အာပေါလု—အဟောအပြောကောင်းသော ခရစ်ယာန်သမ္မာတရား ကြွေးကြော်သူ

ခရစ်ယာန်အသင်းတော်သားများဖြစ်လာရာ၌ နှစ်များစွာကြာခဲ့ပြီးသူများဖြစ်စေ၊ နှစ်အနည်းငယ်သာရှိသေးသူများဖြစ်စေ ဘုရားသခင့်နိုင်ငံတော် ကြွေးကြော်သူတိုင်းသည် သတင်းကောင်းဟောပြောသူများအနေနှင့် တိုးတက်အောင်လုပ်ဆောင်ရေးတွင် စိတ်ဝင်စားသင့်သည်။ ဘုရားသခင့်နှုတ်ကပါဌ်တော်နှင့်ပတ်သက်သော ကျွန်ုပ်တို့၏အသိပညာနှင့် ယင်းအသိပညာကို အခြားသူများအားသွန်သင်ပေးသည့် ကျွန်ုပ်တို့၏စွမ်းရည်ကို တိုးပွားစေခြင်းဟူသည့် သဘောသက်ရောက်သည်။ ယင်းသည် အချို့သူများအတွက်မူ စိန်ခေါ်ချက်များကို ရင်ဆိုင်ခြင်း၊ အခက်အခဲများကို ကျော်လွှားခြင်း သို့မဟုတ် တိုးတက်လုပ်ဆောင်ရန် အသင့်ဖြစ်ခြင်းဟု အဓိပ္ပာယ်သက်ရောက်ပေမည်။

ကျမ်းစာတွင် ဝိညာဉ်ရေးအကြီးအကျယ်တိုးတက်အောင် လုပ်ဆောင်ရာ၌ နည်းအမျိုးမျိုးဖြင့် အောင်မြင်ခဲ့ကြပြီး သူတို့၏အားထုတ်မှုများအတွက် ဆုကျေးဇူးများစွာကို ရိတ်သိမ်းခဲ့သည့် ဘုရားတရားကြည်ညိုသော ရှေးခေတ်က အမျိုးသမီးအမျိုးသားတို့၏ ပုံသက်သေများစွာ ပါရှိသည်။ သူတို့ထဲမှ တစ်ဦးမှာ အာပေါလုဖြစ်သည်။ ကျမ်းစာက သူ့ကို ကျွန်ုပ်တို့နှင့် မိတ်ဆက်ပေးသောအခါက သူသည် ခရစ်ယာန်သွန်သင်ချက်များကို အပြည့်အဝမသိသေးသူတစ်ဦးဖြစ်သည်; သို့သော် နှစ်အနည်းငယ်မျှကြာပြီးနောက်တွင် ပထမရာစု အသင်းတော်၏ နယ်လှည့်ကိုယ်စားလှယ်တစ်ဦးအဖြစ် လုပ်ဆောင်နေလေသည်။ မည်သည့်အရာက သူ့ကို ဤသို့တိုးတက်ရန် စွမ်းဆောင်ပေးခဲ့သနည်း။ ကျွန်ုပ်တို့အားလုံး တုပထိုက်သည့် အရည်အသွေးများကို သူပိုင်ဆိုင်ခဲ့သည်။

“ကျမ်းစာတော်ကို အထူးပင်တတ်ကျွမ်း”

စီ.အီး. ၅၂ ခုနှစ်ခန့်တွင် ကျမ်းရေးသူ လုကာအဆိုအရ “အာလေဇန်ဒိမြို့သား အာပေါလုအမည်ရှိသော ယုဒအမျိုးသားတစ်ယောက်သည် ဧဖက်မြို့သို့ရောက်လာ၏။ သူသည် အဟောအပြောကောင်း၍ ကျမ်းစာတော်ကို အထူးပင်တတ်ကျွမ်းသူဖြစ်၏။ သခင်ဘုရား၏ လမ်းစဉ်အကြောင်းကို စုံလင်စွာလေ့လာသင်ယူထားသူလည်းဖြစ်၏။ သူသည် သခင်ယေရှုနှင့်သက်ဆိုင်သော တိကျမှန်ကန်သည့် အကြောင်းအချက်များကို စိတ်အားထက်သန်စွာ ဟောပြောသွန်သင်၏။ [သို့သော် သူသည် ယောဟန်၏ဗတ္တိဇံကိုသာ သိသည်။] သူသည် တရားဇရပ်တွင် ရဲရင့်စွာဟောပြောလေ၏။”—တမန်တော် ၁၈:၂၄-၂၆၊ သတင်းကောင်း။

