ဘုရားသခင်နှစ်သက်လက်ခံသည့် စစ်မှန်သောသွန်သင်ချက်များ

အဘယ်အရာသည် စစ်မှန်သောသွန်သင်ချက်များဖြစ်ပြီး ဘုရားသခင်နှစ်သက်လက်ခံသည်ကို မြေကြီးသားအားလုံးသိနိုင်ရန် ကိုယ်တော့်အတွေးအခေါ်များကို လူသားများအား ကိုယ်တော်ဖွင့်ပြရမည်။ ထိုဖွင့်ပြချက်ကိုလည်း လူသားအားလုံးရရှိနိုင်ရန် ပြုလုပ်ပေးရမည်။ တခြားအဘယ်နည်းဖြင့် ကိုယ်တော်နှစ်သက်လက်ခံသော အယူအဆ၊ ဝတ်ပြုမှုနှင့် အပြုအမူတို့ကို လူသားများသိနိုင်မည်နည်း။ ထိုအချက်အလက်ကို ဘုရားသခင်ပေးထားပြီလော။ ပေးထားလျှင် အဘယ်ပုံစံဖြင့်နည်း။

ဆယ်စုနှစ်အနည်းငယ်သာ သက်တမ်းရှိသော လူသားတစ်ယောက်ယောက်သည် လူသားထုအားလုံးနှင့် ကိုယ်တိုင်ဆက်သွယ်ပြီး ဘုရားသခင်ဆီမှ ဆက်သွယ်ရေးလမ်းကြောင်းအဖြစ် အမှုဆောင်နိုင်မည်လော။ မဖြစ်နိုင်ပေ။ သို့သော် အမြဲတည်ရှိသောလက်ရေးမှတ်တမ်းတစ်ခုက ထိုသို့ဖြစ်နိုင်ပေသည်။ ထို့ကြောင့် ဘုရားသခင်ထံမှဖွင့်ပြချက်ကို စာအုပ်တစ်အုပ်ပုံစံဖြင့် ရရှိရန်ပြုလုပ်ထားခြင်းမှာ မသင့်လျော်ပေလော။ ဘုရားသခင်မှုတ်သွင်းသည်ဟုဆိုသည့် ရှေးဟောင်းစာအုပ်တစ်အုပ်မှာ သမ္မာကျမ်းစာဖြစ်သည်။ “ထိုကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၍၊ ဘုရားသခင်၏လူသည် စုံလင်သောသူ၊ ကောင်းသောအမှုအမျိုးမျိုးတို့ကိုပြုစုခြင်းအလိုငှာ ပြင်ဆင်သောသူဖြစ်မည်အကြောင်း၊ [ဆုံးမ] ခြင်း၊ အပြစ်ကိုဖော်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်းကျေးဇူးများကို ပြုတတ်၏” ဟုကျမ်းရေးသူတစ်ဦးဆိုသည်။ (၂ တိမောသေ ၃:၁၆၊ ၁၇) သမ္မာကျမ်းစာကို အနီးကပ်လေ့လာပြီး ယင်းသည် စစ်မှန်သောသွန်သင်ချက်များ၏ ရင်းမြစ်ဟုတ်၊ မဟုတ် ဆန်းစစ်ကြည့်ကြစို့။

ယင်း၏သက်တမ်း

ဘာသာရေးအထင်ကရစာအုပ်များတွင် သမ္မာကျမ်းစာသည် အလွန့်အလွန်ရှေးကျသောစာအုပ်တစ်အုပ်ဖြစ်သည်။ ယင်း၏ပထမအပိုင်းတို့ကို လွန်ခဲ့သောနှစ်ပေါင်း ၃,၅၀၀ ခန့်က ရေးသားခဲ့သည်။ စီ.အီး. ၉၈ ခုနှစ်တွင် ဤစာအုပ်ကို အပြီးအစီးရေးသားခဲ့သည်။a လူပေါင်း ၄၀ ခန့်သည် နှစ်ပေါင်း ၁,၆၀၀ ကျော်ကာလအတွင်း သမ္မာကျမ်းစာကိုရေးသားခဲ့ကြသော်လည်း ကျမ်းစာတစ်အုပ်လုံးသည် ရှေ့နောက်ညီညွတ်မှုရှိသောစာစောင်ဖြစ်သည်။ ထိုသို့ဖြစ်ရခြင်းမှာ ယင်း၏အာဘော်ရှင်သည် ဘုရားသခင်ဖြစ်၍တည်း။

