တိကျသော ဖတ်ရှုခြင်း

လူအပေါင်းတို့သည် “တိကျမှန်ကန်သော သမ္မာတရားအသိပညာကိုသိစေရန်” ဘုရားသခင့်အလိုတော်ဖြစ်ကြောင်း ကျမ်းစာကဖော်ပြသည်။ (၁ တိ. ၂:၄၊ ကဘ) ထိုသို့နှင့်အညီ ကျမ်းစာကို အသံကျယ်ကျယ်နှင့် ဖတ်ရှုသည့်အခါ တိကျမှန်ကန်သောအသိပညာကို ဖြန့်ချိသွယ်ပို့ပေးလိုသည့် ကျွန်ုပ်တို့၏ဆန္ဒသည် ကျွန်ုပ်တို့ဖတ်ရှုပုံအပေါ် ဩဇာသက်ရောက်သင့်သည်။

ကျမ်းစာနှင့် ကျမ်းစာအကြောင်းရှင်းပြပေးသည့် စာပေများကို အသံကျယ်ကျယ်ဖတ်နိုင်သည့်စွမ်းရည်သည် လူငယ်များကော လူကြီးများအတွက်ပါ အရေးကြီးသည်။ ယေဟောဝါ၏သက်သေများအနေဖြင့် ကျွန်ုပ်တို့တွင် ယေဟောဝါ၏အသိပညာနှင့် ကိုယ်တော့်နည်းလမ်းတော်များကို အခြားသူများအားဝေမျှရန် တာဝန်ရှိသည်။ ထိုတာဝန်တွင် လူတစ်ယောက် သို့မဟုတ် အုပ်စုငယ်တစ်စုကို စာဖတ်ပြခြင်းပါဝင်လေ့ရှိသည်။ မိသားစုအသိုင်းအဝိုင်း၌လည်း ထိုကဲ့သို့ဖတ်ရှုခြင်းကို ကျွန်ုပ်တို့ပြုကြသည်။ သီအိုကရက်တစ်ဓမ္မအမှုကျောင်းတွင် မိမိတို့အသံကျယ်ကျယ်ဖတ်ရှုခြင်းကို တိုးတက်စေရန်အတွက် သွန်သင်ချက်ခံယူရန် ညီအစ်ကိုညီအစ်မများ၊ လူငယ်လူကြီးများအတွက် သင့်လျော်သောအခွင့်အရေးများရှိသည်။

တစ်ဦးချင်းကိုဖြစ်စေ သို့မဟုတ် အသင်းတော်တွင်ဖြစ်စေ လူသူရှေ့ကျမ်းစာဖတ်ပြခြင်းသည် အလေးအနက်ထားအပ်သောအရာဖြစ်သည်။ သမ္မာကျမ်းစာသည် ဘုရားသခင့်မှုတ်သွင်းခံဖြစ်သည်။ ထို့အပြင် “ဘုရားသခင်၏နှုတ်ကပါဌ်တော်သည် အသက်ရှင်ခြင်း၊ တန်ခိုးနှင့်ပြုပြင်ခြင်း၊ . . . နှင့်ပြည့်စုံသည်ဖြစ်၍ . . . စိတ်နှလုံးအကြံအစည်များကိုလည်း သိမြင်တတ်၏။” (ဟေဗြဲ ၄:၁၂) ဘုရားသခင့်နှုတ်ကပါဌ်တော်တွင် အခြားအဘယ်ရင်းမြစ်မှမရရှိနိုင်သည့် အဖိုးမဖြတ်နိုင်သောအသိပညာပါရှိသည်။ ယင်းသည် လူတစ်ဦးအား စစ်မှန်သည့် တစ်ဆူတည်းသောဘုရားသခင်ကို သိရှိရန်နှင့် ကိုယ်တော်နှင့်ကောင်းသောဆက်ဆံရေးကို ပြုစုပျိုးထောင်ရန်အပြင် ဘဝပြဿနာများကိုလည်း အောင်မြင်စွာဖြေရှင်းရန် ကူညီပေးနိုင်သည်။ ဘုရားသခင့်ကမ္ဘာသစ်တွင် ထာဝရအသက်ရစေသည့်လမ်းကို ယင်းက ရှင်းပြသည်။ ထို့ကြောင့် ကျွန်ုပ်တို့၏ပန်းတိုင်မှာ ကျမ်းစာကို တတ်နိုင်သ၍အကောင်းဆုံးဖတ်ပြရန် ဖြစ်သင့်သည်။—ဆာ. ၁၁၉:၁၄၀; ယေ. ၂၆:၂။

