သမိုင်းဝင်လည်ပတ်မှုတစ်ခုက ကျွန်းတစ်ကျွန်းကိုပျော်ရွှင်စေ

ကာရစ်ဘီယံရှိ လှပသောကျွန်းတစ်ကျွန်းဖြစ်သည့် ကျူးဘားတွင် ဝိညာဉ်ရေးလန်းဆန်းမှုရာသီကို မကြာမီက မကြုံစဖူးကြုံတွေ့ခဲ့သည်။ ၁၉၉၈ ခုနှစ်အကုန်ပိုင်း၌ ဤအနောက်အင်ဒီးစ်နိုင်ငံတွင် နေထိုင်ကြသောယေဟောဝါသက်သေများသည် ကြာမြင့်စွာစောင့်မျှော်ခဲ့သည့်ကောင်းချီးကို ခံစားခဲ့ကြရသည်။ ယေဟောဝါသက်သေများ၏ အုပ်ချုပ်ရေးအဖွဲ့ဝင်များသည်အနှစ် ၃၀ ကျော်အတွင်း ပထမဆုံးအကြိမ်လည်ပတ်ခွင့်ရရှိခဲ့ပြီး အခြားကိုယ်စားလှယ် ၁၅ ဦးသည် သူတို့နှင့်အတူလိုက်ပါခဲ့ကြ၏။ ဩစတြေးလျ၊ ဩစတြီးယား၊ ဘယ်လ်ဂျီယံ၊ ဂရိတ်ဗြိတိန်၊ အီတလီ၊ နယူးဇီလန်နှင့် ပွာတီရီကိုနိုင်ငံများမှ ဧည့်သည်များဖြစ်ကြသည်။

၎င်းသည် ထိုတွင်ရှိ ဘုရားသခင့်နိုင်ငံတော်ကြေညာသူ ၈၂,၂၅၈ ဦးအတွက် သမိုင်းဝင်ဖြစ်ရပ်တစ်ခုဖြစ်ခဲ့ပြီး ၁၉၉၈ ခုနှစ် နွေဦးပေါက် သခင့်ညစာစားပွဲတွင် ၈၇,၈၉၀ ဦးတို့သည် သူတို့နှင့်ပူးပေါင်းခဲ့ကြသည်။

လွိုက်ဘယ်ရီ၊ ဂျွန်ဘားနှင့် ဂဲရစ်လော့ရှ်တို့သည် ၁၉၉၈၊ ဒီဇင်ဘာ ၁ ရက်မှ ၇ ရက်အထိ ဟာဗာနာမြို့ရှိဗေသလအိမ်သို့ လည်ပတ်ခဲ့ကာ ကျူးဘားတွင်ကျင်းပခဲ့သော “ဘုရားသခင်နှစ်သက်ရာဘဝလမ်းစဉ်” ခရိုင်စည်းဝေးကြီးအချို့ကို တက်ရောက်ခဲ့ကြသည်။ နယ်လှည့်အကြီးအကဲများနှင့်တွေ့ဆုံခွင့်ရရှိသည့်အပြင် ကျူးဘားအစိုးရအရာရှိများနှင့်လည်း ပိုမိုသိကျွမ်းခွင့်ရရှိခဲ့ကြသည့်အတွက် သူတို့ပျော်ရွှင်ခဲ့ကြသည်။

“အဲဒါဟာ ကျွန်တော်နဲ့ကျွန်တော့်ဇနီးရဲ့ဘဝအသက်တာမှာ သီအိုကရက်တစ်ရေးရာနဲ့ပတ်သက်ပြီး ပေါ်လွင်ချက်တစ်ခုဖြစ်ခဲ့တယ်။ ကျူးဘားမှာရှိတဲ့ ကျွန်တော်တို့ရဲ့ချစ်ညီအစ်ကို၊ ညီအစ်မတွေဟာ အမှန်တရားဘက်မှာ ဇွဲလုံ့လအပြည့်အဝရှိကြတယ်! ကျွန်တော်တို့ရဲ့ကမ္ဘာချီညီအစ်ကိုအသင်းအပင်းဟာ တကယ့်ကိုမွန်မြတ်တယ်လို့ ခံစားလိုက်ရတယ်” ဟုဂျွန်ဘားကပြောခဲ့သည်။ “အဲဒီအရေးပါတဲ့အပတ်မှာ ကျွန်တော်တို့ညီအစ်ကိုတွေရဲ့အခြေအနေကို ကျွန်တော်ပိုပြီးသိနားလည်လာခဲ့ရတယ်” ဟုလွိုက်ဘယ်ရီက ထပ်လောင်းပြောခဲ့သည်။

