၁၂၄ ကြိမ်မြောက်ဂိလဒ်ကျောင်းဆင်းပွဲ
ခရစ်ယာန်သာသနာပြုများကို ကျိုင်းကောင်များနှင့်နှိုင်းယှဉ်ခဲ့
ဂိလဒ်ကင်းမျှော်စင်သမ္မာကျမ်းစာကျောင်းသည် ခြောက်လလျှင်တစ်ကြိမ် အမေရိကန်ပြည်ထောင်စုဗေသလမိသားစုတစ်ခုလုံးကို ဖိတ်ခေါ်၍ ကျောင်းဆင်းပွဲအစီအစဉ်ကို ကျင်းပသည်။ ၂၀၀၈ ခုနှစ်၊ မတ်လ ၈ ရက်နေ့တွင် နိုင်ငံပေါင်း ၃၀ ကျော်မှဧည့်သည်များသည် ၁၂၄ ကြိမ်မြောက်ဂိလဒ်ကျောင်းဆင်းပွဲတွင် ဗေသလမိသားစုနှင့်အတူပါဝင်ခဲ့ကြသည်။ တက်ရောက်သူပေါင်း ၆,၄၁၁ ဦးတို့သည် ကျောင်းသားများ၏အထူးနေ့ရက်တွင် သူတို့နှင့်အတူပျော်ရွှင်ခဲ့ကြသည်။
အစီအစဉ်သဘာပတိဖြစ်သူ အုပ်ချုပ်ရေးအဖွဲ့ဝင် စတီဗင် လက်တ်က “ယေဟောဝါ၏ပုံဆောင်ကျိုင်းကောင်များနှင့်အတူ ရှေ့သို့ချီတက်ပါ” ဟူသောခေါင်းစဉ်ဖြင့် ဟောပြောကာ အစီအစဉ်ကိုဖွင့်လှစ်ခဲ့သည်။ ဗျာ. ၉:၁-၄ က ၁၉၁၉ ခုနှစ်တွင် ဝိညာဉ်ရေးတွင်မလှုပ်မရှားဖြစ်ရာမှနာလန်ထူလာသော ဝိညာဉ်တော်ဖွားခရစ်ယာန်အုပ်စုငယ်ကို ရုတ်တရက်လှုပ်ရှားလာသော ကြီးမားသည့်ကျိုင်းကောင်အုပ်ကြီးနှင့် နှိုင်းယှဉ်ထားသည်။ “အခြားသိုး” ဝင်များအနေနှင့် ကျောင်းသားများသည် ဤပုံဆောင်ကျိုင်းကောင်အုပ်တွင် ပူးပေါင်းပါဝင်ခဲ့ကြကြောင်း အမှတ်ရစေခဲ့သည်။—ယော. ၁၀:၁၆။
အမေရိကန်ပြည်ထောင်စုဌာနခွဲကော်မတီဝင်တစ်ဦးဖြစ်သူ လော်န်စကီလင်က “အထောက်အမဖြစ်ပါ” ဟူသောဟောပြောချက်ကို ဆက်ဟောခဲ့သည်။ ယင်းသည် ပထမရာစုရှိ ခရစ်ယာန်ဇနီးမောင်နှံဖြစ်သော အာကုလနှင့် ပြစ်ကိလတို့နှင့်ပတ်သက်သော ကျမ်းစာပုံနမူနာပေါ် အခြေခံခဲ့သည်။ (ရော. ၁၆:၃၊ ၄) ဂိလဒ်သင်တန်းကျောင်းသားများတွင် အိမ်ထောင်သည် ၂၈ တွဲပါရှိသည်။ ခရစ်ယာန်သာသနာပြုများအနေနှင့် အောင်မြင်မှုရရန် မိမိတို့၏အိမ်ထောင်ရေးနှောင်ကြိုး ခိုင်မြဲစေဖို့လိုကြောင်း အသိပေးခံရကြသည်။ ကျမ်းစာတွင် အာကုလကို သူ့ဇနီး ပြစ်ကိလနှင့်တွဲ၍ အမြဲဖော်ပြထားသည်။ ထို့ကြောင့် တမန်တော်ပေါလုနှင့် အသင်းတော်သည် သူတို့ကို ဇနီးမောင်နှံအဖြစ် ရှုမြင်ခဲ့ကြသည်။ အလားတူပင် ယနေ့ ခရစ်ယာန်သာသနာပြုဇနီးမောင်နှံတို့သည် အတူတကွအမှုဆောင်ကြ၊ အတူတကွဝတ်ပြုကြ၊ ပင်လယ်ရပ်ခြားတာဝန်နှင့်ပတ်သက်သောစိန်ခေါ်ချက်များကို အတူတကွရင်ဆိုင်ဖြေရှင်းကြခြင်းအားဖြင့် တစ်ဦးနှင့်တစ်ဦးအထောက်အမအဖြစ် အမှုဆောင်နေကြသည်။—က. ၂:၁၈။