တိကျစွာဖတ်ရှုနိုင်ပုံ။ ထိထိရောက်ရောက်ဖတ်ရှုခြင်းအသွင် အမျိုးမျိုးရှိသော်လည်း တိကျမှုကို တိုးတက်ဖွံ့ဖြိုးစေခြင်းသည် ပထမခြေလှမ်းဖြစ်သည်။ ဆိုလိုသည်မှာ ပုံနှိပ်ထားသောစာမျက်နှာပေါ်ရှိရာကို တိတိကျကျဖတ်ရှုရန် ကြိုးစားခြင်းဖြစ်သည်။ စကားလုံးကျော်ဖတ်ခြင်း၊ စကားလုံးများ၏အဆုံးပိုင်းကို ချန်ဖတ်ခြင်း သို့မဟုတ် ဆင်တူသောစကားလုံးများနှင့် မှားဖတ်ခြင်းတို့ကို မပြုမိရန် သတိပြုပါ။

စကားလုံးများကို မှန်မှန်ကန်ကန်ဖတ်နိုင်ရန် အထက်အောက်စကားကို နားလည်ဖို့လိုအပ်သည်။ ယင်းသို့ဖြစ်ရန် သေသေချာချာပြင်ဆင်ဖို့လိုမည်။ အချိန်တန်သော် သင်သည် ရှေ့သို့ကြို၍ကြည့်ကာ ဆက်တိုက်လိုက်ပါလာသော သဘောတရားကို ထောက်ချင့်စဉ်းစားသည့်စွမ်းရည် ဖွံ့ဖြိုးလာသည်နှင့်အမျှ ဖတ်ရှုရာတွင် သင်၏တိကျမှု တိုးတက်လာမည်။

အဖြတ်အတောက်နှင့် အသံပြောင်းသင်္ကေတတို့သည် အရေးအသားဘာသာစကားတွင် အရေးကြီးသောအချက်များဖြစ်သည်။ ရပ်တန့်ရမည့်နေရာ၊ မည်မျှရပ်တန့်ရန်နှင့် အသံအနိမ့်အမြင့်ပြောင်းခြင်း လိုကောင်းလိုမည့်အရာတို့ကို အဖြတ်အတောက်ကညွှန်ပြပေမည်။ ဘာသာစကားတချို့တွင် အဖြတ်အတောက်လိုအပ်သောအခါ အသံနေအသံထားကို ပြောင်းလဲရန်ပျက်ကွက်ခြင်းက မေးခွန်းတစ်ခုကို အဆိုပြုဝါကျတစ်ခုအဖြစ်သို့ ပြောင်းသွားစေနိုင်သည် သို့မဟုတ် အဓိပ္ပာယ် လုံးဝပြောင်းသွားစေနိုင်သည်။ တစ်ခါတစ်ရံ အဖြတ်အတောက်၏ လုပ်ဆောင်ချက်သည် အဓိကတွင် သဒ္ဒါအရဖြစ်သည်မှာ မှန်ပါသည်။ ဘာသာစကားအများစုတွင် ရေးသားထားရာများနှင့် အထက်အောက်စကားမှ နားလည်ထားရာ နှစ်မျိုးစလုံးရှိ အသံပြောင်းသင်္ကေတများကို သေသေချာချာအာရုံမပြုဘဲ တိကျမှန်ကန်စွာဖတ်ရှုဖို့ မဖြစ်နိုင်ချေ။ ၎င်းတို့နှင့်တွဲဖက်ထားသည့် အက္ခရာများ၏အသံကို ယင်းတို့က ပြောင်းလဲပေးသည်။ သင့်ဘာသာစကားတွင် အဖြတ်အတောက်၊ အသံပြောင်းသင်္ကေတများ အသုံးပြုသည့်နည်းကိုသိကျွမ်းကြောင်း သေချာစေပါ။ ယင်းသည် အဓိပ္ပာယ်ပေါ်အောင်ဖတ်ရှုခြင်း၏ သော့ချက်ဖြစ်သည်။ သင့်ရည်ရွယ်ချက်မှာ စကားလုံးများကိုသာ ပြောရုံမျှမဟုတ်ဘဲ သဘောတရားများကို သွယ်ပို့ပေးရန်ဖြစ်သင့်သည်။ တိကျစွာဖတ်ရှုနိုင်ရန် သရသံများကို အထူးဂရုစိုက်ရန်လိုသည်။ ယင်းတို့မှအချို့ကို ရေးသားထားသောစာတွင် ဖော်ပြထားပေမည်၊ အချို့ကိုမူ အထက်အောက်စာနှင့် သဒ္ဒါပေါ်အခြေခံ၍ နားလည်ရန်လိုအပ်သည်။ ယင်းတို့အားလုံးအရေးကြီးသည်။