သမ္မာကျမ်းစာသည် သမိုင်းတစ်လျှောက်လုံးတွင် အဖြန့်ဝေရဆုံးနှင့် ဘာသာအပြန်ရဆုံးစာအုပ်ဖြစ်သည်။ နှစ်စဉ် ကျမ်းစာတစ်အုပ်လုံးဖြစ်စေ၊ တစ်စိတ်တစ်ပိုင်းဖြစ်စေ စောင်ရေ သန်း ၆၀ ခန့်ဖြန့်ဝေရသည်။ တစ်အုပ်လုံးဖြစ်စေ၊ တစ်စိတ်တစ်ပိုင်းအနေဖြင့်ဖြစ်စေ ဘာသာစကားနှင့် လူမျိုးစုငယ်စကားပေါင်း ၂,၃၀၀ ကျော်သို့ ပြန်ဆိုခဲ့ပြီးဖြစ်သည်။ လူ့မိသားစု၏ ၉၀ ရာခိုင်နှုန်းကျော်သည် မိမိတို့မိခင်ဘာသာစကားဖြင့် ကျမ်းစာတစ်အုပ်လုံး သို့မဟုတ် အနည်းဆုံး ကျမ်းစာတစ်စိတ်တစ်ပိုင်းကို ပိုင်ဆိုင်နိုင်ကြပြီ။ ဤစာအုပ်သည် နိုင်ငံနယ်နိမိတ်များ၊ အမျိုးအနွယ်ကွဲပြားမှုများနှင့် လူမျိုးစုတံတိုင်းများကို ကျော်လွှားခဲ့ပေပြီ။

ဖွဲ့စည်းထားပုံ

သင်၌ သမ္မာကျမ်းစာတစ်အုပ်ရှိပါက ယင်းကိုဖွင့်ပြီး မည်သို့စီစဉ်ဖွဲ့စည်းထားကြောင်းကြည့်လိုက်ပါလေ။b ဦးစွာ မာတိကာကိုဖွင့်ကြည့်ပါ။ သမ္မာကျမ်းစာအများစု၌ စစချင်းတွင် စာစောင်တစ်စောင်စီ၏အမည်များနှင့် ယင်းတို့ကိုရှာတွေ့နိုင်မည့် စာမျက်နှာနံပါတ်များ စာရင်းပြုစုထားသည့် မာတိကာတစ်ခုပါရှိသည်။ အမှန်မှာ သမ္မာကျမ်းစာသည် သီးသန့်နာမည်တစ်ခုစီရှိ စာစောင်များကို စုစည်းပေါင်းချုပ်ထားကြောင်း သင်တွေ့ရှိရမည်။ ပထမဦးဆုံးစာစောင်မှာ ကမ္ဘာဦးကျမ်းဖြစ်ပြီး နောက်ဆုံးစာစောင်မှာ ဗျာ.ကျမ်း ခေါ် အပေါကလစ်ဖြစ်သည်။ ထိုစာစောင်များကို အပိုင်းနှစ်ပိုင်း ခွဲထားသည်။ ပထမ ၃၉ စောင်ကို ဟေဗြဲဘာသာစကားဖြင့် အများဆုံးရေးသားခဲ့သောကြောင့် ဟေဗြဲကျမ်းစောင်များဟုခေါ်သည်။ နောက်ပိုင်း ၂၇ စောင်ကို ဂရိဘာသာစကားဖြင့်ရေးသားခဲ့ရာ ဂရိကျမ်းစောင်များအဖြစ် ဖွဲ့စည်းထားသည်။ ထိုအပိုင်းနှစ်ပိုင်းကို အချို့က ဓမ္မဟောင်းကျမ်းနှင့် ဓမ္မသစ်ကျမ်း ဟုခေါ်ကြသည်။