လွန်ခဲ့သောငါးနှစ်အတွင်း ယေဟောဝါသက်သေတို့ကို ကျူးဘားတွင် သာ၍လွတ်လပ်စွာဝတ်ပြုခွင့်ပေးခဲ့ပြီး ကျူးဘားအာဏာပိုင်များ၏မှတ်ချက်က ဤလမ်းစဉ်ကိုဆက်လက်တည်ရှိစေလိုကြောင်း ယုံကြည်စေသည်။

၁၉၉၄၊ စက်တင်ဘာလ၌ ဟာဗာနာမြို့ရှိဗေသလအိမ်တွင် ပုံနှိပ်လုပ်ငန်းထူထောင်ခဲ့၏။ တစ်ဖန် ယေဟောဝါသက်သေများသည် လွတ်လပ်စွာစည်းဝေးနိုင်ခဲ့ကြသည့်အပြင် တစ်အိမ်မှတစ်အိမ်သက်သေခံနိုင်ခဲ့ကြသည်။ ပြီးနောက် ၁၉၉၈ ခုနှစ်၌ အာဏာပိုင်များသည် အုပ်ချုပ်ရေးအဖွဲ့ဝင်သုံးဦးအပါအဝင် ယေဟောဝါသက်သေများ၏ အပြည်ပြည်ဆိုင်ရာကိုယ်စားလှယ် ၁၈ ဦးအား ဤသို့လာရောက်လည်ပတ်ခွင့်ပြုခဲ့သည်။

ပျော်ရွှင်ဖွယ်ပြန်လည်ပေါင်းဆုံခြင်း

ကိုယ်စားလှယ်အဖွဲ့သည် ဟာဗာနာမြို့ရှိ ဟိုစေး မားရ်တီးလေဆိပ်သို့ ရောက်ရှိသောအခါ အစိုးရအရာရှိအဖွဲ့နှင့် ဗေသလမှလူများက လှိုက်လှဲစွာဧည့်ဝတ်ပြုခဲ့ကြသည်။ ထိုလူအုပ်တွင် ၁၉၆၁ ခုနှစ်၌ ကျူးဘားသို့ အုပ်ချုပ်ရေးအဖွဲ့ဝင်တစ်ဦး—မီလ်တင် ဟင်ရှယ်လ်—နောက်ဆုံးလည်ပတ်ခဲ့ချိန်ကို မှတ်မိသောညီအစ်ကိုတစ်ဦးလည်းပါသည်။ ၎င်းအချိန်က ထိုညီအစ်ကိုသည် အသက် ၁၂ နှစ်ရှိခဲ့သည်; ယခု သူသည် နယ်လှည့်ကြီးကြပ်မှူးတစ်ဦးဖြစ်နေပြီ။

ကိုယ်စားလှယ်များသည် ဗေသလအိမ်သို့ရောက်သောအခါ ညီအစ်ကိုတစ်ဦးက ဤအခါသမယအတွက် အထူးစိုက်ပျိုးထားသည့် သစ္စာပန်းများ၊ နှင်းဆီပန်းများ၊ စံပယ်ပန်းများနှင့် အဝါရောင်၊ အနီရောင်ဒေစီပန်းစည်းများကမ်း၍ သူတို့အားကြိုဆိုခဲ့ကြသည်။ ဗေသလမိသားစုသည် ကိုယ်စားလှယ်များကို ဝမ်းသာအားရကြိုဆိုခဲ့ကြချိန်တွင် မျက်ရည်ဖြိုင်ဖြိုင်ကျခဲ့ကြသည်။ ထို့နောက် ကျူးဘားဝက်ကင်၊ ထမင်းနှင့်ပဲ၊ ဟင်းသီးဟင်းရွက်သုတ်၊ ပီလောပီနံနှင့် မိုဂျို (ကြက်သွန်ဖြူနှင့် သံလွင်ဆီဖြင့်လုပ်ထားသောဆော့) နှင့်လတ်ဆတ်သောသစ်သီးတို့ကို စားသုံးခဲ့ကြသည်။ စားသောက်ပြီးနောက် အုပ်ချုပ်ရေးအဖွဲ့ဝင်တစ်ဦးစီသည် တန်ဖိုးရှိလှသော ဗေသလလုပ်ငန်းတော်အကြောင်း အားပေးတည်ဆောက်ဟောပြောခဲ့သည်။ ညီအစ်ကိုလော့ရှ်သည် ညီအစ်ကိုများကို စပိန်စကားဖြင့်ပြောဆိုခဲ့ရာ အထူးထိမိစေခဲ့သည်။ ဗေသလမိသားစုတွင် မှန်မှန်စေတနာ့ဝန်ထမ်း ၄၈ ဦးနှင့် ယာယီကူညီပေးသူ ၁၈ ဦးတို့ရှိသည်။