သင်သည် မိမိ၏ဖတ်ရှုခြင်းစွမ်းရည်ကို တိကျစွာပြုစုပျိုးထောင်ပေးဖို့ဆိုလျှင် လေ့ကျင့်မှုလိုအပ်သည်။ စာပိုဒ်တစ်ပိုဒ်ကိုသာဖတ်ပါ၊ ထို့နောက် ယင်းကို မည်သည့်အမှားမျှမပါဘဲ ဖတ်ရှုနိုင်သည်အထိ ထပ်ခါတလဲလဲဖတ်ပါ။ ၎င်းနောက် နောက်စာပိုဒ်တစ်ပိုဒ်ကို ဆက်သွားပါ။ နောက်ဆုံးတွင် စာမျက်နှာအတော်များများကို အကြောင်းအရာပါ အဘယ်စကားလုံးကိုမျှ ကျော်ဖတ်ခြင်း၊ ပြန်ထပ်ခြင်း သို့မဟုတ် မှားဖတ်ခြင်းတို့မရှိဘဲ ဖတ်နိုင်ရန် အားထုတ်ပါ။ ထိုအဆင့်များကို သင်လုပ်ဆောင်ပြီးနောက် တစ်ဦးတစ်ယောက်အား သင်ဖတ်ရှုနေသည်ကို စောင့်ကြပ်စစ်ဆေးပေးရန်နှင့် သင်လုပ်မိနိုင်မည့် အဘယ်အမှားကိုမဆိုထောက်ပြပေးရန် အကူအညီတောင်းပါ။

ကမ္ဘာ့အချို့အပိုင်းတွင် မျက်စိမှုန်ခြင်း၊ အလင်းရောင် အလုံအလောက်မရခြင်းတို့က စာဖတ်ခြင်းကို ခက်ခဲစေသည်။ ဤအခြေအနေတို့ကို ဖြေရှင်းပေးနိုင်ပါက ဖတ်ရှုခြင်းတွင် တိုးတက်မှုရှိလာမည်မှာ မလွဲဧကန်ပင်။