သမ္မာကျမ်းစာ,စာစောင်များကိုလေ့လာရာတွင် ကိုးကားရှာဖွေရလွယ်ကူစေရန် အခန်းကြီးများ၊ အခန်းငယ်များရှိသည်။ ဤမဂ္ဂဇင်းတွင် ကျမ်းချက်များ ညွှန်းသောအခါ ကျမ်းစာစောင်နာမည်အနောက်ရှိ ပထမနံပါတ်သည် ထိုစာစောင်၏အခန်းကြီးကိုညွှန်းပြီး နောက်တစ်ခုမှာ အခန်းငယ်ကို ဆိုလိုသည်။ ဥပမာ၊ ၂ တိမောသေ ၃:၁၆ ဟူသည့်ကိုးကားချက်သည် တိမောသေသြဝါဒစာဒုတိယစောင် အခန်းကြီး ၃ အခန်းငယ် ၁၆ ဟုဆိုလိုသည်။ ယင်းကို သမ္မာကျမ်းစာတွင် သင်ရှာတွေ့၊ မတွေ့စမ်းကြည့်ပါလေ။

သမ္မာကျမ်းစာနှင့်အကျွမ်းဝင်လာရန် ယင်းကိုနေ့စဉ်ဖတ်ခြင်းသည် အကောင်းဆုံးနည်းဖြစ်ကြောင်း သင်သဘောမတူပေလော။ အချို့က မဿဲကျမ်းနှင့်အစပြုသော ဂရိကျမ်းစောင်များကို ဦးစွာဖတ်ခြင်းသည် အထောက်အကူဖြစ်ကြောင်း တွေ့ရှိခဲ့ကြပြီ။ တစ်နေ့လျှင် အခန်းကြီးသုံးခန်းမှငါးခန်းအထိ ဖတ်ခြင်းဖြင့် ကျမ်းစာတစ်အုပ်လုံးကို တစ်နှစ်အတွင်း သင်ဖတ်ပြီးနိုင်သည်။ သို့သော် သမ္မာကျမ်းစာတွင် သင်ဖတ်ရှုသောအရာသည် ဘုရားသခင့်မှုတ်သွင်းခံစကားများဖြစ်,မဖြစ် မည်သို့အသေအချာသိနိုင်မည်နည်း။

သမ္မာကျမ်းစာကို သင်ယုံကြည်လက်ခံနိုင်သလော

လူအားလုံးအတွက် ဘုရားသခင်မှုတ်သွင်းထားတော်မူသော စာအုပ်တစ်အုပ်ဆိုလျှင် ထိုတွင် အသက်ရှင်နေထိုင်ပုံနှင့်ပတ်သက်၍ ကာလအကန့်အသတ်မရှိသော အကြံပြုချက်မပါသင့်ပေလော။ သမ္မာကျမ်းစာသည် လူမျိုးဆက်တိုင်းနှင့်သက်ဆိုင်သည့် လူ့သဘောသဘာဝကို သိနားလည်ကြောင်း ပေါ်လွင်ပြီး ယင်း၏မူများသည် ၎င်းတို့ကိုရေးသားစဉ်အချိန်က လက်တွေ့ကျခဲ့သကဲ့သို့ ယခုထိ ထိုသို့ဖြစ်ဆဲရှိသည်။ ယင်းကို ခရစ်ယာန်အယူဝါဒတည်ထောင်ခဲ့သူ ယေရှုခရစ်ပေးခဲ့သော ကျော်ကြားသည့်တရားတော်တွင် တွေ့ရှိနိုင်သည်။ ၎င်းကို မဿဲကျမ်း အခန်းကြီး ၅ မှ ၇ တွင်မှတ်တမ်းတင်ထားသည်။ တောင်ပေါ်တရားတော်ဟု လူသိများသော ထိုတရားတော်သည် စစ်မှန်သောပျော်ရွှင်မှုကို မည်သို့ရှာတွေ့နိုင်သည်သာမက အငြင်းပွားမှုများကို မည်သို့ကိုင်တွယ်ဖြေရှင်းရမည်၊ မည်သို့ဆုတောင်းရမည်၊ ရုပ်ပစ္စည်းလိုအပ်ရာများကို မည်သို့ရှုမြင်ရမည်နှင့် အခြားအရာမြောက်မြားစွာကို ကျွန်ုပ်တို့အားသိစေသည်။ ဤတရားတော်နှင့် သမ္မာကျမ်းစာ၏ အခြားအပိုင်းများအားလုံးတို့တွင် ဘုရားသခင်နှစ်သက်လက်ခံသူတစ်ဦးဖြစ်ရန်နှင့် ကျွန်ုပ်တို့၏ဘဝအခြေအနေတိုးတက်စေရန် အဘယ်အရာပြုလုပ်ပြီး အဘယ်အရာကိုရှောင်ကြဉ်ရမည်တို့ကို ရှင်းလင်းစွာဖော်ပြထားသည်။