အီဂျစ်နိုင်ငံရှိ အာလေဇန်ဒိမြို့သည် ရောမပြီးလျှင် ကမ္ဘာ့ဒုတိယအကြီးဆုံးမြို့ဖြစ်ခဲ့ပြီး ဂျူးတို့နှင့် ဂရိတို့အတွက် ထိုအချိန်က အရေးပါဆုံးယဉ်ကျေးမှုဗဟိုဌာနတစ်ခုဖြစ်ခဲ့သည်။ အာပေါလုသည် ထိုမြို့ရှိ ဂျူးရပ်ကွက်ကြီးတွင်ရှိသည့် ပညာပေးအစီအစဉ်ကြောင့် ဟေဗြဲကျမ်းစာနှင့်ပတ်သက်သည့် ခိုင်လုံသောအသိပညာနှင့် အဟောအပြောကောင်းသည့် အရည်အသွေးအချို့ကို ဆည်းပူးလေ့လာခဲ့ရဖွယ်ရှိသည်။ ယေရှုအကြောင်း အာပေါလု သင်ယူခဲ့သည့်အရပ်မှာ သာ၍ မှန်းဆဖို့ခက်သည်။ “သူသည် နယ်လှည့်ကုန်သည်တစ်ဦးဖြစ်နိုင်သည့် ခရီးသွားတစ်ဦးဖြစ်ကြောင်းထင်ရှားရာ သူသွားခဲ့သည့်အရပ်တစ်ခုခုတွင် ခရစ်ယာန်ဟောပြောသူတစ်ဦးနှင့် ဆုံခဲ့နိုင်သည်” ဟု ကျမ်းပညာရှင် အက်ဖ်. အက်ဖ်. ဘရူးစ်က ဆိုသည်။ မည်သို့ပင်ဖြစ်ပါစေ ယေရှုနှင့်သက်ဆိုင်သော အကြောင်းအချက်များကို တိကျမှန်ကန်စွာ ဟောပြောသွန်သင်သော်လည်း သူသည် “ယောဟန်၏ဗတ္တိဇံကိုသာသိ” သောကြောင့် စီ.အီး. ၃၃ ပင်တေကုတ္တေပွဲနေ့မတိုင်မီ သက်သေခံခြင်းခံခဲ့ရကြောင်း ယူဆရသည်။

ယေရှု၏ ရှေ့တော်ပြေးတစ်ဦးအနေနှင့် နှစ်ခြင်းယောဟန်သည် ဣသရေလတစ်မျိုးလုံးကို အားပါပါသက်သေခံခဲ့ပြီး များစွာသောသူတို့သည် နောင်တရခြင်းအထိမ်းအမှတ်အဖြစ် သူ့လက်တွင် နှစ်ခြင်းခံခဲ့ကြသည်။ (မာကု ၁:၅; လုကာ ၃:၁၅၊ ၁၆) သမိုင်းပညာရှင် များစွာတို့၏အဆိုအရ ရောမအင်ပါယာအတွင်းရှိ ဂျူးပြည်သူလူထုများထဲမှ လူများစွာတို့သည် ယေရှုနှင့်ပတ်သက်၍ ယောဒန်မြစ်ကမ်းဘေးတို့၌ ဟောပြောခဲ့ဖူးသည့် အသိပညာလောက်ကိုသာ ရရှိထားကြသည်။ “သူတို့၏ခရစ်ယာန်အယူဝါဒသည် ကျွန်ုပ်တို့သခင်၏ ဓမ္မအမှုအစပြုသည့် အနေအထားတွင်သာ တန့်နေသည်” ဟု ဒဘယ်လျူ. ဂျေ ကန်နီဘာနှင့် ဂျေ. အက်စ် ဟောင်စန်တို့က ဆိုသည်။ “သူတို့သည် ခရစ်တော်၏သေခြင်းအဓိပ္ပာယ် အပြည့်အစုံကို မသိကြပါ; ကိုယ်တော်၏ရှင်ပြန်ထမြောက်ခြင်းအဖြစ်မှန်ကိုပင် သိရှိပုံမရပါ။” အာပေါလုသည်လည်း စီ.အီး. ၃၃ ပင်တေကုတ္တေပွဲနေ့တွင် သန့်ရှင်းသောဝိညာဉ်တော်သွန်းလောင်းခြင်းကို သိပုံမရပါ။ မည်သို့ပင်ဖြစ်ပါစေ သူသည် ယေရှုနှင့်သက်ဆိုင်သည့် တိကျမှန်ကန်သောအကြောင်းအချက်တချို့ကို ဆည်းပူးရရှိခဲ့ရာ ယင်းတို့ကို ဝှက်မထားခဲ့ပါ။ အမှန်မှာ သူသည် မိမိသိခဲ့သည့်အကြောင်းအရာကို ပြောဟောဖို့ အခွင့်အရေးများကို ရဲရဲရင့်ရင့်ရှာယူခဲ့သည်။ သို့သော် သူ၏ဇွဲနှင့် စိတ်ထက်သန်မှုတို့သည် တိကျမှန်ကန်သောအသိပညာနှင့် မညီသေးပါ။