ကျူးဘားရှိညီအစ်ကိုများအတွက် စာအုပ်များနှင့်သမ္မာကျမ်းစာအုပ်များကို အီတလီတွင် ပုံနှိပ်သော်လည်း အဖြူအမဲ ကင်းမျှော်စင်နှင့်နိုးလော့! မဂ္ဂဇင်းများကိုကား ဖယောင်းမိတ္တူကူးစက်နှစ်လုံးဖြင့် ဤနိုင်ငံတွင်ပင် ထုတ်လုပ်လျက်ရှိသည်။ လိုအပ်သောမဂ္ဂဇင်းအားလုံးကို ကျဉ်းကျပ်သည့်အခန်းများတွင် ထပ်ခါတလဲလုပ်ကိုင်ရသည့်အလုပ်ကြမ်းကို နာရီပေါင်းများစွာလုပ်ကိုင်ကြရသည်။ ထိုစေတနာ့ဝန်ထမ်းများသည် တန်ဖိုးမဖြတ်နိုင်သော ယေဟောဝါ၏လုပ်ငန်းတော်ကို အထူးတလည်တန်ဖိုးထားကြသည်။—၂ ကောရိန္သု ၄:၇။

စည်းဝေးကြီးပေါ်လွင်ချက်များ

ကိုယ်စားလှယ်အဖွဲ့ ၁၈ ဦးသည် ဟာဗာနာမြို့၊ ကဲမဂွေးမြို့၊ အောလ်ဂီန်မြို့တို့တွင် ကျင်းပသည့်ခရိုင်စည်းဝေးကြီးသုံးခုကို တက်ရောက်ရန် အုပ်စုသုံးစုခွဲခဲ့ကြ၏။ သုံးရက်စလုံး၌ အကြီးအကဲနှင့် ရှေ့ဆောင်များစွာအပါအဝင် ညီအစ်ကို၊ ညီအစ်မအုပ်စုကြီးအား နေရာတစ်ခုစီတွင် တက်ရောက်ကြရန် ပန်ကြားခဲ့သည်။ ထိုအချိန်သည် အထူးအခါသမယဖြစ်မည်ဟု ဒေသခံသက်သေခံများအား အသိပေးထားသော်လည်း အုပ်ချုပ်ရေးအဖွဲ့ဝင်များ တက်ရောက်ကြလိမ့်မည်ကို သူတို့မသိရှိခဲ့ကြချေ။ သောကြာနေ့နံနက်တွင် အငှားဘတ်စကားများပေါ်မှ ဤချစ်လှစွာသောညီအစ်ကိုများနှင့် သူတို့၏ဇနီးများ ဆင်းလာကြသည်ကို တွေ့လိုက်ရသည့်အခါ သူတို့မည်မျှအံ့သြခဲ့ကြသည်ကို မြင်ယောင်ကြည့်လိုက်ပါ!

အာဏာပိုင်များ၏ခွင့်ပြုချက်ဖြင့် ညီအစ်ကိုများဆောက်လုပ်ထားသော လဟာပြင်အဆောက်အဦများတွင် စည်းဝေးကြီးများကိုကျင်းပခဲ့ကြ၏။ ဟာဗာနာစည်းဝေးကြီး၌ အဝင်ဝရှိကျောက်တုံးတစ်တုံးပေါ်တွင် “ဆာလံ ၁၃၃:၁” ဟုထွင်းခဲ့သည်။ ယင်းက ၎င်းကျမ်းချက်ပါ ဤစကားများကို ညီအစ်ကိုများအား ပြန်လည်သတိရစေခဲ့သည်– “ညီအစ်ကိုတို့သည် သဘောတူလျက် ပေါင်းဖော်ကြသည်အရာမှာ အလွန်ကောင်းပေ၏။ အလွန်တင့်တယ်လျောက်ပတ်ပေ၏။” စည်းဝေးကြီးအတွင်း ကောင်းမွန်တင့်တယ်သော ခရစ်ယာန်ပေါင်းသင်းမှုအမှန်ပင်ရှိခဲ့သည်။