သမ္မာကျမ်းစာကို သင်ယုံကြည်လက်ခံနိုင်သည့် အခြားအကြောင်းတစ်ခုမှာ သိပ္ပံဆိုင်ရာကိစ္စများနှင့်ပတ်သက်လာလျှင် ဤရှေးဟောင်းစာအုပ်၏ ဖော်ပြချက်သည် တိကျမှန်ကန်သောကြောင့်ဖြစ်သည်။ သာဓကအနေဖြင့် ကမ္ဘာမြေကြီးပြားသည်ဟု လူအများယုံကြည်လက်ခံထားသည့် အချိန်တစ်ချိန်တွင် သမ္မာကျမ်းစာက “မြေကြီးစက် [သို့မဟုတ်၊ စက်လုံး]” ဟုဆိုခဲ့သည်။c (ဟေရှာယ ၄၀:၂၂) ထို့ပြင် နာမည်ကျော် သိပ္ပံပညာရှင် ဆာအိုက်ဇက်နယူတန်က ဂြိုဟ်များသည် ဆွဲငင်အားကြောင့် အာကာသဟင်းလင်းပြင်တွင် တည်နေသည်ဟု မရှင်းပြမီ နှစ်ပေါင်း ၃,၀၀၀ ကျော်ကတည်းက သမ္မာကျမ်းစာ ဤသို့ဆိုသည်– “မြေကြီးကို အခုအခံမရှိဆွဲထားတော်မူ၏။” (ယောဘ ၂၆:၇) လွန်ခဲ့သောနှစ်ပေါင်း ၃,၀၀၀ ခန့်က မှတ်တမ်းတင်ခဲ့သော ကမ္ဘာကြီး၏ရေသံသရာနှင့်ပတ်သက်သည့် ဤကဗျာဆန်သောဖော်ပြချက်ကိုလည်း စဉ်းစားကြည့်ပါ– “ခပ်သိမ်းသောမြစ်တို့သည် ပင်လယ်ထဲသို့ရောက်ကြ၏။ သို့သော်လည်း ပင်လယ်သည်မပြည့်တတ်။ မြစ်ရေသည် စီးထွက်ရာအရပ်သို့ တစ်ဖန်ပြန်သွားတတ်၏။” (ဒေ. ၁:၇) မှန်ပါသည်၊ စကြဝဠာကြီး၏ဖန်ဆင်းရှင်သည် သမ္မာကျမ်းစာ၏ အာဘော်ရှင်လည်းဖြစ်ပေသည်။

သမ္မာကျမ်းစာ၏ သမိုင်းဆိုင်ရာတိကျမှန်ကန်မှုက ယင်းသည် ဘုရားသခင်မှုတ်သွင်းသောအားဖြင့်ဖြစ်ကြောင်း ထောက်ခံသည်။ သမ္မာကျမ်းစာပါ ဖြစ်ရပ်များသည် ဒဏ္ဍာရီမျှသာမဟုတ်ပေ။ ၎င်းတို့သည် ရက်စွဲ၊ လူပုဂ္ဂိုလ်နှင့် နေရာအတိအကျတို့ကို ဖော်ပြနေခြင်းဖြစ်သည်။ သာဓကအနေဖြင့်၊ လုကာ ၃:၁ တွင် “ကဲသာဘုရင်တိဗေရိနန်းစံတစ်ဆယ့်ငါးနှစ်တွင်၊ ယုဒပြည်၌ ပုန္တိပိလတ်သည်မြို့ဝန်အရာ၊ ဂါလိလဲပြည်၌ ဟေရုဒ်သည်စော်ဘွားအရာ” ဟုအတိအကျညွှန်းထားသည်။