ဇွဲရှိသော်လည်း နှိမ့်ချ

“သူ၏ဟောပြောချက်ကိုကြားရသော ပြစ်ကိလနှင့် အာကုလတို့သည် သူ့ကို အိမ်သို့ခေါ်ဖိတ်၍ ထာဝရဘုရား၏လမ်းစဉ်အကြောင်းကို ပိုမိုတိကျစွာရှင်းလင်းပေးကြ၏” ဟုလုကာမှတ်တမ်းက ဆက်ပြောသည်။ (တမန်တော် ၁၈:၂၆၊ သတင်းကောင်း) အာပေါလု၏ ယုံကြည်ချက်သည် သူတို့၏ယုံကြည်ချက်နှင့်များစွာ သဟဇာတဖြစ်ကြောင်း အာကုလနှင့် ပြစ်ကိလတို့ သတိပြုမိခဲ့ကြပေမည်၊ သို့သော် ဉာဏ်ပညာရှိစွာဖြင့် သူတို့သည် သူ၏မပြည့်မစုံနားလည်ထားမှုကို လူသူရှေ့တွင် ပဲ့ပြင်ပေးဖို့မကြိုးစားခဲ့ကြပါ။ သူတို့သည် အာပေါလုကို ကူညီပေးဖို့ရည်ရွယ်ချက်ဖြင့် သူနှင့်တေ့တေ့ဆိုင်ဆိုင်အပြန်အလှန်ပြောဆိုခဲ့ကြမည်ဟု ကျွန်ုပ်တို့ တွေးကြည့်နိုင်ပေသည်။ “ကျမ်းစာ၌အားကြီးသောသူ” အာပေါလုသည် မည်သို့တုံ့ပြန်ခဲ့သနည်း။ (တမန်တော် ၁၈:၂၄) ဖြစ်နိုင်ဖွယ်ရှိသည်မှာ အာပေါလုသည် အာကုလနှင့်ပြစ်ကိလတို့နှင့် မတွေ့မီ မိမိရရှိထားသော မပြည့်စုံသေးသည့် သတင်းတရားကို လူထုရှေ့တွင် အချိန်အတန်ကြာဟောပြောခဲ့ပေမည်။ ဘဝင်မြင့်သူတစ်ဦးသည် မည်သည့်ပဲ့ပြင်တည့်မတ်ပေးမှုကိုမဆို လက်မခံဘဲငြင်းပယ်လိုက်ရန် အလွန်လွယ်ကူလှသော်လည်း အာပေါလုမူ နှိမ့်ချမှုရှိပြီး မိမိ၏အသိပညာကို ပြည့်စုံအောင်ဖြည့်စွက်နိုင်လိုက်သည့်အတွက် ကျေးဇူးတင်ခဲ့သည်။