ဧည့်သည်များသည် ဟောပြောချက်များနှင့် လူတွေ့မေးမြန်းခန်းများ၏တင်ဆက်ပုံ အထူးကောင်းကြောင်း မှတ်ချက်ချခဲ့ကြပြီး ဒံယေလအခန်းကြီး ၃ ပါကျမ်းစာပုံပြင်ကိုအခြေခံ၍ ရှေးဗာဗုလုန်ခေတ်ပြဇာတ်၏ တင်ဆက်ပုံကလည်း သူတို့အတွက် စွဲမှတ်စရာဖြစ်ခဲ့သည်။ ညီအစ်မတစ်ဦးက ဤသို့ဝေဖန်ခဲ့သည်– “သရုပ်ဆောင်သူအားလုံး တကယ့်ကိုကောင်းကြတယ်။ ကြိုတင်အသံသွင်းထားမှန်းတောင် မသိသာတဲ့အထိ ပြောဆိုလုပ်ကိုင်ပုံတွေက အသံနဲ့တစ်ထပ်တည်းဖြစ်နေတယ်။ . . . ရက်စက်ယုတ်မာတဲ့ဗာဗုလုန်သားက တကယ့်လူဆိုးကြီးအတိုင်းပဲ။ ဟေဗြဲလူသုံးယောက်ကျတော့ ခိုင်မာတည်ကြည်ပြတ်သားလိုက်ကြတာ။”

[ခရစ်ယာန်] သာသနာရေးရုံးမှ ကိုယ်စားလှယ်များနှင့် စည်းဝေးကြီးများကိုကြည့်ရှုရန် တက်ရောက်လာခဲ့ကြသော အခြားအစိုးရအရာရှိများသည် ညီအစ်ကိုများ၏စနစ်တကျဖွဲ့စည်းမှုနှင့် အမူအကျင့်ကောင်းတို့ကို ချီးကျူးခဲ့၏။ ကျူးဘားအာဏာပိုင်များက လည်ပတ်ရောက်ရှိနေကြသော ကိုယ်စားလှယ်များကိုကြိုဆိုကာ ကောင်းစွာဆက်ဆံခဲ့သည့်အတွက် စိတ်ရင်းမှန်ဖြင့်ကျေးဇူးတင်ရှိကြောင်း ညီအစ်ကိုဘယ်ရီက ပြောခဲ့သည်။ ဟောပြောချက်များအတွက်လည်းကောင်း၊ စည်းဝေးကြီးများကိုကျင်းပရန် အာဏာပိုင်များကခွင့်ပြုသည့်အတွက်လည်းကောင်း ညီအစ်ကိုများ တန်ဖိုးထားလေးမြတ်ကြကြောင်းကို မိနစ်အနည်းငယ်ကြာ မတ်တတ်ရပ်၍ လက်ခုပ်သြဘာပေးခြင်းဖြင့် ဖော်ပြခဲ့ကြသည်။ “ကျွန်တော်တို့မျှော်လင့်တာထက်မကဘူး၊ အပြည်ပြည်ဆိုင်ရာစည်းဝေးအသေးစားပဲ! တကယ်ပျော်စရာကြီး၊ ယေဟောဝါဟာ ကတိတော်တွေ ပြည့်စုံစေနိုင်တယ်ဆိုတာ ထင်ရှားတယ်” ဟူ၍ခရစ်ယာန်မိသားစုတစ်စုက ပြောခဲ့သည်။

ထို့ပြင် ဤစည်းဝေးကြီးများသည် အခြားသူများအား သက်သေခံတို့၏အကြောင်းကို ပိုမိုသိစေသည့် အခွင့်အရေးတစ်ခုဖြစ်စေခဲ့သည်။ ဘတ်စကားဒရိုင်ဘာတစ်ဦးသည် စနေနေ့တွင် စည်းဝေးကြီးကို တက်ခဲ့သည်၊ တနင်္ဂနွေနေ့တွင်လည်း ပြန်တက်သည်။ မိမိသည် ယေဟောဝါသက်သေများ၏အကြောင်းများစွာကို ကြားသိခဲ့ရသော်လည်း အမှန်မှာ သူတို့သည် လူကောင်းများဖြစ်ပြီး အေးဆေးငြိမ်သက်သူများဖြစ်ကြောင်း ယခုသိရှိပြီဟု သူပြောခဲ့သည်။

“ကျွန်ုပ်တို့ဘယ်တော့မျှမမေ့မည့်အရာများ”

