ်ချက်များကို လုပ်ဆောင်လျက်ရှိကြသည်။ အသင်းအဖွဲ့အားလုံးတို့သည် လူသားချင်းမေတ္တာထား၍ စေတနာ့ဝန်ထမ်းသူများ၏ငွေကြေးအကူအညီနှင့် လုပ်အားတို့ဖြင့်ထောက်ပံ့ခံရကြသည်။

၁၉၁၆ ခုနှစ်တွင်ချားလ်စ်တေဇ်ရပ်စယ်လ် ကွယ်လွန်ပြီး ကင်းမျှော်စင်အသင်းဥက္ကဌအဖြစ် ဂျိုးဇက်ဖရန်ကလင်ရပ်သဖော့ဒ်က ဆက်လက်တာဝန်ထမ်းခဲ့သည်။ ပထမကမ္ဘာစစ်ပြီးဆုံးချိန်နှစ်များအတောအတွင်း ကျမ်းစာကျောင်းသားတို့သည် နှိပ်စက်ညှဉ်းပန်းခြင်းဖြင့် အပြင်းအထန်စမ်းသပ်ခံခဲ့ရသည်။ အမေရိကန်ဌာနချုပ်တွင် တာဝန်ထမ်းဆောင်နေကြသည့် ညီအစ်ကိုရှစ်ဦး မတရားထောင်ချခံရခြင်းဖြင့် စမ်းသပ်မှုအထွတ်အထိပ်ရောက်ရှိခဲ့သည်။ ကျမ်းစာကျောင်းသားတို့၏လုပ်ငန်းသည်လည်း ဘေးသင့်ခဲ့ပုံရသည်။ သို့သော်၊ ၁၉၁၉ ခုနှစ်ရောက်သောအခါ ညီအစ်ကိုများလွတ်မြောက်လာကြပြီး ထိုအချိန်မှစ၍ဟောပြောခြင်းလုပ်ငန်းကို အကြီးအကျယ်တိုးချဲ့လာခဲ့ကြသည်။

ဘိသိက်ခံခရစ်ယာန်ကျောင်းသားများအဖွဲ့သည် အသင်းမဌာနချုပ်မှတစ်ဆင့်အဖွဲ့အစည်းနှင့် ပေါင်းသင်းသူတိုင်းကို အချိန်တန်ဝိညာဏအစာဆက်လက်ကျွေးမွေးလျက်ရှိသည်။ ပထမရာစုခရစ်ယာန်အသင်းတော်တွင် ယေရှုရည်ညွှန်းခဲ့သည့် “သစ္စာနှင့်သတိပညာရှိကျွန်” အတန်းအစားဖွဲ့စည်းခဲ့သကဲ့သို့ ဆက်ကပ်အပ်နှံထားသောဘိသိက်ခံကျမ်းစာကျောင်းသားများအဖွဲ့သည် နိုင်ငံတော်လုပ်ငန်း၌ပါဝင်ဆောင်ရွက်လာပြီး မျက်မှောက်ခေတ် “သစ္စာနှင့်သတိပညာရှိကျွန်” အတန်းအစားအဖြစ်ဖွဲ့စည်းပါဝင်လာကြသည်။ အသင်းတော်ကို ယေရှုလာရောက်စစ်ဆေးသောအခါအိမ်သားများကို ကျွေးမွေးနေသည့်ဤလူစုကိုတွေ့ရှိ၍ မိမိဥစ္စာရှိသမျှကိုအပ်နှင်းခဲ့သည်။—မဿဲ ၂၄:၄၅-၄၇။ လုကာ ၁၂:၄၂။