ဧဖက်မြို့ရှိညီအစ်ကိုများထံမှ ကောရိန္သုအသင်းတော်သို့ရေးပေးသည့် ထောက်ခံစာကို ယူဖို့တလိုတလားရှိသည့် အာပေါလု၏ဆန္ဒတွင်လည်း ပလွှားမှုကင်းမဲ့သော သူ၏ထပ်တူသဘောထားကို အထင်အရှားတွေ့ရသည်။ “သူသည် အခါယပြည်သို့သွားခြင်းငှာအလိုရှိသည်ဖြစ်၍ တပည့်တော်ချင်းတို့သည် သူ့ကိုလက်ခံမည်အကြောင်း ညီအစ်ကိုတို့သည် မှာစာကိုပေးလိုက်ကြ၏” ဟု မှတ်တမ်းကဆက်ဖော်ပြသည်။ (တမန်တော် ၁၈:၂၇; ၁၉:၁) အာပေါလုသည် မိမိ၏ကိုယ်ရည်ကိုယ်သွေးများကိုထောက်၍ မိမိကိုလက်ခံရန်မတောင်းဆိုဘဲ ခရစ်ယာန်အသင်းတော်၏အစီအစဉ်ကို ကျိုးနွံစွာ လိုက်နာခဲ့သည်။

ကောရိန္သုမြို့တွင်

ကောရိန္သုမြို့တွင် အာပေါလု၏ဓမ္မအမှု ပွဲဦးထွက်ရလဒ်မှာ အထူးကောင်းမွန်သည်။ တမန်တော်ကျမ်းက “သူသည် ရောက်လာလျှင်၊ ကျေးဇူးတော်အားဖြင့် ယုံကြည်သောသူတို့ကို အလွန်ထောက်မလေ၏။ ယေရှုသည် ခရစ်တော်ဖြစ်တော်မူကြောင်းကို ကျမ်းစာအားဖြင့် ထင်ရှားစွာပြ၍ လူအပေါင်းတို့ရှေ့မှာ ယုဒလူတို့၏စကားကို အားကြီးစွာ ပယ်ဖျက်လေ၏” ဟုမှတ်တမ်းတင်ထားသည်။—တမန်တော် ၁၈:၂၇၊ ၂၈။

အာပေါလုသည် အသင်းတော်လုပ်ငန်းတွင် မိမိကိုယ်ကို မြှုပ်နှံထားလိုက်ပြီး မိမိ၏ပြင်ဆင်မှု၊ ဇွဲတို့ဖြင့် ညီအစ်ကိုများကို တိုက်တွန်းအားပေးသည်။ သူ့အောင်မြင်မှု၏ သော့ချက်ကားအဘယ်နည်း။ အာပေါလုသည် အမှန်ပင် ပင်ကိုအရည်အသွေးရှိပြီး လူရှေ့သူရှေ့တွင် ဂျူးများနှင့် အတိုက်အခံဆွေးနွေးရာ၌ ရဲရင့်သူဖြစ်သည်။ သာ၍အရေးအရာရောက်သည်ကား ကျမ်းစာကိုသုံးကာ ကျိုးကြောင်းဆင်ခြင်ခြင်းတည်း။

အာပေါလုသည် ကောရိန္သုမြို့သားများအလယ်တွင် အကြီးအကျယ်သြဇာညောင်းခဲ့သော်လည်း အကြောင်းမလှစွာဖြင့် သူ၏ဟောပြောခြင်းသည် မမျှော်လင့်ဘဲဆိုးကျိုးများ ထွက်ခဲ့သည်။ မည်သို့ဖြစ်သွားသနည်း။ ပေါလုနှင့် အာပေါလုတို့နှစ်ဦးစလုံးသည် ကောရိန္သုမြို့တွင် ဘုရားသခင့်နိုင်ငံတော် သမ္မာတရားမျိုးစေ့ကို စိုက်ပျိုးခြင်းနှင့် ရေလောင်းခြင်းတို့တွင် အလွန်ကြိုးစားပမ်းစားလုပ်ဆောင်ခဲ့ကြသည်။ ပေါလုသည် ထိုမြို့၌ အာပေါလုမရောက်မီ နှစ်နှစ်ခန့်ဖြစ်သော စီ.အီး. ၅၀ ခုနှစ်ခန့်တွင် ဟောပြောလာခဲ့သည်။ စီ.အီး. ၅၅ ခုနှစ်ခန့်တွင် ကောရိန္သုအသင်းတော်သားများထံသို့ မိမိ၏ပထမစာကို ပေါလုရေးသားချိန်၌ သင်းကွဲမှုများပေါ်ပေါက်နေပေပြီ။ ပေါလုကိုပို၍ သဘောကျသူ၊ ပေတရုကို ပို၍သဘောကျသူ၊ ခရစ်တော်သာလျှင် မိမိတို့၏ခေါင်းဆောင်ဟုစိတ်သန်သူများရှိနေစဉ် အချို့သူများမူ အာပေါလုကို သူတို့၏ခေါင်းဆောင်အဖြစ် ယူမှတ်နေကြသည်။ (၁ ကောရိန္သု ၁:၁၀-၁၂) အချို့သူများက ‘ငါသည် အာပေါလု၏လူဖြစ်သည်’ ဟု ပြောနေကြသည်။ အဘယ်အကြောင်းကြောင့်နည်း။