“ယေဟောဝါ၏ကောင်းမြတ်တော်မူခြင်းကို တုံ့ပြန်ကြလော့” ခေါင်းစဉ်ရှိ နောက်ဟောပြောချက်ကို အုပ်ချုပ်ရေးအဖွဲ့ဝင် ဂိုင်ပီယပ်စ်က တင်ဆက်ခဲ့သည်။ ညီအစ်ကို ပီယပ်စ်က ကောင်းမြတ်သည်ဟုဆိုရာတွင် မကောင်းမှုပြုခြင်းကို ရှောင်ခြင်းထက်မကပါဝင်ကြောင်း ရှင်းပြခဲ့သည်။ လူကောင်းတစ်ဦးသည် အခြားသူများအကျိုးအတွက် ကောင်းမွန်သည့်အရာများကို ပြုလုပ်သည်။ ယေဟောဝါဘုရားသခင်၏ကောင်းမြတ်မှုသည် အမြင့်ဆုံးဖြစ်တော်မူ၏။ (ဇာ. ၉:၁၆၊ ၁၇) ဘုရားသခင်၏ကောင်းမြတ်တော်မူခြင်းနှင့် မေတ္တာတော်က အခြားသူများအတွက် ကောင်းမွန်ရာများပြုလုပ်ရန် ကျွန်ုပ်တို့အား လှုံ့ဆော်ပေးနိုင်သည်။ ကျောင်းသားများကို ချီးမွမ်းလျက် ညီအစ်ကို ပီယပ်စ်က ဤသို့နိဂုံးချုပ်ခဲ့သည်– “သင်တို့ဟာ ကောင်းမွန်ရာကို လုပ်ဆောင်လာခဲ့ကြတယ်။ ယေဟောဝါဘုရားသခင်ပေးမယ့် သင်တို့ရဲ့အနာဂတ်ဘယ်တာဝန်မှာမဆို ကောင်းမွန်ရာကိုလုပ်ဆောင်ခြင်းဖြင့် ဘုရားသခင်ရဲ့ကောင်းမြတ်တော်မူခြင်းကို ဆက်တုံ့ပြန်ကြလိမ့်မယ်လို့ ကျွန်တော်တို့ယုံကြည်ပါတယ်။”
ထို့နောက် ယခင်ကခရစ်ယာန်သာသနာပြုတစ်ဦးဖြစ်ခဲ့ပြီး မကြာသေးမီက ဂိလဒ်သွန်သင်ပို့ချသူအဖြစ် ခန့်အပ်ခံရသူ မိုက်ကယ်လ် ဘားနက်က “သင်တို့၏မျက်စိကြားမှာ သင်းကျပ်အဖြစ် ချည်ထားကြ” ဟူသောခေါင်းစဉ်ဖြင့် ဟောပြောခဲ့သည်။ ဣသရေလလူတို့သည် သူတို့၏မျက်စိကြားတွင် “သင်းကျပ်” ချည်ထားသည့်အလား သူတို့ကိုယ်စား ယေဟောဝါလုပ်ဆောင်ခဲ့သည့် အီဂျစ်ပြည်မှ အံ့ဖွယ်နုတ်ဆောင်တော်မူခြင်းကို အောက်မေ့သတိရကြရန်ဖြစ်သည်။ (ထွ. ၁၃:၁၆) ကျောင်းသားများသည် ဂိလဒ်ကျောင်းတွင် ရရှိခဲ့သည့်ညွှန်ကြားချက်များစွာကို မိမိတို့၏မျက်စိကြားတွင် သင်းကျပ်အဖြစ် ချည်ထားဘိသကဲ့သို့ ထိုညွှန်ကြားချက်တို့ကို မှတ်မိသတိရရန် အားပေးခံရကြသည်။ ညီအစ်ကို ဘားနက်က နှိမ့်ချမှုနှင့် ကျိုးနွံမှုရှိဖို့လိုကြောင်း၊ ခရစ်ယာန်သာသနာပြုအချင်းချင်းနှင့်ရော အခြားသူတို့နှင့်ပါဖြစ်သည့် နားလည်လွဲမှုများကို ဖြေရှင်းရာတွင် ကျမ်းစာမူများအသုံးပြုရန်လိုကြောင်း အလေးပေးဖော်ပြခဲ့သည်။—မ. ၅:၂၃၊ ၂၄။