ရှေးခေတ်သမိုင်းပညာရှင်များသည် အုပ်စိုးရှင်များ၏ အောင်မြင်မှုများနှင့် အကျင့်ကောင်းများကိုသာ အမြဲလိုလိုမှတ်တမ်းတင်လေ့ရှိသော်လည်း ကျမ်းရေးသူများမူ သူတို့ကိုယ်တိုင်၏အမှားများကိုပင် ရိုးသားပွင့်လင်းစွာဝန်ခံကြသည်။ ဥပမာအနေနှင့် ဣသရေလဘုရင်ဒါဝိဒ် ဤသို့ဝန်ခံခဲ့သည်– “အကျွန်ုပ်ပြုမိသောအမှု၌ အလွန်ပြစ်မှားပါပြီ။ အကျွန်ုပ်သည် အလွန်မိုက်သောအမှုကို ပြုမိပါပြီ။” ထိုဖော်ပြချက်ကို သမ္မာကျမ်းစာတွင်ပွင့်ပွင့်လင်းလင်း မှတ်တမ်းတင်ထားသည်။ (၂ ဓမ္မရာဇဝင် ၂၄:၁၀) စစ်မှန်သောဘုရားသခင်အပေါ် သူမှီခိုမှုမရှိခဲ့သည့်အဖြစ်အပျက်ကို ကျမ်းရေးသူ မောရှေကိုယ်တိုင် မှတ်တမ်းတင်ခဲ့သည်။—တောလည်ရာ ၂၀:၁၂။

သမ္မာကျမ်းစာသည် ဘုရားသခင်မှုတ်သွင်းခြင်းအားဖြင့်ဖြစ်ကြောင်း နောက်ထပ် အမှတ်အသားတစ်ခုရှိသေးသည်။ ထိုအမှတ်အသားမှာ ကြိုတင်မှတ်တမ်းတင်ရေးသားထားသည့် သမိုင်းဖြစ်သည့် ၎င်း၏ပရောဖက်ပြုချက်များ ပြည့်စုံခြင်းဖြစ်သည်။ ယင်းတို့မှအချို့မှာ ယေရှုခရစ်နှင့်ပတ်သက်သော ပရောဖက်ပြုချက်များဖြစ်သည်။ သာဓကအနေနှင့် ယေရှုမမွေးဖွားမီ နှစ်ပေါင်း ၇၀၀ ကျော်ကပင် ဤကတိထားရာပုဂ္ဂိုလ်သည် “ယုဒပြည်ဗက်လင်မြို့” တွင် မွေးဖွားမည်ဖြစ်ကြောင်း ဟေဗြဲကျမ်းစောင်များက အတိအကျကြိုဟောခဲ့သည်။—မဿဲ ၂:၁-၆; မိက္ခာ ၅:၂။