ပေါလုနှင့် အာပေါလုတို့ဟောပြောသည့် သတင်းတရားသည် တစ်ခုတည်းဖြစ်သော်လည်း သူတို့သည် ကိုယ်ရည်ကိုယ်သွေးများမတူကြပါ။ ကိုယ်တိုင်ဝန်ခံချက်အရ ပေါလုသည် “အဟောအပြောညံ့သူ” ဖြစ်သည်; တစ်ဖက်တွင်မူ အာပေါလုသည် “အဟောအပြောကောင်းသူ” ဖြစ်သည်။ (၂ ကောရိန္သု ၁၀:၁၀; ၁၁:၆၊ သတင်းကောင်း) သူ့တွင်ရှိသောအရည်အသွေးမျာက ကောရိန္သုမြို့ရှိ ဂျူးအသိုင်းအဝိုင်းမှ အချို့သူများကိုနားထောင်လိုစိတ်ပေါ်စေသည်။ သည့်အရင် များမကြာမီအချိန်က ပေါလုသည် တရားဇရပ်မှ ထွက်ခွာခဲ့ရသော်လည်း သူကမူ ‘ဂျူးများ မှားကြောင်း အားကြီးစွာ ချေပပယ်ဖျက်’ ရာတွင် အောင်မြင်ခဲ့သည်။—တမန်တော် ၁၈:၁၊ ၄-၆။

ယင်းသည် အချို့သူများ အာပေါလုဘက်သို့ ယိမ်းရသည့် အကြောင်းရင်းဖြစ်သွားနိုင်ပါသလော။ ဂရိတို့အလယ်တွင် ဒဿနိကဗေဒဆိုင်ရာ အယူအဆသဘောတရားဆွေးနွေးလိုသည့် မွေးရာပါစိတ်အဟုန်က အချို့သူများအား သာ၍တက်ကြွသော အာပေါလု၏ချဉ်းကပ်နည်းကို သဘောကျသွားစေနိုင်ကြောင်း ဋီကာဆရာအတော်များများက ယူဆကြသည်။ ဂျူးဇက်ပေးရီးချော့တီးက “[အာပေါလု] ၏ စိတ်ဝင်စားဖွယ် ကွက်ကွက်ကွင်းကွင်းပြောဆိုမှု၊ မွမ်းမံစီခြယ်သရုပ်ဖော်ပြောဆိုချက်တို့က မွမ်းမံစီခြယ်မှုမရှိ၊ မဖွဲ့နွဲ့ဘဲဟောပြောသူ ပေါလုထက် သူ့ကိုသဘောကျသူများစွာတို့၏လေးစားမှုကို ရယူနိုင်ခဲ့သည်” ဟုဆိုသည်။ အချို့သူများသည် ယင်းသို့သော ပုဂ္ဂိုလ်ရေးနှစ်သက်သဘောကျမှုများက ညီအစ်ကိုများကြား ကွဲပြားမှုကိုဖန်တီးရန် အမှန်ပင် မှားယွင်းစွာ ခွင့်ပြုခဲ့ပါမူ “ဉာဏ်ကောင်းသောသူတို့၏ ဉာဏ်” အားချီးမြှောက်ခြင်းကို ပေါလုအဘယ့်ကြောင့် ခါးသီးစွာ အပြစ်တင်ရသည်ကို နားလည်ဖို့လွယ်ကူပါသည်။—၁ ကောရိန္သု ၁:၁၇-၂၅။