ပထမကမ္ဘာစစ်ပြီး၍ မကြာခင်မှာပင်ယေရှုခရစ်အားဖြင့် ဘုရားသခင့်နိုင်ငံတော်သည် ၁၉၁၄ ခုနှစ်တွင်ကောင်းကင်၌တည်ထောင်ခဲ့ပြီးဖြစ်ကြောင်း အထင်အရှားသိရှိခဲ့ရသည်။ ထို့ကြောင့် “လူမျိုးအပေါင်းတို့အားသက်သေဖြစ်မည်အကြောင်း နိုင်ငံတော်နှင့်ယှဉ်သောဧဝံဂေလိတရားကိုလောကီနိုင်ငံ အရပ်ရပ်ရှိသမျှတို့၌ဟောရလိမ့်မည်။ သို့ပြီးမှအဆုံးသည်ဖြစ်လတံ့” ဟူသောယေရှု၏စကားသည် ယခုအခါအပြီးသတ်ပြည့်စုံရအံ့။ ပိုမိုများပြားသောလူဦးရေအတိုင်းအတာသည် ဤနိုင်ငံတော်သတင်းကိုလက်ခံရရှိရန် ဂျေအက်ဖ်ရပ်သဖော့ဒ်စတင်ဆောင်ရွက်ခဲ့သည်။—မဿဲ ၂၄:၁၄။

ထို့ကြောင့်အသင်းမသည် ဈေးနှုန်းအသက်သာဆုံးဖြင့်ကျမ်းစာ,စာပေများကို မှန်မှန်ထုတ်ဝေသွားနိုင်ရေးအတွက် ဆက်ကပ်အပ်နှံပြီးသော စေတနာ့ဝန်ထမ်းယောက်ျားများအားဖြင့် ကိုယ်ပိုင်ပုံနှိပ်ခြင်းကို ပြုလုပ်သွားရန်ဆုံးဖြတ်ခဲ့သည်။ ကျမ်းစာကျောင်းသားအားလုံးတို့သည် နိုင်ငံတော်သတင်းကောင်းဟောပြောခြင်းလုပ်ငန်း၌ မှန်မှန်ပါဝင်ရန်အားပေးခံရကြသည်။ ရေဒီယိုမှဟောပြောချက်အသံလွှင့်ခြင်းကိုလည်း နိုင်ငံအတော်များများ၌အသုံးပြုခဲ့သည်။

၁၉၁၈ ခုနှစ်မတိုင်ခင်က ကျမ်းစာကျောင်းသားတို့သည် မိမိတို့ဟောပြောသည့် ရည်ရွယ်ချက်မှာ ကောင်းကင်၌ခရစ်တော်နှင့်နေရန်ရွေးချယ်ခံရသောသူ အကြွင်းအကျန်တို့ကိုစုသိမ်းရန်နှင့် လာမည့်ဘုရားသခင့်တရားစီရင်ခြင်းအကြောင်းကို သတိပေးရန်ဖြစ်ကြောင်းသဘောပေါက်ခဲ့ကြသည်။ ကမ္ဘာပေါ်တွင် အသက်ရှင်ရန်ကပ်ကျော်မည့်သူများ စုသိမ်းခြင်းကိုမူအနည်းအကျဉ်းသာ သဘောပေါက်ခဲ့ကြသည်။ သို့နှင့် ၁၉၁၈ ခုနှစ်နောက်ပိုင်းတွင် “ယခုအသက်ရှင်သူသန်းပေါင်းများစွာတို့ ဘယ်တော့မှမသေရတော့” ဟူသည့်ဟောပြောချက်ကို ကျယ်ကျယ်ပြန့်ပြန့်ဟောပြောလာကြသည်။

၁၉၂၃ ခုနှစ်ရောက်သောအခါ မဿဲ ၂၅:၃၁-၄၆ ပါယေရှု၏သိုးနှင့်ဆိတ်ဥပမာကို လေ့လာရာ၌ ကောင်းကင်နိုင်ငံတော်သို့မသွားရသော ဖြောင့်မတ်သည်ဟုကြေညာခံရသည့် လူများလည်း ဘုရားသခင့်မျက်နှာသာခံစားရပြီး အာမဂေဒုန်ကိုကပ်ကျော်ကြမည်ဖြစ်ကြောင်း ဖော်ပြသည်။ ၁၉၃၅ ခုနှစ်တွင် ပိုမိုလေ့လာသိရှိလာရသည်မှာ ဤသိုးကဲ့သို့သူများသည် ဗျာဒိတ် ၇:၉-၁၇ ၌ဖော်ပြထားသော မရေမတွက်နိုင်သည့် လူအုပ်ကြီးနှင့်အတူတူပင်ဖြစ်သည်။ ဤသူတို့ကိုလူမျိုးအသီးသီးမှ စုသိမ်းပြီး သူတို့သည်ကြီးစွာသောဒုက္ခကို ကပ်ကျော်၍ မြေကြီးပေါ်၌ ထာဝရအသက်ရှင်ရကြမည်။ ဤအသိပညာများသည် ဟောပြောခြင်းလုပ်ငန်းကိုအကြီးအကျယ် အရှိန်အဟုန်တိုးမြှင့်စေခဲ့သည်။—ယောဟန် ၁၀:၁၆။