အခြားသာဓကတစ်ခုကိုလည်း စဉ်းစားကြည့်ပါ။ ၂ တိမောသေ ၃:၁-၅ တွင် သမ္မာကျမ်းစာက ဤသို့ဖော်ပြသည်– “နောင်ကာလသည် ခဲယဉ်းသောကာလဖြစ်မည်ဟု သိမှတ်လော့။ အဘယ်သို့နည်းဟူမူကား၊ လူတို့သည် ကိုယ်ကိုကိုယ်ချစ်သောသူ၊ ငွေကိုတပ်မက်သောသူ၊ ဝါကြွားသောသူ၊ ထောင်လွှားစော်ကားသောသူ၊ သူ့အသရေကိုရှုတ်ချသောသူ၊ မိဘစကားကိုနားမထောင်သောသူ၊ ကျေးဇူးမရှိသောသူ၊ သန့်ရှင်းခြင်းမရှိသောသူ၊ ပကတိကြင်နာစုံမက်ခြင်းနှင့်ကင်းသောသူ၊ ရန်ငြိုးဖွဲ့သောသူ၊ ချောစားတတ်သောသူ၊ ကိုယ်ဣန္ဒြေကိုမချုပ်တည်းနိုင်သောသူ၊ ပြင်းထန်သောသူ၊ သူတော်ကောင်းကိုမုန်းသောသူ၊ သစ္စာကိုဖျက်တတ်သောသူ၊ သတိပေးခြင်းကိုမခံသောသူ၊ မာန်မာနနှင့်ယစ်မူးသောသူ၊ ဘုရားသခင်ကိုနှစ်သက်သည်ထက် ကာမဂုဏ်ခံစားခြင်းကိုသာ၍နှစ်သက်သောသူ၊ ဘုရားဝတ်၌မွေ့လျော်ယောင်ဆောင်၍၊ မွေ့လျော်ခြင်းတန်ခိုးကို ငြင်းပယ်သောသူဖြစ်ကြလိမ့်မည်။” ယင်းက ယနေ့ခေတ်လူအများစု၏ စိတ်နေသဘောထားကို ဖော်ပြနေသည်မဟုတ်လော။ ဤစကားများကို လွန်ခဲ့သောနှစ်ပေါင်း ၁,၉၀၀ ကျော်၊ စီ.အီး. ၆၅ ခုနှစ်က ရေးသားခဲ့သည်!

ကျွန်ုပ်တို့ကို သမ္မာကျမ်းစာအဘယ်အရာသွန်သင်ပေးသနည်း

ကျမ်းစာသတင်းစကားကို သင်သိနားလည်လာလေ ယင်းသည် မြင့်မားသောဉာဏ်ပညာ၏ရင်းမြစ်ဖြစ်ကြောင်း သင်သဘောပေါက်လာလေဖြစ်မည်။ ယင်းက ဘုရားသခင်ကား မည်သူနည်း၊ မာရ်နတ်အမှန်တကယ်တည်ရှိသလော၊ ယေရှုခရစ်ကား မည်သူနည်း၊ ဆင်းရဲဝေဒနာများ အဘယ့်ကြောင့်ရှိနေရသနည်း၊ ကျွန်ုပ်တို့သေဆုံးသောအခါ အဘယ်အရာ ဖြစ်ပျက်သနည်း စသောမေးခွန်းများ၏ ကျေနပ်ဖွယ်အဖြေများကို ပေးသည်။ အခြားသူများထံမှသင်ကြားရသောအဖြေများသည် သူတို့၏ယုံကြည်ချက်များနှင့် ဓလေ့ထုံးစံများကဲ့သို့ပင် ကွဲပြားခြားနားကြသည်။ သို့သော် သမ္မာကျမ်းစာသည် ထိုအရာများနှင့် အခြားအကြောင်းအရာမြောက်မြားစွာ၏ အမှန်တရားကိုဖော်ပြသည်။ ထို့ပြင် အခြားသူများနှင့် အထက်အာဏာပိုင်များအပေါ် ထားရှိသင့်သည့် သဘောထား၊ အပြုအမူတို့နှင့် ပတ်သက်လာလျှင်လည်း သမ္မာကျမ်းစာလမ်းညွှန်ချက်မှာ အကောင်းဆုံးဖြစ်သည်။d

ကမ္ဘာမြေနှင့်ရောလူသားထုနှင့်ပါ ပတ်သက်သည့် ဘုရားသခင့်ရည်ရွယ်ချက်အကြောင်း သမ္မာကျမ်းစာက အဘယ်အရာဖော်ပြသနည်း။ ယင်းက ဤသို့ကတိပြုထားသည်– “ခဏကြာပြီးမှ မတရားသောသူသည်မရှိရ။ . . . စိတ်နှိမ့်ချသောသူတို့မူကား ပြည်တော်ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။” (ဆာလံ ၃၇:၁၀၊ ၁၁) “ဘုရားသခင်သည် ကိုယ်တော်တိုင်သူတို့ [လူသားထု] နှင့်အတူရှိနေ . . . တော်မူမည်။ ဘုရားသခင်သည် သူတို့၏မျက်စိ၌မျက်ရည်ရှိသမျှတို့ကို သုတ်တော်မူမည်။ နောက်တစ်ဖန် သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ။ အကြောင်းမူကား၊ ရှေးဖြစ်ဖူးသောအရာတို့သည် ရွေ့သွားကြပြီ။” (ဗျာ. ၂၁:၃၊ ၄) “ဖြောင့်မတ်သောသူတို့သည် ပြည်တော်ကိုအမွေခံ၍ အစဉ်အမြဲနေရကြလိမ့်မည်။”—ဆာလံ ၃၇:၂၉။