ကျူးဘားကျွန်းသားတို့၏ဖော်ရွေမှုနှင့် ခင်မင်ရင်းနှီးမှုသည် ကိုယ်စားလှယ်များအား စွဲမှတ်စရာဖြစ်စေခဲ့သည်။ ကျူးဘားကျွန်းသားများသည် အလုပ်ကြိုးစားပြီး ကိုယ်ကျင့်တရားကောင်းမွန်၍ ကြင်နာသူများဖြစ်ကြသည်။ တစ်ကြိမ်ထက်မက၊ “သူတို့လာကူညီပေးခဲ့ကြတယ်” ဟုကိုယ်စားလှယ်တစ်ဦးက ပြောခဲ့သည်။

ကျူးဘားရှိ သက်သေခံချင်းများပြသခဲ့ကြသည့် ယုံကြည်ခြင်း၊ ပျော်ရွှင်မှုနှင့် ချစ်ခြင်းမေတ္တာသည် ကိုယ်စားလှယ်များအတွက် အလွန်စွဲမှတ်စရာဖြစ်ခဲ့၏။ အတားအဆီးများစွာရှိလျက်နှင့် ယေဟောဝါအား သူတို့၏ရဲတိုက်ဖြစ်စေခဲ့သည်။ (ဆာလံ ၉၁:၂) “ကျူးဘားကို ကျွန်တော်ဦးဆုံးလည်ပတ်ခဲ့ရတဲ့ ဒီအချိန်မှာ မထင်မမှတ်ဘဲ ပျော်ရွှင်ကြည်နူးစရာတွေအများကြီးတွေ့ခဲ့ရတယ်—တိုင်းပြည်သာယာလှပမှု၊ ကျွန်တော်တွေ့ခဲ့တဲ့လူတွေရဲ့ နှစ်လိုဖွယ်ကောင်းတဲ့ပင်ကိုစရိုက်နဲ့ ကျူးဘားသက်သေခံတွေရဲ့စိတ်ဓာတ်တက်ကြွမှုတွေက အားရှိစရာအကောင်းဆုံးပဲ။ ဘုရားသခင့်နိုင်ငံတော်သီချင်းတွေကို ဒီလောက်အူလှိုက်သည်းလှိုက်အားရပါးရသီဆိုတာ၊ ဝိညာဉ်ရေးရာတွေ သူတို့ရဲ့နှလုံးကိုထိမိတဲ့အခါ မဆုံးနိုင်အောင်လက်ခုပ်တီးသြဘာပေးကြတာတွေကို ကျွန်တော့်အသက်တာမှာ တစ်ခါမှမကြားခဲ့ဖူးဘူး! ဒါတွေကို ကျွန်တော်တို့ ဘယ်တော့မှမေ့နိုင်မှာမဟုတ်ဘူး။ အမြဲသတိရနေမှာ” ဟုဂျွန်ဘားကပြောခဲ့၏။

“ကျွန်းများတို့သည်လည်း ရွှင်လန်းကြစေ” ဟု ဆာလံ ၉၇:၁ ကဆိုသည်။ ကျူးဘားကျွန်းပေါ်ရှိ ယေဟောဝါသက်သေများသည် ဘုရားသခင်အား လွတ်လပ်စွာဝတ်ပြုခွင့်ပိုရလာသည့်အတွက်လည်းကောင်း၊ အဆိုပါအပြည်ပြည်ဆိုင်ရာကိုယ်စားလှယ်အဖွဲ့၏ သမိုင်းဝင်လည်ပတ်မှုအတွက်လည်းကောင်း အားရဝမ်းမြောက်လျက်ရှိကြသည်မှာ အမှန်ပင်။

[စာမျက်နှာ ၈ ပါ ရုပ်ပုံ]

ကျူးဘားတွင်ကျင်းပသော အထူး “ဘုရားသခင်နှစ်သက်ရာဘဝလမ်းစဉ်” ခရိုင်စည်းဝေးကြီးကို မိသားစုများစွာတက်ရောက်ခဲ့

[စာမျက်နှာ ၈ ပါ ရုပ်ပုံ]

ဟာဗာနာမြို့ရှိဗေသလအိမ်ကို ၁၉၉၄ ခုနှစ်တွင် ပြန်လည်ဖွင့်လှစ်ခဲ့

[စာမျက်နှာ ၈ ပါ ရုပ်ပုံ]

အုပ်ချုပ်ရေးအဖွဲ့ဝင်များသည် သမ္မာကျမ်းစာအုပ်များကို လက်မှတ်ထိုးပြီး အစိုးရအရာရှိများအား လက်ဆောင်ပေးခဲ့ကြ