၁၉၃၁ ခုနှစ်တွင်ကျမ်းစာကျောင်းသားများသည် ယေဟောဝါသက်သေများဟူသောအမည်ကို ခံယူခဲ့ကြသည်။ ၄င်းမတိုင်ခင် သူတို့ကိုကျမ်းစာကျောင်းသားများ၊ အပြည်ပြည်ဆိုင်ရာကျမ်းစာကျောင်းသားများ၊ အနှစ်တစ်ထောင်အရုဏ်ဦးလူများ၊ ကင်းမျှော်စင်လူများဟု လူသိများကြသည်။ ရပ်စယ်လ်လူများ၊ ရပ်သဖော့ဒ်နောက်လိုက်များဟုလည်း ကျီစယ်၍ခေါ်ကြသည်။ ဤအမည်များတစ်ခုမျှ သူတို့မည်သူမည်ဝါဖြစ်ကြောင်း တော်လျော်စွာမဖော်ပြချေ။ ပထမရာစုယေရှု၏နောက်လိုက်များကို ဘုရားသခင့်စီမံချက်ဖြင့် ခရစ်ယာန်ဟုခေါ်တွင်ခဲ့ရာ၌ လုံးဝတော်လျော်မှန်ကန်ခဲ့သော်ငြားလည်း အယူမှားလိုက်သူအုပ်စုများလည်း ယင်းအမည်ကိုအသုံးပြုကြသည်။ သန်းပေါင်းများစွာသော အမည်ခံခရစ်ယာန်များမှ မိမိတို့ကိုယ်ကိုသီးခြားခွဲထုတ်ရန် ယနေ့ခရစ်တော်၏နောက်လိုက်စစ်များသည် သိသာထင်ရှားကွဲပြားသည့်အမည်နာမရှိဖို့လိုအပ်သည်။

ကျမ်းစာကိုဆင်ခြင်သုံးသပ်ရာတွင် ယေဟောဝါသည်မိမိလူမျိုးတော်ဣသရေလကို ကိုယ်တော်၏သက်သေများဟုခေါ်ခဲ့သည်။ ထို့ကြောင့်အစီအစဉ်စနစ်၏အဆုံးကာလတွင် ကိုယ်တော့်နာမတော်နှင့် ရည်ရွယ်တော်မူချက်များကို ကြေညာဖို့ဆက်ကပ်အပ်နှံထားသူများကို ယေဟောဝါသက်သေများဟု မှန်ကန်စွာခေါ်သင့်သည်။ ဤအမည်သည် ယေဟောဝါ၏စစ်မှန်သောခရစ်ယာန်သက်သေဝတ်ပြုသူများကို ယနေ့အခြားအခြားသောခရစ်ယာန်များမှ သီးခြားဖြစ်စေသည်။—ဆာလံ ၈၃:၁၈။ ဟေရှာယ ၄၃:၁၀-၁၂။