သို့သော် ထိုသို့ပြစ်တင်ဝေဖန်မှုကြောင့် ပေါလုနှင့် အာပေါလုတို့ကြား သဘောထားကွဲလွဲမှု ရှိခဲ့ပုံမရပါ။ ဤဟောပြောသူနှစ်ဦးသည် ကောရိန္သုအသင်းတော်သားများ၏ ချစ်ခင်လေးမြတ်မှုကို အနိုင်လုကြသည့် အငြိုးကြီးသော ရန်ဘက်များဖြစ်ကြသည်ဟု အချို့သူများက တစ်ယူသန်တစ်ဖက်သတ်ယူဆကြသော်လည်း ကျမ်းစာက ဤကဲ့သို့ မဆိုထားပါ။ အာပေါလုသည် မိမိကိုယ်ကို ဂိုဏ်းတစ်ဂိုဏ်း၏ခေါင်းဆောင်အဖြစ် တင်မြှောက်ရန်ကြိုးစားဖို့နေနေသာသာ သူသည် ကောရိန္သုမြို့မှ ထွက်ကာ ဧဖက်မြို့သို့ပြန်လာပြီး ကွဲပြားနေသောအသင်းတော်သို့ ပထမစာစောင်ကို ပေါလု ရေးသားချိန်တွင် ပေါလုနှင့်အတူရှိခဲ့သည်။

သူတို့ကြားတွင် သွေးကွဲမှု သို့မဟုတ် ပြိုင်ဆိုင်မှု မရှိပါလေ; ယင်းအစား အပြန်အလှန်ယုံကြည်စိတ်ချမှုဖြင့် ကောရိန္သုမြို့မှပြဿနာများကို ဖြေရှင်းရန် နှစ်ဦးသား ပူးပေါင်းလုပ်ဆောင်ကြကြောင်း ထင်ရှားသည်။ ပေါလုသည် ကောရိန္သုမြို့ရှိ အချို့သူများကို သံသယဝင်ခဲ့ဖွယ်ရှိသော်လည်း အာပေါလုကိုမူ လုံးဝသံသယမဝင်ပါ။ နှစ်ယောက်သား၏လုပ်ဆောင်ချက်သည် လုံးဝလိုက်ဖက်ညီသည်; သူတို့၏သွန်သင်ချက်များသည် စည်းဝါးကိုက်လှသည်။ ကိုးကားရမည့် ပေါလု၏လက်သုံးစကားမှာ “ငါသည် စိုက်ပျိုးသောသူဖြစ်၏။ အာပေါလုသည် ရေလောင်းသောသူဖြစ်၏၊” နှစ်ဦးစလုံးသည် “ဘုရားသခင်ထံ၌ အလုပ်လုပ်သူချင်းဖြစ်ကြ၏။”—၁ ကောရိန္သု ၃:၆၊ ၉၊ ၂၁-၂၃။

ကောရိန္သုအသင်းတော်သားများသည် ပေါလုကဲ့သို့ပင် အာပေါလုကို အလွန်လေးစားခဲ့ကြပြီး သူ၏ နောက်ထပ်လာရောက်လည်ပတ်မှုကို လက်ခံကြိုဆိုလိုကြသည်။ ပေါလုက အာပေါလုကို ကောရိန္သုမြို့သို့ ပြန်လာဖို့ ဖိတ်ခေါ်ပါသော်လည်း ထိုအာလေဇန်ဒိမြို့သားက ငြင်းလိုက်လေသည်။ “ငါ့ညီအာပေါလု၏အကြောင်းမှာ . . . သင်တို့ဆီသို့သွားမည်အကြောင်း ငါသည် များစွာချော့မော့၍ တောင်းပန်သော်လည်း သူသည် ယခုသွားခြင်းငှာ အလျှင်းအလိုမရှိ။ နောက်မှ အဆင်သင့်လျှင် သွားလိမ့်မည်” ဟု ပေါလုဆိုသည်။ (၁ ကောရိန္သု ၁၆:၁၂) အာပေါလုသည် ထပ်မံကွဲပြားမှုဖြစ်ပွားအောင် လှုံ့ဆော်လိုက်သလိုဖြစ်သွားမည်စိုးသောကြောင့်ဖြစ်စေ၊ တစ်နေရာရာတွင် အလုပ်များနေသောကြောင့်သာဖြစ်စေ ပြန်သွားဖို့ကို စိတ်မပါခဲ့ခြင်းဖြစ်နိုင်သည်။