စစ်၊ ရာဇဝတ်မှု၊ အကြမ်းဖက်မှုနှင့် ဆိုးယုတ်မှုများ မကြာမီအဆုံးတိုင်တော့မည်ဟူ၍လည်း သမ္မာကျမ်းစာကြိုပြောသည်။ ဖျားနာခြင်း၊ အိုမင်းရင့်ရော်ခြင်းနှင့် သေခြင်းတို့ရှိတော့မည်မဟုတ်။ ပရဒိသုကမ္ဘာမြေပေါ်တွင် ထာဝရအသက်သည် အမှန်တကယ်ဖြစ်လာပေမည်။ အလွန်ဝမ်းသာကြည်နူးဖွယ် အလားအလာများပါတကား! ယင်းတို့အားလုံးသည် လူသားထုအပေါ် ဘုရားသခင်၏မေတ္တာကို အမှန်တကယ်တင်ပြသည်!

သင်အဘယ်အရာပြုလုပ်မည်နည်း

သမ္မာကျမ်းစာသည် ဖန်ဆင်းရှင်ထံမှ ထူးမြတ်လှသော လက်ဆောင်မွန်ဖြစ်သည်။ ယင်းစာအုပ်ကို သင်မည်သို့သဘောထားသင့်သနည်း။ ဟိန္ဒူနောက်ခံရှိအမျိုးသားတစ်ဦးက ဘုရားသခင့်ဖွင့်ပြချက်တစ်ခုသည် လူသားထုအားလုံးအတွက် အကျိုးရှိရန် ယင်းသည် လူ့ယဉ်ကျေးမှုရောင်နီပေါ်စအချိန်ကတည်းက ဖြစ်ရမည်ဟုခံယူသည်။ ကျမ်းစာအစိတ်အပိုင်းအချို့သည် ရှေးအကျဆုံးဟိန္ဒူကျမ်းစောင်များဖြစ်သော ဗီးဒတ်စ်ကျမ်းထက် ပိုရှေးကျသည်ဟု သူသိလာသော် သမ္မာကျမ်းစာကိုဖတ်ပြီး ယင်းတွင်ပါရှိသောအကြောင်းအရာများကို ဆန်းစစ်ကြည့်ရန် ဆုံးဖြတ်ခဲ့သည်။e ယူနိုက်တက်စတိတ်ရှိ တက္ကသိုလ်ပါမောက္ခတစ်ဦးသည်လည်း ကမ္ဘာပေါ်တွင်အဖြန့်ဝေရဆုံး ဤစာအုပ်နှင့်ပတ်သက်၍ ထင်မြင်ချက်မပေးမီ ယင်းကို ဖတ်ကြည့်ဖို့လိုကြောင်း အသိအမှတ်ပြုခဲ့သည်။