၁၉၄၂ ခုနှစ်၊ ဒုတိယကမ္ဘာစစ်အတွင်း ဂျိုးဇက်အက်ဖ်ရပ်သဖော့ဒ်ကွယ်လွန်ခဲ့ပြီး ကင်းမျှော်စင်အသင်းဥက္ကဌအဖြစ်သူ့နေရာကို နေသန်အိပ်ချ်၊ နောရ်ကဆက်ခံခဲ့သည်။ ပရောဖက်ပြုချက်များက ရှင်းလင်းစွာဖော်ပြသည့်အချက်တစ်ခုမှာ စစ်ပြီးနောက်ပိုင်းကာလ ဤစနစ်မဆုံးခင်ဟောပြောခြင်းလုပ်ငန်းကို အကြီးအကျယ်တိုးချဲ့နိုင်ဖို့ အထိုက်အလျောက်ငြိမ်းချမ်းမှုနှင့် လွတ်လပ်သောကာလတစ်ခုရှိလိမ့်မည်ဖြစ်သည်။ ၁၉၄၃ ခုနှစ်ဖေဖော်ဝါရီလတွင် အချိန်ပြည့်ဓမ္မအမှုဆောင်များကို နိုင်ငံခြားသာသနာပြုရန် လေ့ကျင့်ပေးသည့်ဂိလဒ်ကင်းမျှော်စင်ကျမ်းစာကျောင်းပေါ်ပေါက်လာသည်။ ထိုနှစ်နောက်ပိုင်းတွင် ယေဟောဝါသက်သေတို့၏ပတ်စဉ်အစည်းအဝေးများ၌ ဓမ္မအမှုဆောင်အထူးလေ့ကျင့်ခြင်းအစီအစဉ်များပါဝင်လာသည်။

၁၉၅၀ ခုနှစ်ရောက်သော် အသင်းမသည်မူရင်းကျမ်းစာမှ ခေတ်သုံးအင်္ဂလိပ်စာဖြင့် ဘာသာပြန်သောကမ္ဘာသစ်ဘာသာပြန်ကျမ်း ၏အပိုင်းကဏ္ဍအချို့ကိုစတင်ထုတ်ဝေလာခဲ့သည်။ တိကျသောအသုံးအနှုန်း၊ နားလည်ရန်လွယ်ကူခြင်း၊ အသင်းမပုံနှိပ်တိုက်မှ ထုတ်ဝေသောကြောင့်ဈေးနှုန်းချိုသာခြင်းတို့ကြောင့် ဟောပြောခြင်းလုပ်ငန်းအတွက်များစွာအထောက်အကူဖြစ်ခဲ့သည်။ ယခုအထိ ၁၁ ဘာသာဖြင့် စောင်ရေသန်းပေါင်း ၅၀ ကျော်ထုတ်ဝေပြီးဖြစ်သည်။

၁၉၉၀ ခုနှစ်ကုန်သောအခါ လေးသန်းကျော်သောယေဟောဝါသက်သေတို့သည် ၂၀၀ ကျော်သော နိုင်ငံများနှင့်ကျွန်းများတွင် ဟောပြောနေကြသည်။ ခရစ်တော်သေခြင်းသတိရအောက်မေ့ပွဲကို ၁၉၉၀ ခုနှစ်အတွင်းသူတို့၏အသင်းတော်ပေါင်း ၆၃,၀၁၆ ခုတွင်ကျင်းပရာတက်ရောက်သူ စုစုပေါင်း ၉,၉၅၀,၀၅၈ ဦးရှိခဲ့သည်။

ဘုရားသခင့်လုပ်ငန်းတော်၌ သူတို့ဆက်လက်ထက်သန်နေခြင်း၊ ကမ္ဘာချီစည်းလုံးညီညွတ်နေကြခြင်း၊ ဘုရားသခင့်နာမတော်ကို စွဲကိုင်ထားခြင်းနှင့်နိုင်ငံတော်အကြောင်းဟောပြောခြင်းတွင် သူတို့၏ဇွဲ၊ သန့်ရှင်းစင်ကြယ်သော သူတို့၏စာရိတ္တစံချိန်၊ ကျမ်းစာတစ်ခုလုံးသည် မလွဲမှားနိုင်သော ဘုရားသခင့်နှုတ်ကပါဌ်တော်ဖြစ်ကြောင်း သူတို့၏ခံယူချက်၊ အယူသည်းခြင်းနှင့် နတ်ဝိဇ္ဇာအတတ်များမှ ကင်းရှင်းမှုစသည်တို့ကိုကြည့်၍ ဘုရားသခင်သည် ယေဟောဝါသက်သေတို့ကို အသုံးပြုနေကြောင်းသိသာသည်။