နှစ်ကြာဂိလဒ်သွန်သင်ပို့ချသူတစ်ဦးဖြစ်သော မာ့ခ် နူမဲရ်က “သင့်အကြောင်း အဘယ်သီချင်းသီဆိုမည်နည်း” ဟူသောဟောပြောချက်ကို ပေးခဲ့သည်။ ရှေးအချိန်များတွင် စစ်အောင်ပွဲများကို သီချင်းဖြင့်သီဆိုသည့် ထုံးစံရှိသည်။ ထိုသီချင်းများထဲမှတစ်ခုတွင် ဇာဗုလုန်အမျိုးသည် ၎င်းတို့၏ကိုယ်ကျိုးစွန့်စိတ်ဓာတ် တင်ပြမှုအတွက် ချီးမွမ်းခံရပြီး ရုဗင်၊ ဒန်၊ အာရှာအမျိုးတို့မှာ ရေသာခိုသူများအဖြစ် ဖော်ကျူးထားသည်။ (သူကြီး. ၅:၁၆-၁၈) သီချင်းတစ်ပုဒ်၏စာသားများကဲ့သို့ပင် ခရစ်ယာန်ယောက်တိုင်း၏ လုပ်ဆောင်မှုများသည် နောက်ဆုံးတွင် အခြားသူများသိရှိလာကြသည်။ ဘုရားသခင့်လုပ်ငန်းတွင် လူတစ်ဦး၏ဇွဲနှင့် သီအိုကရက်တစ်အစီအစဉ်အပေါ် သူ၏တည်ကြည်မှုကို ယေဟောဝါမှတ်မိမည်ဖြစ်ပြီး ယင်းသည် သူ၏ညီအစ်ကိုများအတွက် ကောင်းသောပုံသက်သေအဖြစ်ရှိမည်ဖြစ်သည်။ ကျွန်ုပ်တို့၏လုပ်ရပ်များဖြင့် ရေးစပ်သောပုံဆောင်သီချင်းကို အသင်းတော်ရှိအခြားသူများ ဂရုပြုကြသောကြောင့် ယင်းကောင်းမွန်သည့်ပုံသက်သေကို တုပရန် လှုံ့ဆော်ခံရကြသည်။
၁၂၄ ကြိမ်မြောက်သင်တန်းသားများသည် မိမိတို့၏ဂိလဒ်သင်တန်းလေ့ကျင့်မှုတစ်ခုအနေဖြင့် ဟောပြောခြင်းလုပ်ငန်းတွင် နာရီပေါင်း ၃,၀၀၀ ခန့်စုပေါင်းအသုံးပြုခဲ့ကြသည်။ သီအိုကရက်တစ်ကျောင်းဌာနမှ ဆမ်မြူအယ်လ် ရော်ဘာစဲန်က “သန့်ရှင်းသောဝိညာဉ်တော်၏ဦးဆောင်မှုနောက် လိုက်လျှောက်ခြင်း” အကြောင်းဟောပြောစဉ် ကျောင်းသားများသည် လယ်ကွင်းတွေ့ကြုံမှုအချို့ကို ပြန်ပြောခဲ့ကြ၊ ယင်းတို့ထဲမှအချို့ကို ပြန်သရုပ်ပြကြသည်။ ဤအားရှိဖွယ်တွေ့ကြုံမှုများအပြီးတွင် အမေရိကန်ပြည်ထောင်စုဌာနခွဲကော်မတီမှ ပက်ထရစ် လာဖရင့်ကာသည် သဘာပတိလုပ်ပြီး နိုင်ငံအသီးသီးတွင် ယခုအမှုဆောင်နေကြသော ဂိလဒ်ကျောင်းဆင်းများကို လူတွေ့မေးမြန်းခဲ့သည်။ ကျောင်းသားများသည် ထိုညီအစ်ကိုများထံမှရရှိသော လက်တွေ့ကျအကြံပေးချက်များကို လေးမြတ်တန်ဖိုးထားကြသည်။