သမ္မာကျမ်းစာကိုဖတ်ပြီး ယင်း၏သွန်သင်ချက်များကို လက်တွေ့ကျင့်သုံးခြင်းသည် သင့်အား ကောင်းချီးများစွာရရှိစေလိမ့်မည်။ သမ္မာကျမ်းစာက ဤသို့ဆိုသည်– ‘ထာဝရဘုရားသခင် [“ယေဟောဝါ၊” ကဘ] ၏တရားတော်ကိုမွေ့လျော်၍ တရားတော်ကို နေ့ညမပြတ် ဆင်ခြင်အောက်မေ့သောသူသည် မင်္ဂလာရှိ [“ပျော်ရွှင်၊” ကဘ] ၏။ အကြောင်းမူကား ထိုသူသည် မြစ်နားမှာစိုက်လျက် မိမိအချိန်တန်မှအသီးကိုသီး၍ အရွက်မညှိုးနွမ်းတတ်သော အပင်နှင့်တူ၏။ ပြုလေသမျှတို့၌ အောင်လိမ့်မည်။’f (ဆာလံ ၁:၁-၃) သမ္မာကျမ်းစာကိုဖတ်ရှုလေ့လာပြီး တွေးတောဆင်ခြင်ခြင်းသည် သင်၏ဝိညာဉ်ရေးလိုအပ်ရာများကို ဖြည့်စွက်ပေးသည်ဖြစ်ရာ သင့်အားပျော်ရွှင်စေပေမည်။ (မဿဲ ၅:၃) သမ္မာကျမ်းစာသည် အကျိုးဖြစ်ထွန်းသောအသက်တာဖြင့် အသက်ရှင်နိုင်ပုံနှင့် ပြဿနာများကိုအောင်မြင်စွာ ကိုင်တွယ်ဖြေရှင်းနိုင်ပုံတို့ကို ဖော်ပြမည်။ မှန်ပါသည်၊ “တရား [သမ္မာကျမ်းစာ၌ဖော်ပြထားသော ဘုရားသခင့်ပညတ်များ] စောင့်ခြင်းအကျိုးသည် ကြီးလှပါ၏။” (ဆာလံ ၁၉:၁၁) ထို့ပြင် ဘုရားသခင်၏ကတိတော်များကို ယုံကြည်စိတ်ချခြင်းသည် သင့်အား ယခုပင်ကောင်းချီးများရရှိစေပြီး အနာဂတ်အတွက်လည်း တောက်ပသောမျှော်လင့်ချက်ရှိစေသည်။

သမ္မာကျမ်းစာက ကျွန်ုပ်တို့ကို ဤသို့အားပေးသည်– “ဖွားစသောသူငယ်ကဲ့သို့၊ ထိုတရားနို့ကို အလွန်လိုချင်သောစိတ်ရှိကြလော့။” (၁ ပေတရု ၂:၃) နို့စို့ကလေးသည် မိခင်ထံမှအာဟာရကို အားထားနေရပြီး ထိုလိုအပ်ရာ မရမချင်း အလျှော့မပေးဘဲတောင်းဆိုတတ်သည်။ အလားတူပင် ကျွန်ုပ်တို့အတွက်လည်း ဘုရားသခင်ထံတော်မှအသိပညာ မရှိမဖြစ်ပါ။ ထို့ကြောင့် ကိုယ်တော်၏နှုတ်မြွက်စကားတော်ကို “အလွန်လိုချင်သောစိတ်ရှိကြလော့။” သမ္မာကျမ်းစာသည် ဘုရားသခင်ထံတော်မှ စစ်မှန်သောသွန်သင်ချက်များပါ စာအုပ်တစ်အုပ်ဖြစ်သည်။ ယင်းကို ပုံမှန်လေ့လာရန် ပန်းတိုင်ထားပါ။ သင့်ဒေသရှိ ယေဟောဝါသက်သေများသည် သင်၏လေ့လာမှုမှ အကျိုးအများဆုံးရရှိရန် သင့်အားဝမ်းမြောက်ဝမ်းသာကူညီပေးလိုကြသည်။ သူတို့ကိုဆက်သွယ်ရန် သင့်အားလှိုက်လှဲစွာဖိတ်ခေါ်ပါသည်။ သို့မဟုတ် ဤမဂ္ဂဇင်းထုတ်ဝေသူများထံ စာရေးဆက်သွယ်ပါ။

[အောက်ခြေမှတ်ချက်များ]

[စာမျက်နှာ ၇ ပါ ရုပ်ပုံ]

ဘုရားသခင်၏နှုတ်မြွက်စကားတော်ကို “အလွန်လိုချင်သောစိတ် ရှိကြလော့။” သမ္မာကျမ်းစာကို ပုံမှန်လေ့လာပါ

[Picture Credit Line on page 5]

NASA photo