ဤသို့ဘုရားသခင်ကို မှန်ကန်စွာဝတ်ပြုရေးပြန်လည်ထွန်းကားလာခြင်းမှ သင်မည်သို့အကျိုးရယူနိုင်ကြောင်းကိုလာမည့် ကဏ္ဍများကဖော်ပြသည်။

• အဘယ်အခြေခံကျမ်းစာသွန်သင်ချက်များသည် ကျမ်းစာကျောင်းသားများကို ချာ့ချ်ဂိုဏ်းဂဏများမှသီးခြားဖြစ်စေသနည်း။

• ၁၉၁၈ ခုနှစ်အထိအဖွဲ့အစည်းဆိုင်ရာ အဘယ်တိုးတက်မှုများကို ကျမ်းစာကျောင်းသားများတွေ့ကြုံခဲ့ရသနည်း။

• ဘိသိက်ခံကျောင်းသားအုပ်စုသည် မဿဲ ၂၄:၄၅-၄၇ ပါ “သစ္စာနှင့်သတိပညာရှိကျွန်” များအဖြစ်စုစည်းခဲ့ကြောင်း အဘယ်ကြောင့်ပြောနိုင်သနည်း။

• ဘုရားသခင့်ရည်ရွယ်ချက်ဆိုင်ရာ အဘယ်အသိပညာသည် ဟောပြောခြင်းလုပ်ငန်းကို အရှိန်အဟုန်တိုးမြှင့်စေခဲ့သနည်း။

• ယေဟောဝါသက်သေများဟူသောအမည်သည် မည်သည့်ရည်ရွယ်ချက်ကိုဖြစ်ထွန်းစေသနည်း။

• ယေဟောဝါသက်သေတို့ကို ဘုရားသခင်အသုံးပြုနေကြောင်း မည်သည့်အထောက်အထားများရှိသနည်း။

[စာမျက်နှာ ၈ ပါ ရုပ်ပုံ]

စီ၊ တီ၊ ရပ်စယ်လ်၊ ၁၈၇၉

၁၈၇၉၊ ဇူလိုင်လထုတ်

ကနဦးကျမ်းစာကျောင်းသားများ၊ ပစ္စဘာ့ဂ်၊ ပီအေ

[စာမျက်နှာ ၉ ပါ ရုပ်ပုံ]

ဌာနချုပ်၊ ၁၈၈၉–၁၉၀၉၊ ပစ္စဘာ့ဂ်၊ ပီအေ

ရုံးချုပ်၊ ၁၉၀၉–၁၉၁၈၊ ဘရွတ်ကလင်၊ နယူးယောက်

ဌာနချုပ်ဝန်ထမ်းများနေအိမ်၊ ၁၉၀၉–၁၉၂၆၊ ဘရွတ်ကလင်၊ နယူးယေက်

[စာမျက်နှာ ၁၀ ပါ ရုပ်ပုံ]

ယေဟောဝါသက်သေတို့၏ကမ္ဘာ့ဌာနချုပ်၊ ဘရွတ်ကလင်၊ နယူးယောက်၊ ယူအက်စ်အေ

အထက်ဝဲ—ရုံးများ

အထက်ယာ— နေအိမ်အဆောက်အအုံ

အောက်ဝဲ— စက်ရုံများ

အောက်ယာ— တင်ပို့ရေးဌာန

[စာမျက်နှာ ၁၁ ပါ ရုပ်ပုံ]

ဂျေ၊ အက်ဖ်၊ ရပ်သဖော့ဒ်ရေဒီယိုဖြင့် အသံလွှင့်နေစဉ်

ကင်းမျှော်စင်အသင်း၏ပထမဆုံးစာပုံနှိပ်စက်၊ စေတနာ့ဝန်ထမ်းလုပ်အားဖြင့်လည်ပတ်သည်

ကမ္ဘာသစ်ဘာသာပြန်ကျမ်းစာ၊ ယခု ၁၁ ဘာသာဖြင့်ထုတ်ဝေ