ကျမ်းစာထဲတွင် အာပေါလုအကြောင်း နောက်ဆုံးအကြိမ်ဖော်ပြချက်မှာ သူသည် ကရေတေကျွန်းနှင့် ယင်း၏အလွန်ဖြစ်ကောင်းဖြစ်မည့်နေရာသို့ ခရီးနှင်နေသည်။ တစ်ဖန်ပေါလုသည် မိမိ၏မိတ်ဆွေလည်းဖြစ်၊ လုပ်ဖော်ဆောင်ဖက်ချင်းလည်းဖြစ်သူအတွက် အထူးစာနာမှုတင်ပြကာ အာပေါလုနှင့် သူ၏ခရီးသွားဖော် ဇေနတို့အား သူတို့ခရီးစဉ်အတွက် လိုအပ်နိုင်သည့်အရာတိုင်း ထောက်ပံ့ပေးဖို့ တိတုကို ပြောလိုက်သည်။ (တိတု ၃:၁၃) ခရစ်ယာန်လေ့ကျင့်မှုကို ဆယ်နှစ်ခန့် ခံယူပြီးသည့် ဤအချိန်တွင် အာပေါလုသည် အသင်းတော်နယ်လှည့်ကိုယ်စားလှယ်တစ်ဦးအနေနှင့် တာဝန်ထမ်းဆောင်ရန် အပြည့်အဝတိုးတက်နေပြီဖြစ်သည်။

ဝိညာဉ်ရေးတိုးတက်မှုကို ဖြစ်ထွန်းစေသည့် ဘုရားရေးရာအရည်အသွေးများ

ထိုအာလေဇန်ဒိမြို့သား ဟောပြောသူသည် ယနေ့ခေတ် သတင်းကောင်းကြေညာသူအားလုံး၊ အမှန်ဆိုလျှင် ဝိညာဉ်ရေးတိုးတက်လိုသူတိုင်းအတွက် စံနမူနာကောင်းတစ်ခုကို တင်ပြခဲ့သည်။ ကျွန်ုပ်တို့သည် သူ့ကဲ့သို့အဟောအပြောကောင်းချင်မှကောင်းမည်ဖြစ်သော်လည်း သူ၏ ကျမ်းစာကိုအသုံးပြုသည့် အသိပညာနှင့် အရည်အသွေးကို စံထားကာအတုယူပြီး စိတ်ရင်းမှန်ဖြင့် သမ္မာတရားရှာဖွေသူများကို ကူညီပေးရန် အမှန်ပင်ကြိုးစားနိုင်ပါသည်။ အာပေါလုသည် ဇွဲရှိရှိလုပ်ဆောင်သည့်နမူနာဖြင့် “ယုံကြည်သောသူတို့ကို အလွန်ထောက်မလေ၏။” (တမန်တော် ၁၈:၂၇) အာပေါလုသည် နှိမ့်ချကာ ကိုယ်ကျိုးစွန့်ပြီး အခြားသူများအား အလုပ်အကျွေးပြုလိုသည့်ဆန္ဒရှိသည်။ မိမိတို့အားလုံးသည် “ဘုရားသခင်ထံ၌ အလုပ်လုပ်သောသူချင်း” ဖြစ်ရကား ခရစ်ယာန်အသင်းတော်တွင် ပြိုင်ဆိုင်ခြင်း သို့မဟုတ် ရာထူးအာဏာမက်ခြင်းအတွက် နေရာမရှိကြောင်း သူကောင်းကောင်း နားလည်ထားသည်။—၁ ကောရိန္သု ၃:၄-၉; လုကာ ၁၇:၁၀။

ကျွန်ုပ်တို့လည်း အာပေါလုကဲ့သို့ပင် ဝိညာဉ်ရေး တိုးတက်အောင်လုပ်နိုင်သည်။ ကျွန်ုပ်တို့သည် တိုးတက်ကာ မိမိတို့၏မြင့်မြတ်သောလုပ်ငန်းတော်ကို တိုးချဲ့လိုပါသလော၊ ယေဟောဝါနှင့် ကိုယ်တော့်အဖွဲ့အစည်းအတွက် သာ၍ပြည့်ဝစွာ အသုံးတော်ခံမည့် အနေအထားတွင် မိမိတို့ကိုယ်ကို ရှိနေစေလိုပါသလော။ ဤသို့ဆိုလျှင် ကျွန်ုပ်တို့သည် ခရစ်ယာန်သမ္မာတရား၏ ဇွဲရှိသော ကျောင်းသားများနှင့် ကြွေးကြော်သူများဖြစ်လိမ့်မည်တည်း။