အုပ်ချုပ်ရေးအဖွဲ့မှ အန်တိုနီ မောရစ်က “မြင်ရသောအရာများသည် တစ်ခဏသာတည်ကြောင်း သတိရကြ” ဟူသောနောက်ဆုံးဟောပြောချက်ကို ပေးခဲ့သည်။ လက်ရှိကြုံတွေ့နေရသည့် တစ်ခဏသာဖြစ်သော မည်သည့်ဆင်းရဲခက်ခဲမှုမဆိုထက် ယေဟောဝါထံမှလာသော အနာဂတ်ကောင်းချီးများအပေါ် အာရုံစိုက်ဖို့ သမ္မာကျမ်းစာက ကျွန်ုပ်တို့ကို တိုက်တွန်းထားသည်။ (၂ ကော. ၄:၁၆-၁၈) အလွန်အမင်းဆင်းရဲခြင်း၊ မတရားခံရခြင်း၊ ဖိစီးမှုခံရခြင်း၊ ဖျားနာခြင်းနှင့် သေခြင်းတို့သည် ယနေ့ ကျွန်ုပ်တို့အားလုံး မြင်တွေ့နေရသည့် ဖြစ်ရပ်မှန်များဖြစ်ကြသည်။ ခရစ်ယာန်သာသနာပြုများသည် ဤဝမ်းနည်းဖွယ်အခြေအနေအချို့ကို ထိပ်တိုက်ရင်ဆိုင်ကြုံတွေ့လာနိုင်သည်။ သို့သော် ယင်းတို့သည် တစ်ခဏသာတည်ကြောင်း သတိရခြင်းက ဝိညာဉ်ရေးဟန်ချက်ညီရန်နှင့် မျှော်လင့်ချက်ရှိရန် ကျွန်ုပ်တို့ကို ထောက်ကူပေးနိုင်သည်။
ညီအစ်ကို လက်တ်၏နောက်ဆုံးမှတ်ချက်များကို စင်မြင့်ပေါ်ရှိသင်တန်းကျောင်းဆင်းများ နားထောင်ရင်း အစီအစဉ်ကို နိဂုံးချုပ်ခဲ့သည်။ သူက လက်လျှော့အရှုံးမပေးဖို့ ကျောင်းဆင်းများကို အားပေးကာ ဤသို့ပြောခဲ့သည်– “ကျွန်တော်တို့ဘက်မှာ ယေဟောဝါရှိမယ်ဆိုရင် ကျွန်တော်တို့ရဲ့သမာဓိစောင့်သိမှုကို ဖျက်ဆီးနိုင်မယ့်အရာ တစ်ခုမှမရှိဘူး။” ခရစ်ယာန်သာသနာပြုလူသစ်များသည် ယေဟောဝါ၏လုပ်ငန်းတော်တွင် ဆက်ပါဝင်ခြင်း၊ ဆက်၍ဇွဲရှိပြီး တည်ကြည်ကာ အမြဲနာခံခြင်းဖြင့် ကျိုင်းကောင်များကဲ့သို့ဖြစ်ကြရန် တိုက်တွန်းခဲ့သည်။
[စာမျက်နှာ ၃၀ ပါလေးထောင့်ကွက်]
သင်တန်းဆိုင်ရာအချက်အလက်များ
ကိုယ်စားပြုနိုင်ငံအရေအတွက်– ၇
တာဝန်ပေးအပ်ခံရသည့် နိုင်ငံအရေအတွက်– ၁၆
ကျောင်းသား/သူအရေအတွက်– ၅၆
ပျမ်းမျှအသက်– ၃၃.၈
ပျမ်းမျှအမှန်တရားသက်တမ်း– ၁၈.၂
ပျမ်းမျှအချိန်ပြည့်အမှုဆောင်သက်တမ်း– ၁၃.၈
[စာမျက်နှာ ၃၁ ပါပုံ]
ဂိလဒ်ကင်းမျှော်စင်သမ္မာကျမ်းစာကျောင်း၏ ၁၂၄ ကြိမ်မြောက်သင်တန်း
အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။
(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.
[စာမျက်နှာ ၃၂ ပါပုံ]
ဂိလဒ်ကျောင်းသည် ကင်းမျှော်စင်ပညာပေးဌာနတွင်တည်ရှိ