အချိန်တန်သော်၊ ကောင်းစွာဖတ်နိုင်သောညီအစ်ကိုများသည် အသင်းတော်စာအုပ်ကြီးသင်တန်းနှင့် ကင်းမျှော်စင်သင်တန်းတို့၌ လေ့လာမည့်အကြောင်းအရာကို လူထုရှေ့ဖတ်ရှုခြင်းတွင်ပါဝင်ရန် ဖိတ်ခေါ်ခံရနိုင်ဖွယ်ရှိမည်။ သို့ရာတွင် ထိုကဲ့သို့သောအခွင့်ထူးအတွက် ကောင်းစွာဂရုစိုက်ရန်မှာ စကားလုံးများကို မှန်ကန်စွာရွတ်ဖတ်နိုင်ရုံထက်မက ပို၍လိုအပ်ပါသည်။ အသင်းတော်တွင် ထိရောက်သော လူထုရှေ့စာဖတ်သူတစ်ယောက်ဖြစ်လာရန်အတွက် ကိုယ်ပိုင်ဖတ်ရှုခြင်းတွင် အလေ့အထကောင်းများ တိုးတက်ဖို့လိုသည်။ ယင်းတွင် ဝါကျတစ်ကြောင်းရှိ စကားလုံးတိုင်းသည် ဆိုင်ရာကဏ္ဍရှိကြောင်း သိရှိနားလည်ခြင်းပါဝင်သည်။ စကားလုံးအချို့ကို လျစ်လျူရှုပါက ပြောနေသည့်အရာကို ရှင်းရှင်းလင်းလင်းနားလည်ဖို့ မဖြစ်နိုင်ချေ။ မိမိဘာသာဖတ်ရှုနေလျှင်ပင် စကားလုံးများကိုမှားဖတ်မိပါက ဝါကျအဓိပ္ပာယ်လွဲသွားပေမည်။ မှားဖတ်မိခြင်းသည် အသံပြောင်းသင်္ကေတများ သို့မဟုတ် အထက်အောက်အသုံးပြုထားသည့် စကားလုံးများကို ထည့်မစဉ်းစားမိ၍ဖြစ်နိုင်သည်။ ဤဝါကျအထားအသိုတွင်တွေ့ရသည့် စကားလုံးတစ်လုံးစီသည် အဘယ်အရာကိုဆိုလိုကြောင်းနားလည်ရန် ကြိုးပမ်းအားထုတ်ပါ။ ဝါကျတစ်ကြောင်း၏အဓိပ္ပာယ်ကို အဖြတ်အတောက်က မည်သို့အကျိုးသက်ရောက်စေကြောင်းကိုလည်း သုံးသပ်ပါ။ ဆိုလိုရင်းအချက်များကို များသောအားဖြင့် စကားလုံးအစုလိုက်ဖြင့် ဖော်ပြကြောင်း သတိရပါ။ ယင်းတို့ကိုမှတ်သားပါ၊ အသံကျယ်ကျယ်ဖတ်ရှုရာ၌ သင်သည် စကားလုံးများလောက်သာဖတ်မည့်အစား စကားလုံးအစုလိုက်—စကားစုများနှင့် ဝါကျပုဒ်စုအလိုက်ဖတ်နိုင်ရန် အလို့ငှာဖြစ်သည်။ သင်အဘယ်အရာဖတ်ရှုနေသည်ကို ရှင်းလင်းစွာနားလည်ထားခြင်းက တိကျမှန်ကန်သည့်အသိပညာကို လူထုရှေ့စာဖတ်ခြင်းဖြင့် အခြားသူများထံ ဖြန့်ချိသွယ်ပို့ပေးနိုင်ရန် အရေးကြီးသောခြေလှမ်းတစ်ရပ်ဖြစ်သည်။

ယင်းကို အတွေ့အကြုံရှိ ခရစ်ယာန်အကြီးအကဲတစ်ဦးထံ တမန်တော်ပေါလုက ဤသို့ရေးခဲ့သည်– “လူပရိသတ်ရှေ့ ကျမ်းစာဖတ်ခြင်း . . . ကိုအာရုံစိုက်၍ ဆောင်ရွက်လော့။” (၁ တိ. ၄:၁၃၊ ကဘ) ယင်းသည် ကျွန်ုပ်တို့အားလုံး တိုးတက်စရာများရှာယူနိုင်မည့် နယ်ပယ်တစ်ခုဖြစ်သည်မှာ သိသာလှပေသည်။